අලියා නොනැගිටින්නම වැටී ඇත්ද ?.

අලියා නොනැගිටින්නම වැටී ඇත්ද ?. එසේ සිතනවා නම් එය වැරදිය. ශ්‍රීලනිපයේ ලේකම් වරයාට අනුව අලියා සියදිවි නසා ගෙනය. නැත්නම් සියදිවි නසාගැනීමට සූදානමින් සිටියි. පුරසාරම් දොඩන ඇත්තෝ 1977 දී ඇතිවු ධාර්මිෂ්ඨ සමාජයේ උදාව සිහිපත් කරන්නේ නම් මැනවිය. බින්දුවට බැස තිබු එජාපය නැගිට්ට වන්න JR 1970 පරාජයේ සිටම වැඩ කලේය. නරක ආදර්ශ ඇතිව වුවද පාසල් සිසුන්ගේ සිට විවිධ තරාතිරමේ ජනතාව හට දේශපාලන සටන් පාඨ , දේශපාලන බලාපොරොත්තු ලබා දෙමින් එජාපයට ජීවය ලබා දී 1977 වන විට 2/3 ක බලයක සිටි රජයක් අතු ගා දමන්නට සමත් විය.

අදත් තනි දේශපාලන පක්ෂ යක් ලෙස වැඩිම චන්දදායකයයින් පිරිසක් බුක්තියේ සිටින එකම දේශපාලන පක්ෂය එජාපය මිස වෙනත් පක්ෂයක් නැත. අද එජාපයට සිදුව ඇත්තේ නව JR කෙනෙකු නැතිවීමය. 1970 JRගේ දේශපාලන උපක්‍රම වර්තමානයේ ආදේශ කිරීමෙන් දණ ගාන්නවත් නොහැකිය. වලං බිදින කොට හෝන් ගහන කොට ජනතාවට හිනා යන්නේ ඒ නිසාය.

රනිල්ට නායකත්වනය අතහැර යා නොහැක. එතුමන් කෙරෙහි එජාපය බිම් මට්ටමේ සාමාජිකත්වකයේ විශ්වාසය ඇතැත් ජයග්‍රහණය උදෙසා ලං කරගත යුතු සාමාජික නොවන ජනතාවගේ විශ්වාසය නැත. එම විශ්වාසය සදාකාලිකවම එතුමාට නම් දිනා ගත නොහැක.මොනවා උනත් පක්ෂයට පමනක් කතිරය ගහන පිරිසගෙන් පාලක බලය ලබා ගත නොහැක. බලය ලබා ගැණිමට නම් මොන පක්ෂයකට වත් නැති අයගේ ඡන්ද ලබා ගත යුතුය.
මෙතෙක් කලක් මොන පක්ෂයකට වත් නැති අයගේ ඡන්ද ලබා ගැණිම සදහා වැඩ සටහනක් එජාපයට තිබුනේ නැත. මොන පක්ෂයකට වත් නැති අය බලයට පත් කරන පක්ෂයෙන් රැකී රක්ෂා . නිලතල , රට බීම බලපත්‍රල,මාර්ග බලපත්‍ර ආදී කී නොකී වරදාන බලාපොරොත්තුව ඡන්දය දෙන්නේ නැත. ඔවුන් ගේ එකම බලාපොරොත්තුව යහපත් සමාජයක් රට තුල ස්ථාපනයවීමය. යහපත් සමාජයක් ස්ථාපනය කරන බවට ඉගියක්වත් කිරීමට තප්පුල්ලන එජාපයේ නායක කාරකාදීන්ට මෙතෙක් හැකිවුනේ නැත.

JR 1970 දී මුලින්ම කලේ ධාර්මිෂ්ඨ සමාජයක් බිහිකරන අන්දම ගම් මට්ටමේ සිට තහවුරු කිරීමේ ප්‍රචාරක ව්‍යාපෟතියක් දියත් කිරීමය. 1977 වන විට ඇට අටක් ද එකතු කරගත් ඔහු සමාජයේ සියළු මට්ටම් අමතමින් ජයග්‍රහණයේ අවසන් අදියර දක්වා ජනතාව කැදවා ගත්තේය. ධාර්මිෂ්ඨ සමාජය බිහිවිය.

ඒ හපන් කම අදත් කරන්නට හැකි වුනත් ජනතාව ගමන් ගන්නා අත තේරුම් නොගෙන ජනතාව තමන් යන අතට කැදවා ගෙන යාමට දරන උත්සහාය තුල මොන පක්ෂයකට වත් නැති අයගේ ඡන්ද ලබා ගැණිමට එජාපය දරන උත්සහාය සාර්ථක වන්නේ නැත.
එයට පිළියම් යෙදිය හැකි කවරෙකු හෝ නායකත්වයයට පත්වු දාට අලියා කෙලින් සිටුවීම සරල කාරණයක් වනු ඇත. ඔන්න බබෝ බිල්ලෝ එනෝ යන කියමන් වලට මුලා වන්නේ නැතිව එජාපය නියම ලෙසින් වැඩට බැස්සොත් ශ්‍රීලනිපයේ ලේකම් වරයාට දුවන්න පාරක් වත් සොයා ගත නොහැකි වනු ඇත. ඒත් කාල සටහන දිග හැරෙන විදියට නම් දැන් හොදටම පරක්කුය.

සංකීර්න ප්ලෑන් එකක්.

අද බාලයින්ට නොයෙක් පූර්වාදර්ශ සිහිපත්වනවා . සිහිපත්වූවාට ක්‍රියාත්මක කරන්න ගියොත් සිද්ධවන්නේ ඒවා සිද්ධ කල පූර්වාචාරීන්ට සිද්ධවුන වින්නහැයියම තමන්ටත් අත්වෙන එකයි.තමන් ගැනම සිතූ ‘ධාර්මිෂ්ඨර්’ ඡන්ද සිතියම අකුලා දැම්මා.ඒ වකවානුවේ අසල්වැසි රටවලත් පාලකයෝ වෙලා හිටියේ සමාන මානසිකත්වයක් තිබුන අය.සියා උල් හක් සුල්පිකාර් අලිගේ බෙල්ලට තොන්ඩුව දමන කොට මෙහේ සිරිමාවෝගේ කකුලට ලොකු යකඩ බෝලයක් දමලා බැදලා දැම්මා. ඒවයින් ඇති වුන දේශපාලන මානසික පීඩනය තවමත් මේ හැම රටකම නිට්ඨාවට සුවපත් වෙලා නෑ. විවිධ රෝග ස්වරූපයෙන් යලි යලි මතු වෙනවා.

