ධර්මසිරි රාජපක්‍ෂ මානව හිතවාදියාට ලියු කවි.

ධර්මසිරි රාජපක්‍ෂ මානව හිතවාදියා

ධර්මේ මචං,

අපි හමුවෙනවා නිසැක
රත්නපුරේ, කුරුවිට, කඳන්ගොඩ විසූ,
ධර්මසිරි රාජපක්ෂ නම් මානව දයාවෙන් පිරිපුන් සුවිශිෂ්ට කවියාට උපහාර පිණිස යි.
1985 වසරේ දී, මගේ කුළුඳුල් කාව්‍ය සංග්‍රහය වන " සක්මන් මළුව " මහනුවර ඩී. එස්. සේනානායක පුස්තකාලයේ දී දොරට වඩිනා මොහොතේ, මේ හෘදයාංගම අහිංසක අසිරිමත් මිනිසා සිරිපොද වැස්සේ වන විහඟෙකු සේ තෙමීගෙන ඇවිත්, ආදරයෙන් මා වැළඳගෙන මට සුබ පැතූ හැටි මතක්වන විට අදත් මා දෑස තෙමී යයි.

මේ අදීන, නිර්ව්‍යාජ, අහිංසක කවියා දේසපාලුවන්ගේ හේත්තුවෙමින්, උන්ගේ දෙපා ලෙවකමින්, උන්ට කවි සිංදු ලියමින්, තනතුරු තානාන්තර සිඟමින් කිසිදාක සිය ආත්මය පාවා දුන්නේ නැත.

මේ කවිය මම ඔහුට පූජාකරමි.

රත්නපුරේ ගංගා ද්‍රෝනියක             යට
තෙත් ව ඛනිජ නිධිගත වන සුලිය     පිට
රත් ව කැකෑරෙන දාඩිය       එකතුකොට
හුස්ම ගලා යයි උල්පත්         කවියකට

උලා කෑව දිවියක ලුණු රස         ගිහිණී
සදා වමාරා කන දුක කැටි            ගැසුණී
පලා ගිරව් වැලපෙන විරිතක         පැමිණී
නුඹේ සියුම් හදවත වෙණ නද         ඇසුණී

මිනිසත් සුවඳ උතුරන සුලකර         බසිනී
පොහොසත් කවක ගලනා රුධිරය     පිරුණී
මුඳුනත් බඳින වෙසතුරු මනසක     යටිනී
පැහැපත් හදින් බෝසත් අරුණලු     වැටුණී

සාස්පාන සූරා කන             දිවියකට
රාස්සිගේ අව්වෙන් ගිනි     පිඹිනකොට
දෑස් කොනින් උතුරා යන     කඳුළු කැට
වාස්තවික අනුභූතිය         කවියකට

ලෑටි ගෑව උරුමෙක කඩතොළු     මතිනී
නාටකීය විසුළු ය අම රස         ගිහිණී
ශෝචනීය හූමිටි කර පිට         පැමිණී
සාධනීය කවියක ගැඹුරට         හැරුණී

ගල්ලැහැ පැදුර උඩ වියැලී යන         කඳුල
බොල් වී දහයියා පොතු කැරපොතු     ඉඳුල
ඇල්මෙන් තැවුල උකහා දිවියෙන්         වගුල
ලොව්තුරු හැඟුම් ඉතිරූ හදකි ය         උදුල

දෙනගම ඥානවතියගෙ උණු කඳුළු         ගෙන
නුඹ ලිව් කවිය පුපුරයි හදවතට             පැන
දෙනගම වැවේ රතු මානෙල් පිපෙන         දින
කිරලුනි පොළොවෙ හැපි හැපි යළි හඬනු     මැන

රබර් යාය මැද කිරි කපනා             දුවක
රිදුම් දෙමින් කකියන පැහැසර         ළයක
හැඬුම් පුරා සැඟවෙන නොකියන     පෙමක
උදම් හැඟුම් වැගිරෙයි නුඹගේ         කවක

තනියා ගසා අම්මා මිය ගිය         සොවිනී
වෙව්ලා හඬන විට අසරණ වූ         දියණී
වැලපී හඬා වැටෙනා ළතැවුල         යටිනී
අහුලා ගන්ට උපමා රූපක             තිබුණී

මොණර බිජු ද පුපුරා යන         ගිනියමක
අඟුරු කකා මිරිදිය බොන         සරතැසක
පඳුරු ලලා සෝගිනි දලු ලන         බිමක
අඳුර ඉරා සඳ දිය ගැලුවා             කවක

වහ බී මෙලොව හැර ගිය         පොඩිනංගීට
ගහ බඩගාන මළපොත බැරි             අයියාට
රහමෙර රහක දුක සඟවන             ගැමියාට
නොකියන කවක් කොහිවෙද මේ         කවියාට

කම්පාවකින් උලලේනෙකු             ඉකිබිඳින
ගිම්හානය ම සංධ්වනියක් සේ         විඳින
සීතල සිංහරාජයෙ තුරු පත්             තුඩින
නංගිගෙ සෙනෙහෙ වීණාවේ තත්         සිඳිණ

සිරිපා ගමන වැටිලා ඇති             එරත්නට
ගලනා සුදෝසුදු මීදුම් වලා                 යට
නොමියෙන අකුරු ඉකිලන නිම්නයෙන්     වට
නිදි නැති නදිය ම ය ධර්මේ නුඹ         අපට

පෑන් තුඩින් ගෙන දුහුවිලි             මකරන්ද
රිදුම් විඳුම් මිරිකා මීවද                 බැන්ද
දැහැන් ගත ව නුඹ ලබනා කෙටි         නින්ද
ඉතින් අපට උහුලන්නට ද             පුළුවන්ද

වැටි වැටි නැඟිට හති ලන මඟ         අතරමඟ
ඉර සේවයට කලියෙන් තව දුරක්             නැඟ
විඳිනට මචං උතුරන සඳ වතුර                 දඟ
නවතිමු ටිකක් නෝනගෙ අම්බලම             ළඟ

සත්‍යයෙ පුෂ්පයේ සුවඳින් පිරි                 බිමක
සංසාරය ම කවියෙන් කියවන                 දිනක
නිර්වාණයට හූවක දුර ඇති                 ඉමක
ධර්මේ මචං අපි හමුවෙනවා                 නිසැක



