සිංහල අවුරුද්ද අප්‍රේල් 13 14 තමයි

අවුරූද්දක ම වගේ මතුවෙන ප්‍රශ්නයක්. මේ ගැනත් මා ලිපි රාශියක් ලියා තියෙනවා. මා තාරකා විද්‍යාව ගැන හරි ජ්‍යොතිෂය ගැන හරි දන්නෙ නැති නිසාත් ජනශ්‍රැතවේදියකු නොවන නිසාත් උගතකු බුද්ධිමතකු නොවන නිසාත් හිතලූ කියන්නකු පමණක් නිසාත් ජනමාධ්‍ය ඒ් ලිපි ගැන අවධානය යොමු කරන්නේ නැහැ. ඒ කොහොම වුණත් මා නැවතත් ඒ සමහර අදහස් නැවත කියනවා.

සිංහල අවුරුද්ද සම්බන්ධයෙන් සාමාන්‍යයෙන් මත තුනක් තියෙනවා. ඒ සූර්යයා මීන රාශයෙන් මේෂ රාශියට යෑම ගැන. ඇතැමුන්ට අනුව ඒ සිදුවන්නේ මාර්තු 21. සමහරුන්ට අනුව අප්‍රේල් 18 19 දිනවල. තවත් පිරිසකට අනුව අප්‍රේල් 13 14 දිනවල. කවුද හරි. හැමෝම හරි. එහෙම වෙන්නෙ කොහොමද කියල අහන්න පුළුවන්. එක් එක් අය මීන මේෂ දේශසීමාව (රාශි සීමාව) ලකුණූ කරන විධිය අනුව. මට තවත් මතයක් තියෙනවා. අප්‍රේල් 13 14 15 දිනවල සුර්යයා රේවති නැකතෙන් අස්විද නැකතට යනවා. අපේ අවුරුද්ද එ නිමිත්තෙන්.

මේ අවුරුද්දෙ නැකත් දෙක තුනක් තියෙනවා. සිංහල සංස්කෘතියෙ එක නැකත් සීට්ටුවක් එක බෙහෙත් සිට්ටුවක් තිබිල නැහැ. ගමෙන් ගමට ගෙදරින් ගෙදරට නැකැත් සීට්ටු වෙනස් වුණා. වෙද මහතාගෙන් වෙද මහතාට බෙහෙත් සීට්ටු වෙනස් වුණා. එ තමයි විවිධත්වය. සිංහල සංස්කෘතිය චීන සංස්කෘතිය හරි බටහිර සංස්කෘතිය හරි වගේ නො වෙයි. විවිධ අදහස් තියෙනවා. එක වෙලාවට කැව කියල ජාතියක් සමගි වෙන්නෙ නැහැ. එක වෙලාවට කන එක 1993න් පස්සෙ වි ජ මු හොඳ හිතින් එහෙත් වැරදියට කරපු වැඩක්. සිංහල සංස්කෘතියට පටහෑණි ව කරපු එකක්. ඔය විධියට තර්ක කළොත් ලෝකෙ හැම ගෙදර ම එක ම පැනඩෝල් පෙත්ත දෙනවා වගේ අට පත එකට හින්දවන්න එක ම ප්‍රමාණයේ කෝප්ප තියා ගන්න වේවි. ඒක බොරුපන වෙදමහත්තය මට කී කතාවක්. බටහිරයට හරි ඉන්දියානුවට හරි චීනට හරි ඕන විධියට සිංහල සංස්කෘතිය සකස් කරන්න උත්සාහ ගන්න අය ඉන්නවා. ඔවුන්ට පඩි නඩිත් ලැබෙනවා.

මේ සමග රුප සටහනක් ඇති. එයින් පෙන්නන්නෙ ඛගෝලය. (හිස් ගෝලය celestial sphere ) ඒ ඛගෝලයෙ පෘථිවි සමකය ප්‍රක්‍ෂෙපණය කරල තියෙනවා. ඒ වගේ ම සූර්යයාගේ ගමන් මාර්ගයත් (ක්‍රාන්ති වලයය ecliptic) ප්‍රක්‍ෂෙපණය කරල තියෙනවා.ඇඳලා තියෙනවා කිවුවත් කමක් නැහැ. පෘථිවිය තම අක්‍ෂය වටේ පැය විසිහතරකට සැරයක් කැරකෙනවා. ඒ අතර එහි අක්‍ෂයත් බමරයක වගේ අවකාශයෙ අචල අක්‍ෂයක් වටේ කැරකෙනවා. එ නිසා අර සමකයේ ප්‍රක්‍ෂෙපණය වෙනස් වෙනවා. මේ බමර සෙල්ලමට පූූර්වායනය (precession) කියා කියනවා

සමකයේ ප්‍රක්‍ෂෙපණයත් ක්‍රාන්ති වලයයෙ ප්‍රක්‍ෂෙපණයත් ඡෙදනය වන ලක්‍ෂ්‍යයට මේෂ රාශියේ ප්‍රථම ලක්‍ෂ්‍යය කියනවා. එය ග්‍රීක හෝඩියෙ ගැමා අක්‍ෂරයෙන් හැඳින්වෙනවා. සූර්යයා තම වාර්ෂික ගමනේ දක්‍ෂිණාර්ධ ගෝලයේ සිට උත්තරාර්ධගෝලයට යන එක සනිටුහන් වෙන්නෙ ගැමා ලක්‍ෂ්‍යයෙන්. ඒ ක්‍රාන්තිවලයයේත් සමකයේත් ඡෙදන ලක්‍ෂ්‍යය. සූර්යයා සමකය හමුවෙන ලක්‍ෂ්‍යය. අර පූර්වායනය නිසා ගැමා ලක්‍ෂ්‍යය අවුරුදු හැත්තෑදෙකකට දවසක් පමණ ඉදිරියට යනවා. අවුරුදු දෙදදහකට පමණ පෙර ශක වර්ෂ ක්‍රමය ආරම්භ වෙන කාලෙ සූූර්යයා ඔය ගැමා ලක්‍ෂ්‍යය පසු කෙළෙ මාර්තු 21 වෙන්න ඕන. අවුරුදු දෙදහකට විතර පස්සෙ අද එය සිිද්ධ වෙන්නෙ අප්‍රේල් 18 19 දිනවල. ඒ අනුව සමහරු සූර්යයා මීනයෙන් මේෂයට යන්නෙ මාර්තු 21 හරි අප්‍රේල් 18 19 හරි කියල ගන්නවා. මාර්තු 21 වැනි දා බටහිර ලෝකයෙ වසන්ත කාලය නිල වශයෙන් ආරම්භ වෙනවා. මේ තමයි සකුරා මල් පිපෙන කාලය. ලංකාවෙ සකුරා මල් පිපෙන්නෙ නැති වුණත් ඒ ගැන ගීත තියෙනවා. ඇපල් මල් ගැනත් තියෙනවා. කෙහෙල් මල් ගැන ගීත තියෙනවා ද දන්නෙ නැහැ.