අපිට උරුම වෙලා තියෙන්නේ නියමිත කාලෙට ඡන්දේ පාවිච්චි කරන්න විතරයි. ජනතා පරමාධිපත්‍යය ජනතාව අතේ රැදී තියෙන්නේ සීමිත මොහොතයි. ඒ ජනතාව චන්දේ පාවිච්චි කරනකන් විතරයි.ඊට පස්සේ පරමාධිපත්‍යයයේ උරුමක්කරුවා වෙන්නේ චන්දෙන් දිනන නියෝජිතයායි. මේ උරුමක්කාරයා එතැන් සිට ජනතාවගේ කරුමක්කාරයා වෙනවා.ජනතාව වත්ත බද්දට දීලා ඇස්සට දත නියවනවා.
දඹුල්ලේ පැත්තේ මේ දවස්වල තදට පායනවා වෙන්න ඇති රස්නේ වැඩි උනාම පිස්සු තද වෙනවා. ප්‍රාදේශීය සභාවක යෝජනාවක් ගෙනාවා කියලා ඒ පැත්තෙම ඇමති කෙනෙක් කියනවා.ඡන්දේ ජනමත විචාරනයක් වී මහින්ද මහත්තයට අවුරුදු 12ක පාලන සමයක් නිර්මානය කරලා දෙන්න ඕනෑ කියලා .ජනාධිපතිවරනයක් තිබ්බත් වෙන්නේත් ඒකම තමයි.ඒත් ලිහන්න තියෙන මල්ල ඔබා බලන්නේ නැතිව ලිහලාම බලමුකෝ. වෙනසක් නෑනේ.නිකම් මඩ ගාගන්න ඕනීත් නැහැනේ. මතකද පරන කතාවක් තියෙනවා රජෙකුට හිටිය විශ්වාසවන්ත වදුරෙක් ගැන . මැස්සෙක් රජතුමාගේ බෙල්ලේ වහපුවහම කඩුව අරන් මැස්සව එක කඩු පාරින් මරලා දාපු. ඇමති තුමාත් ඒ චරිතය රගපානවා වගෙයි.

ආණ්ඩුව මාධ්‍ය. ප්‍රකාශ කරමින් අනේ අපිට එහෙම අදහසක් ඇත්තේම නෑ. තිබුනේමත් නෑ කියනවා.කලින්ම ඔය වගේ මෝඩ අදහස් කියන ඇත්තතන්ට ප්‍රතිකාර කලා නම් තමයි හොද.එතකොට නිකම්ම මඩ නාගන්න වෙන්නේ නැ.
ජනාධිපතිතුමා කිව්වා දැන් රටේ සිටිය යුත්තේ දේශප්‍රේමීන් සහ දේශද්‍රෝ හීන් යන කොටස් දෙක පමනයි කියලා. ඇත්ත .............. මේ කොටස් දෙක වෙන් කරන්න නිර්නායකයින් කොතෙක් තියෙනවද ?.එජාපය නිර්වචනය කරන විදිහට නෙමෙයි. ශ්‍රීලනිපය නිර්වචනය කරන්නේ.ජවිපෙය නිර්වචනය කරන විදියට නෙමෙයි ද්‍රවිඩ සන්ධානය නිර්වචනය කරන්නේ මේ හැම කෙනාම වෙන් වෙන්ව ජීවත්වන්නේ වෙන වෙන රටවල් වල.ඒ රටේ නායකයා තමන් කියලා හිතා ගෙන. තමන් හැර අනෙක් සියල්ලෝම දේශද්‍රෝහීන්.
දඹුල්ලේ ඇමති තුමාට සැකයක් ඇතිවෙලා වගෙයි මේ දේශප්‍රේමීන් සහ දේශද්‍රෝ හීන් යන කොටස් දෙක ගැන. සිංහල චන්ද වගේම අනෙක් ජාතීන්ගේ චන්ද දිනා ගත්ත දවසට ඇමතිතුමාට පුළුවන් එතුමාගේ දේශප්‍රේමීන්ගේ ගොඩ වැඩි කරගන්න. තවමත් එහෙම වෙලා නෑ.
උතුරේ ,වතුකරේ සහ නැගණහිර අපි හිතන නිර්ණායක තුල ජීවත්වන දේශප්‍රේමීන් සහ දේශද්‍රෝ හීන් නැහැ.උතුරේ සහ නැගණහිර ඔවුන්ට අහිමිවු දේපල, දූ දරුවෝ, අඹු දරුවෝ නෑ හිතවතුන් අහිමිවුනේ සිංහල හමුදාවක් සමග ද්‍රවිඩ හමුදාවක් කල සටනකින්.අපි ත්‍රස්තවාදය ලෙස හදුන්වතත් ඔවුන් LTTEය හදුන්වන්නේ ත්‍රස්තවාදීන් ලෙස නොවන්න පුළුවන් .අපිට මේ විරසක බව සමනයකට පත් කරගන්න වෙනවා.
ගියවර ජනාධිපතිවරණයේදී ප්‍රභාකරන් චන්දය පාවිච්චි කරන එක වැලක්වු නිසා ඇමති තුමාගේ දේශප්‍රේමීන් යාන්තමින් ජයග්‍රහණය කලා . ස්වාධීනව ද්‍රවිඩ ජනතාව චන්දය පාවිච්චි කලා නම් රනිල්ගේ දේශප්‍රේමීන් දිනනවා. අදත් මේ වෙනස සමනය වෙලා නෑ.මැතිවරන ඉතිහාසය විග්‍රහ කලොත් සිංහල ජනමතයට එරෙහිවු ගමනක නිරත වෙලා තියෙනවා ද්‍රවිඩ ජනමතය.
ඒ බයට ඇමතිතුමාට ලාම්පු කලගෙඩි හීනෙන් පේනවද ?.

ජනතා අපේක්‍ෂාවත් ඒකමයි.