- කුමාර හෙට්ටිආරච්චි

A day in the life

Read More

රජයේ සේවකයෙකුගේ නම සංශෝධනය කිරීම

හේමා කුමාරිගේ නම උප්පැන්න සහතිකයේ සඳහන් වන්නේ "ඕලු පැලියාවගේ හේමාවතී මල්ලිකා පීලිපොළ" යන නමිනි. රජයේ ව්‍යවස්ථාපිත ආයතනයක ඇය සේවය කරන්නීය. සිය උප්පැන්න සහතිකයේ නම දීර්ඝ බැවින් එය භාවිතයේ පහසුවට කෙටි කර ගැනීමට ඇයට උවමනා විය.
ඒ සඳහා උප්පැන්න සහතිකයේ නම සංශෝධනය කිරීම අවශ්‍ය නොවන බව ද අදාළ චක්‍රලේඛයක් පවතින බව ද ඇය අසා තිබිණි. චක්‍රලේඛය සොයාගත් පසු ඇය නියමිත පරිදි "හේමා කුමාරි සෙනරත්" යනුවෙන් නම රාජකාරි කටයුතු සඳහා වෙනස් කර ගත්තා ය. වසර දහයකටත් වඩා ඇය කිසිදු ගැටලුවකින් තොරව කාර්යාල කටයුතුවල දී මෙම නම භාවිතා කළා ය.
ඇගේ සේවා ස්ථානයේ ආයතනික සහ මානව සම්පත් අධ්‍යක්ෂක ලෙස නවක නිලධාරියෙක් රාජකාරි ඉටු කිරීමේ පත්වීම් ලබා පැමිණියේ ය. ඔහු විශ්වාස කරන්නේ උප්පැන්න සහතිකයේ තිබෙන සම්පූර්ණ නම හැර වෙන නමක් භාවිතා නොකළ යුතු බවයි.
දැන් නවක විධායක නිලධාරියා වසර දහයක් පුරා ඇය භාවිතා කළ නම නීත්‍යානුකූල නොවන බවට ඇයට උපදෙස් ලබා දෙයි. ඇයට මෙම කෙටි නම භාවිතා කිරීමට අවශ්‍ය නම් උප්පැන්න සහතිකයේ ද සංශෝධනයක් සිදු කරගන්නා ලෙස ඇයට දැනුම් දී ඇත. ඇය මෙතෙක් භාවිතා කළ නම ඇතුළත් කරමින් සිය ප්‍රථම තීරු බදු රහිත වාහන බලපත්‍රයට අයදුම් කළාය. මානව සම්පත් අධ්‍යක්ෂවරයා එම අයදුම්පත යොමු කිරීම ප්‍රතික්ෂේප කරයි.
දිවුරුම් පෙත්සමක් ඉදිරිපත් කළ ද ඔහුගේ මතය වෙනස් නොවේ.
මේ පිළිබඳ නීතිමය තත්ත්වය විමසා බලමු.
රජයේ සේවයෙහි හෝ පළාත් රාජ්‍ය සේවයෙහි හෝ නියුක්තව සිටින සේවකයෙකුට 1951 අංක
17 දරණ උපත් හා මරණ ලියාපදිංචි කිරීමේ පනතේ ප්‍රතිපාදන වලින් බැහැරව රාජ්‍ය සේවයේ සියළුම කටයුතුවලට බලපවත්වන පරිදි නම සංශෝධනය කළ හැකි ය.
ශ්‍රී ලාංකික පුරවැසියෙකුගේ උපත් හා මරණ ලියාපදිංචි කිරීම සඳහා බල පවත්වන්නේ 1951 අංක 17 දරණ උපත් හා මරණ ලියාපදිංචි කිරීමේ පනතයි. එමෙන්ම 1975 වසරේදී සකස් කරන ලද රෙජිස්ට්‍රාර් ජනරාල්ගේ අත් පොතෙහි උපත් හා මරණ ලියාපදිංචිය සහ සංශෝධනය කිරීමේ කාර්ය පටිපාටිය දක්වා ඇත.
පුරවැසියන්ගේ උප්පැන්න සහතිකයේ නම සංශෝධනය කරන්නේ නම් එය කළ යුත්තේ උප්පැන්න සහතිකයේ 13වන තීරයේ සංශෝධනයක් ලෙස ය.
ඒ සඳහා අනුගමනය කළ යුතු ක්‍රියා පටිපාටිය පනතේ 27 වගන්තියෙහි සහ රෙජිස්ට්‍රාර් ජනරාල්ගේ අත් පොතෙහි X පරිච්ඡේදයේ 4 වන කොටසේ 412 වගන්තියෙහි දැක්වේ.
රාජ්‍ය සේවයේ හෝ පළාත් රාජ්‍ය සේවයෙහි නියුක්තව සිටින රාජ්‍ය නිලධාරියෙකුට නම වෙනස් කිරීමට අවශ්‍ය නම් සිය දෙපාර්තමේන්තුවේ ප්‍රධානියා ඉදිරිපිට දී නම වෙනස් කිරීම සඳහා නියමිත ආකෘතියෙහි ප්‍රකාශයක් සිදුකිරීමෙන් නම වෙනස් කරගත හැකිය.
එහි විශේෂත්වය නම් උප්පැන්න ලේඛන සටහන විධිමත් ලෙස වෙනත් නොකර ම රජය විසින් සියලුම කටයුතු සඳහා මෙම සංශෝධනය පිළිගනු ලැබීමයි.
ඒ සඳහා පුද්ගලයාගේ උප්පැන්න සහතිකයෙහි නමෙහි කොටසක් තිබීම ද අවශ්‍ය නොවන බව මෙම වගන්ති වලින් පෙනී යයි.
එම ප්‍රකාශය පිටපත් තුනකින් යුතුව සිදුකළ යුතු ය. දෙපාර්තමේන්තු ප්‍රධානියා විසින් නම සංශෝධනය අනුමත කිරීමේ ලිපියක් නිකුත් කරයි.
එම ලිපිය නිලධරයාගේ පෞද්ගලික ලිපි ගොනුවේ මෙන්ම පත්වීම් බලධරයා සතුව ද පිටපතක් තැබිය යුතු ය.
එනම් උප්පැන්න සහතිකය හෝ උප්පැන්න ලියාපදිංචි කිරීමේ සටහන් වෙනස් කිරීමට කිසිසේත් අවශ්‍ය නොමැත.
මෙම සංශෝධිත නාමය නිලධාරියාගේ රාජ්‍ය සේවයේ සියලුම කටයුතු සඳහා මෙන්ම විශ්‍රාම ගැන්වීම සඳහා ද අදාළ වේ. පත්වීම් ලිපියෙහි මුල් නම තිබීමද ඉහත ප්‍රතිපාදනවලට අනුව ගැටලුවක් නොමැත.
මේ සඳහා ප්‍රතිපාදන ඇත්තේ රෙජිස්ට්‍රාර් ජනරාල්ගේ අත්පොතෙහි 327 වගන්තියෙහිය.
ඒ අනුව භාණ්ඩාගාර චක්‍රලේඛයක් ද නිකුත් කර ඇත.
1957 අගෝස්තු 18 දින නිකුත් කරන ලද භාණ්ඩාගාර 394 චක්‍රලේඛය මේ සම්බන්ධයෙන් ආකෘතිය ඉදිරිපත් කරයි.
මේ සඳහා පුද්ගලයකුට විවිධ මත තිබිය හැකි වුව ද නීතිය මගින් එබඳු ප්‍රතිපාදනයක් සලසා ඇත. එම ප්‍රතිපාදන වලංගුව තිබෙනතාක් ඒ අනුව සිය නම සංශෝධනය කරන රජයේ නිලධාරීන්ට කිසිදු නීතිමය ගැටලුවක් රාජ්‍ය සේවය තුළ පැන නොනගී.
විශේෂයෙන්ම විධායක නිලධාරීන්ගේ පුහුණු සැසිවල දී ද මේ පිළිබඳව දැන නොසිටි බව පෙනී ගිය හෙයින් මෙම ලිපිය ලිවීමට සිතිණි.
එමෙන්ම මෙසේ නිසියාකාරව නම වෙනස් කළ නිලධාරිනියන්ට ද නිලධාරිනියන්ට ද කාර්යාල කටයුතු වල දී ඔවුන්ගේ උප්පැන්න සහතිකයෙහි තිබෙන පෙර නම යළිත් ලියන ලෙස ඇතැම් ආයතනවල ද උපදෙස් දෙනු නිරීක්ෂණය කළෙමි.
ඒ මේ පිළිබඳව ඇති නෛතික විධිවිධාන ගැන අවබෝධයකින් තොරවීම නිසාය.
අදාළ චක්‍රලේඛයෙහි ඡායාරූපයක් ද වෙනස් කිරීම සඳහා දෙපාර්තමේන්තු ප්‍රධානියාට යොමු කළ යුතු ආකෘති පත්‍රය ද පහත කොමෙන්ටුවක දක්වා ඇත.
මෙම ලිපිය ප්‍රයෝජනවත් වේ යැයි සිතන්නේ නම් කතෘ අයිතිය සුරකිමින් බෙදා හරිනු මැනවි.

ආචාර්ය රෝෂණී දිසානායක

(C)@Dr.Roshanie.Dissanayake

A day in the life

Read More

අධිකරණ ඇමති

නිදහසෙන් පසු 1948 සිට සිට ශ්‍රී ලංකාවේ අධිකරණ/නීති (Justice / Law) අමාත්‍ය ධූරය දරපු මහත්වරුන් ගැන සොයන්න මීදුමට හිතුනා.

විශේෂ හේතුවක් තියෙන්නත් එපාය.

අපේ අධිකරණ අමාත්‍ය හර්ෂණ නානායක්කාර අභිරූප රංගණ ශිල්පියෙක් වෙලා.

ලිංගිකත්වය මේ පාර්ලිමේන්තු  කාලයේ ජනප්‍රිය මාතෘකාවක්.

ඒ වගේම සරල ව්‍යවහාරයක්.

සාමන්‍යයෙන් මුඩුක්කු ව්‍යවහාරයේදී සුලබ එමෙන්ම නොසලකා හරින මේ වාග් විලාශයන් වර්තමානයෙත් නිතර අහන්න දකින දේවල්.

ඒකත් සිස්ටම් චේන්ජ් එකක්.

1947 සිට 1956 දක්වා එච්.ජේ.සී පෙරේරා මහතා අධිකරණ අමාත්‍ය ධුරයේ කටයුතු කරලා තියෙනවා.

ඊ.බී .වික්‍රමනායක 1956 දී අධිකරණ අමාත්‍ය ධුරයේ කටයුතු කරනවා.මේ කාල වකවානුව අපේ වයසේ අයට සිහිපත් කරන්න පුළුවන් කාලයක්.

අපරාධ යුක්ති විනිශ්චය සභාව වැනි විනිශ්චය සභා නිර්මානය වුනේ මේ කාලේ.

1956 - 1977 සෑම් පී.සී ප්‍රනාන්දු ,සී.පී ද සිල්වා,ෆීලික්ස් ඩයස් බණ්ඩාරණයක යන මහත්වරු අමාත්‍ය ධුරයේ වගකීම් දරුවා.

ජනරජ පනත වැනි සුවිශේෂි අණ පනත් පාර්ලිමේන්තුවට ආවේත් ජාතික රාජ්‍ය සභාව ඇතිවුනේත් මේ  කාලයේ.

1977 ජේ.අර්  -  ප්‍රේමදාස ගේ යුගය 1977 -1994 දක්වා නිශ්ශංක විජේරත්න , ලලත් ඇතුලත්මුදලි,එච් ඩබ්ලිව් ජයවර්ධණ රංජන් විජේරත්න,

චන්ද්‍රීකා යුගය 1994 -2005 ජී.එල් පීරිස්  බී.ජී.පී.එස්.ඩී ඒකනායක ඩබ්ලිව්. ජේ .එම් ලොකුබණ්ඩාර ,ඩිලාන් පෙරේරා ,මිලින්ද මොරගොඩ රාවුෆ් හකීම් 

2015 -2026 විජේදාස රාජපක්ෂ , තලතා අතුකෝරළ අලි සබ්ර් 

අධිකරණ අමාත්‍ය ධුර දැරු අමාත්‍යවරුන්.

මෙතුමන්ලාගේ චරිත ලක්ෂණ හදාරණ ගමන් වර්තමාන රජයේ හර්ෂණ නානායක්කර අමාත්‍යවරයා සසදන එක ඔබට භාරයි.

මේ වියමන මුණු පොතෙන් උපුටා ගත්තක්.

වියමන කරලා තිබුනේ ප්‍රියන්ත ප්‍රනාන්දු .