සමහරුන්ට අනුව අප්‍රේල් 13 14 අවුරුද්ද ගන්නෙ රාශි සීමා ගැන ඇති වුණු පොඩි අවුලක් නිසා. රාශී සීමා බටහිර හා ඉන්දියවෙ වෙනස් වෙලා. ඒක එහෙම වෙන්න පුළුවන්. මට තවත් කතාවක් තියෙනවා. නකත් කියන්නෙ ලංකාවෙ නාගයන්ගෙ (නක) නිර්මාණයක්. ග්‍රහයන් යන වළල්ල නකත් 27කට බෙදල තියෙනවා. අස්විද ආදී වශයෙන්. අවසන් නකත රේවති. මා හිතන්නෙ අපි අවුරුද්ද සමරන්නෙ සූර්යයා රේවති නැකතෙන් අස්විද නැකතට සංක්‍රමණය වෙන වෙලාවෙ කියල. අශ්වින් කියන්නෙ අස්විද සංස්කෘතයට හරවා ගත්ත ම එන වචනය. චිත්‍ර නක්‍ෂත්‍රය කියන්නෙ සිත නකත සංස්කෘතයට හරවා ගත්ත ම එන වචනය. නක්‍ෂත්‍ර කියන්නෙ නකත් සතර සංස්කෘතයට හරවා ගත්ත ම එන වචනය. නක්‍ෂත්‍ර කියන එකට සංස්කෘතෙන් නිරුක්ති නැහැ.

අපි අහසෙ ග්‍රහයන් යන වළල්ල හඳ අනුව නකත් 27කට බෙදුවට බැබිලෝනියන්වරු රාශි දොළහකට බෙදුවෙ. වෛදිකයන් මේ පද්ධති දෙක එකතු කරා කියල හිතන්න පුළුවන්. ඔය තුලා ලග්නය සිත නකත හා සම්බන්ධයි. තුලා ලග්නයෙ ප්‍රධාන ආරම්භක තාරකාව ස්පිකා කියල හඳුන්වනවා. එයට චිත්‍ර නක්‍ෂත්‍ර කියල වෛදිකයන් කිවුව. චිත්‍ර නක්‍ෂත්‍රට හරියට ම අනෙක් පැත්තෙ තියෙන මාසය වෛදිකයන් චිත්‍ර මාසය කියා හැඳින්නුවා. අර චිත්‍ර (ස්පිකා) තරුවට හරියට ම අනෙක් පැත්තට සූර්යයා එන දිනය සූර්යයා අලුත් අවුරුද්ද ආරම්භ වෙන දිනය ලෙස ගන්නවා.

මට හිතෙන්නෙ එය රේවති අස්විද නකත් සීමාව මීන මේෂ රාශි සීමාවට එක් කරන්න ගිහින් වෙච්ච දෙයක්. සූර්යයා රේවති නකතෙන් අස්විදයට යන්නෙ අප්‍රේල් 13 14 15 දිනවල. මේෂ රාශියෙ මුල තියෙන්නෙ අස්විද නකතෙ මුල නොවෙයි. එය තියෙන්නෙ අස්විද නකතෙ දෙවැනි පාදයෙ විතර. නකතක් පාද හතරකට බෙදල තියෙනවා. ඒ කියන්නෙ අර වළල්ල පාද 108කට. පාද 108ක් යන්න දින 365ක් යනවා නම් පාද එකකට ටිකක් වැඩියෙන් විතර යන්න දින තුන හතරක් යනවා. අපේ අවුරුද්ද අප්‍රේල් 18 19 නැතුව අප්‍රේල් 13 14 වෙන්නෙ එ නිසා කියයි මා හිතන්නෙ. අපි භාරතීය පද්ධතියට යටවෙල සූර්යයා මීනයෙන් මේෂයට යෑමක් ගැන කිවුවට අප සමරන්නෙ සූර්යයා රේවති නකතින් අස්විද නකතට යෑම කියලයි මට හිතෙන්නෙ.

අපි නකත් අනුව ජීවිත සකස් කරගත් අය. අස්විද නකතින් අපි අවුරුද්ද අරඹනවා. මුවසිරිස නකතින් දේවානම්පිය තිස්ස රජු දඩයමේ ගියා. අස්ලිස නකතින් ඇසළ උත්සවය පවත්වනවා. ඒ හැම තැනම ස්නානය දිය කැපීම වගේ කතා තියෙනවා. ඒ හඳ එක්ක සම්බන්ධය නිසා ද?

    --නලින් ද සිල්වා.

A day in the life

Read More

නිවන් සැප ලැබේවා!

 

නිවන් සැප ලැබේවා!

ලෙස සුභ පැතිය නොහැකිද?

මේ ලෝකයේ විවිධාකාර සැප තිබේ. සියලුම සත්වයෝ ඒ සැප සම්පත් විඳින්නට දැඩි සේ කැමැත්ත දක්වයි. ඒ සියලුම සැප දෙයාකාරයකට බෙදිය හැකි ය. ඒ කාම සැපය සහ විමුක්ති සැපය ලෙසයි. කාම සැපය ලෞකික සැප වන අතර, විමුක්ති සැපය ලෝකෝත්තර සැපය වේ. ඉන් ඉහළම සැපය වන්නේ උතුම් ලෝකෝත්තර විමුක්ති සැපය යි. ඒ තරම් සැපයක් කොහේවත් නැත. ඒ සැපයට "නිවන" යැයි කියනු ලැබේ.

මේ සියළුම සැප විවිධාකාරයෙන් විස්තර කළ හැකි ය. - ධම්මපදයේ නාග වර්ගයේ මෙසේ සඳහන් වේ.

"අත්ථම්හි ජාතම්හි සුඛා සහායා,

තුට්ඨී සුඛා යා ඉතරීතරෙන;

පුඤ්ඤං සුඛං ජීවිතසඞ්ඛයම්හි,

සබ්බස්ස දුක්ඛස්ස සුඛං පහානං."