රටේ දු දරුවන්ගේ තාත්තා රණවිරු උපහාර උලෙළදී ජාතිය අමතා කළ කතාව නම් බොහෝම හැගීම් බරයි. කතාවක් නොවී අපට ආවේනික දේශීය නිෂ්පාදනයකින් ජාතික ප්‍රශ්නයට විසදුමක් හොයාගන්නා ප්‍ර තිඥාව නම් යථාර්තයක් වෙන්න ඕනී.ජාතික ප්‍රශ්නය කියන්නේ උතුරේ නැගණහිර තිබුන ත්‍රස්තවාදය විතරක් නෙමෙයි. ත්‍රස්තවාදයේම අංග තමයි රාජ්‍ය දූෂණය, නාස්තිය,මේවත් මුලින් උපුටා දාන්න ඕනී.විදේශීය මූල්‍ය ආයාතන වලින් අයවැය පරතෙරය පියවගන්න බලා ඉන්නේ නැතිව දේශීය නිෂ්පාදනය ඉහල දාගෙන ,නාස්තිය බින්දුවට බස්සා ගත්තොත් මේ වැඩ කජ්ජක් නෙමෙයි.දැන් යුද්ධයට ගිය නාස්තිය සංවර්ධණයට පොම්ප කරන්න පුළුවන්නේ.
වර්තමාන පාලනය ගැන විශ්වාසයක් තියා ගෙන ඉන්න ජනතාව යුද්දේ ගැන හිතුවා වගේ ඉවසීමෙන් කටයුතු කරයි. නැත්නම් වෙන්නේ ජනතා සිතුම් පැතුම් ආයාලේ ගිහින් විකල්ප නායකයෝ ගැන සිතිවිලි ඇතිකර ගන්න එකයි. රට ආයාලේ යන එකයි. බඩ ගැන ගැන හිතන රට ගැන නොහිතන ලොකු ලොක්කෝ ආදර්ශයට ගන්න ඕනී අපේ රණවිරුවෝ. අතිකාල නොතිබුන පැය අටේ සේවා මුරයක් නොතිබුන කෑම පැයක් නොතිබුන අයිස් ගැහිල්ලක් නොතිබුනු රණවිරුවෝ ඇස් ඉස් මස් දන් දීලා ජීවිත පූජා කරලා අපට රටක් ඉතිරි කලා, නම් ඇයි බඩ ගිනි රජයේ සේවක හමුදාවට බැරි පැය අට හරියට වැඩ කරන්න.
පාසල් වල නිවරදි කාල සටහනට අධ්‍යයන වසර තුල ඉගැන්වීමේ කටයුතු නිසි අයුරින් කලොත් දරුවන්ට ටියුෂන් ඕනිද ?. පංතියේ බාගයක් උගන්වන ගුරුවරයා හවස ටියුෂන්. ටියුෂන් පංතියට නොගියොත් විෂය නිර්දේශය සම්පුර්න කරගන්න බැරිව දරුවා අතරමග. දරුවන් ගේ විභාග ,විභාගවල උත්තර පත්‍ර වෘත්තීය ගැටළු විසදා ගන්න දරුවන් ප්‍රාන ඇපේට ගන්නේ අපේ ගුරුවරු. රජයේ කාර්යාලවල මාසේ උපරීම අතිකාල පැය ගනන වැඩට යන සේවක මහත්වරු නෝනාලා කාර්යාල පැය තුල පත්තර සගරා නවකතා කියවමින් කල්මරනවා.පොඩ්ඩ බැරිවෙන්න බෑ වර්ජනය: ඉල්ලීම් දෙනතුරු. ඒත් තමන්ගේ රාජකාරි යුතුකම් ඉටු කරන්න නම් හරිම හොරයි. දේශපාලකයෝ ඇමති කම් , බලතල වරදාන නුදුන්නොත් අයවැය වගේ මර්මස්තානයකදී කරනම් ගහනවා . ඒචත් ත්‍රස්තවාදය තමයි. මේ එකෙක් වත් රට ගැන හිතනවාද.
එක් උදාහරනයක් සටහන් කරන්නම්. සමහර අය නව වගා ව්‍යාපෘති හදන්නේ හිස් වගා ඉඩම් තිබියදී පාරම්පරික වනාන්තර දිහා බලා ගෙන.ඒවා එලිපෙහෙලි කරලා අපනයන බෝග වගා කරන්න.දෙපැත්තෙම්ම ගලන්නේ ජරාව. ගස් කොලන් මොරටුවට යනවා. ඒත් සල්ලි.ව්‍යාපෘතිය පන ගන්වන්නේ ජාතික හෝ විජාතික සමාගම් . කොමිස් ( ජරාව) හැටියට සාක්කුවට .මේ වගේ තව කොච්චර වැඩ වෙනවද ?. ඇමති තනතුරුම ශතකයක් විතර තියෙනවනේ. හැමෝගෙම අධිෂ්ඨාණය මෙහෙම නම් රටක් හැදෙයිද ඉතින් ?.
මේ වගේ වැඩ නතර කරන එකත් මානුෂික මෙහෙයුමක්.
මම හිතන විදියට ඒ මෙහෙයුම පටන් ගන්න ඕනී පාර්ලිමේන්තු මැතිවරණයකින් . මේ දවස්වල ජනමතේට චන්දේ දෙන්නේ මහින්ද මහත්තයට නිසා 2/3 ක පාර්ලිමේන්තුවක් ගැත්තන්ගෙන් නිර්මානය වෙයි. නාමයෝජනා දෙන්න ඉස්සෙල්ලාම දින රහිතව පාර්ලිමේන්තු මන්ත්‍රී ධුරයෙන් ඉල්ලා අස්වෙන ලිපි අරගෙන නාස් ලණුව අතේ තියාගන්න ඕනී.ජේ.ආර් මෙතඩ් එකට. ඇමතිකම් සීමා කරගෙන ජරා වැඩ කලොත් පයින් ගහලා එලවන්න ඕනී.එක්කෙනෙක් දෙන්නෙකුට දුන්නම අනිත් අය පාඩමට අරන් නිකම්ම ජාති හිතෛෂින් වෙයි.සංයුතියට ගැටළුචක් නැහැනේ යටින් ඉන්න කෙනා ස්වය ංක්‍රීයව උඩට එනවානේ.ඡන්දේ දුන්නට පස්සේ ජනතාවට බලය නැහැනේ එලවා දාන්න. මේ පවතින ක්‍රමය තුල ජනතාව කරන්නේ වත්ත බද්දට දීලා ඇස්සට දත නියවන එකනේ. පරමාධිපත්‍ය එක මොහොතකදී තනි කතිරෙන් නැති කර ගන්නා ජනතාවක් අපි. ඉතින් හරි මනුස්සයෙක් ජනතා ප්‍රාතර්ථනා නිසි ලෙස හසුරනවට ජනතාව අකමැති වෙන එකක් නෑ.
කාගෙවත් කාබන් කොපියක් නොවී අපේ රට අපේ රටම විය යුතුයි.

ආවර්ජනක් සමග ප්‍රාර්ථනයක්.

වසරක් පුරා ගෙත්තම් කල මීදුම පසුගිය මාසය මන්දගාමී ගමනකට පත්වුනා. විවිධ තේමා සොයමින් ගිය මුල් කාලයත් පසු ගිය දීර්ග මාස කිහිපයත් පසුකලේ තත්කාලීන දේශපාලන තේමාවන් ගෙත්තමට මෝස්තර කරගනිමින්. මාවිල් ආරුවෙන් අරඹන ලද මානුෂික මෙහෙයුම අපේ ජීවිත අමුතු ඉසව්වක රිද්මයක් කරා යොමුකරමින් නන්දිකඩාල් කලපුව තෙක් ගමන් කළ රණවිරුවන්ගේ ගමනත් සමග බැදී තිබිණා . ඒ අතර රනිල්ගේ ගමන් මග නෝර්වේ පහසුකම් සපයන්නාගේ පා මුලින් අවසන් වුනා.

පලාත් සභා මැතිවරණ සියල්ලම ජයගත්තේ මානුෂික මෙහෙයුමේ ජනමතය. ජනතාව සියල්ල අමතක කර රට පමනක් පෙරටු කොට ගෙන ගමන් ගත්තා . පෙරමුනේ රාල වුනේ මහින්දයන් . එතුමා ලෙලවමින් ගෙන ගිය ජාතික කොඩියේ පංගුකාරයන් පොතේ න්‍යායට යටවී උඩුගං ගියා. ඹවුන්ට ජන ගග ගලන දෙසට පිහිනන්න දැන් කාලය ඇවිත් .නැත්නම් කැළෑ වදින්න තමයි සිද්ද වෙන්නේ. ඹවුන් හිතන්නේ එකවරම රට යටි උඩුකුරු කරන්න නම් ඒකත් යථා ස්වභාවය තුළ කොමඩියක්.

