ගිතෙල් වල ගුණ.

කෙනෙකු ගිතෙල් ආහාරයට ගන්නා වග ඇසීමෙන් පවා ඔහු බුද්ධිමත් ධර්මිකයකු ය යන හැඟීමක් ඉබේම ඇති වේ. එසේ වන්නේ සිහි නුවණ, ශුක්‍ර, ඕජස්, බල වර්ණ, දෘෂ්ඨි ශක්ති වර්ධක ගුණ වැඩි වශයෙන් ගිතෙල තුළ ඇති නිසා යි. "ඍණං කෘත්වා ඝෘතඃ පිබේ" "ණය වී හෝ ගිතෙල් කන්න" යනුවෙන් ඉපැරණි ඉන්දියානු දර්ශන වේදියෙකු වූ චාර්වාක ද පවසා ඇත්තේ ගිතෙල් තුළ එපමණකටම ගුණයන් ඇති හෙයිනි.
අපට ගිතෙල් බත්, දුන්තෙල් බත් කෑමට ලැබෙන්නේ කලාතුරකිනි. පායාසත් (කිරිබතක්) එසේ ය. ඉන්දියානු බමුණන් ගේ දවස දෙවේලේ පරිභෝජනයට මේවා ඇතුලත් වේ. සිංහලයන් ද කිරි, දී කිරි, මෝරු, වෙඬරු, ගිතෙල් හොඳ හැටි කෑවේ අනුරාධපුර ආර්‍යශිෂ්ඨාචාරය පැවති සමයේ යි. ගුණැති ආහාර අනුභවයේ අගය අදටත් රජරටෙහි නෂ්ඨාවශේෂ දැකීමෙන් සිතාගත හැකි ය. එදා කිරි ගිතෙල් වල පැවතුන ගුණය අදත් එසේම ය. ඇති එකම වෙනස සපයා ගැනීමට අපහසු වීම සහ සාමාන්‍ය ජනයාට එහි අගය නොතේරීමයි. ජාතියේ අවාසනාවකට තවමත් සාමාන්‍ය ජනයා තුළ සැලකිය යුතු මට්ටමේ කැමැත්තක් දැනුමක් මෙම ගිතෙල් පරිභෝජනය කිරීමෙහි නොපවතී. එකල අපට තිබූ කායික ශක්තියත්, බුද්ධි බලයත් නැවත සුළුවෙන් හෝ වඩා ගැනීමට අවශ්‍ය නම් ගිතෙල් මුසු බත ස්වල්පයක් හෝ ගැනීම ඉතා ගුණදායක ය.
"අප්‍රේල් මස 14 වෙනි සිකුරාදා පූර්ව භාග 05.41ට රන්වන් පැහැති වස්ත්‍රාභරණයෙන් සැරසී උතුරු දිශාව බලා ලිප් බැඳ, ගිනි මොලවා, ගිතෙල් හා හකුරු මිශ්‍ර කිරිබතක් ද අග්ගලා සහ කැවිලි වර්ගයක්ද පිළියෙලකර ගැනීම මැනවි."
අලුත් අවුරුදු නැකැත් සීට්ටුවේ එන ආහාර පිසීමේ නැකතට ඉහත පරිදි ගිතෙල් මුසු කිරිබතක් සෑදීම අනිවාර්‍ය කෙරුනත් සැබවින්ම එය ද එපරිද්දෙන් සකසා ගන්නේ කීයෙන් කී දෙනාද? සමහරවිට පුද්ගලයෙකුට අවුරුද්දටම ගිතෙල් කෑමට ලැබෙන එකම එක අවස්ථාව එයවිය හැකියි.
හෙළ වෙදකමෙහි සහ ආයුර්වේද වෙදකමෙහි එන සමහර සංයෝග ඖෂධ සංස්කරණයට ගිතෙල් නැතිවම බැරි ‍ය. ගිතෙල් වල ගුණ ආයුර්වේදයේ චරක සූත්‍රස්තාන වල සඳහන් වන්නේ මෙපරිද්දෙනි.
ඍතඃ පිත්තානිල හරං - රස ශුක්‍රෝජසා හිතම්
නිර්වාපනම් මෘදුකරං - ස්වර වර්ණො ප්‍රසාදනම්
ගිතෙල් මගින් පිත් දෝෂ සමනය කරන අතර රස ශුක්‍ර ඕජස් යන ධාතු පෝෂණය කරයි. එමෙන්ම ශරීරය පැහැපත් කරමින් ප්‍රසාදයට පත් කරනවා සේම ස්වර ප්‍රසාදය ද (කටහඬ මිහිරි කිරීම) ඇති කරයි.