"කිසියම් කටයුත්තක් ඇති විට යහළුවෝ සැපගෙන දේ, තමන් සන්තක සුළු දෙයින් හෝ සතුටුවීම සැපය යි, මරණාසන්නයේ දී පින සැපය යි. රහත් බව ඒකාන්ත සැපය යි."

සියලු සත්වයන් ගේ ඒකායන අරමුණ විය යුත්තේ සියලු සසර දුක් නසා නිවන් දැකීමයි. ඒ සුන්දර නිර්වාණ සුවය දකින්නට නුවණැති පින්වතුන් කටයුතු කර ගත යුතුමයි. එහෙත් වර්තමානයේ දී මිනිසුන් සිතන පතන දෘෂ්ඨියේ තිබෙන බොහෝ වැරදි අදහස් නිසා, නිවන් දැකීම පිළිබඳවද ඇති කරගෙන ඇත්තේ මිත්‍යා මත වේ.

ඔබ ඉදිරියට ඔබේ හිතවතෙකු පැමිණෙන විට, ඔබේ හිතවතාට ඔබ 'නිවන් සුව ලැබේවා!' යැයි කිව හොත් කුමක් වේදැයි සිතන්න. වර්තමානයේ මේ කාල සීමාවේදී නම්, ඔහු ඔබත් සමග ජීවිත කාලයටම අමනාප වනවා නො අනුමානයි. එයට හේතුව ඔහු 'නිවන් සැප ලැබේවා!' යැයි සිතා සිටින්නේ මිය යෑම නිසා ලැබෙන කාරණාවක් හෝ, මිය යෑමට අදාළ කුමන ආකාරයක ආශිර්වාදයක් හෝ, සුභ පැතීමක් හෝ, මරණයට අදාළ යම්කිසි කාාරණාවක් ලෙස සිතීමයි.

මෙය සම්පූර්ණයෙන්ම වැරදි මිථ්‍යා අදහසකි. මෙවැනි මිත්‍යා දෘෂ්ටියක් නිර්මාණය කරගෙන ඇත්තේ බෞද්ධ සමාජය තුළින්මයි. මේ මිථ්‍යා දෘෂ්ටිය වෙනස් කරගන්නට නුවණැති බෞද්ධ පින්වතුන් කටයුතු කරගත යුතුමයි. එය මහනීය පින්කමක් ද වේ.

මේ ලෝකයේ යම්කිසි කෙනෙක් තවත් කෙනෙකුට සුබ පතනවා නම් "ඔබට නිවන් සැප ලැබේවා!" ලෙස සුබ පතන සුබ පැතීම හා සමාන උතුම් සුභ පැතීමක් තවත් නැත.

මේ ලෝකයේ කවුරුහරි මනුස්ස, දිව්‍ය, බ්‍රහ්ම සතර අපා ආදී සත්වයෙක් උතුම් සැපයක් ලබන්නට කටයුතු කරනවානම් ඒ උතුම් සැපය නිවන් සැපයම වේ. ඒ හා සමාන සැපයක් තුන් ලෝකයේ කිසිම තැනක නැත. නමුත් අවාසනාවකට නිවන් දැකීම ගැන බහුතරයක් දෙනා දන්නේ නැත. නමුත් ඔවුන් තමන් සිව්වනක් පිරිසට අයත් "බෞද්ධයෝ" යැයි හඬනගා කියයි. නමුත් ඔවුන් විසින්ම උතුම් වටිනා වචන අවභාවිතා කර ඇත.

නිවන් සුව ලබන්නේ ජීවත්ව සිටින මනුස්සයෙක්, දෙවියෙක්, බ්‍රහ්මයෙක්, ආදී ජීවත්ව ඉන්න කෙනෙක් හැර මිය ගිය කෙනෙකුට නොවේ. මිය ගිය පසුව එසේ කීමෙන්, පැතීමෙන් ලැබෙන නිවනක් නැත. නිවන ප්‍රාර්ථනාවකින් ලැබෙන දෙයක් නොවේ.

"නිවන් සුව ලැබේවා!" යන්න පමණක් නොව, උතුම් බුදු දහමේ තවත් එවැනි උතුම් වචන රාශියක්ම බෞද්ධයින් විසින් ම අවභාවිතා කර ඇත.

උතුම් "අරහං" බුදු ගුණය ද එවැනි වචනයකි. බොහෝ දෙනා අද එය භාවිතා කරන්නේ "මට ඔය මනුස්සයා අරහං" ආදී ලෙස කෙනෙක් පෙන්වන්නට නොහැකි බව ඇඟවීමට යි.

"හයහතර නොදත් අය" ලෙස අද බොහෝ දෙනා හඳුන්වන්නේ දරුවන් සම්බන්ධව කතා කිරීමට ය. නමුත් එයින් කියවෙන්නේ දිව්‍යලෝක හය සහ සතර අපාය ගැනයි.

"උපාසක මහතා, උපාසක අම්මා" යන මේ වචන අද භාවිතා කරන්නේ සිල් ගත් අය සඳහා පමණයි. නමුත් සිල් ගත් විටදී ද වැඩි වශයෙන් බොහෝ දෙනා කැමති, මැතිතුමා මැතිණිය කියන එකටයි. සිව්වනක් පිරිසට අයත් භික්ෂූන් වහන්සේලා, භික්ෂුණීන් වහන්සේලා හැර ඉතිරි සියලු දෙනාම අයත් වන්නේ උපාසක උපාසිකාවන් ටයි. වර්තමානයේ දී බෞද්ධ පින් පින්වතෙකු ට “උපාසක මහතා, උපාසක අම්මා” යැයි කීවිට ඇතමුන්ට ඉතා තදබල ලෙස කේන්ති යයි. සමහර විට එසේ කී ස්වාමින්වහන්සේ සමඟ ජීවිත කාලයටම කතා කරන්නේ ද නැත.

තවත් මේ ආකාරයට බෞද්ධයින් විසින් ම උතුම් ධර්මයේ අවභාවිතා කරන වචන රාශියක් පෙන්විය හැකි ය. ඒ සියලු අවභාවිතාවන් අතර ඉහළින්ම තිබෙන්නේ "නිවන් සුව ලැබේවා!" යන්නයි. සසර සැරි සරනා සත්වයින්, සසරින් එතෙර වන්නට "නිවන් සුව" දැකිය යුතුම ය.