යුද්ධය ඉවරයි. දුෂණය තාම එතනමයි. සත් භාවයෙන් රාජ්‍ය සේවය කරන, දේශපාලනයේ නියුතු පිරිසක් නිර්මාණය කරගන්නා එක මානුෂික මෙහෙයුමට වඩා අමාරු කට යුත්තක් මේ අම්බරුවන්ගෙන් වැඩි කොටසක් රටට වඩා බඩ ගැන සිතන උදවිය. ටික දෙනෙක් තමයි රට ගැන හිතන්නේ. පාර්ලිමේන්තුවේ ඉන්න ඔක්කොම බලාපොරොත්තුවන්නේ ඇමතිකම් .ඇමති කමක් නැත්නම් සේවයක් කරන්න බෑ කියනවා .අනේ මන්දා රටටද ගෙදරටද ? කියලා.

රෙදි හෝදපු කට්ටිය විතරයි පසුගිය කාලෙම වැඩ කලේ . මේ කට්ටියම ශ්‍රීලනිපයට ආනනය කරපු අය. ශ්‍රීලනිපය තුල වැඩට තියා බුද්ධිමත්ව කතා කරන්න පුළුවන් අය පාර්ලිමේන්තුව තුළ ඉදලා නැහැ. මහින්ද සමරසිංහ, රාජිත,කෙහෙළිය,බන්දුල ගුණවර්ධන,දිනේෂ් ගුණවර්ධන,විමල් වීරවංශ වගේ අය විවිධ ඉසව්ව වල ඉදගෙන කරපු කාර්ය භාරය මිළ කරන්න බෑ. අපරාදේ 100 විතර ඇමතිවරු නඩත්තු කරන්නේ. ජනාධිපති තුමයි වැඩ පුළුවන් ඇමතිවරු ටිකයි රටට හොදටම ඇති . අපි චන්දේ දීලා යවලා තියන අයගේ මට්ටම රටටම පේන මේ මොහෙතේ රාජ්‍ය වියදම අඩු කරලා නාස්තියට තිත තියන්න එතනින්ම පටන් ගන්න ඹ්නී.
අල්ලසට හා දුෂණයට දැඩි දඩුවමත්, අල්ලසට හා දුෂණය අඹා යන හමුදාවක් ජනාධිපති තුමාගේ ආරක්‍ෂක අමාත්‍යාං ශය යටතේ පටන් අරන් ලොකු පොඩි සැමටම එක වගේ සැලකුවොත් මාසේ යන කොට රට හරියයි. කෘෂිකර්මාන්තය දියුණුවෙන්න කන්න දෙකයි ඕනී.
ජනතාවගේ මානසික පිබිදීමට පුංචි තල්ලුවකි ඕනී.ඒ තල්ලුව වේගවත් ගමනක් වෙයි ඉබේටම.
රට හැදෙන කොට අපිත් නිකම්ම හැදෙයි.

ජයග්‍රහණය පසුතැවිල්ලක්ව.

මීදුම සටහනක් තබන්නට පසුගිය කාලයම උත්සහාකලත් සිතිවිලි කටු සටහන තුලම සටහන්වී අසම්පූර්නව මකා දමන්නට අකාරුණික විය.පෞද්ගලික හේතුවක් නිශ්චිත නැති වුවද ජීවිතය කැළබී ඇති බවක් මනස ආකූල ව්‍යෘකූල වී ඇති බවක් දැනෙන්ට විය. මා වටා ගම් කිහිපයක දූ දරුවෝ සියයකට ආසන්න පිරිසක් හමුදා සේවයට එක්වී ඇත. මින් බොහෝ දෙනෙකුට හමුදාවට බැදීමට පුර්ව සුදුසුකම් සපයා ගැණීමට මට උපකාර කිරීමට සිදුවිය.මින් දහදෙනෙකුන් පමන විටින් විට පසු ගිය අසීරු ආක්‍රමික සමයේ තම ජීවිතය අප වෙනුවෙන් පුද කලාය.මේ විරුවන් මිහිදන්වු සොහොන් බිමේ තනිවු මා හැම විටම වගඋත්තර කරුවෙකුව කදුළු සැළුවාය.ඔවුන්ගේ ජීවිත නිරර්ථක වෑයමක් උදෙසා මිහිදන් වූවාද? යන්න ප්‍රශ්නයක්ව ඉතිරි කර ගත්තාය.
ප්‍රභාකරන් නන්දිකඩාල් කලපුවෙන් ජීවිතය අතහැර මිහිතලය සිපගත් පසු යලිත් ජීවිතය මා සොයා එන්නට පටන් ගත් සෙයක් දැනෙමින් පැවතීම යම් ආනන්දයක් විය.
මේ දැන් දකින්නේ තැන තැන කැවුම් කිරිබත් ‍ මහ මග පිසමින් බෙදා හදාගන්නා උද්වේග කර ජනතාවය. මහ මග පා පැදි, ත්‍රී රෝද , වැනි නන් රිය වල නැගී නොතේරෙන නොගැලෙපෙන සටන් පාඨ කියමින් බෙරිසන් දෙමින් යන හූදී ජනයාය. මොවුන් මෙහෙයන වන ගම් වැදි දේශපාලන බට්ටන්ට වීරයන්ව සිහිපත්ව ඇත්තේ මේ මානුෂික මෙහෙයුමේ සැබෑ වීරයන් වු ගමේ සිට හමුදා සේවයට එක්වු ගිනියම්වු අව්ව, ධාරානිපාත වැස්ස නොහදුනන වැලිතලා මඩ වගුරු කලපු පියමන් කල සහෝදර සහෝදරියන් හෝ ඔවුන් රටට ජාතියට දායාද කල මව්වරුන් පියවරුන් නොව ජනාධිපති තුමාය.
අවිවාදයෙන්ම එතුමා අපේ කාලයේ සැබෑ වීරයාය. නියමුවාය. අපේ සිත සතන් යාවජීව ව එතුමන් හැර නොයනු ඇත.
ඒත් ගමේ එකා පලමුව පෙරහැරෙන් ගොස් දන නමස්කාර කලයුත්තේ තවමත් නිවාඩුවක් නොලබා නිවසට නොආ සෙබළ විරුවාගේ මව් වරුන්ටය,පියවරුන්ටය. නැත්නම් බිරින්දැවරුන්ටය. අපේ ජීවිතවලට ආලෝකය ගෙන ඒමට හිරු සදුවු ඔවුන්ව අදම අමතක කර දමත් නම් එය කුමන අකෘතඥකමක්ද ?. සතුට බෙදා ගන්නේ හරයක් නොමැති ප්‍රදර්ශණයකට සහභාගීවී ලකුණු දමා ගැණීමේ වින්තනයෙන්වීම නම් බලවත්ම කනගාටුවකි.
මේ සෙබල විරුවන් බොහෝ දෙනා තරු පන්තියේ දෙමව්පියන්ගේ දූ දරුවෝ නොවෙති. බඩ ගැන දොඩමින් සිටින විට බඩත් රටත් ගැන සිතමින් හමුදාවට බැදුන මේ සත්පුරුෂයන්ගේ අගහිග කම් බොහෝය. හිසට නිසි වහළක් තමන්ට කියා බිම් අගලක් නොමැති මේ විරුවන් හමුදා සේවයේත් නිවසේදීත් ජීවත් වන්නේ බංකර තුළය.ප්රිටති ඝෝෂා කරන කොටස වහා ඒ දෙස හැරී බලන්නේ නම් කෙතරම් සුන්දරද.
සෝඩා බෝතලයක් කඩා හලවිට මිදී යන කාබන්ඩයොක්සයිඩ් වායුව මෙන් පෙළපාලි යන කිරිබත් උයාගෙන මහමග බෙදන හූදී ජනයා හට මේ බවක් සිහිපත්වන්නේ නම් නැත. උන්ගේ අස්වාභාවික සතුට තවදින දෙක තුනකින් වියකී ගිය පසු ඇස් මස් ලේ මව් බිම වෙනුවෙන් දන් දුන් විරුවන් අමතකය.