හෙළ වෙදකමෙහි ගිතෙල් වල ගුණ සඳහන් කිරීමට මෙවැනි රසබර හරවත් කවි පේළි ද භාවිතා කර ඇත.
වැල්පෙනෙල ශාකා
ගිතෙලින් බැද කා
අඹුවන් නොතකන එකා
සියක් අඹුවන් තකා
ගිතෙල් සහ දුන්තෙල් එළගවයාගෙන් සහ මී ගවයාගෙන් ලබාගන්නා කිරි වලින් සකසන තෙල් වර්ග වෙයි. එළදෙනගෙන් ගන්නා කිරි වලින් හදන බටර් උණු කර එහි ඇති ජලවාෂ්ප, කිරි ප්‍රෝටීන ඉවත් කිරීමෙන් පසු එහි ඉතිරිවන තෙල් කොටස ගිතෙල් නම් වෙයි. මෙම ගිතෙල් කහ පැහැයක් ගනී. දුන්තෙල් ලබා ගැනීමට මීකිරි භාවිතා කරයි. එම දුන්තෙල් සුදු පැහැති වේ.
ගිතෙල් වල ගුණ
==================
. ගිතෙල් අපේ ශරීරයට බොහෝ ගුණදායකයි. ගැස්ට්‍රයිටිස් තියෙන අයට තමන්ගේ ආහාර වලට එළඟිතෙල්/ගිතෙල් ටිකක් එකතු කරගැනීමෙන් බඩට ලොකු සහනයක් ලබාගන්න පුළුවන්.
. පොල්තෙල් වලින් ආහාර පිසිනවිට එය 170 °C ක උෂ්ණත්වයට වඩා ‍රත් වූ විට එම තෙල් පිළිස්සුනත් එළඟිතෙල් වලට 250 °C ක තරම් ඉහළ උෂ්ණත්වයක් දක්වා ආහාර පිසගත හැකියි.
. එළඟිතෙල් වල බහුල ලෙස විටමින් A,D,E,K2 අඩංගු වෙයි.
. මෙහි බිඔටොනික් ඇසිඩ් (Biotonic acid) වලින් පොහොසත් නිසා බඩවැල් වල පවතින විෂ තත්වයන් නැසීමටත් එහි සෞඛ්‍ය තත්වය පවත්වා ගැනීමටත් ඉතා ගුණදායක වේ.
. බඩ දැවිල්ල නැතිකරන අතර ආහාර දිරවීමේ ගැටළු ඇති අයට ද ගුණදායක වෙයි.
. මෙහි ලිනොලෙයික් ඇසිඩ් (Linoleic acid) අඩංගු නිසා කොලෙස්ටරෝල් වලටද ගුණදායකයි. එම නිසා හෘදයාබාධ වලට ද ගුණදායක වෙයි.
. කිරි වලට ආසාත්මිකතා දක්වන අයට වුව ද කිසිදු ගැටළුවකින් තොරව එළඟිතෙල් පරිභෝජනය කළ හැකියි.
. මලබද්ධයට ද ගුණදායකයි.
. ප්‍රතිශක්තිය වර්ධනය කරයි.
. විටමින් E අඩංගු නිසා සමෙහි පවතින විවිධ ගැටළු නැතිකළ හැකියි.
. වියළි සමක් පවතින අයට, තොල් පැලෙන අයට, වියළි හිසකෙස් ඇති අයට සහ පිළිස්සීම් වල ට එළඟිතෙල් ආලේපකළ හැකියි.
. අස්ථි පද්ධතිය ශක්තිමත් කිරීමට, ශරීරයේ හෝමෝන සමබර කිරීමට, පිත දෝෂ සමනයට, කටහඬ මිහිරි වීමට, සම පැහැපත් වීමට, විශාදයට ඉතා ගුණදායකයි.
. ඖෂධ සඳහා භාවිතා කරනුයේ පරණ වූ එළඟිතෙල් වේ. එළඟිතෙල් පරණ වෙන්න පරණ වෙන්න එහි ඇති ඖෂධීය වටිනාකම ද ඉහළ යයි.