රහතන් වහන්සේලා හැර අන් සියලු දෙනා මිය යාමේදී වෙන්නේ මරණයත් සමගම නැවත පුනර්භවයට පැමිණීමයි. ඉපදීමයි. සෝවාන් ආදී අනෙක් උතුමන්ද රහත් නොවී සිටියහොත් මාර්ගඵලයට අනුරූප තැනක උපදී. රහත් වූ පසු එහි ආයු අනුව ආයුෂ විඳ අනුපාදිසේස පරිනිර්වාණයත් සමගම පිරිනිවන් පායි.

"නිවන"

"නිවන" යැයි කියන්නේ මේ ලොව ඇති උසස්ම ප්‍රණීතම සැපය යි.

නිවන් දකින්නට කටයුතු කරන උත්තමයන් වහන්සේලා හඳුන්වන්නේ බෝධි බෝධිසත්වත්වයෝ කියා යි. "බෝධි" යන වචනයෙන් කියවෙන්නේ ලෝකෝත්තර වූ ආර්ය මාර්ගයත්, සර්වඥතා ඥානයත් වේ. බෝධි තුනක් තිබේ.

1. සම්මා සම්බෝධිය

2. පච්චේක සම්බෝධිය

3. ශ්‍රාවක බෝධිය

මේවාට තුන්තරා බෝධිය යැයි කියනු ලැබේ.

මේ තුන්තරා බෝධියෙන් එක්තරා බෝධියකට පැමිනෙන්නට, පිරිය යුතු ධර්ම වන්නේ පාරමිතා යි. පාරමිතා පිරූ බෝධිසත්වයන් වහන්සේලා, ලෝකෝත්තර ආර්ය මාර්ගය ඥානයෙන් කෙලෙසුන් නසා නිවන් දකී.

නිවන කියන්නේ.... මේ ලෝකයේ ඇති අති ප්‍ර‍ණීතම, වටිනාකම කිව නොහැකි, කවර කලෙකවත් නැති නොවන හැම කල්හි පවත්නා සැපයටයි. මේ නිවන දුක මිශ්‍ර‍ නැති ශුද්ධ වූ සුඛය වේ.

නිවන පඤ්චේන්ද්‍රියයන්ට හා මන්දබුද්ධිකයින්ගේ මනින්ද්‍රියට ද විෂය නොවන පරම සූක්ෂ්ම ධර්මයක් වේ.

නිවන් දැකීම නිසා නැතිව යන දුක් ලෙස සලකන විට අති විශාල ධර්මයක් වේ. ලෝකෝත්තර ධර්මයක් වේ. මහානුභාව සම්පන්න ධර්මයක් වේ. පිහිටි තැනක් නැතිව ඇති ධර්මයක් වේ. එක ද සත්ත්වයකුත් එහි නැත, එහෙත් සත්ත්වයින්ට පරම පිහිටක් වූ ධර්මයක් වේ.

නිවනට පැමිණීම අවස්ථා පහකින් ද, ඉතිරි වී ඇති ස්කන්ධ සහ ඉතිරි ස්කන්ධ කිසිවක් නැති බව දැක්වීම් ලෙස අවස්ථා දෙකකින් ද නිවන ගැන කිව හැකි වේ.

නිවනෙහි ස්කන්ධයන්ට අයත් දේවලින් කිසිවකුත් නැත. ඒ නිවනෙහි ඇති උතුම් ගුණය යි.

ලෝකයෙහි සැප වර්ග දෙකක් තිබේ.

ඒ කාම සුඛය සහ විමුක්ති සුඛය යි. මෙයින් කාමනීය වූ රූප, ශබ්ද, ගන්ධ, රස, ස්ඵර්ෂ, ධර්ම නිසා උපදින සුඛය “කාම සුඛ” වේ.

පැමිණ තිබෙන්නා වූ හෝ මතු පැමිණෙන්නට තිබෙන්නා වූ හෝ විපතකින් දුකකින් බේරීම වූ නිදහස “විමුක්ති සුඛ” වේ.

මේ සැප දෙකින් කාම සුඛය විඳින සැපයකි. එම නිසා එයට “වේදයිත සුඛය” කියා කියනු ලැබේ. විමුක්ති සුඛය නො විඳින සැපයකි. එයට “අවේදයිත සුඛය” කියා කියානු ලැබේ.

"නිවනට පැමිණෙන ආකාරය

එක් පුද්ගලයකුට නිවනට පැමිණිය හැකි වනුයේ එක් වරක දී නො ව පස්වරක දී ය. නිවන් සොයා ක්‍රියා කරන්නා වූ යෝගාවචරයා සෝවාන් වන විට ඔහුට මතු සතර උපායෙහි උපදින්නට තිබෙන ස්කන්ධයන් හා ජාති සතකින් මතු සුගතියෙහි ද, උපදින්නට තිබෙන ස්කන්ධයෝ ද නිරුද්ධ වේ. ඉන් පසු ඔහු අපායෙහි නූපදී. සුගතියෙහි ද සත් වරකින් මතු නූපදී. සෝවාන් පුද්ගලයාට වන්නා වූ මේ දුඃඛ නිරෝධය පළමු වරට නිවනට පැමිණීම වේ.

සෝවාන් ඵලයට පැමිණ සිටින ආර්‍ය්‍ය ශ්‍රාවකයා සකෘදාගාමි වන විට ඔහුට ඉතිරිව තුබූ ජාති සතකට අයත් ස්කන්ධයන්ගෙන් ජාති සයකට අයත් ස්කන්ධයෝ නිරුද්ධ වේ. ඉන් පසු ඔහු සසර උපදිතත් උපදින්නේ එක් වරක් පමණී. සකෘදාගාමි පුද්ගලයාගේ මේ ජාති සයකට අයත් දුඃඛයෙන් මිදීම දෙවෙනි වර නිවන් ලැබීම වේ.

සකෘදාගාමි පුද්ගලයා අනාගාමි වන විට ඔහුට කාම භවයෙහි එක් වරක් ලබන්නට තුබූ ස්කන්ධ දුඃඛය ද නිරුද්ධ වේ. ඉන්පසු ඔහු කාම භවයෙහි නූපදී. අනාගාමි පුද්ගලයා ලබන මේ දුඃඛ නිරෝධය තුන්වෙනි වර නිවන් ලැබීම වේ.

අනාගාමි පුද්ගලයා රහත් වන විට රූපාරූප භවයන්හි උපදින්නට තුබූ ස්කන්ධයෝ ද නිරුද්ධ වේ. ඉන්පසු ඒ රහතන් වහන්සේ කිසි කලෙක කොතැනක වත් නූපදී. රහතන් වහන්සේ ගේ ඒ දුඃඛ නිරෝධය සතරවැනි වරට නිවනට පැමිණීම වේ.