අධිකරණ ඇමති මට මැද ඇගිල්ල පෙන්නලා,දිව දික් කරා – මන්ත්‍රී අජිත් පී පෙරේරා කියයි

March 20, 2026  iri news

අධිකරණ අමාත්‍ය හර්ෂණ නානායක්කාර මහතා තමන් වෙත මැද ඇඟිල්ල පෙන්වමින් සහ දිව දික් කරමින් අතිශය අසභ්‍ය හා නින්දිත ආකාරයෙන් පාර්ලිමේන්තුව තුළ හැසිරුණු බවට සමගි ජන බලවේගයේ පාර්ලිමේන්තු මන්ත්‍රී අජිත් පී. පෙරේරා මහතා අද (20) සජීවී වීඩියෝවක් මගින් බරපතල චෝදනාවක් එල්ල කළා.

පාර්ලිමේන්තු සම්ප්‍රදායන් උඩුයටිකුරු කරමින් කැබිනට් අමාත්‍යවරයෙකු මෙලෙස හැසිරීම සමස්ත උත්තරීතර සභාවටම සිදුකළ අපහාසයක් බව මන්ත්‍රීවරයා මෙහිදී අවධාරණය කළා.

නීතිපති දෙපාර්තමේන්තුවේ බලය විමධ්‍යගත කරමින් ප්‍රාදේශීය නීතිපති කාර්යාල ආරම්භ කිරීමේ ප්‍රගතිය පිළිබඳව අජිත් පී. පෙරේරා මහතා මීට වසරකට පමණ පෙර යොමුකර තිබූ ප්‍රශ්නයකට අද දින අමාත්‍යවරයා පිළිතුරු දීමට නියමිතව තිබුණු නමුත් අමාත්‍යවරයා එම ප්‍රශ්නයට පිළිතුරු දීම මගහැරි බවත්, ඒ පිළිබඳව මන්ත්‍රීවරයා කතානායකවරයාට කරුණු ඉදිරිපත් කරන අවස්ථාවේදී අමාත්‍යවරයා මෙම අශෝභන හැසිරීම සිදුකර ඇති බවත් අජිත් පී පෙරේරා මහතා පවසනවා.

අධිකරණ අමාත්‍යවරයෙකු ලෙස පත් කරන්නේ ඉතාමත් සංයමයකින් සහ වගකීමකින් කටයුතු කරන අයෙක් වුණ නමුත් මෙලෙස  උගත් යැයි කියාගන්නා, පාර්ලිමේන්තු සම්ප්‍රදාය වෙනස් කිරීමට පැමිණි අයගේ හැසිරීම අතිශය කනගාටුදායක බවයි.

එමෙන්ම මේ මට්ටමට පල්ලෙහාට වැටිච්ච අවස්ථාවක් මගේ තුන්වෙනි පාර්ලිමේන්තු වාරය තුළ මම දැකලා නැහැ,” යනුවෙන් අජිත් පී. පෙරේරා මහතා ප්‍රකාශ කළා.

කෙසේවෙතත් විපක්ෂයේ මෙන්ම ආණ්ඩු පක්ෂයේ මන්ත්‍රීවරුන් ද මෙම සිදුවීම දුටු බවත්, මේ පිළිබඳව වරප්‍රසාද කඩකිරීමේ යෝජනාවක් ඉදිරිපත් කරන බවත් ඔහු වැඩිදුරටත් පැවසුවා.

වැඩක් කරගත නොහැකි, කේන්තිය සහ අපහාසය පමණක් සිතේ ඇති මෙවැනි අසභ්‍ය ලෙස හැසිරෙන අමාත්‍යවරුන් සමග ආණ්ඩුවක් පවත්වාගෙන යා හැකිද යන්න පිළිබඳව ජනාධිපතිවරයා නැවත සිතා බැලිය යුතු බව මන්ත්‍රීවරයා මෙහිදී අවධාරණය කළා.

එමෙන්ම කතානායකවරයා මේ සම්බන්ධයෙන් වහාම විනයානුකූල පියවරක් ගත යුතු බව ද අජිත් පී පෙරේරා මහතා එහිදී වැඩිදුරටත්  ඉල්ලා සිටියා.

A day in the life

Read More

රේල් පීලි දෙකක් අතරේ කුඩා ඉඩක්

රේල් පීලි දෙකක් අතරේ කුඩා ඉඩක් තබන්නේ අව්වට ප්‍රසාරනය වීම සඳහා යයි පැවසීම තවත් දුම්රියට සම්බන්ධ ප්‍රචලිත මිත්‍යාවකි.
රේල් පීලි දෙකක් අතර පෙනෙන හිඩැස පිළිබඳ පැහැදිලි කිරීම.
රේල් පීලි දෙකක් එකිනෙක සම්බන්ධ කිරීම සඳහා පත්තු (Fish Plates) දෙකක් දෙපසින් තබා අඟලක් පමණ විශ්කම්භයක් ඇති වානේ ඇන (Bolts & Nuts) 4 කින් (සමහර විට 6 කින්) දැඩි ලෙස සම්බන්ධ කරනු ලබයි. මේ ඇන හොඳින් තදවී ඇත්නම් එම පීලි දෙක එකම දෘඩ පීල්ලක් ලෙස ක්රිියා කරයි.
මෙවන් සම්බන්ධකිරීමකදී පීලි දෙක එකිනෙක හේත්තුවන ලෙස තබන්නේ නම් පීලිවල හා පත්තුවල සිදුරු එකිනෙක නිවැරදිව සම්පාතවීම සඳහා විශාල නිරවද්යහතාවකින් යුතුව සිදුරු ස්ථානගත විය යුතුය. උදාහරණයක් ලෙස අවසන් සිදුරේ කේන්ද්රහයේ සිට පීල්ලේ කෙලවරව දුර මිමී 100ක් නම් හා පත්තුවේ මැද සිදුරු 2 අතර දුර මිමී 200ක් නම් පීලි අතර හිඩැසක් නොවන පරිදි පීලි දෙක සම්බන්ධ කල හැකිය. එහෙත් යම්කිසි හේතුවක් නිසා පීල්ල කැපීමේදී එහි අවසන් සිදුරේ සිට කෙලවරට දුර මිමී 1 කින් වැඩිවුනා යයි සිතමු. එවිට එවන් පීලි දෙකක් හේත්තු කලවිට සිදුරු අතර දුර මිමී 202කි. නමුත් පත්තුවේ අදාල සිදුරු අතර පරතරය මිමී 200ක් පමණි. පීලි තවත් මිමී දෙකකින් ලං කල යුතු ය. කොටින්ම කිවහොත් සවිකල නොහැකිය. මේ සඳහා අවශ්ය නිරවද්යයතාවට විශාල රේල් පීලි කැපීම හා විදීම ක්ෂේත්රමයේදී අපහසුය.
එබැවින් ප්රා‍යෝගිකව සිදු කරන්නේ මිමී 5ක් පමණ කොටට පීල්ල කැපීමයි. මුල් උදාහරණයම සලකමු. දැන් සිදුරේ සිට පීල්ල කෙලවරට දුර මිමී 95 යි. පීලි දෙක එකට තැබූ විට සිදුරු අතර අවම දුර මිමී 190. පත්තුවේ සිදුරු අතර දුර මිමී 200. දැන්පීලි අතර මිමී 10ක හිඩැසක් තබා පත්තුව සවි කල හැකිය. වැරදීමකින් පීල්ලේ දිග මිමී 1ක් 2ක් අඩු වැඩි වුවද පත්තුව සවිකල හැකිය. පීලි අතර හිඩස ඇතිවන්නේ මේ හේතුව නිසාය.
පීලි ශක්තිමත්ව සිල්පර හා සම්බන්ධ කර ඇති විට රත්වීමේදී හා සිසිල් වීමේදී සිදුවියයුතු දිගවැඩිවීම හා අඩුවීම එසේ නොවී සංපීඩනයක් (Compression) හෝ ආතතියක් (Tension) ලෙස පීල්ල විසින් විඳගනු ලබයි. (මේ සඳහා බකල් වීමට හෝ Crack වීමට අවකාශ නොලැබෙන සේ මාර්ගය ශක්තිමත්ව තිබියයුතුය.)
පත්තුවේ ඇන හොඳින් තදවී ඇත්නම් රත්වීමේදී හෝ සිසිල් වීමේදී මෙම හිඩැස වෙනස් නොවේ. එහෙත් ඇන බුරුල්වී ඇත්නම් යම් ප්රීමාණයක අදීමක් හෝ හැකිලීමක් නිරීක්ෂණය කල හැකිය.
මෙසේ පීලි අතර හිඩසක් තිබීමෙන් ඒවා මාර්ග නඩත්තුවේදී මාරු කිරීම පහසු වන අතර අවාසිය වන්නේ රෝද මේ හිඩැස් මතින් යාමේදී ඇතිවන ශබ්දය හා කම්පනයයි. වර්තමානයේ අධිවේගී දුම්රිය මාර්ග සැදීමේදී රේල් පීලි කිහිපයත් එකට පාස්සා සම්බන්ධක ප්ර මාණය අවම කර ඇත. සම්බන්ධක (Joints) නැතිවම හදන රේල් පාරවල් ද ඇත (Continuously welded rails). තවද Expansion Joints යනුවෙන් අතරමැදි ක්‍රමයක් ද වේ.
ඒ අනුව රේල් පීලි දෙකක් අතර හිඩැසක් තබන්නේ රත්වීමේදී වන ප්රිසාරණයට ඉඩ දීම සඳහායයි පැවති මතය බැහැර කල යුතු ය.

