මා පිය සබද මා ගැන මතක ද ? තවම

මට හැකි පමණ අත්වැල් පටලා ලොවම
සිතුවිලි පෙලගසා මානයකින් නවම
රතුපැහැ රුවින් හැඩගන්වූ ලක්දිවම
මා පිය සබඳ මා ගැන මතකද තවම

සැම තොරතුරම සුරැකිව රඳවමින් මුවේ
මාකල මෙහෙය සුළුපටුසේවයක්නොවේ
පරසිදු වුවද එදවස මා මිතුරු ලොවේ
අද නම් විවේකීවම කල දවස ගෙවේ

කුසතුළ හොවාගෙන සිට කරදහි කඳුම
තවමත් රෝග⁣යක් නැති එකමය පුදුම
රෑ දහවලේ සිදුවී දුහුවිලි වැදුම
අවපැහැ වෙලාදෝ මගෙ රතුපැහැ ඇඳුම

ගරුතර ලියුම් රජයේ සලකුණුද තියා
ලියවුනු හසුන් නෑකම් මිතුරන්ද සොයා
යායුතු මංතලය පසුවට සොයන නියා
පුදුමයි නේද පළමුව මගෙ කුසට ගියා

එනමුදු හෙනහුරා පැන මගෙ කුස මතට
කටකන පෙත්ත ආවා ඔබ ගේ අතට
පණිවුඩ දුන් සැනින් ලැබුනත් ඔබ අතට
මහ කණගාටුවක් ඇත මගෙ නම් සිතට

එදවස ලිපි සමග මාවෙත පියමැන්න
රසබර කතා ඇත තවමත් පවසන්න
ඔබටත් අවැසි නම් ඒවා දැනගන්න    

ළඟදිම දිනක ලිපියක් ගෙනවිත් දෙන්න

--සුරංග බණ්ඩාර

notes of imaginary

දුකට කියන කවි

ගොම්මන් පාළුවේ පිල්කඩ උඩින් හිඳ

සන්සුන් වෙන්න හැදුවත් කොච්චරක් අද

හොල්මන් කරන බියකරු සිතුවිළි නිබඳ

සැනසෙන්නට නො හැක හිමියනිනො දැක බිඳ

වැවේ මායිමේ තනියා දුටුවාද

රැලේ ගමන් යන නපුරන් හමුවීද

උදේ කාපු කුරහන් රොටි විතරමද

මගේ හිතට සැක සංකා නැතුවා ද .

රෑ බෝවන්ට පෙර එන බව කිව්වාට

වෑ කන්දේ කරුවල ඇවිදින් පිලට

කණාමැදිරි එළි දෙවැටේ නටන කොට

උල ලේනියක් අඬනව ඇහෙනව දුරට .

පොඩි පුතු කුසේ හිඳ දඟලා පහර ගසයි.

වැදුම් ගෙයට හෙට පුරහඳ ඒවි වගෙයි

අලිමංකඩේ තනියා ගැන හිතට බයයි

හිමි ඔබ තවම නැති හින්දා ම’සිත තැවෙයි .

සංහිඳ පාමුලේ දෙවියන් සිටින තුරා

රන්කඳ මගේ රැකදීපන් සමා වෙලා

තනියෝ මංකඩ දි මගෙ හිමි ඇහැ ගැහිලා

හදියක් නො කර පලයන් පුතු ගැන හිතලා .

රෝ.සි.

notes of imaginary