සතර වැනි වරටත් නිවනට පැමිණීමෙන් පසු රහතන් වහන්සේට ශේෂව ඇත්තේ අතීත හේතුවෙන් හටගන්නා වූ වර්තමාන ස්කන්ධ දුඃඛය පමණකි. පිරිනිවීමෙන් එය කෙළවර වන්නේ ය. එය පස්වෙනි වරට නිවනට පැමිණීම වේ.

සෝවාන්, සකෘදාගාමි, අනාගාමි, අර්හත් පුද්ගලයන් හැම ආකාරයකින්ම දුකින් මිදී නැති නිසා, පිරිනිවීම තෙක් ස්කන්ධ පවතින නිසා ඔවුන්ගේ නිවනට ඉතිරිව තිබෙන ස්කන්ධයන් නිමිත්ත කොට "සෝපාදීශේෂ නිර්වාණය" කියා කියනු ලැබේ. පරිනිර්වාණයෙන් පසු ලබන නිවනට ඉතිරි ස්කන්ධ කිසිවක් නැති බව නිමිත්ත කොට "අනුපාදිශේෂ නිර්වාණය" යි ද කියනු ලැබේ."

ප්‍රාර්ථනා කළාට, ආශිර්වාද කළාට නිවන් දැකිය නොහැක. එසේ කිරීමෙන් කළ හැකි වන්නේ කල්‍යාණ මිතුරකු වී නිවන් දකින්නට අනිත් අයව උනන්දු කරවීම කි. එය මහනීය පිංකමකි.

නිවන් දකින්නට නම්, දුක්ඛ සත්‍යය යි, සමුදය සත්‍යය යයි යන දෙක නැති කළ යුතු ය. ඒ සඳහා ආර්ය අෂ්ටාංගික මාර්ගය පිළිපැදිය යුතු ය.

කරුණු මෙසේ හෙයින් නුවණැති පිංවතුන් දැන්වත් මේ සිදු කරන වරද නිවැරැදි කරගත යුතු ය. මියගිය පසු කියන වචනයක් ලෙස "නිවන් සුව ලැබේවා!" යැයි සමාජගත වී තිබෙන මතය වෙනස් කර, ඒ සඳහා සුදුසු ලෙස කටයුතු කිරීමට පෙළ ගැසිය යුතුය.

එය ඔබටද කළ හැකිය. "නිවන් සැප ලැබේවා"කියන වචනයම කිව නොහැකි නම්, පෙරළා ලැබෙන ප්‍රතිචාරයට ඔබ බය නම්, එය සමාජයට හුරුවන තෙක් ඔබට මෙසේ කිව හැකි ය.

"මේ පින සසර දුක් නසා නිවන් දකින්නට හේතු වේවා! "

"ඔබට චතුරාර්ය සත්‍ය සත්‍යාවබෝධ ඤාණයෙන් නිවන් දකින්නට හැකි වේවා!"

ආදී ලෙස කැමති ආකාරයකට ඔබගේ හිතවතාට සුදුසු ලෙස සුබ පැතිය හැකිය. ඒ කල්‍යාණ මිත්‍රත්වයෙන් ලැබෙන මගපෙන්වීම, ඔබටද මහානීය පුණ්‍යකර්මයක් වේ.

ඉතින් ඔබත් මේ පවතින මිථ්‍යා මතය වෙනස්කර, නුවණැත්තන්ට නිවන් දකින්නට මග පෙන්වන කල්‍යාණ මිත්‍රයෙක් වෙන්න. එන්න අපි හැමෝම එකම අරමුණකට යන කල්‍යාණි මිතුරන් ලෙස ආශිර්වාද කරමු හැමෝටම

"ඔබ සැමට නිවන් සුව ලැබේවා!

අතිපූජනීය තපෝවනයේ රතන ස්වාමීන්වහන්සේ

මිණිපුර අමා ශාන්ති තපෝවන ආරණ්‍ය සේනාසනය,

පැල්වාඩිය ,

රත්නපුරය. Copied .

day in the life

Read More

බල තුලනයේ අවසාන විචල්‍යය .

මහාචාර්ය අනිල් ජයන්ත ප්‍රනාන්දු

“මහජනතාවට කියන්නේ මේ බල තුලනයේ අවසාන විචල්‍යය බවට පත්වෙන්නේ ඔබගේ ඡන්දයයි. ඔබ මේ දූෂිත කණ්ඩායම්වල විවිධ උපක්‍රමවලට අසුවීමේ ඉඩකඩ තිබෙනවා. දූෂිතයන් කවුද යන්න ඔබ හරියටම බෙදුම් ඉර ඇඳගෙන ඉන්නේ. මේක ඉදිරියටත් පවත්වාගෙන යන්න. කිසිම ආකාරයේ නොමඟ යැවීම්වලට අසුවෙන්න එපා. අපේ ප්‍රතිපත්තිවල, වැඩපිළිවෙල පිළිබඳ යම් ගැටලු තිබෙනවා නම් ලංකාව පුරා විහිදුණු, ග්‍රාමසේවා වසම්වල කොට්ඨාස මට්ටමේ ක්‍රියාත්මක වෙන සංවිධාන ජාලයක් තිබෙනවා. ඒවා ඇතුළට සම්බන්ධ වෙලා අප පිළිබඳව විමර්ශනය කරන්න; කරුණු එකතු කරන්න; තේරුම් ගන්න. අපි එකතු වෙලා බලය වෙනස් කිරීමේ කාර්යයට සම්බන්ධ වෙමු. මේ වංචනිකයක්, දූෂිතයන් බලයේ ඉඳගෙන මහජනතාවට දෙන පීඩනයෙන් ඔවුන් ඉවත් කරලා හැම කෙනෙකුටම සතුටින් ජීවත් වීමට සමාජය හැදීමේ කාර්යයට දායක වෙමු.” යැයි ජාතික ජන බලවේගයේ ජාතික විධායක සභික සහ එහි ආර්ථික කවුන්සිලයේ සාමාජික මහාචාර්ය අනිල් ජයන්ත ප්‍රනාන්දු අවධාරණය කරයි.

ඔහු මේ බව අවධාරණය කළේ, බත්තරමුල්ල පැලවත්ත හි පිහිටි ජනතා විමුක්ති පෙරමුණේ ප්‍රධාන කාර්යාලයේ අද (02) පෙරවරුවේ පැවති ජාතික ජන බලවේගයේ ආර්ථික කවුන්සලයේ මාධ්‍ය හමුව අමතමිණි.