© former gmr mr. Punnavijitha Wijesekera

#2023memories

Ceylon Government Railway Magazine

A day in the life

Read More

ජල්බරියක් !.

දවස - මාර්තු 17
වෙලාව 1.30 ට - පාසල් අවසන් වන වෙලාව.
ප්‍රාථමික විද්‍යාලයක්.
නම කියන්න හොද නැහැනේ . විද්‍යාලයේ කීර්තිනාමයට හොද නැහැනේ
ප්‍රාථමික විද්‍යාලයක ලොකු ළමයි නේ හතර වසරේ ඉන්නේ.
මේ අයියලා පාසල අවසන් වෙලා බෑග් එල්ලගෙන පාරට බහින කොට ගුරුභවතෙක් මිදුලේ තිබුන පයිප්ප බට ටිකකුයි සිමෙන්ති බෑග් භාගෙකුයි ශාලාවක් ඇතුලට දාන්න කියලා.
මේ පුංචි අයියලට ගුරු නියෝගය පිටු දකින්න බැරිවෙලා.
ඒ වැඩේ නිම කරලා පාරට එන කොට පාසල් බස් රථය පිටත් වෙලා.
බස් රථයේ රියදුරු මාමා හිතුවළු හවස පන්ති කියලා.
බස් රථය එනකම් පාරේ බලා ගෙන හිටපු සීයට පණිවිඩය තියලා රියදුරු මාමා ඉගිළුනා.
පන්ති තියෙන බවක් ගෙදරින් පිටත් වෙන කොට නොකිවු නිසා සීයාට ගින්දර පත්තු වෙලා.
මුණුපුරා ගෙදර ආවේ නෑ නේ.
මේ මනුස්සයා මොනවා කර ගන්නවා ඇද්ද ? . පාරේ හරහා පැනලා අණතුරක් කරගනීද ? දහාක් දේවල් සීයට හිතෙනවා.
වාහනයක් අරගෙන කලබලෙන් මුණුපුරා හොයා ගෙන පාසල ගාවට යන කොට මුණුපුරා එයාගේ තවත් යාළු අයියා කෙනෙක් එක්ක අයිස් ක්‍රී්ම් එකක් කකා පාරේ අනිත් පැත්තේ වෙළද සැලක ඉන්නවා.
යාන්තම් දහඩිය නිමලා ගිඩි ගිඩිය පාලනය කර ගත්තා.
තව පොඩ්ඩෙන් සීයත් 1919 නලාව හඩවා ගෙන යනවා.

කතාව ඕක වුනත් පාසලට ගියාම පාසල් කාලේ දරුවන්ගේ වගකීම තියෙන්න ඕන ගුරුවරු අතේ .
විශේෂයෙන් වගකිව යුත්තා විදුහල්පති තුමා හරි තුමිය .
ඒ වගකීම බැහැර වෙලා.
දරුවෝ පසල් යන්නේ එන්නේ පාසල් බස්රථවල වුනාම ඒවා යන්නේ එන්නේ කිසියම් කාල සටහනකට.
හිතපු හැටියේ දරුවෙක් නතර කරගත්තම ඒ දරුවා ගෙදර යන්නේ කොහොමද ? කියලා ප්‍රාථමික ගුරු මොළ වලට අවබෝධයක් නැත්නම් ඒ මොළත් ප්‍රාථමිකයි.
ටිකක් හොයලා බැළුවා මොකක්ද මේ අයියලාගේ ශ්‍රමදානේ කියලා !.

ඒ ගැන නොලියා ඉන්නම්.
පෞද්ගලිකයි රහසිගතයි කියලා හිතාගෙන.

A day in the life

Read More

ජනාධිපතිවරයාගේ විශේෂ මාධ්‍ය හමුව.

ඉන්ධනවලට අපි දිගු කාලීන ටෙන්ඩර් ප්‍රධානය කරලා තිබුණා. නමුත් අපි දිගුකාලීන ටෙන්ඩර් දෙකක් විශේෂයෙන් මෙට්‍රික් ටොන් 90,000 නැව් දෙකක් නියමිත කාලයට ලබා ගන්න හැකියාවක් ලැබෙන්නේ නෑ. පෞද්ගලික අපේ තෙල් සැපයුම්කරුවන් ඉන්නවා ඔවුන්ගෙන් එක නැවක් අපිට නියමිත කාලයට ලැබෙන්නේ නෑ කියලාත් දැන් වාර්තා වෙලා තියෙනවා. අපිට අවශ්‍ය ඉන්ධන සැපයීමේ අඩුවක් තියෙනවා.. එක නැවක ප්‍රමාදයක් මේ ජාලයටම බලපෑම් එල්ල කරනවා. ඒ නිසා අපි ඉලක්ක කරලා තියෙන ඉන්ධන සැපයුම අපිට ලැබෙන්නේ නෑ.

අපි මේ වෙනකොට මැදිහත්වීම් කිහිපයක් කරලා තියෙනවා රාජ්‍ය තාන්ත්‍රික මට්ටමින්. දෙවැනි එක අපි ඉක්මන් ටෙන්ඩර් කිහිපයක් දැම්මා. අපි අද ටෙන්ඩරයක් දැම්මා ඩීසල්, බොරතෙල්, ලිහිසිතෙල්, පෙට්‍රල්, සඳහා අපිට ඉතාම විශ්වාසවන්ත සැපයුම්කරුවන්ගෙන් ටෙන්ටර් ඇවිල්ලා තියෙනවා.

ඩොලර්වලින් ව්‍යාපාරවල යෙදෙන අය ව්‍යාපාර සඳහා ඔවුන්ට බලපත්‍රයක් දෙන්න ඔවුන්ට අවශ්‍ය වන තෙල් ආනයනය කර ගැනීම සඳහා කියලා. ඔවුන්ට අපි තාවකාලික බලපත්‍රයක් ලබා දීලා තියෙනවා.
මාර්තු මාසේ ගෑස් අවශ්‍යතාවය තිබ්බේ 33,000යි නමුත් අපි 38,000ක් ඇනවුම් කළා මාර්තු මාසයට පෞද්ගලික සමාගමක් ගෑස් සැපයුම අඩාල කරලා තිබෙන නිසා. ඒ මෙට්‍රික් ටොන් 38,000ම ලැබිලා තිබෙනවා. තව අපි ගෑස් නැවක් ඇනවුම් කරලා තියෙනවා ඒක හෙට හෝ අනිද්දා ලැබීමට නියමිතව තිබෙනවා ඒ නිසා ගෑස් අර්බුදයක් ඇති වෙන්නේ නෑ.
ගෑස්, ගල් අඟුරු සහ ඉන්ධන අපේ රාජ්‍ය තාන්ත්‍රික සම්බන්ධතා හරහා ලබා ගැනීමට සාකච්ඡා කරමින් තිබෙනවා ඒ සඳහා අවශ්‍ය කටයුතු සිදුකරමින් යනවා.

QR කේතයේ යම් යම් ගැටලු තිබෙනවා කියලා අපි දන්නවා. යම් ගැටලු මතුවෙනවා කියලා පූර්ව අවබෝදයකින් යුතුව තමයි අපි ඉරිදා දිනයක්ම තෝරාගත්තේ. දැන් මිලියන 5කට අධික පිරිස් ලියාපදිංචි වෙලා තිබෙනවා. යම් ජාතික පද්ධතියේ ගැටලුවක් එන බව දැනගෙනම තමයි අපි මේක දැම්මේ.

අත්‍යවශ්‍ය සේවා කටයුතු සඳහා අපි ආරක්ෂිත තෙල් තොග පවත්වාගනිමින් යනවා. ඉන්ධන අත්‍යවශ්‍යම තැන්වලට ඒවා බිඳ වැටෙන්නේ නැතිව QR එක ප්‍රමාණවත් නැත්නම් ඒක වැඩි කරමින් ලබා දීම සඳහා අමාත්‍යාංශ මගින් වැඩපිළිවෙළක් සකස් කරමින් යනවා.

ආහාර සැපයුම් ජාලය අපි අධ්‍යනය කරමින් යනවා. විශේෂයෙන් උත්සව සමය එන්නේ. අපි මාස 3ක් දීර්ඝ වශයෙන් තොග රැස් කරන්න පුළුවන් අය සමග සාකච්ඡා කරා ඔවුන්ගාව ඒ මාස 3ක තොග ගබඩා කරන්න පහසුකම් තිබෙන බව වාර්තා කළා. ඒ නිසා අත්‍යවශ්‍ය ආහාරවල හිඟයක් ඇති නොවීම ගැන අපි කල්පනා කරනවා.

අපි හැම අමාත්‍යාංශයකටම ඉලක්කයක් දීලා තියෙනවා තමන්ගේ අමාත්‍යාංශයේ තෙල් ප්‍රමාණය අඩු කරගත යුතුයි. අඩුම තරමේ 25%කින්වත්. සෞඛ්‍ය අමාත්‍යාංශයේ ලේකම්තුමා අපිට දැනටමත් වාර්තාවක් ලබා දීලා තිබෙනවා ඒ අමාත්‍යාංශය සම්බන්ධව.
අපි ඉතාමත් සාර්ථකයි අපි දවස් දෙකක් වැඩ කරනවා. දවසක් නිවාඩු දෙනවා ආයේ දවස් දෙකක් වැඩකරනවා . අපිට රාජ්‍ය සේවයේ අඛණ්ඩතාව තමයි වැදගත් වුණේ.
අපි ප්‍රධාන ක්ෂේත 4ක, අඛණ්ඩ බලශක්තිය සැපයීම සඳහා, අත්‍යශ්‍ය සේවාවන් සඳහා, රාජ්‍ය සේවය සූදානම් කිරීම, පීඩාවට පත්වෙන ප්‍රජාවට ලබා දෙන සහනාධාර පිළිබඳව අපි අවධානය යොමු කරලා තියෙනවා. කිසි කෙනෙක් බියට පත්විය යුතු නෑ.