සැකසුම :- හෙළ අරණ

මූලාශ්‍ර ග්‍රන්ථ :- චරක සංහිතාව, භෝජන සංග්‍රහය - ආයුර්වේද චක්‍රවර්තී පණ්ඩිත ජී.පී. වික්‍රමාරච්චි

මූලාශ්‍ර වීඩියෝ :- අපේ අම්මා youtube නාළිකාව

මූලාශ්‍ර වෙබ් පිටුව :- විකිපීඩියා, නිදහස් විශ්වකෝෂය

........................................................................

____________

~ උපුටා ගැනීමකි.

A day in the life

පඬුවස් නුවර බේගල්

ඩිලාන් ප්‍රගීත් - සොදුරු ඉසඹුව. ( මුණු පොතෙන් ) 

බේගල්කාරයන් කොතෙකුත් සිටිතත්, සත්‍ය සිද්ධි හැටියට ඒ හැම දෙනා ම කියන බොරු රසවත් නැත. රසවත් වන්නේ නිර්මාණාත්මක බේගල්ය. දක්ෂිණ ලංකාවේ කොග්ගල ගමේ බේගල් නයිදේ නමින් ප්රසිද්ධව සිටිය පුද්ගලයා සත්‍ය සිද්ධි හැටියට කියූ ප්‍රලාප අඩංගු කර මාර්ටින් වික්‍රමසිංහ මහා ලේඛකයා බේගල් නමින් පොතක් කළේ ඒවායෙහි නිර්මාණාත්මක ගුණයක් රසයත් සැලැකිල්ලට ගැනීමෙන් බවට සැක නැත.

කොග්ගල ගමේ බේගල් නයිදේ හා ඔහුගේ බේගල් පිළිබඳ මතක මතු වී මගේ පෑන් තුඩ දක්වා ගලා ආවේ පඬුවස් නුවර බේගල් නයිදේ යි. හැඳින්විය යුතු තරමට නිර්මාණ ශක්තියෙන් පොහොසත් දෙමටව ජෝන් මාමාගේ කතා අසන්නට ලැබීමෙනි. මොහු පඬුවස් නුවර නාරම්මල - හෙට්ටිපොළ පාරේ දෙමටව නමැති ගමේ ජීවත් වුණෙකි. 1980 හරිය වන තෙක් ඔහු ජීවන් වුණු බව සැලැකේ.

ඔහු ගැනත්, ඔහුගේ කතාත් මා දැන ගත්තේ දෙමටව ගමට යාබද ගමක් වන මායාකඩවර ගමේ දොන් සිරිසේන දිසානායක මිතුරාගෙනි. මේ මිතුරාට දෙමටව ජෝන් මාමාගේ බේගල් දා හතරක් මතක තිබී මට කියා දුන්නේ ය. මේ කතා වල සමහර තැන් දෙමටව ජෝන් මාමාගේ ම සුවිශේෂ භාෂණයෙනි. තම ළමා වියේ දී, කළු වන් තරබාරු මහල්ලක ව සිටිය දෙමටව ජෝන් මාමා කියූ කතා බොහෝ දුරට ඒ සැටියෙන් මා සිරිසේන දිසානායක මිතුරා මා සමඟ කියා සිටියේය.

ගුවන් යානයක් වූ ගොයම් මිටියකින් දෙමටව ජෝන් මාමා අනුරාධපුර වන්දනාවේ ගිය හැටි කියන කතාව මේ කතා දාතරෙන් එකක්.

"ඉස්කෝලෙ මහත්තයටයි මේ ළමයින්ටයි මේ මා කියන්නේ ඇත්තටම වෙච්ච එකක්."ජෝන් මාමා අනුරාධපුරයට අහසින් යැවුණු කතාව ඇරඹුවේ එසේය. ඉස්කෝලෙමහත්තයා එවෙලේ එතැන සිටිය පාඨශාලාචාර්ය කළුබණ්ඩා අමරසිංහ මහතාය.