එජාපයට සහ ජවිපෙයට ඥාණය දෙනු මැනවි.

බස්නාහිර පලාත් සභා මැතිවරණය අවසන් විය. සුළු ජාතීන් බහුතර ඡන්දදායකයින් වන මැතිවරණ කොට්ඨාශ පහක එක්සත් ජාතික පක්ෂයට බහුතරය ලබා දෙමින් අනෙක් සියළුම මැතිවරණ කොට්ඨාශ එක්සත් ජනතා නිදහස් සන්ධානයට බහුතරය ලබාදීමට ජනතාව කටයුතු කලේය.
සිංහල බෞද්ධ ඡන්ද පදනම උතුරේ විසදුම නිවරදි බව තීන්දු කලත් සුළු ජාතික ජනතාව තවමත් දෙගිඩියාවකින් පසුවෙන්නේද ? .මුස්ලිම් සහ ද්‍රවිඩ ජනතාව මානුෂික මෙහෙයුම් දෙස වෛරයෙන් බලන්නේද ?. යන්න අපට සිතන්න ඉඩදී ඇති බවක් මෙම ප්‍රතිඵල දෙස බලන මට ප්‍රශ්න දෙකක් ඉතිරිවිය.
එක්සත් ජනතා නිදහස් සන්ධානයට ඡන්දය දුන් ඡන්දදායකයින්ගෙන් අතිවිශාල ප්‍රතිශතයක් තම කැමැත්ත පල කලේ සන්ධාණයටවත් අපේක්ෂායනටවත් නොව ජනාධිපතිවරයාටය. එතුමාගේ ජනප්‍රියතාවය නොවන්නට පුරසාරම් දොඩන්නට අනෙක් අයට කිසිවක් ඉතිරිවන්නේ නැත. ශ්‍රීලනිපය තුල නොතිබු ජවිපෙය රැගෙන ආ දේශප්‍රේමිත්වයේ ධජය මහින්දයන් අත ලෙල දෙද්දී ජවිපෙය කුණු ගොඩවල් බදා ගෙන වලපල්ලට යන්න පටන් ගෙන තිබෙන බවක් පෙනෙන්නට ඇත. ජනාධිපතිතුමා සුළුජාතීන් බහුතරයකගේ ආකර්ෂණය , විශ්වාසය දිනාගැනීමට වත්මනයේ ගන්නා යම් යම් පියවර සාර්ථක වුවහොත් රනිල් වික්‍රමසිංහයන්ට සිදුවන්නේ දවල් සිහින බලමින් නිදන්නටය.
එක්සත් ජාතික පක්ෂය ජයගත් මැතිවරණ කොට්ඨාශ පහ යම් තරමකින් දුමින්ද සිල්වා තිලංග සුමතිපාල වැනි එජාප චරිත එක්සත් ජනතා නිදහස් සන්ධානයට එම ආසනවලදී තම චන්ද ප්‍රමාණය වර්ධනයට හේතු සාධකයක් විය. කරු එජාපයට යලිත් සේන්දුවූවත් නාය යාම වලක්වා ගැණිමට නොහැකි බව ගම්පහ ප්‍රතිඵලය පෙන්වා දෙන්නේය.කෙලෙසවුවත් ජන චින්තනය දේශප්‍රේමී වින්තනය ක් තුල සිටින බවක් නිගමනය කළ හැක.ඔවුන් ආර්ථික අපහසුකම් තඹයකට නොසලකමින් රටේ ඒකීය භාවයට මුල් තැන දෙමින් කටයුතු කරන බව නම් පැහැදිලිය.
ත්‍රස්තවාදය පරාජය කල නොහැකිය යන මානසිකත්වයෙන් කටයුතු කල රනිල් දක්වා වු නායකත්වය ජනතාව විසින් ප්‍රතික්‍ෂේප කලේ මහින්දයන් ජනාධිපති කරවීමෙනි. සියළු සම්පත් එම මැතිවරණයේදී අත්පත් කරගෙන සිටි රනිල් පරදවා අමාරුවෙන් ජනාධිපතිවරණය ජයගත් මහින්දයන් වටා රොක්වන ජනතාව‍ගේ විඥාණය වැලද ගැණිමට එජාපයට නොහැකි වුවහොත් තව තවත් පල්ලම් බැසීමට සිදුවනු ඇත.
එජාපයට තවදුරටත් රනිල් නායකත්වයේ තබා ගෙන නම් ඒ ගමන යාමට නොහැකිවන අතර ජනතා විශ්වාශය ඇති නායකත්වයක ආදේශයක් වහාම එජාපයට අවශ්‍ය බව නම් පැහැදිලිය. ජවිපෙය , ජනාධිපතිවරණයෙන් පසු ඔවුන් කටයුතු කළ යුතු කෙසේද යන්න සාකච්චාවු කරුණු නැවත නැවතත් විමර්ශණය කර නිවරදි මගට ආ යුත්තේ රටට ජවිපෙයද අත්‍යවශ්‍ය දේශපාලන බලවේගයක් බැවිනි. (“ඇත්ත වෙනුවට නැත්ත “ පොතෙහි ඇතුලත් සෝමවංශ, නන්දන ගුණතිලක, විමල් වීරවංශ මත පලකිරීම් කියවන්න )

වර්තමානයේ LTTE ය ඇමරිකාවේ කෙමනක්‍ වෙලාද?