බලශක්ති අර්බුදයක් මතුවෙනවානම් අපි ඒක තමයි ක්ෂණික මිලදී ගැනීම සඳහා අපි ටෙන්ඩර් කෝල් කළා. ඒකෙන් අපි නැව් 5කට අවසර ලබා දෙනවා. රාජ්‍යතාන්ත්‍රික සම්බන්ධතාවලදීත් අපි ගල් අඟුරු ඇතුළත් කරලා තිබෙනවා. ප්‍රමිතියේ ප්‍රශ්නයක් තිබෙනවා නම් අපි ඒකට කටයුතු කරනවා.
අපි කාලයක් තිස්සේ හැදිච්ච කාටල බිඳිනවා. අපි සාධාරණ ටෙන්ඩර් ක්‍රමවේදයකින් ටෙන්ඩර් ලබා දෙනවා. අලුත් කෙනෙකුට චූටි චූටි ගැටලු මතුවිය හැකියි.

මම විවෘතව කිව්වොත් දැනට පස්සට ගිහිල්ලා තියෙන්නේ අප්‍රේල් 6-7 එන්න තිබුණ බොරතෙල් නැව්. දැන් ගබඩා කරලා තිබෙන බොරතෙල් ප්‍රමාණය අප්‍රේල් 15 දක්වා ප්‍රමාණවත්. අපිට නැව් එන්න ඕනේ. ඒ නැව යම් කාලයක් ගන්නවා එන්න. අපිට තියෙන්නේ සීමිත ගබඩා ප්‍රමාණයක්. ගබඩාවෙන් පිරිපහදු කෙරෙන්න ඕනේ. මේ පද්ධති කළමනාකරණයක් තියෙන්න ඕනේ. අද අපිට නැව් 10ක් ගෙනල්ලා තියාගන්න තැනක් නෑ. මේ තියෙන යාන්ත්‍රණයට අනුව CPC එකෙන් කොච්චරද IOC නැව කවදාද, RM පාර්ක් නැව කවදාද, සිනොපැක් නැව කවදාද කියලා අපි ප්ලේස් කරලා තියෙන්නේ. එතකොට අපි බලන්න ඕනේ කොතනද අවලංගු වෙන්න ඕනේ. ඉතිං අපි කලින් ටෙන්ඩර් දැම්මාට වැඩක් නෑ.
ගනුදෙනුව කරන්න පුළුවන් ඕනෑම මුදල් ඒකකයකින් අපිට. හැබැයි අපිට අවශ්‍ය කරලා තියෙන්නේ මොකක්ද රුසියාව සහ අපි අතර එකඟතාවයකට එනවානම් අපි ගන්න බැඳෙනවා. ගන්න බැඳෙනවානම් අපි බැඳිම ඉටු කරන්න ඕනේ. ඉටු කරන්න පුළුවන් පරිසරයක් අපි හදාගන්න ඕනේ. අපි මේ හැම දෙයක් පිළිබඳවම තීන්දු ගන්න කලින් සියල්ල සලකා බලමින් තමයි තීන්දු ගනිමින් ඉන්නේ.

අපේ කවර හෝ අමාත්‍යවරයෙක් අමාත්‍යවරයාගේ බලතල අමාත්‍යවරයාගේ විෂය පඨය උපයෝගි කරගෙන කොතන හෝ අධිකරණයක නඩුවක් පැවරෙනවානම් මම ඔහුව ඉවත් කරනවා. ජයකොඩි පිළිබඳව ප්‍රශ්නය 2014දි ඔහු රාජ්‍ය නිලධාරියෙක් විදිහට ඉන්නකොට ප්‍රසම්පාදනයේ ගැටලුවක්. හැබැයි ඔහු අමාත්‍යවරයා හැටියට නම් අධි චෝදනා ලබලා අධිකරණයට ගොනු වෙලා තිබෙනවානම් මම ඔහුව හෙට අමාත්‍යධුරයෙන් ඉවත් කරනවා.

විදුලි කප්පාදුව පිළිබඳව දැනට අවශ්‍යතාවයක් පැන නැගිලා නෑ. අපි ඉදිරිපත් කරලා තිබුණ සැලසුම් යටතේ දැනට විදුලි කප්පාදුවක් නෑ. නමුත් මේ යුද්ධයේ සීමා මායිම් ඔබට මට හෝ කාටවත් තීරණය කරන්න බෑ. ඒ නිසා දැනට අපි සකස් කරලා තියෙන වැඩපිළිවෙළ යටතේ විදුලි කප්පාදුවක් නෑ. නමුත් එතනින් එහා තීරණය කරන්නේ යුද්ධයේ සීමා මායිම් කොච්චර ප්‍රමාණයකින් වර්ධනය වේවිද කියන එක මත.
මම පාරිභෝගික ජනතාවට කියන්න කැමතියි අපේ රටේ හවස 6-10 තමයි වැඩිම විදුලි ඉල්ලුම එන්නේ. අපි මේ ඉලෙක්ට්‍රික් කාර් පාවිච්චි කිරීම නිසා ගොඩක් විදුලි කාර් වැඩ ඇරිලා ගිහිල්ලා 6-10 අතරේ චාර්ජ් කරනවා. ඒ නිසා මීට පෙරට වඩා මෙගාවෝට් 300කට වගේ ආසන්න විදුලි ඉල්ලුමක් 6-10 අතර වෙලා තිබෙනවා. හැබැයි අපිට දවල් කාලයේදි විදුලි අතිරික්තයක් තියෙන්නේ ඒ නිසා මම විදුලි කාර් රථ හිමියන්ගෙන් ඉල්ලා සිටිනවා දවල් කාලයේදී චාර්ච් කරගන්න.
අපි හඳුන්වා දෙන්න යනවා ස්මාර්ට් මීටරයක්. ඒකට අපි දැන් ටෙන්ඩර් කෝල් කරලා තියෙන්නේ. ස්මාර්ට් මීටරයක් ගෙනාවට පස්සේ මිල අගයන් දෙකක් හඳුන්වා දෙන්න කටයුතු කරනවා. දවල් කාලයේ එකක් 6-10 අතර කාලයේදී එකක්. අපේ අවශ්‍යතාවය තමයි දවල් කාලයේදී වැඩිපුර විදුලිය පරිභෝජනය කරන්න ඕනේ.

අපි සූර්ය බලයෙන් විදුලිය බලයෙන් විදුලිය හදාගෙන ගියා ගබඩා පහසුකම් නැතිව. විදුලිය කියන්නේ ඒ වෙලාවේ හදලා ඒ වෙලාවෙම පාවිච්චි කරන්න ඕනේ. නමුත් දවල් හැදෙන විදුලිය ඒ වෙලාවෙම පාවිච්චි කරන්න බැරිවෙනවා. අපිට අතිරික්තයක් තියෙනවා.

පොඩි ප්‍රශ්නයකට තියෙන්නේ කියන ඒවා නෙවෙයි නේ කෙරෙන්නේ.

කමක් නෑ අර්බූදයක් වෙලාවේ පාට පාට ගැන නෙමෙයි රට ගැනයි හිතන්නේ..

රටට යහපතක් වෙන ලෙස ප්‍රශ්න කළමනාකරනය කර ගන්නට හැකි වේවායි කියලයි මීදුම හිතන්නේ.

රටක තියෙන්න එපාය දේශපාලනය කරන්න. මින් ඉහත එහෙම නොහිතපු එක ගැන නම් දුක හිතෙනවා.

A day in the life

Read More

Gastritis ගැස්ට්‍රයිටිස්

"මහත්තයෝ මට දැන් හොඳයි"
ඒ ගිය සතියේ අපේ clinic එකට ආව ලෙඩෙක් පුටුවේ ඉඳගත්තේ එහෙම කියාගෙන. 

ඒ අවුරුදු 40 ක විතර තරුණයෙක්. 

මාස ගාණක් අපේ clinic එකට ආවේ gastritis වලට බෙහෙත් ගන්න. 

Endoscopy පරීක්ෂණයක් කරා. මුලු ආමාශයම ඉදිමිලා. 

තුවාලත් තිබුනා.
ඒත් දුන්න බෙහෙත් වලට අඩුවක් උනේම නෑ.

මූණේ තිබුනේ මලානික ගතිය නිසා මානසික ප්‍රශ්නයක් තියෙනවද ? . කියලා clinic එකට ආව දෙතුන් වතාවකදී මම ඇහුවට නෑමයි කිව්වේ.
ඒත් එක දවසක් job එකේ ප්‍රශ්නයක් නිසා මානසිකව වැටිලා ඉන්නේ කියලා විස්තරේම කිව්වා. 

අපි ලෙඩාව මනෝ වෛද්‍ය සායනයට යොමු කරා.
මනෝ වෛද්‍ය සායනයට ගිහින් ආව පලවෙනි දවසෙ තමයි අර විදියට මට හොඳයි කියාගෙන clinic එකට ආවේ.

ඇත්තටම මොකක්ද මේ "ගැස්ට්‍රයිටිස්" කියන්නේ ? 