ජෝන් මාමා සෙසු බොහෝ කතා වලින් කියන දේවල් මෙන්ම මේ කතාවෙන් කියැවෙන දේද සිදු වූයේ ඔහු දෙමටව ගමේ බින්න බැහැපු තරුණ සැමියකු කාලයේය. කුඹුරු වැඩකට ගිය ගමනක දීය. වැඩට ගියේ මහවැව පාවුල රාලගේ වෙලටය. පැවරුණු කාර්යය වූයේ වෙලේ සිට පන්සල් වන්නේ කමතට ගොයම් කොළ මිටි ඔසවාගෙන ගොස් දැමීමය. හතර දෙනකු අමාරුවෙන් ඔසවා හිස මත තබන ගොයම් කොළ මිටියක් තනියෙම ඔසවාගෙන යන්නට ශක්තිය ජෝන් මාමාට තිබිණි.ඒ තරම් බර, ඒ තරම් විශාල ගොයම් මිටිය හිසේ තබාගෙන ගියේ අනුරාධපුරය ගැන සිත සිතාය. 

අටමස්ථාන වන්දනාවේ යෑමට ආශාව තිබුණු බැවිනි.වැව් පැත්තෙන් හමන සුළගේ වේගය, අටමස්ථාන කල්පනාව නිසා, ජෝන් මාමාට මුල දී තේරුණේ නැත. තේරුණේ සුළභ කුණාටුවක් වී ‍ගොයම් මිටිය අහසට ගසාගෙන යන්නට එසැවෙන විටය. ගොයම් මිටිය ගසාගෙන යෑමට හැරිය නොහැකිය. ඒ නිසා ජෝන් මාමා කළේ ගොයම් මිටියේ ලණු දෙ පට තදින් අල්වා ගැනීමය. 

එත්, සිදු වූයේ කුමක්ද? ජෝන් මාමා ද එල්වාගෙන ගොයම් මිටිය අහසට යෑම ය! අහසේ ඉහළට ඉහළට යෑම ය!

වලාකුළු වලිනුත් ඉහළට ගියාට පසු පොළොව පෙනුණේන් නැත. ඉතින් ඇස් ඇරගෙන සිටීමෙන් පලක් නැති නිසා ජෝන් මාමා ඇස් පියාගත්තේය. වෙහෙස දැඩි නිසා නින්ද යනවා වාගෙන් විය.

මෙන්න ! ජෝන් මාමාට හීනෙන් වාගේ දැනුණේ ගොයම් මිටිය පහළට පහළට තතව පහළට බහිනවා වාගේය! ඇස්බලන විට නැබෑවය ! හෙමින් සීරුවේ පහළට ආ ගොයම් මිටිය සමඟ තමා සේන්දු වූයේ බිමට මය! ගොයම් මිටිය බිම දමා බලන විට මේ කෙහේ ද! අනුරාධපුරයේ ඉසුරුමුණිය විහාර භූමියය!

විශාල පිරිසක් එහෙන් මෙහෙන් ඇවිත් ජෝන් මාමා වට කරගන්නට වැඩි වේලාවක් ගත වුණේ නැත.ඉසුරුමුණියේ ලොකු හාමුදුරුවෝත් ඒ තැනට වැඩියහ.අහස් ගමන් විස්තරය ආසා දැනගත් ලොකු හමුදුරුවෝ දායකයන් මගින් ජෝන් මාමාට සරමකුත් බැනියමකුත් ලැබෙන්නට සැලැස්වූහ. ජෝන් මාමා මෙ තෙක් සිටියේ ගොයම් අදින්නට ගසාගත් අමුඩයෙන් බැවිනි.

සරමෙන් බැනියමෙන් සැරැසෙන්නට පෙර,කිසා වැවෙන් නෑම සඳහා ජෝන් මාමා ගියේලොකු හමුදුරුවන් යෙදැවූ මහ පෙන්වන්නන්  කීප දෙනෙකු සමඟ ම. නාගෙන පැමිණි ජෝන් මාමාට කෑමබීම ද එ දා දවස විවේකයෙන් සිටින ලෙසට උපදෙස් ද ලැබුණේය.පසුදා සිට ඔහු දවස් ගත කළේ අටමස්ථානය හිතේ හැටියට වන්දනාමාන කරගනිමිනි. කොච්චර දවස් ගත වුණා දැයිජෝන් මාමාට තේරුණේ නැත. ආපසු ගමට යා යුතු බව මතක් වී ඒ සඳහා සැරසෙන විට ගමන් වියදම වශයෙන් ලොකු හාමුදුරුවෝ රුපියල් දහයක් දුන්හ. ඒ කාලයේ දහය සුළුමුදලක් නොවෙයි.