කොටි සංවිධානය යුධමය වශයෙන් අන්ත අසරන තත්වයකට පත්ව තිබේ. ඔවුන් අනියම්ව පාලනය කල ප්‍රදේශවල ජනතාවද පසුගිය වකවානුව තුල ස්වර්ග රාජ්‍යයක් බලාපොරොත්තුව අනන්ත දුක් කන්දරාවක් උසුලා ඇති බව රාජ්‍ය පාලනයට නිරාවරනය වන එම ප්‍රදේශයන් හී දුගී සමාජ ආර්ථිකය විමසන අපට පැහැදිලි වේ. ජත්‍යන්තර සංවිධාන කොටි පාලන ප්‍රදේශවල සිට සමාජ සුබ සාධනය පිනිස කල කෙන්ගෙඩියක් නොමැති බව අසරන මිනිසුන්ගේ ජීවන පරිසරය දෙස බලනවිට නිරාවරනය වේ. ඔවුන්ගේ ආර්ථිකය .දු දරුවන්ගේ අධ්‍යාපනය සුඛිත ජීවන රටාව මේ සියල්ල වර්තමානය වන විට විනාශව ගොසිනි.
යාපනයේ සිත්තන්කර්නි නම් ප්‍රදේශයේ ජීවත්වු මගේ මිත්‍රයෙකු මීට වසර විසිපහකට පමන පෙර මේ සියල්ල ලඝු කොට කී අනාවැකියක් මට සිහිපත් වේ. මම ජවිපෙ මෙන් සංවිධානයක් ලෙස කොටි සංවිධානය එකල විග්‍රහ කලෙමි.මම විශ්වාස කලේ යම් කලක දේශපාලනය තේරුම් ගැනීමෙන් පසු කොටි සංවිධානය ප්‍රජාතන්ත්‍රවාදී ප්‍රවාහයට එක්වීම සිදුවන බවයි. ඔහු “අපවත් විනාශ කර රටත් විනාශ කර මේ මිනිස්සුත් විනාශවනවා හැරෙන්නට වෙනත් දෙයක් සිදුවන්නේ නැත ” යන්න මට එදා පැහැදිලි කරන ලද්දකිද. මේ මිත්‍රයා අසනීපවු තම බිරිදට නිසි ප්‍රතිකාර කර ගැනීමට නොහැකිව තම බිරිදත් වයස අවුරුදු දහයක පමන පුත්‍රයාත් අහිමි කර ගත්තේය. උග්‍ර ලෙස කොටි ක්‍රියාකාරකම් සිදුවු අවධියක සිදුවු මෙම මරණ සදහා කොළඹ සිටි ඔහුට සහභාගීවීමට පවා නොහැකිවිය. පසු කලක ඉතිරි දරුදෙදෙනාත් සමග කෙටි කලක් වැල්ලවත්තේ පදිංවිව සිට විදේශ ගතවිය.
කොටි සංවිධානයට යහපත් දේශපාලන අරමුණු නොතිබූ බව අද වන විට පැහැදිලි වන්නකි. ඹවුන්ගේ අනියම් පාලන ප්‍රදේශ කාන්තාර බවට පත් කරගෙන ඇත. මිනිසුන් දුගියන් බවට පත් කර ඇත. අවුරුදු තිහක් තිස්සේ තම දේශපාලන අරමුන සාර්ථක කර ගැණීමට මිනී මැරීම හැර වෙනත් ව්‍යාපෟතියක් කොටි සංවිධානය කර නැත. තම අනියම් පාලන ප්‍රදේශයේ ජනතාව උදෙසා ත්‍රස්ත්‍රවාදී ක්‍රීයාකාරකම් පිණිස විනාශ කර ඇති ධනස්කන්දය යොදවා සංවර්ධනය කලා නම් කොටි සංවිධානය මේ එන විට උතුරේ නියම පාලකයන් බවට පත් වනවා නො අනුමානය.
තනියෙන් කන්න යාමේ න්‍යාය කොටි සංවිධානය පිට පටවා රජිව් ගාන්ධිගේ යුගයේ අපේ රට ඇමරිකාව දෙසට ඇදී යාම මෙල්ල කරගත් අතර , ඇමරිකාව විසින් අප ඉන්දියාව දෙසට ඇදී යාම නෝර්වේ බලල් අතක් කර ගනිමින් ඉටුකරගත්තාවත්ද ?. ජත්‍යන්තර බලපෑම් කොතෙකුත් ආවත් පසුගිය වකවානුව තුල කරුණු පැහැදිලි කර දී හෝ නෑසුනා වගේ සිට හෝ මේ තත්වසන් සමනයකට පත් කර කොටි සංවිධානය මෙල්ල කර ගැනීමට වත්මන් ආණ්ඩුවට හැකිවිය.
ඉන්දියාව අස්ථාවර කර ගැණිමේ පහසුවක් ඇමරිකාව දකින බවක් තමිල් නාඩු සාධකය හා ආදේශවන කොටි සංවිධානය පෙන්නවන බැවින් තවදුරටත් කොටි සංවිධානය ආරක්‍ෂා කර ගැණිමේ පිලිවෙතක් ඇමරිකාවට ඇතිවිය හැක. අසරනවූ මිනිසුන් තිස් හතලිස් දහසක් ප්‍රාන ඇපකරුවන් පිරිසක් ලෙස රදවා ගෙන සිටින අමානුෂික කොටි සංවිධානයට ආයුධ බිම තබා යටත් වෙන්න නොකියන ජත්‍යන්තර බලපෑම් ප්‍රජාතන්ත්‍රවාදී රජයකට සටන් විරාම යෝජනා කරන්නේ ඇමරිකාව වැනි රටවල වෙනත් අරමුණු ඇති බැවින් බව නම් පැහැදිලිය. ඔවුන් තම බල තුලනය පවත්වාගෙන යාම සදහා වත්මන් කොටි නායකත්වය විනාශවුවත් වෙනත් ආදේශකයක් ඒ සදහා අනාගතයේදී නිර්මාණය කරනු ඇත.

ශ්‍රී ලංකාවේ ත්‍රස්තවාදය.

අතීතයේ අප අතරේ භාවිතාවූ කොමිනියුස්ට් වාදය එකල පැවති ආණ්ඩුවලට අද ත්‍රස්තවාදය තරම් බියගෙන දෙන පදයක්. කොමිනියුස්ට්වාදීන් සහ සමසමාජ වාදීන් පිලිබදව ජනතාව තුළ ඇති කර තිබුනේ බියකරු ආකල්පයක්. ශ්‍රී ලංකාවේදී නාගරික කම්කරු පංතිය, ගම්බදට වෙන විට අඩු ආදායම්ලාභීන් සහ යම් යම් කුළ අතරත් , විප්ලවීය හැගීම් ඇති තරුණ වයසත් කොමිනියුස්ට් සහ සමසමාජ දේශපාලන පක්ෂළ වලට කිසියම් ස්ථාවරයක් තිබුනා. 1956 දී ශ්‍රී ලංකා නිදහස් පක්ෂයේ ආගමනයත් සමගම ගම්බදව පැවති කොමිනියුස්ට් සහ සමසමාජවාදී දේසපාලන නැඹුරුව ටිකින් ටික දියවී ගියා.1948-1970 දක්වා පැවති දක්ෂිණාංශික සහ අර්ධ දක්ෂිණාංශික ආණ්ඩු තුල තිබු හිතුවක්කාරි පිලිවෙත නිසා ජනතා විමුක්ති පෙරමුණ අනෙක් වාමාංශික දේශපාලන පෙරමුණු බෝර්ඩ් ලෑලි වලට සීමා කරමින් පෙරමුණ ගත්තා.