අපි කන කෑම වලට ආමාශයේ දි ඇසිඩ් එකතු වෙනවා. 

ආහාර ජීරණය වෙන්නත්, ආහාර වල තියෙන විෂ බීජ විනාශ වෙන්නත් මේ ඇසිඩ් ඕන වෙනවා. 

අපි හැමෝම දන්නවා ඇසිඩ් අපේ සමේ ගෑ උනොත් සම පිච්චෙනවා.
ආමාශයේ හැදෙන ඇසිඩ් ආමාශය බිත්තියේ ගෑ උනොත් ආමාශ බිත්තිය පිච්චෙනවා.

මේ ඇසිඩ් එකෙන් ආමාශයේ ඇතුළු බිත්තිය පිච්චෙන්නේ නැතුව ආරක්ෂා කරන්න ආරක්ෂිත පටලයක් (Mucus Layer) තියෙනවා.
ගැස්ට්‍රයිටිස් හැදෙන්නේ මෙහෙමයි. ඇසිඩ් එක වැඩිපුර හැදුනොත් හරි, ආරක්ෂිත පටලය දුර්වල වුණොත් හරි තමයි ආමාශ බිත්තිය පිච්චෙන්න පටන් ගන්නවා. මේ නිසයි අපිට බඩේ දැවිල්ල එන්නේ.

ඇසිඩ් අඩු වැඩි වෙන්න හේතු ගොඩක් බලපානවා.

ගොඩක් අය හිතන්නේ මේකට බලපාන්නේ කෑම විතරයි කියලා.

බඩේ ඇසිඩ් ගතිය වැඩි වෙන්න බලපාන ප්‍රධාන හේතු.

දිගු වෙලාවක් බඩගින්නේ සිටීම නිසා ආමාශයේ නිපදවෙන ඇසිඩ් උදාසීන වීමට ආහාර නොමැති වීම.
අධික තෙල් සහ කුළුබඩු දැමූ කෑම සහ ගැඹුරු තෙලේ බැදපු ආහාර මගින් ඇසිඩ් නිෂ්පාදනය වැඩි කිරීම.
මානසික ආතතිය (Stress)
අධික ලෙස තේ, කෝපි (Caffeine) පානය සහ මධ්‍යසාර භාවිතය.
දුම්පානය.
දිගුකාලීනව ගන්නා ඇතැම් වේදනා නාශක (NSAIDs) නිසා ආමාශයේ ඇතුලත ආරක්ෂිත පටලය තුනී වීම.
H. pylori වැනි බැක්ටීරියා මගින් ආමාශයේ ආරක්ෂිත පටලයට හානි කිරීම.
නිසි විවේකයක් නොමැති වීම නිසා ශරීරයේ හෝමෝන ක්‍රියාකාරිත්වය වෙනස් වී ඇසිඩ් මට්ටම ඉහළ යාම.
අධික තරබාරුව.

stress එක gastritis වලට බලපාන විදිය අද කතා කරමු.

අපේ මොළයයි, ආමාශයයි අතර හරියට සෘජු සම්බන්ධයක් තියෙනවා.

1. ඔයා ලොකු මානසික පීඩනයකින් හෝ බයකින් ඉන්නකොට, මොළය හිතන්නේ ශරීරයට ලොකු අනතුරක් වෙන්න යනවා කියලා. එතකොට මොළය ආමාශයට පණිවිඩයක් යවනවා දැන් වැඩියෙන් ඇසිඩ් හදපන් කියලා. එතකොට කෑමක් නැතත් ආමාශයේ ඇසිඩ් වැඩි වෙනවා.
2. අපි stress උනාම ආමාශයේ තියෙන ආරක්ෂිත පටලය හැදෙන එක අඩු වෙනවා. එතකොට අර වැඩිපුර හැදුණු ඇසිඩ් කෙලින්ම බඩේ බිත්තිවල වදින්න ගන්නවා. ඒකයි අර දැවිල්ල විදියට අපිට දැනෙන්නේ.
3. Stress එකක් ආවම අපේ ඇඟෙන් ආමාශයට යවන ලේ ටික එක අඩු කරනවා. එතකොට ඇසිඩ් වලින් වෙන පොඩි පොඩි තුවාල සුව කරගන්න තියෙන හැකියාව නැති වෙලා යනවා.
4. හිතේ තියෙන කලබලයට බඩේ ආහාර ජීර්ණය වෙන වේගයත් වෙනස් වෙනවා. සමහර වෙලාවට කෑම බඩේ හිරවෙලා වගේ තියෙනවා. එතකොට ඒ කෑම දිරවන්න තව තවත් ඇසිඩ් හැදෙනවා.
කොච්චර බෙහෙත් බිව්වත් gastritis අඩු වෙන්නේ නැත්තේ ඒකයි.
ඔයාගේ මනස සන්සුන් නැත්නම් ඒ ලෙඩේ සුව වෙන්නේ නෑ.

අපි මොකද කරන්නේ?

හිතට වද දෙන ප්‍රශ්නය මොකක්ද කියලා හඳුනාගන්න. (Job එකේ ප්‍රශ්නයක්ද? පවුලේ ප්‍රශ්නයක්ද?)
පැය 7-8 ක සුව නින්දක් අනිවාර්යයි. ඒක ඔයාගේ ආමාශයේ තුවාල හොඳ වෙන්න උදව් වෙනවා.
දවසට විනාඩි 10ක් හරි ආගමික වතාවත්, භාවනාවක් හෝ කැමතිම සින්දුවක් අහලා හිත නිදහස් කරගන්න.
ඒත් හරියන්නේ නැත්නම් මනෝ වෛද්‍යවරයෙක් එක්ක ඔබේ මානසික පීඩනය ගැනත් කතා කරන්න. 

අවශ්‍ය නම් Counseling වලට යොමු වෙන්න බය වෙන්න එපා.

මේ වගේ තවත් සෞඛ්‍ය තොරතුරු දැනගන්න අපේ පේජ් එක Follow කරන්න.
සමාජය දැනුවත් කිරීම යුතුකමක් කියලා මම හිතන නිසා කාර්ය බහුල උනත් මේ වගේ දෙයක් ලියන්න වෙලාව වෙන් කරගන්නවා. මට පුලුවන් ලියලා දාන්න විතරයි. මගේ facebook පිටුවේ ඉන්න අය මේක දකී. 

මේ ලිපිය තව අයට දකින්න share කරන්න. කාටමහරි වැදගත් වේවි.

වෛද්‍ය ගයාන් සෙනෙවිරත්න.
© Dr. Gayan Senevirathne
Please share, not copy-paste, to keep the info accurate and updated.
නිවැරදි තොරතුරු සඳහා Share කරන්න. Copy paste කරන්න එපා.
#DrGayan, #MedicalCare #HealthyLifestyle #healthtips #Gastritis_Gayan

A day in the life

Read More

නාලන්දාව .

පෙරදිග ලෝකයේ පැවති උසස් අධ්‍යාපනය කෙබඳුද?

මෙහි විශ්ව විද්‍යාල තිබිණ.

ඉන්දියාවේ අද "රාජ්හිර්"ලෙස හැඳින්වෙන එදා "රජගහ නුවර"නම් වූ

නගරයෙන් සැතපුම් හතක් උතුරු දිසාවෙන් වූ

"නාලන්දාව" ඉන් එකකි.

මෙහි සිසුන් දසදහසක් නේවාසිකව අධ්‍යපනය ලැබූ අතර,

ඔවුන් නේවාසිකව සිටි තට්ටු පහේ සිට නවය දක්වා වූ

ගොඩනැගිලි එකොලහක් දැනට සොයාගෙන ඇත.

මේ ගොඩනැගිලිවල බිත්තියක පලල අඩි හතකි.

එකක දිග අඩි 203 කි.

පලල අඩි 168 කි.

පියගැට පෙලක පලල අඩි 32 කි.

කාමරයක් අඩි 10-12 කි.

ඒවායේ ගලින් නෙලන ලද ඇඳන්ය.

හැම තට්ටුවකම මැද මිදුලකි.

එය වටා විවෘත ආලින්දයකි.

මෙහි ප්‍රධානියා හැඳන්වුණේ "කුලපති" නමිනි.

ආචාර්ය මණ්ඩලය 1510 කි.

"මානව"නමින් හැඳින්වුන සේවකයන් 1500 කි.

ඉගැන්වුන විෂයන් අතර භාෂාව,බුද්ධ දර්මය,දර්ශන ශාස්ත්‍ර

,ලෞකික විද්‍යාවන් හා ලලික කලාවන් විය.

ගිහි පැවිදි දෙපාර්ශවයම වූ අතර

තෙවසරක් පුරා නේවාසිකව අධ්‍යාපනය ලැබූහ.

මේ පිළිබඳව තොරතුරු ප්‍රධානකොට අපට ලැබෙන්නේ

චීන ජාතික "හියුං සියෑං"ගේ ගමන් විස්තරයෙනි.

මෙතුමාද මෙහි අධ්‍යාපනය ලබා ඇත.

මීට අමතරව "තාරානාථ,ඉත් සිං,පාහියන්,හුයි ලී

වැනි අයද තොරතුරු සපයයි.

මොන්ගෝලියාව,චීනය,කොරියාව,ජපානය,සුමාත්‍රා,ජාවා

ආදී රටවලින් පැමිණි සිසුන් මෙහි අධ්‍යාපනය ලදහ.