ජෝන් මාමා, අහස් ගමන් කතාව අවසන් කළේ මෙසේය.ළමයිනේ මට ඉතින් ගෙදර එන්න කොව්වරදවස් ගත වුණා ද දන්නවාද ? මං ගෙදර එනකොට මගේ හත් දොනේ දානෙන් දීල මේව මේ බොරු කතා හෙම නෙමේ.

සිරිලාල් කොඩිකාර

(දෙසතිය 1999 මැයි 15-30කලාපයෙන් උපුටා ගන්නා ලදී)

රිවිරැස පිටුව වෙනුවෙන් A.Herath විසින් පළකරන ලදී.





A day in the life

බුදු මැදුරට යන්නට හොඳ නැද්ද?

කාන්තාවන් ඔසප් වන දිනයට බුදු මැදුරට යන්නට හොඳ නැද්ද?

👧👧👧  මිත්‍ය මත බැහැර කල යුතුයි. අද ශාරීරික සෞඛ්‍ය ගැන දැනුම්වත් සමාජයක අපි ඉන්නේ.මානසික සුවය තහවුරු කරගෙන සැහැල්ලු වෙන් සිටිය යුතු දවසක දෙකක බුදුන් සිහිපත් කරගෙන සිත සැහැල්ල්ු කර ගැනීම කොයිතරම් හොදයි ද ?.👧👧👧

කාන්තාවන්ට බුදුන් වදින්න විතරක් නොවේ, සියළුම කුසල් කරන්න හොඳම දවසක් වන්නේ ඔසප් වන දවසයි.
සියළුම සසර දුක් නසන්න පිහිට සරණ වන තුණුරුවන්, සියළුම කායික දුක් නැති කර ගන්නත් අතිශයින්ම මහනීය ඖෂධයක්ම වේ.
ආවෙණිකදුක්ඛ සූත්‍රයේ භාග්‍යවතුන් වහන්සේ මෙසේ දේශනා කළ සේක.
පින්වත් මහණෙනි, පුරුෂයන් හැර කාන්තාවන්ට පමණක් විදින්නට සිදු වන දුක් පසක් තිබේ.ඒ දුක් පහ වන්නේ
“පින්වත් මහණෙනි,
1. මේ ලෝකයෙහි කාන්තාව ලාබාල වයසේදීම ස්වාමියාගේ නිවසට ගොස් නෑයන්ගෙන් වෙන් වෙයි.
2. කාන්තාව ඔසප් වේ.
3. කාන්තාව ගැබිණියක් වෙයි.
4. කාන්තාව දරුවන් වදයි.
5. කාන්තාව සැමියාට උපස්ථාන කරන්නියක් බවට පත් වෙයි.
මේවා පිරිමින්ට විඳින්නට නැති කාන්තාවන්ට පමණක් විදින්නට වන දුක් කරදර පහයි.”
කාන්තාවන්ගේ ඔසප් දිනයට ඔවුන්ට, හිසේ කැක්කුම, ගර්භාෂායේ කැක්කුම, කෑම අරූචිය, මානසික නොසන්සුන් කම, කරකැවිල්ල, බඩ බුරුල් වීම, ඔක්කාරය, වැනි කායික සහ මානසික වේදනා රාශියක්ම විදින්නට සිදු වේ.
එවැනි වේදනාත්මක පීඩාකාරී දවස් වලට තුන් ලෝකයේ එකම ආරක්ෂාව, රැකවරණය, සැනසිල්ල වන බුද්ධ රත්නය ළඟට යන්නත් තහනම් කරනවානම් එසේ කියන අයට තියෙන්නේ තදබල මිථ්‍යා දෘෂ්ටියක් බව කිව යුතුය. 