1970 දී ජනතා විමුක්ති පෙරමුණ විසින් ගම්බදව පැවති දක්ෂිණාංශික සහ අර්ධ දක්ෂිණාංශික දේශපාලන ඒකාධිකාරී නායකත්වයෙන් පීඩිත කොටස් එක්රැස් කරගෙන නිෂ්පාදනය කළ “වේ ගුවේරා “ ව්‍යාපාරය අප හදුනාගත් පළමු ත්‍රස්තවාදී ව්‍යාපාරයයි.නමුත් 1956 එජාප පළමු දෙකඩ වීමේ පටන් රාජ්‍ය ත්‍රස්තවාදය මෙරට පැවතුනා.ගම්බද මෙන්ම නාගරිකවද එකල මැතිවරණ වලදී එජාපය ප්‍රතිවිරුද්ධ පාක්ෂිකයන් ගේ මැතිවරණ සහභාගිත්වය වැලක්වුවේ පොළු මුගුරු, අත් බෝම්බ, කඩු කිණිසි, වැනි ප්‍රාථමික යුද උපකරණ භාවිතයෙන්.සුප්‍රසිද්ධ වයඔ මැතිවරණයත් ත්‍රස්තවාදයක්.

ත්‍රස්තවාදය කියන්නේ දෙපැත්ත කැපෙන කඩුවක්.අපේ ඡන්දෙන් පත්වෙච්ච ආණ්ඩු වලට විජේවීර, ප්‍රභාකරන් ත්‍රස්තවාදියෝ. විජේවීරගේ, ප්‍රභාකරන්ගේ අනුගාමිකයන්ට ආණ්ඩු අනුගමනය කරන්නේ ත්‍රස්තවාදි පිලිවෙතක්.

1971 විජේවීරගේ කැරැල්ලත් 1989 අවදිවීමත් නිසා ආණ්ඩු යම් මෙල්ලවිමක් වුනා කියලා අපිට පිලිගන්න වෙනවා .
විජේවීරත් , ප්‍රභාකරනුත් ඉල්ලන්නේ දෙන්න බැරි දේවල් . ත්‍රස්තවාදයේ ස්වභාවය එහෙම තමයි. ගෙදරක වුනත් අම්මටයි තාත්තටයි දෙන්න බැරි දෙයක් ලබා ගන්න ඉල්ලීමක් කරනවා පුචි දැනුම් තේරුම් නැති දරුවෝ . කාර් එකක් ඉල්ලා කරන උද්ඝෝසනයක් සෙල්ලම් කාර් එකකින් තෘප්තිමත් නොවනවිට පොඩි එකාට වෙන්නේ ප්‍රහාරයකින් පස්සේ නිහඩ වෙන්න.මේ දෙන්නගෙන් විජේවීරට වුනේත් ඒක. ප්‍රභාකරන්ට වෙන්නෙත් ඒක.

උතුරේ සහෝදර ජනතාවට සෙල්ලම් කාර් එකක් වත් අනිවාර්යෙන්ම ලැබේන් ඕනී.1971, ආයෙත් 1989 දකුනේ වගේ 2009 ත්‍රස්තවාදය පරාජය සනිටුහන් කරනවිට , ත්‍රරස්තවාදය නිද්‍රාවට පත්කිරීම වෙනුවට සදාකාලික මරණයට පත් කිරීමට කවුරුත් එකතු වෙලා වැඩ පටන් ගන්න ඕනී කාලය ඇවිල්ලා තියෙන්නේ.
ඡන්ද අමතක කරලා තනතුරු අමතක කරලා වැඩට බහින්න ඕනි කාලයයි මේ.

කොටි සංවිධානයේ උපත. 02

1970 දශකය කොටි සංවිධානය බිහිවිමේ වාතාවරණය ඇතිවු යුගය ලෙස සැලකේ.සන්නද්ධ කන්ඩායම් බිහිකල නායකයින් එකල ද්‍රවිඩ එක්සත් විමුක්ති පෙරමුණේ තරුණ සංගමය වටාවු දෙමළ තරූණ ලීගයේ සහ දෙමළ ශිෂ්‍ය ලීගය වටා ගොණුවී සිටියා.1974 වසර දී වඩුකොඩෙහිදී ද්‍රවිඩ එක්සත් පෙරමුණ ගෙනා “තමිල් ඊලාම් යෝජනාව” සම්මත කරගන්නවා. ප්‍රජාතන්ත්‍ර රාමුව තුල ක්‍රියාත්මක ද්‍රවිඩ එක්සත් විමුක්ති පෙරමුණේ ප්‍රධාන පෙල මෙම සම්මුතිය සමග ගියේ හෙමින් ගමනක්. තරුණ කොටස මේ මන්දගාමීත්වවය පසකලා දෙමළ සන්නද්ධ සංවිධාන පිහිටුවා ගන්නවා.
ප්‍රභාකරන්ද සම්බනධවු ප්‍රථම සන්නද්ධ සංවිධාණය වාර්තාවන්නේ ධනබාලසිංහම් හෙවත් චෙට්ටි විසින් මෙහෙයවන පාතාල කණ්ඩායමක් .( මීදුම- ප්‍රභාකරන් සම්බන්ධ කරගන්න) මෙම සංවිධානයට දේශපාලන මුහුණක් ලැබෙන්නේ ‍එවකට කෝපායි පාර්ලිමේන්තු මන්ත්‍රීව සිටි අලාල සුන්දරම් මහතා අතින්. ඔහු මෙම සුළු කන්ඩායම “ ද්‍රවිඩ නව කොටි “ නමින් බෞතීස්ම කරනවා.
1972 නව ජනරජ ව්‍යස්ථාව එලිදැක්වීමේදි උතු‍රේ ඇතිවු යම් යම් විරෝධතා ද්‍රවිඩ තරුණ සටන්කාමීත්විය ප්‍රදර්ශනය කල මුල් අවස්ථාවක් .1975 .07.27දින යාපනයේ පුරපති ඇල්ෆුර්ඩ් දුරේඅප්පා වෙඩි තබා ඝාතනය කරනවා.1978.09.07 දින රත්මලාන ගුවන් තොටුපලේදි ඇව්රෝ ගුවන් යානය පුපුරවා හරින්නේ 1978 ආණ්ඩු ක්රමම ව්‍යවස්ථාවට විරෝධය පාමින්. ද්‍රවිඩ සංන්නද්ධ කන්ඩායම් අවධිවු බව දක්වන වෙඩි මුර ලෙස මේවා හදුන්වන්න පුළුවන්.
1976 .05.05 දින උමා මහේෂ්වරම් ගේ සභාපතිත්චයෙන් ද්‍රවිඩ ඊළාම් විමුක්ති කොටි සංවිධානය LTTE ය බිහිවෙනවා . වේළුපිල්ලේ ප්‍රභාකරන් එහි අණදෙන නිළධාරියායි. “ ද්‍රවිඩ නව කොටි “- ද්‍රවිඩ ඊළාම් විමුක්ති කොටි සංවිධානය" ලෙස නම් වී කලඑලි බසින්නේ උමා මහේෂ්වරම් අතින්. උමා මහේෂ්වරම් වෘත්තීයෙන් මිණුම්දෝරුවෙක් . ඹහු කොළඹ කේන්ද්‍රකරගෙන අනෙක් ද්‍රවිඩ දේශපාලන පක්‍ෂ හා සම්බන්ධ වෙමින් සංවිධාණයයේ අත්තිවාරම සවිමත් කරනවා.
පසුකාලීනව ඇතිවු මතවාද නිසා උමා මහේෂ්වරම් වෙන්වනවා. එතනට පත්වෙන්නේ රාගවන්. මහුගෙන් පසු ප්‍රභාකරන් නායකත්චනයට පත්වනවා.
1974 වසර දී වඩුකොඩෙහිදී ද්‍රවිඩ එක්සත් පෙරමුණ ගෙනා “තමිල් ඊලාම් යෝජනාව” මතවාදයක් කරගත් ද්‍රවිඩ සංවිධාන අතර “ ටෙලෝ, ප්‍රදියපාදෙයි කුමාර පුරම් ගෲප්, ඊරෝස්,EPRLF,ප්ලොට්, ද්‍රවිඩ ඊළාම් විමුක්ති හමුදාව, EPDP, ENDLF “ වැනි සංවිධාන පසුකාලීනව අක්‍රීය කරමින් නැත්තම් පළවා හරිමින් වේළුපිල්ලේ ප්‍රභාකරන්ගේ LTTE ය උතුරේ නායකත්වය අත්පත් කරගත්තා.