එහිදී වැඩිදුරටත් අදහස් දැක්වූ ජාතික ජන බලවේගයේ ජාතික විධායක සභික සහ එහි ආර්ථික කවුන්සිලයේ සාමාජික මහාචාර්ය අනිල් ජයන්ත ප්‍රනාන්දු,

“මේ වනවිට පවතින දේශපාලන හා ආර්ථික තත්වය සහ අර්බුදය හමුවේ ජාතික ජන බලවේගය සහ අනෙකුත් දේශපාලන පක්ෂ සහ ව්‍යාපාර හැසිරෙන ආකාරය සහ මේ අවුරුද්දේ පැවැත්වීමට නියමිත මැතිවරණය පිළිබඳවත්, ඇත්ත තත්වයත් විය හැකි දේ පිළිබඳවත් මහජනතාවට කරුණු ඉදිරිපත් කිරීමට බලාපොරොත්තු වෙනවා.

ජාතික ජන බලවේගය මීට පෙර ඉතාම දුෂ්කර තත්වයන් යටතේදිත් මේ රටට සිදුවුණේ කුමක්ද, සිදුවෙමින් තිබෙන්නේ කුමක්ද? සිදුවිය හැක්කේ කුමක්ද යන ආර්ථික ගැටලු පැහැදිලි කළා. ඒ අවස්ථාවේ අපට තිබුණේ මහජනතාවගේ ඉතාම අඩු පිළිගැනීමක්. අපි අඛණ්ඩව කරගෙන ආ ක්‍රියාදාමය හේතුවෙන් මහජනතාව ජාතික ජන බලවේගය වැළඳගනිමින්, ජාත්‍යන්තර පිළිගැනීමට ලක්වෙමින්, බලය ලබාගැනීමට සූදානම් තැනට පත්වී තිබෙනවා. මේ හේතුව නිසා දූෂිත පාලක කණ්ඩායම් බියට පත්වී තිබෙනවා. මේ අවස්ථාවේ සිදුවෙන බල හුවමාරුව දේශපාලන පක්ෂයකින් තවත් දේශපාලන පක්ෂයකට සිදුවෙන මාරුවීමක් නොවෙයි. මේ සිදුවන්නේ ව්‍යුහාත්මක වෙනසක්. දූෂණය, වංචාව නිමාවට පත්වෙන, ජනතාවට එරෙහිව ක්‍රියාත්මක වූ වැරදි ප්‍රතිපත්තිවල නිමාවක් සිදුවෙන අවස්ථාවක්. මේ නිසාම ඔවුන් මේ අර්බුදයට බලපෑ සැබෑ හේතු යටපත් කොට මතුපිට ප්‍රශ්න ටිකක් සමාජගත කිරීමට උත්සාහ දරමින් ඉන්නවා. සැබෑ හේතු වූ, වංචාව, දූෂණය, හොරකම, රටේ සම්පත් නිසියාකාරව නිෂ්පාදන ක්‍රියාවලියට යොදා නොගැනීම, සුළු පිරිසකගේ අවශ්‍යතාවයට භාණ්ඩ නිෂ්පාදනය කිරීම වැනි කරුණු හංගා මතුපිට ප්‍රශ්න පමණක් පෙන්වමින් සහ මේ ප්‍රශ්නවලට උත්තර සෙවිය හැක්කේ ඒගොල්ලන්ට පමණක් බවත් වැඩපිළිවෙළක් ඇත්තේ ඒගොල්ලන්ට පමණක් බවත්, අලුත් අත්හදා බැලීම්වලට නොයා යුතු බවත් ජනතාවට කියනවා. එය මිථ්‍යාවක්.

මෙවැනි ප්‍රකාශ කරන්නේ කවුද කියා බලමු. මෙතෙක් මේ වැරදි ප්‍රතිපත්ති අඛණ්ඩව විවිධ ආණ්ඩු යටතේ ක්‍රියාත්මක කරන්නට ඍජුව හා වක්‍රව දායක වූ, මැති ඇමතිකම් දරමින් කටයුතු කළ අය, ප්‍රශ්නවලට විසඳුම් තිබෙන්නේ මේ ක්‍රමය තූළ පමණක් බව කියනවා. ඔවුන් මේ සිදුකරන්නේ විසඳුම් සඳහා විකල්ප වැඩපිළිවෙළකට යන්න තිබෙන පාර වහන්න උත්සාහ කරන එකයි. ඔවුන් මේ මොහොතේදී මුහුණ දී තිබෙන අර්බුදකාරී තත්වයේදී වැඩපිළිවෙළක් සමාජයට ඉදිරිපත් කරමින් තිබෙනවා. අයි.එම්.එෆ් එක හරහා ණය ගැනීමෙන් මේ රට ගොඩගන්න පුළුවන්, ආර්ථිකය වර්ධනය කරන්න පුළුවන්, ණය උගුලක සිරවී සිටින නිසා කරන්න හැකියාවක් නැතිකම, ඒ ණය ගෙවන්න නම් රාජ්‍ය දේපළ විකුණන්න ඕනෑ බවට වන මතය සමාජගත කරමින් ඉන්නවා. ඒ මතය තහවුරු කිරීමට අප හැර, ආණ්ඩුවත්, විපක්ෂයේ අනෙක් කණ්ඩායම් ඍජුව හා වක්‍රව දායක වෙනවා. විපක්ෂයේ ප්‍රතිපත්ති තුළ ආණ්ඩුවේ වැඩපිළිවෙළ වෙනත් ආකාරයකින් සාධාරණීකරණය කරන්න උත්සාහ ගන්නවා. ඔවුන්ගේ ප්‍රතිපත්ති තුළ වංචාව, දූෂණය පිටුදැකීම කියා පරිච්ඡේදයක් ඉදිරිපත් කරමින්, රාජ්‍ය දේපළ විකිණීමේ ප්‍රතිපත්තිය, දැනට ආණ්ඩුව අනුගමනය කරන ප්‍රතිපත්තියම සාධාරණීයකරණය කිරීම සඳහා විශේෂයෙන් බලශක්තිය උපයෝගීතාවයන් පිළිබඳව අකාර්යක්ෂමතාවයන් රටේ පවතින බවත්, දූෂිත රාජ්‍ය ආයතන තිබෙන බවත්, එවැනි ආයතන ගොඩගන්න නම් එම ආයතන විකුණන්න ඕන බවත් සමාජ මතයක් හදනවා. ජලය, විදුලිබලය, බලශක්ති වගේ ක්ෂේත්‍ර විකිණීමට අවධානය යොමු කරනවා.