බුදුරජාණන් වහන්සේ වැඩ සිටිය කාලයේ මහ රහත් තෙරණින් වහන්සේලාගේ සිට සියලුම භික්ෂුණීන් වහන්සේලා, මාසික ඔසප් දිනයට භාග්‍යවතුන් වහන්සේ මුණ ගැසී ධර්මශ්‍රවණය කර තිබේ. එකළ එයට කිසිදු බාධාවක් තිබී නැත.
ඔසප් දින වල අතීත භික්ෂුණීන් වහන්සේලාට සීමාවට වැඩම කර පොහොය කර්ම කිරීමටද කිසිදු බාධාවක් තිබී නැත. විවිධ විනය කර්ම කිරීමටද, බුදු රජණන් වහන්සේ සහ උභතෝ සංඝරත්නයේ දානාදියට සහභාගි වන්නට කිසිදු තහංචියක් තිබී නැත. 

හේමමාලා කුමරිය දන්ත ධාතූන් වහන්සේ වඩම්මවන විට ඇයද කාන්තාවන්ට ආවේණික මෙම සිදුවීමට මුහුණ පෑවාය.
ඒ අතීත උත්තමාවියන් මෙවැනි වේදනාකාරී දවසක වඩ වඩාත් බුද්ධ රත්නයේ, ධර්ම රත්නයේ, සංඝ රත්නයේ පිහිටම තමන්ගේ ජීවිතයට ලබා ගන්නට කටයුතු කළාය. 

කාන්තා පිරිමි දෙපක්ෂයම ඇවිදින අසුචි ගොඩවල් වැනිය. ඔවුන් අතරින් කාන්තාවන් ඔසප් වන දිනයේ ඔවුන්ව ආගමික කටයුතු වලින් ඉවත් කිරීම, කොන් කිරීම, වධ දීම, පීඩාවට පත් කිරීම, දොස් කීම වැරදිය. ඔවුන්ට බුදු මැදුරට යාම තහනම් කිරීම ධර්ම විනයට පට හැනි මිථ්‍යා දෘෂ්ඨියකි.
එම දවසට කාන්තාවන්ට තුණුරුවන්ගේ සෙවන තුළින් වඩ වඩාත් සහනය ලබන්නට ඉඩකඩ සැලසිය යුතුය. 

කාන්තාවන්ගෙන් උයන පිහන වැඩ, ගෙදර දොර වැඩ එවැනි වේදනාත්මක දවසක ගැනීම නම් සුදුසු නැත. පිරිමින් අපහසුවට පත්ව සිටින තමන්ගේ බිරිඳ සහ දියණිය එම වැඩ කටයුතු වලින් එදිනට නිදහස් කර ඒවා කර දිය යුතුය. 

එම දිනයෙහි දී බුදු මැදුරට ගොස් මල් පහන් පූජා කර උතුම් පින් රැස්කර ගන්නා කාන්තාවන්ට ලැබෙන කුසලය අහෝසි වන්නේ කුමන කරුණු නිසාද? කියා කර්ම සකස්වන විදිහ අනුව විමසා බැලිය යුතුය. එවිට පෙනෙන්නේ සමහර විට වෙනදාට වඩා ඇයට එදිනට පින් කර ගත හැකි බවයි. ඇයට කායික මානසික අපහසුතාවය නිසා වඩ වඩා තුණුරුවන්ගේ ගුණ සිහි කරමින් එදිනට පිහිට ලබාගත හැකි ය.
සසරේ භයානක බව වටහාගෙන ත්‍රිලක්ෂණය ඔස්සේ සංස්කාරයන්ගේ හැටි තේරුම් ගන්නටද පුළුවන. විදර්ශනාව හොඳින් වැඩය හැකි දිනයක් බවට ද පත් විය හැක. 

ප්‍රේතාදී අමනුෂ්‍ය පිරිස් ගැබ් මල, බැහැර කරන ලද ඔසප් ලේ, කෙළ සැරව වැනි දෑ අනුභවයට පැමිණීම සාමාන්‍ය දෙයකි. නමුත් නිරතුරුවම ඥාතීන්ට දෙවියන්ට පින් අනුමෝදන් කරමින්, පින් දහම් සිදු කරන ස්ථානයකට, අමනුෂ්‍යයින්ට පැමිණෙන්නට දෙවියන් විසින්ද ඉඩ ලබා දෙන්නේ නැත. 