මෙම අති ශ්‍රේෂ්‍ඨ අධ්‍යාපන ආයතනය වනසා ලන්නේ

13වන සියවසේ භාරතය ආක්‍රමනය කරන

"භක්තියාර් බල්ජි" නම්වූ මුසල්මාන් ආක්‍රමනිකයා විසිනි.

අධ්‍යාපන ආයතනයක් යැයි නොමදැන

බලකොටුවක් යැයි සිතා මෙය කල බව කියති.

එකවර කඩා පැන එහි විසූ සියලු දෙනා

ඝාතනය කර ගොඩනැගිලි ගිනිබත් කල අතර

එම ගින්න තෙමසක් පුරා ඇවුලුනේ ලු!

Kalplanthaya

*** කමල් පී අලහකෝන් ගේ කල්පිනු ලන්තයෙනි.

A day in the life

Read More

දේ.සේ.බ.(දේශප්‍රේමී සේදුම් බළකාය)

(මගේ මිත්‍ර සිංහල ගුරැවරයෙක් සිටී.මේ ළඟදී අපේ ගෙදර පැමි⁣ණි ඔහු ආපසු ගියේ රැගෙන ආ ඇක්සයිස් පොතද අමතකවය. එය පෙරළා බැලූ මට එහි ඇත්තේ ළමයින් සඳහා ලියූ ආදර්ශ රචනා බව පෙනී ගියේය .සුළු සංශෝධන සහිතව මෙවර මානිගෙ තීරැව හැටියට පළවෙන්නේ එහි තිබූ එක් රචනාවකි .)
මේ ආණ්ඩුව කතා කිරීම හැරෙන්නට වෙන මෙලෝ වැඩක් කර නැතැයි එහි සතුරෝ නිතර⁣ දෙවේලේ කියති .එහෙත් හැත්තෑහය අවුරැද්දක් තිස්සේ තිබුණු යුද්ද හමුදාව,නාවුක හමුදාව,ගුවන් හමුදාව හා පොලිස් බළකායට අතිරේකව මේ ආණ්ඩුව බලයට පැමි⁣ණීමෙන් පසු රටේ ආරක්ෂක පද්ධතියට එක්කළ සේදුම් බළකාය ගැන උහු අමතක කරති .ආණ්ඩුවද තමන්ගේ නිහතමානිකම නිසා ඒ ගැන පුරසාරම් දොඩවන්නේ නැත.
සේදුම් බළකාය පිහිටුවා අවුරැදු එකහමාරකට වඩා නැතත් එය අවුරැදු සියගණන් පැරණි ඇතැම් බළකායන්ටද වඩා කාර්යක්ෂමතාවය අතින් ඉහළින් සිටී.එහි සේවය කරන්නන්ට ඉතා ඉහළ වැටුප් ගෙවන්නේ යැයි සතුරන් මඩ ගැසුවද ඒ පට්ටපල් බොරැය.එහි සේවකයින් පැය විසිහතරේම සේවයේ යෙදෙතත් ඔවුන්⁣ එසේ කරන්නේ ස්වේච්ඡාවෙනි.අවංක චේතනාවෙනි.ඇතැම් පාපතරයන් විසින් ඩෝබීන් හා අපුල්ලන්නන් හැටියට නිග්‍රහ කළද ඔවුහූ ඉන්ද්‍රඛීලයන් සේ නොසැලී සිය වගකීම ඉටු කරති .
සේදුම් බළකාය ගැන හැඳින්වීමක් කරතොත් එය ආණ්ඩුවේ සෑම වරදක්ම සේදීමේ නිල ජාතික සේවයයි .එහි සේවය කරන්නේ බෙහෙවින් කැපවුණු පිරිසකි.ආණ්ඩුව ප්‍රශ්නකාරී ,අර්බුදකාරී හා මෝඩ වැඩක් කළ විට හෝ එබඳු කතාවක් කියූ කල හෝ සේදුම් බළකාය මීවදයක් මෙන් ඇවිස්සෙයි.ඔව්හූ නිදහසට කාරණා බාල්දි ගණනින් ගෙනවිත්, භක්තියේ ⁣සබන් කුඩු යොදා, දේශප්‍රේමයේ බුරැසුවලින් ඒ ක්‍රියාව හෝ කතාව හෝ සෝදති.ඔවුන්⁣ට විනාඩි ගණනක් තුළ එය සෝදා, වේලා, ඔප දමා, තිබුණාටත් වඩා හොඳින් තැබීමට පුළුවන් බව ඔවුන්⁣ගේ සතුරන්ට පවා පිළිනොගෙන බැරිය.
ෆේස්බුක් පැමිණීමට පෙර ආණ්ඩුවලට මෙවැනි සේදුම් බළකායක් තිබුණේ නැත.ඒ කාලේ ආණ්ඩුවක් ඇනගත්තොත් ඇනගත්තාමය.නෑවොත් නෑවාමය.දැන් එසේ නොවේ .හදිසි අවස්ථාවකදී සේදුම් බළකාය ඇම්බියුලන්සයක් එනවාටත් වඩා වේගයෙන් පැමි⁣ණ පිරිසිදු කිරීම අරඹයි.අනතුරැව ⁣ආණ්ඩුව තකතිරු වැඩක් කලාද නැත්නම් අප එය වරදවා වටහා ගත්තාදැයි අපටම හිතාගන්නට බැරි මට්ටමට වැඩේ ගොඩය.
ඇමතිවරයෙක් ගොන් කතාවක් කියූ කල එහි ගැඹුරු යටි අරැත අපට කියාදීමට හපන් භාෂා විශේෂඥයෝ සේදුම් බළකායේ සිටිති.තමා එවැනි අර්ථාන්විත කතාවක් කියා ඇති බව ඇමති දැනගන්නේද එවිටය .ආණ්ඩුව කරන වැඩක් වකුරැ වූ විට, ඉන් පෙර නොවූ විරෑ ජයග්‍රහණයක් අත්වන බවද එය පෙනෙන්නේ නුවණැත්තන්ට පමණක් බවද වහාම අපට පෙන්වාදෙනු ලැබේ.එවිට රජ්ජුරැවන්ගේ ඇඳුම මෙන් ⁣එය තමන්ටද පෙනෙන බව සියල්ලෝ පිළිගනිති .සේදුම් බළකායේ නිර්මාණාත්මක ශූරතාවය එබඳුය.
කෙටියෙන් කියතොත් අපේ රට මේ ආණ්ඩුව අතින් ලිස්සා ගොස් ඉන්දියන් සාගරයට පතබෑවුණා යැයි මොහොතකට සිතන්න .සේදුම් බළකාය පුරැෂ ධෛර්යයෙන් නැගී සිට, රට මෙතෙක් ගොඩගැනීමට නොහැකි වූ⁣යේ එය ගොඩබිම තිබූ නිසා යැයි අපට පෙන්වා දෙනු ඇත.ආණ්ඩුව දුරදක්නා නුවණින් එය මහමුහුදට වැට්ටුවේ ගොඩදී ලබාගත නොහැකි වූ දියුණුව දියේදී ලබාගැනීමේ පරම පවිත්‍ර චේතනාවෙන් යැයි අපට ඒත්තු ගන්වනු ලැබේ.
සේදුම් බළකාය උතුම් රැකියාවක නියුතු වුවත් ,ඔවුන්⁣ මහඟු සේවාවක යෙදී සිටියත් මෙහි පොඩි කොස්සක්ද තිබෙන බව අකැමැත්තෙන් වුවත් කිව යුතුව තිබේ .ඒ දිගින් දිගටම හෝදන විට ඕනෑම රෙද්දක් දියවෙන බවය.දුර්වර්ණ වන වගය.එහෙත් "ය⁣කුනේ ඔච්චර හෝදන්න එපා,ඔහොම ගියොත් 2029 වෙනකොට තොපිට හෝදන්න රෙද්දක් ඉතුරැ වෙන්නේ නෑ" කියා ඔවුන්⁣ට කියන කෙනෙක් නැත.ඒ දිනපතා ගාගන්නා ජරාවේ හැටියට එය නිතිපතා සේදිය යුතු නිසා විය යුතුය.
තවත් එක පරහක් තිබේ .ඒ මේ විදිහට හෝදගෙන,හෝදගෙන ගොස් 2029 දී ඔවුන්⁣ට ඡන්දයද හෝදන්නට හැකිවේද කියාය.හැම දෙයක්ම හෝද හෝද යන සේදුම් බළකායට ඊළඟ ඡන්දයද හෝදන්නට හැකි වේවායි ජාතික ජන බලවේගයේ සියළු නෑදෑහිතමිතුරන් වෙනුවෙන් අපිදු ඉතසිතින් ප්‍රාර්ථනය කරමු!