රට අර්බුදකාරී තත්වයකට වැටී තිබියෙදී ගොඩගන්නා ව්‍යායාමය තුළ සෑම කෙනෙකුම විවිධ ආකාරයට විවිධ ධාරිතාවන් යටතේ දායක වෙන්න ඕනෑ. ආර්ථිකයක් ගොඩගන්නකොට විශාල පංගුවක් ඉෂ්ට කරන්න අවිනිශ්චිත තත්වයකදී තනි තනි පුද්ගලයන්ට විශාල පරිමාණයෙන් ආයෝජනය කිරීමට, අවදානම දැරීමේ අපහසුතාවය තිබෙනවා. එවැනි අවස්ථාවකදී රාජ්‍ය දේපළවල වැදගත්කමක් තිබෙනවා. ඔවුන් මේ යෝජනා කරන්නේ රාජ්‍ය දේපළ කුණු කොල්ලයට විකුණා යම් ඩොලර් ප්‍රමාණයක් එකතු කර ගැනීමත් අයවැය පරතරයේ යම් සහනයක් ලබාගැනීමත්. ආණ්ඩුවත්, විපක්ෂයත් යෝජනා කරන්නේ ලබාගැනීම හෝ බලය පවත්වාගැනීම සඳහා දිගු කාලීන ආර්ථිකය විනාශ කරමින්, කෙටි කාලීන ආර්ථික උප්පරවැට්ටිවලට යාමක්.

ජාතික ජන බලවේගය රාජ්‍ය දේපළ සම්බන්ධයෙන් අනුගමනය කරන්නේ කුමක්ද යන්න පැහැදිලිව කියා තිබෙනවා. ඒ වගේම ආර්ථික මර්මස්ථාන වැනි දේවල් යම් ආකාරයකට රාජ්‍ය හිමිකාරිත්වය අතහැරියහොත් ගැටලු ගණනාවකට මුහුණ දීමට වෙනවා. ආර්ථිකයක් ගොඩගන්න අවස්ථාවේදී බලශක්තිය, මූල්‍ය වෙළඳපොළ, සන්නිවේදන ඉතාමත් තීරණාත්මකයි. ප්‍රධාන වශයෙන් බලශක්තිය සහ වතුර වගේ දේවල්වලදී දුරදිග නොබලා, ඇතැම් රටවල් යම් පිරිස්වල ප්‍රතිලාභ වෙනුවෙන් පුද්ගලීකරණ වැඩසටහන්වලට ගොස් අත්පත් කරගෙන තිබෙන විනාශකාරී ප්‍රතිඵල ලෝකය දැක තිබෙනවා. එංගලන්තය ජලය පුද්ගලීකරණය කර, අවුරුද්දක් පමණ යනකොට ප්‍රශ්න මතුවී තිබෙනවා. මහජනතාවට නිසියාකාර වතුර දෙන්න බැරිකම, එහි ගුණත්වය අඩුවීම වැනි ප්‍රශ්න මතුවී තිබෙනවා. විකුණපු කණ්ඩායම් දැන් ප්‍රශ්න කරනවා තමන් ගත් ප්‍රතිපත්තිය වැරදි බවත් වෙනත් ඉන් එහා එකකට යන්නේ කොහොමද කියන එකත්. අපි වැනි බංකොලොත්භාවයට පත්වුණු රටක් ග්‍රීසිය. එතනදී ගොඩ යන්න විවිධ ක්‍රම ඉදිරිපත් කළා. ප්‍රතිව්‍යුහගත කිරීම්වලට අමතරව ඔවුන්ගේ රාජ්‍ය ව්‍යවසායන්වලට අනුව කටයුතු කරන්නේ කොහොමද කියලා. ඔවුන්ට රාජ්‍ය දේපළ කිහිපයක් වරාය, දුම්රිය, ගුවන්තොටුපොළවල් විකුණන්න සිද්ධ වුණා. ජර්මනිය, ඉතාලිය සහ චීනය විසින් මිලදී ගෙන වසර පහක් පමණ වෙනවා. නමුත් අදත් ග්‍රීසිය නිසි පරිදි ප්‍රවාහන සේවයක් නොමැති ප්‍රශ්නයට මුහුණ පා සිටිනවා.

මේ පාලකයන් පෙනී සිටින්නේ, මේ තිබෙන තත්වයෙන් රට මුදාගෙන නිසි ගමනකට බලය හුවමාරු වෙන තත්වයකදී එය වැළැක්වීම වෙනුවෙනුයි. ඔවුන් පැරණි දූෂිත යාන්ත්‍රණයම පවත්වාගෙන යාමට උපක්‍රම යොදනවා. මේ දූෂිත යාන්ත්‍රණයේ ඉන්න සමහර අය පෙනෙන්නේ නැහැ. විශේෂ අවධානය යොමුකරන්න ඕනෑ මේ නොපෙනෙන ඇක්ටර්ස්ලා ගැන. දූෂිතයෙක් දූෂණයට විරුද්ධව කතා කරනවා නම්, අපරාධකාරයෙක් අපරාධ අයින් කරන්න කතා කරනවා නම්, සමාජය විශේෂයෙන් ඒ අය ගැන සැලකිලිමත් වෙන්න ඕනෑ. මේ ආර්ථිකය ගොඩනඟන්න ව්‍යුහාත්මක වෙනසක් කරන්නම ඕනෑ. හැම කෙනෙක්ම එකතුවෙලා පොර බදන්න ඕනෑ. ඒ නිසා අපි නිසි වැඩපිළවෙළක් ඉදිරිපත් කොට තිබෙනවා.

ජාතික ජන බලවේගයේ ආණ්ඩුවක් ආවොත් බලශක්තිය පිළිබඳව ගැටලුවකින් තොරව ඕනෑම අයෙකුට ආර්ථික ක්‍රියාකාරකමක නියැලෙන්න අවස්ථාව ලැබෙනවා. ජාතික ජන බලවේගය ආර්ථික ප්‍රතිපත්තිය ඇතුළේ ඉතිරි කිරීම් ආයෝජනය සඳහා හා විදේශීය ආයෝජනය කැඳවන්නේ කොහොමද? ණය ලබා ගන්නේ කෙසේද? ප්‍රතිලාභ කෙටි කාලීන හා දිගු කාලීන වශයෙන් එන්නේ හා බෙදා ගන්නේ කොහොමද කියන එක ඉතා පැහැදිලිව ප්‍රකාශ කර තිබෙනවා.