කාන්තාවන්ගේ ඔසප් දිනයක වුවත්, කිසිදු බියක් සැකක් නොමැතිව තම තමන්ගේ නිවෙස් වල බුදු මැදුරු වල හෝ වෙහෙර විහාරස්ථාන වලට ගොස් හිතේ හැටියට පින්කම් කරගත හැකිය. එදිනට වුවත් ඇතිවන ත්‍රිහේතුක උත්කෘෂ්ට ඥාන සම්පයුත්ත කුසල් සිත් වලට, එවැනි ම විපාක ලැබෙනවා හැර අකුසල විපාකයක් ලැබෙන ක්‍රමයක් නැත. 

එම නිසා බිය නොවී ඔබට පීඩාකාරීම මොහොතේ තුණුරුවන් පිහිට කර ගන්න.
තෙරුවන් සරණයි!!! සුවපත් වෙත්වා!!!

උපුටාගැනීම

තපෝවනයේ රතන ස්වාමින්වහන්සේ ලියු ලිපියක්

මල්කි ගජනායක

A day in the life

දැනුම රත්තරන්සේ වටිනවා.

චීනයේ ගුවැන්ෂු හි සිදු වූ මංකොල්ලයක් අතරතුර, බැංකු කොල්ලකරු බැංකුවේ සිටි සියල්ලන්ටම කෑ ගැසුවේය: "හෙල්ලෙන්න එපා. මුදල් රාජ්‍යයට අයිතියි. ඔබේ ජීවිතය ඔබට අයිතියි."
බැංකුවේ සිටින සියල්ලන්ම නිහඬව වැතිර සිටියහ. මෙය "මනස වෙනස් කිරීමේ සංකල්පය" ලෙස හැඳින්වේ. 

සාම්ප්‍රදායික චින්තන ක්‍රමය වෙනස් කිරීම.
කාන්තාවක් ප්‍රකෝපකාරී ලෙස මේසය මත වැතිර සිටින විට, කොල්ලකරු ඇයට කෑ ගැසුවේය: "කරුණාකර ශිෂ්ට සම්පන්න වන්න! මෙය දූෂණයක් නොව මංකොල්ලයකි!"
මෙය "වෘත්තීය වීම" ලෙස හැඳින්වේ. ඔබට කිරීමට පුහුණු කර ඇති දේ කෙරෙහි පමණක් අවධානය යොමු කරන්න! 

බැංකු කොල්ලකරුවන් ආපසු නිවසට පැමිණි විට, බාල කොල්ලකරු (MBA පුහුණුව ලත්) වැඩිහිටි කොල්ලකරුට (ප්‍රාථමික පාසලේ 6 වන ශ්‍රේණිය පමණක් සම්පූර්ණ කර ඇති) මෙසේ පැවසීය: "ලොකු අයියා, අපි කොපමණ මුදලක් ලබා ගත්තාද කියා ගණන් කරමු."
වැඩිහිටි කොල්ලකරු ප්‍රතික්ෂේප කරමින් මෙසේ පැවසීය: "ඔයා හරිම මෝඩයි. ගණන් කිරීමට අපට බොහෝ කාලයක් ගතවන තරම් මුදල් තිබේ. අද රාත්‍රියේ, රූපවාහිනී ප්‍රවෘත්ති අපට බැංකුවෙන් කොපමණ කොල්ල කෑවාද කියා කියනු ඇත!"
මෙය "අත්දැකීම්" ලෙස හැඳින්වේ. අද කාලේ, කඩදාසි සුදුසුකම් වලට වඩා අත්දැකීම් වැදගත්! 

කොල්ලකරුවන් ගියාට පස්සේ, බැංකු කළමනාකරු බැංකු අධීක්ෂකවරයාට කිව්වා ඉක්මනින් පොලිසියට කතා කරන්න කියලා. නමුත් අධීක්ෂකවරයා ඔහුට කිව්වා: "ඉන්න! අපි බැංකුවෙන් ඩොලර් මිලියන 10ක් අරගෙන අපි කලින් බැංකුවෙන් වංචා කළ ඩොලර් මිලියන 70ට එකතු කරමු".
මෙයට කියන්නේ "රැල්ලත් එක්ක පීනන්න" කියලා. අහිතකර තත්වයක් ඔබේ වාසියට හරවා ගැනීම! 