සුන්දර නිහතමානි ද මැල්

A day in the life

Read More

ප්‍රබලම ආගම් තුනක් අතු බෙදී ගිය හැටි,

ලෝක ජනගහනයෙන් බිලියන 4.4ක්ම පිළිගන්නා එකම 'ආදි පිතෘවරයා' (Patriarch) ගැන ඔබ දන්නවාද? වසර 1,400ක් තිස්සේ ලෝකය කැළඹූ මහා යුද්ධ පිටුපස ඇත්තේ මේ පවුල් ආරවුලයි.
ලෝකයේ ප්‍රබලම ආගම් තුනක් එකම පවුලක අතු බෙදී ගිය හැටි, 

ඔබ නොඇසූ සත්‍යය 
ලෝකයේ ජීවත්වන මිනිසුන්ගෙන් බිලියන 4.4කට වඩා වැඩි පිරිසක් එකම ශ්‍රේෂ්ඨ ආදි පිතෘවරයෙකු තමන්ගේ මූලිකයා ලෙස පිළිගන්නවා. පුදුමයට කරුණ නම්, පසුගිය වසර 1,400 පුරාම මේ පිරිස් එකිනෙකා සමඟ යුද්ධ කරමින් ලේ හලා ගන්නේද එම උරුමයේ අයිතිය වෙනුවෙන් වීමයි.
කිසිවෙකු ප්‍රසිද්ධියේ කතා නොකරන ඒ සත්‍යය
ඉස්ලාම්, ක්‍රිස්තියානි සහ යුදෙව් දහම යනු එකිනෙකට වෙනස් කථාන්දර තුනක් නොවෙයි. ඒවා එකම පවුල් ගසකින් ඇරඹුණු අතු තුනක්. මේ මහා ප්‍රවාහය ආරම්භ වන්නේ මීට වසර හාරදහසකට පමණ පෙර කාන්තාරයේදී දෙවියන්ගේ හඬට සවන් දී ඒ පසුපස ගිය 'එබ්‍රහම්' (Abraham) නම් ශ්‍රේෂ්ඨ ආදි පිතෘවරයාගෙන්.
ආගමික විද්වතුන් සියලු දෙනාම පාහේ මෙයට එකඟ වනවා. බයිබලයේ උත්පත්ති පොතට සහ ආගමික ඉතිහාසයට අනුව, එබ්‍රහම් යනු "ජාතීන් බොහෝමයක පියා" හෙවත් ලොව ප්‍රධාන ආගම් තුනක මූලපුරුෂයායි.
ආගම් තුනක්. එකම මූලපුරුෂයෙක්. එකම පැරණි පොරොන්දුවක්.
එකම පවුල ආගම් තුනකට බෙදුණු ආකාරය
එබ්‍රහම්ට පුතුන් දෙදෙනෙක් සිටියා. ලෝක ඉතිහාසය දෙපැත්තකට බෙදෙන්නේ මෙතැනින්.
ඔහුගේ වැඩිමහල් පුත්‍රයා වූ 'ඉස්මායෙල්' (Ishmael) උපන්නේ හාගර්ටයි (Hagar). දෙවන පුත්‍රයා වූ 'අයිසෙක්' (Isaac) උපන්නේ ඔහුගේ බිරිඳ වූ සාරාටයි (Sara). මවුවරුන් දෙදෙනෙක්, පුතුන් දෙදෙනෙක් සහ ඉරණම් දෙකක් හරහා ලෝක ආධ්‍යාත්මික ඉතිහාසයෙන් අඩකට වඩා ලියවුණා.
එබ්‍රහම් තම පුතුන් දෙදෙනා ලෝකයේ විවිධ ප්‍රදේශවල පදිංචි කළා: ඊසාක්ව ජෙරුසලම (Jerusalem) අසලත්, ඉස්මායෙල්ව මෙක්කාව (Macca) අසලත්. 'අයිසෙක්' (Isaac) පෙළපතින් යුදෙව් දහම ව්‍යාප්ත වූ අතර, පසුව ජේසුස් වහන්සේ උපත ලැබුවේද එම යුදෙව් සම්ප්‍රදාය තුළමයි. ඉස්ලාම් දහම සිය ආධ්‍යාත්මික උරුමය 'ඉස්මායෙල්' (Ishmael) හරහා හඹා යනවා. මුස්ලිම්වරුන් විශ්වාස කරන්නේ එබ්‍රහම් සහ ඉස්මායෙල් එක්ව මෙක්කාවේ 'කාබා' (Kaaba) ශුද්ධස්ථානය ගොඩනැඟූ බවයි.
එකම සීයා. යාඥා ක්‍රම තුනක්. දිශාවන් තුනක්.

මේ පවුල කොපමණ විශාලද?
නවතම වාර්තා සහ ඇස්තමේන්තු අනුව මෙම ආගමික පවුලේ සාමාජික සංඛ්‍යාව මෙසේයි:
ක්‍රිස්තියානි දහම: ලොව විශාලතම ආගම ලෙස අනුගාමිකයින් බිලියන 2.3–2.4 කට ආසන්න පිරිසක් සිටිනවා.
ඉස්ලාම් දහම: වේගයෙන්ම ව්‍යාප්ත වන, බිලියන 2.0 ක පමණ අනුගාමිකයින් පිරිසක් සිටින දෙවන විශාලතම ආගමයි.
යුදෙව් දහම: අනෙක් ආගම් දෙකටම මුල පෑදූ පැරණිතම දහම වන මෙහි අද සිටින්නේ මිලියන 15–16 ක පමණ පිරිසකි.
මොවුන් සියල්ල එකතු කළ විට බිලියන 4.4 කට වඩා වැඩි පිරිසක් 'එබ්‍රහමික ආගම්' (Abrahamic Religions) අනුගමනය කරනවා. එය මුළු පෘථිවියේ ජනගහනයෙන් අඩකටත් වඩා වැඩි ප්‍රමාණයක්!

ගැටලුව මතු වන තැන
මේ කතාවේ ඇති අවංකම පැත්ත මෙයයි. මෙම ආගම් තුනම රබ්‍රහම්ව තමන්ගේ 'ආදි පිතෘවරයා' ලෙස පිළිගත්තත්, ඒ සඳහා ඔවුන් ඉදිරිපත් කරන දේවධර්මීය හේතු වෙනස්.
යුදෙව්වන් එබ්‍රහම්ව දකින්නේ දෙවියන් සමඟ මුල්ම ගිවිසුම ඇති කරගත් තම ජාතියේ පියා ලෙසයි. ක්‍රිස්තියානීන් ඔහුව දකින්නේ සියලු ඇදහිලිවන්තයන්ගේ ආධ්‍යාත්මික පියා ලෙසයි. ඉස්ලාම් දහම උගන්වන්නේ එබ්‍රහම් යනු මුල්ම 'මුස්ලිම්වරයෙකු' (දෙවියන්ට අවනත වූවෙකු) බවත්, පසුව වෙනස් වූ දහම් නැවත නිවැරදි කිරීමට ඉස්ලාමය පැමිණි බවත්ය.
එබැවින් මේ පාර්ශව තුනම පවසන්නේ "එබ්‍රහම් අයිති අපට" කියායි. පොදු ආදිපුරුෂයෙකු සිටි පමණින් ඔවුන්ගේ ඇදහිලි පොදු වන්නේ නැහැ. ක්‍රිස්තියානි දහමේ මූලික ඉගැන්වීම් යුදෙව් හෝ ඉස්ලාම් දහම පිළිගන්නේ නැහැ.
මෙහි සැබෑ අර්ථය කුමක්ද?
අද අප පුවත්පත්වල දකින ගාසා තීරයේ ගැටුම් හෝ මැදපෙරදිග අර්බුද යනු නන්නාඳුනන පිරිස් අතර ඇති වූ ගැටුම් නොවෙයි. මේවා දේවධර්මීය අර්ථයෙන් ගත් කල 'පවුල් ආරවුල්' (Family disputes) ලෙස හැඳින්විය හැකියි.
පවුල් ආරවුල් බොහෝ විට සාමාන්‍ය රණ්ඩුවකට වඩා දරුණු විය හැකියි. ක්‍රිස්තියානි, මුස්ලිම් හෝ යුදෙව් භක්තිකයෙකු යාඥා කරන විට, ඔවුන් සියල්ලන්ම උත්සාහ කරන්නේ වසර දහස් ගණනකට පෙර එබ්‍රහම් නම් ආදි පිතෘවරයා ඇරඹූ ඒ මහා ආධ්‍යාත්මික ගිවිසුම හා සම්බන්ධ වීමටයි.
ඔවුන් ජේසුස් වහන්සේ කවුද, කුරානයේ අර්ථය කුමක්ද, පොරොන්දු දේශය අයිති කාටද යන්න ගැන දැඩි ලෙස එකිනෙකා සමඟ තර්ක කරනවා. සැබවින්ම ඔවුන් රණ්ඩු වන්නේ "පියාගේ උරුමය" අයිති කාටද යන්න ගැනයි.
නමුත් කිසිවෙකු නොකියන කටුක සත්‍යය නම්, පියා කිසිවිටෙකත් මෙය එක් අයෙකුට පමණක් උරුම කර දීමට අදහස් නොකළ බවයි.
අවසාන වශයෙන්
මීළඟ වතාවේ යමෙකු මේ ආගම් අතර කිසිදු සමානකමක් නැතැයි පවසන විට, ඔබ සැබෑව දන්නවා. ඔවුන් අතර ඇති වෙනස්කම් සහ ආරවුල් සැබෑවක් මෙන්ම භයානකයි. නමුත් මේ ඉතිහාසය දෙස බලන විට අනෙක් පාර්ශවයේ සිටින පුද්ගලයා නන්නාඳුනන අයෙකු ලෙස හැඳින්විය නොහැකියි.
ඔවුන් අවම වශයෙන් ඔබගේ ඉතා දුරස්ථ ඥාති සහෝදරයෙකු වැනියි.
මෙම ආගම් තුනටම මෙතරම් සමීප සහ පොදු මුල් පවතින බව ඔබ මීට පෙර දැන සිටියාද?

 ඔබේ අදහස් පහළින් කමෙන්ට් කරන්න
මූලාශ්‍රය: Britannica, History.com, Pew Research Center
#abraham #abrahamicreligions #islam #christianity #judaism #worldreligions #religionexplained #srilanka #humblecitizen

මුණු පොතෙන්  - #humblecitizen

A day in the life

Read More