මහජනතාවට කියන්නේ මේ බල තුලනයේ අවසාන විචල්‍යය බවට පත්වෙන්නේ ඔබගේ ඡන්දයයි. ඔබ මේ දූෂිත කණ්ඩායම්වල විවිධ උපක්‍රමවලට අසුවීමේ ඉඩකඩ තිබෙනවා. දූෂිතයන් කවුද යන්න ඔබ හරියටම බෙදුම් ඉර ඇඳගෙන ඉන්නේ. මේක ඉදිරියටත් පවත්වාගෙන යන්න. කිසිම ආකාරයේ නොමඟ යැවීම්වලට අසුවෙන්න එපා. අපේ ප්‍රතිපත්තිවල, වැඩපිළිවෙල පිළිබඳ යම් ගැටලු තිබෙනවා නම් ලංකාව පුරා විහිදුණු, ග්‍රාමසේවා වසම්වල කොට්ඨාස මට්ටමේ ක්‍රියාත්මක වෙන සංවිධාන ජාලයක් තිබෙනවා. ඒවා ඇතුළට සම්බන්ධ වෙලා අප පිළිබඳව විමර්ශනය කරන්න; කරුණු එකතු කරන්න; තේරුම් ගන්න. අපි එකතු වෙලා බලය වෙනස් කිරීමේ කාර්යයට සම්බන්ධ වෙමු. මේ වංචනිකයක්, දූෂිතයන් බලයේ ඉඳගෙන මහජනතාවට දෙන පීඩනයෙන් ඔවුන් ඉවත් කරලා හැම කෙනෙකුටම සතුටින් ජීවත් වීමට සමාජය හැදීමේ කාර්යයට දායක වෙමු.”

Lanka Truth | 2024.04.02

Like

Comment

Share

A day in the life

Read More

සුදුළූණු

Dr Bandula Sathkumara

සුදුළූණු යනු ළූණු පවුලට අයත් ශාකයකි

සුදුළූණු යනු පුරාණ කාලයේ සිට පරිභෝජනය කරන ලද පොලිෆෙනොලික් සහ කාබනික සල්ෆර් අඩංගු පෝෂණීය කුළුබඩු වර්ගයකි.

සුදුළූණු සහ එහි ද්විතියික පරිවෘත්තීය ප්‍රතිඔක්සිකාරක, කොලෙස්ට්‍රරොල්/ ලිපිඩ අඩු කිරීමේ ගුණාංග, පිළිකා, හෘද වාහිනී සහ පරිවෘත්තීය ආබාධ, රුධිර පීඩනය සහ දියවැඩියාව .අසත්මිකතා, පිළිකා, හෘද වාහිනී සහ පරිවෘත්තීය ආබාධ, සම, අස්ථි සහ අනෙකුත් බෝහොමයක් රෝග සදහා සුදුළූණු පරිභෝජනය, ඉතාමත් සුදුසු බව සොයාගෙන ඇත.

සුදුළූණු වල කැලරි අඩු වන අතර විටමින් C, විටමින් B6 සහ මැංගනීස් බහුලව අඩංගු වේ. වෙනත් විවිධ පෝෂ්‍ය පදාර්ථව මාත්‍ර ද එහි අඩංගු වේ.

සුදුළූණු උණ සහ සෙම්ප්‍රතිශ්‍යාව වැනි රෝග සුව කීරීමට සහ සැදීමා වළක්වා ගැනීමට උපකාරී වේ

අධි රුධිර පීඩනය ඇති අයගේ රුධිර පීඩනය පාලනය කිරීමට සුදුළූනු වලට හැකිය.

සුදුළූනු මගින් සම්පූර්ණ සහ LDL කොලෙස්ටරෝල් අඩු කරන බව පෙනේ,

සුදුළූණු වල ප්‍රතිඔක්සිකාරක අඩංගු වන අතර එය සෛල වලට වන හානි අඩු කරයි.

මෙය ඇල්සයිමර් රෝගය සහ අනෙකුත් ඩිමෙන්ශියා රෝග වල අවදානම (හෝ ප්‍රගතිය මන්දගාමී වීම) අඩු කරයි.

සුදුළූණු අමුවෙන් ආහාරයට ගැනීමෙන් අමතර ප්‍රතිලාභ ලබා ගත හැකිය, මන්ද සුදුළූණු වල ඇති සමහර හිතකර සංයෝග තාපය මගින් විනාශ විය හැක.

සුදුළුණු බොහෝ මිනිසුන් සඳහා ආරක්ෂිත සහ සෞඛ්ය සම්පන්න වේ. නමුත් ඔබ රුධිරය තුනී කරන බෙහෙත්(වොෆරින් වැනි)0 ලබා ගන්නේ නම්, ඔබේ සුදුළූණු අහාරයට ගැනීමේ ප්‍රමාණය වැඩි කිරීමට පෙර වෛද්‍යවරයෙකු සමඟ කතා කරන්න.

කොලෙස්ටරෝල් අඩු කිරීමට පුද්ගලයෙකු කොපමණ සුදුළූණු ගත යුතුද?

දිනපතා සුදුළූණු ග්‍රෑම් 2-20 ක් පරිභෝජනය කිරීම කොලෙස්ටරෝල් අඩු කිරීමට උපකාරී වන බව පර්යේෂණවලින් පෙනී යයි. කෙසේ වෙතත්, කොලෙස්ටරෝල් අඩු කිරීම සඳහා සුදුළූණු වල නියම මාත්‍රාව තීරණය කිරීම සඳහා වැඩි පර්යේෂණ අවශ්‍ය වේ.

කොලෙස්ටරෝල් අඩු කිරීම සඳහා සුදුළූණු ආහාරයට ගත හැකි හොඳම ක්‍රරමය කුමක්ද?

සුදුළූණු කොලෙස්ටරෝල් අඩු කිරීමට කොපමණ කාලයක් ගතවේද?

සති 8 ක් සඳහා සුදුළූණු ගැනීමෙන් කොලෙස්ටරෝල් මට්ටම වැඩි දියුණු වන බව අධ්‍යයනයන් පෙන්වා දී ඇත.

සුදුළූණු කොලෙස්ටරෝල් සහ රුධිර පීඩනය අඩු කරයිද?

සායනික අත්හදා බැලීම් වලදී, සුදුළූණු සැලකිය යුතු අතුරු ආබාධ නොමැතිව රුධිර පීඩනය විශ්වාසනීය මූලාශ්‍රය අඩු කර ඇත.

A day in the life

Read More