ප්‍රහාකරන් - කොටි සංවිධානයේ උපත. 01.

ප්‍රභාකරන් මීදුම තුල සටහනකට පාදක නොවුනේ මන්ද යයි මම ‍බොහෝ විට සිතමි. භූමියේ අයිතියත් මිනීමැරීමේ අයිතියත් පැහැර ගැණීමේ අයිතියත් නොමැතිව සර්ව සාධාරණ පාලන ක්‍රමයක් නියෝජනය කරන මත වාදයක සිටින ප්‍රභාකරන් කෙනෙක් සිටියා නම් ඔහු මගේද වීරයෙකු වනවා නියතයි.එහෙත් කෙටි කලක් ද්‍රවිඩ සහෝදර වරුන්ගේද වීරවරයෙකුවු ඔහු වර්තමානයේ නම් සියළු අන්ත ජරා වැඩ වල නිරත යක්ෂයෙක්.

1954.නොවැම්බර් මස 26 දා යාපනය රෝහලේදී උපත ලද වේළුපිල්ලේ ප්‍රභාකරන් අදට අවුරුදු 54 මාස 03 දවස් 05ක් ජීවත්ව තිබෙනවා. ඔහුගේ පියා වල්ලීපූරම් පාර්වතීගේ තිරුවෙන්කනම් වේළුපිල්ලේ මහතායි. වෟත්තියෙන් දිස්ත්‍රික් ඉඩම් නිලධාරියෙක්.මව ගැන මීදුම දැනුවත් නෑ. බිරිද මදිමාදනී යාපනය විශ්ව විද්යාබලයේ වෛද්‍යපීඨ ශිෂ්‍යාවක්.
ප්‍රභාකරන්ගේ මූලික අධ්‍යාපනය මඩකලපුවේ පාසලකින් ඇරඹි පසුව වැල්වෙටිතුරේ විදම්බරම් විදුහලේ හත්වෙනි ශ්‍රේණියෙන් අවසන් වුනා. වැල්වෙටිතුරේ නගරය එකල හොර ජාවාරම්වල තෝතැන්නක් .ඉන්දියාව වෙරළ තීරය සම්බන්ධ් කර ගෙන බෝහෝ හොර බඩු ලංකාවට ගෙන ආවේ වැල්වෙටිතුරේ හරහායි. ප්‍රභාකරන්ගේ ජීවන වෟත්තිය ඇරඹෙන්නේ මේ හොර ජාවාරම්වල වල නිරත ජාවාරම් කරුවන්ගේ සේවකයෙකු ලෙසයි.

උතුරුකරය ඉතාමත් ප්‍රබල ලෙස කුල ගෝත්‍රයේ වටිනාකම් සොයන සමාජයක්. ප්‍රභාකරන් මුහුදු ධීවරයන්ගේ පීඩිත කුළයක්වු කාර්රියාර් කුළය නියෝජනය කරන්නෙක්.ඉතාමත් අඩු ජනගහණ අනුපාතයක් නියෝජනය කල මෙම කුළය (10%) අධිපති ප්‍රභූන් අයත්වු වෙල්ලාල කුළයේ ජනතාවගේ අවමානයට සහ පීඩනයට ලක් වූවෝ පිරිසක්. ප්‍රභාකරන්ට සමාජ ගතවීමට මෙම කුළ පීඩනය.අඩු අධ්‍යායපනය, සමාජ ස්ථරය, විශාල බලපෑමක් වුනා.හොර ජාවාරම් වලින් මිළ මුදල් උපයා ගත්තත් යාපනයේ සමාජය තුළ හිස ඔසවන්න මෙම කාරනා විශාල බාධාවක් උනා ස්ථීර වශයෙන්ම.
යෞවනයේදී මෙම හේතූන් නිසා ඉච්චා භංගත්වයටත් වැඩි වැඩියෙන් හොර ජාවාරම් වලින් මුදල් උපයා ගැණිමට ආරක්ෂක ආවරනයක් ලබා ගැණීමටත් දෙමළ සටන්කාමී සංවිධාන හා එක්වෙන ප්‍රභාකරන් 70 දශකයේ දෙමළ තරූණ ලීගයේ සහ දෙමළ ශිෂ්‍ය ලීගයේ කටයුතු කරන්න පටන් ගන්නවා.පසුකාලීනව තංගතු‍රෙයි සහ කුට්ටමණීලාගේ දෙමළ සන්නද්ධ ව්‍යාපාරය හා සම්බන්ධරවන ප්‍රභාකරන් 1975 දී යාපනයේ පුරපති ඇල්ෆර්ඩ් දුරේඅප්පා වෙඩි තබා ඝාතනය කරනවා.මේ සිද්ධියත් සමග දෙමළ සන්නද්ධ ව්‍යාපාරය තුළ ප්‍රතිරූපයක් ගොඩනගා ගන්නවා.අනතුරුව ගතවන කාලය තුල මිතුරු පසමිතුරු සියළු දෙමළ සංවිධාන විනාශකර දෙමළ ඊලාම් කොටි සංවිධානය ගොඩ නගා ගෙන ද්‍රවිඩ ජනතාවගේ එකම නායකයායි කියවා ගන්නවා.