අධීක්ෂකවරයා කියනවා: "සෑම මසකම මංකොල්ලයක් සිදුවුවහොත් එය හොඳයි."
මෙය "කම්මැලිකම නැති කිරීම" ලෙස හැඳින්වේ. ඔබේ රැකියාවට වඩා පුද්ගලික සතුට වැදගත්. 

ඊළඟ දවසේ රූපවාහිනී ප්‍රවෘත්ති වාර්තා කළේ බැංකුවෙන් ඩොලර් මිලියන 100ක් ලබා ගත් බවයි. කොල්ලකරුවන් ගණන් කළා, ගණන් කළා, නමුත් ඔවුන්ට ගණන් කළ හැක්කේ ඩොලර් මිලියන 20ක් පමණයි. කොල්ලකරුවන් ඉතා කෝපයට පත් වූ අතර පැමිණිලි කළේ: "අපි අපේ ජීවිත අවදානමට ලක් කළා, ඩොලර් මිලියන 20ක් පමණයි ගත්තේ. බැංකු කළමනාකරු ඇඟිලි තුඩකින් ඩොලර් මිලියන 80ක් ගත්තා. සොරෙකු වීමට වඩා අධ්‍යාපනය ලැබීම හොඳ බව පෙනේ!"
මෙය "දැනුම රත්තරන් තරම් වටිනවා!" ලෙස හැඳින්වේ. 

කොටස් වෙළඳපොලේ ඔහුගේ පාඩු දැන් මෙම මංකොල්ලයෙන් ආවරණය වී ඇති නිසා බැංකු කළමනාකරු සිනාසෙමින් හා සතුටින් සිටියේය.

මෙය "අවස්ථාව අල්ලා ගැනීම" ලෙස හැඳින්වේ. අවදානම් ගැනීමට එඩිතර වීම!
ඉතින් මෙහි සැබෑ මංකොල්ලකරුවන් කවුරුන්ද?

තිලින මිහිරාන්.

- මෙය ඉංග්‍රීසි භාෂාවෙන් පල වූ කතාවක

උපුටනයකි.

A day in the life

කස කසා ඇට

ඔබත් කසකසා ඇට දාපු සරුවත් බීලා තියනව ද..? -
ඔබ දන්න කස කසා ඇට මේස හැන්දක් දිනපතා ආහාරයට ගැනීමෙන් ඔබේ ශරීරයේ සිදුවන වෙනස..
සුපිරි ආහාරයක් ලෙස බොහෝ විට හඳුන්වන චියා බීජ හෙවත් කස කසා ඇට, සැල්වියා හිස්පැනිකා ශාකයෙන් ලබාගත් කුඩා කළු හෝ සුදු බීජ වේ.
මෙම කුඩා බීජ ප්‍රමාණයෙන් කුඩා විය හැකි නමුත්, ඒවා ප්‍රබල පෝෂණ ගුණයක් සහිතයි. දිනකට මෙම ගන්නා කස කසා ඇට මේස හැන්දක් පමණක් සෞඛ්‍ය ප්‍රතිලාභ රැසක් අපට ලබා දෙයි. 

මෙම පෝෂ්‍ය පදාර්ථ බහුල බීජ ඔබේ ආහාර වේලට එකතු කිරීමෙන් ඔබේ ශරීරයට කළ හැකි කැපී පෙනෙන දේවල් දහයක් තමයි මේ:
1. ඔබේ ආහාර ජීර්ණය වැඩි දියුණු කරයි.
කස කසා බීජ ආහාරමය තන්තු වලින් පොහොසත් වන අතර, එක් මේස හැන්දක තන්තු ග්‍රෑම් 5 ක් පමණ අඩංගු වේ. මෙම තන්තු අන්තර්ගතය බඩවැල් චලනයන් නියාමනය කිරීමට සහ බඩවැල් සෞඛ්‍යයට සහාය වේ. මෙම බීජ වල ද්‍රාව්‍ය තන්තු ජලය සමඟ මිශ්‍ර කළ විට ජෙල් වැනි ද්‍රව්‍යයක් සැදෙයි, එය ආහාර දිරවීම මන්දගාමී කිරීමට සහ පෝෂ්‍ය පදාර්ථ අවශෝෂණය වැඩි දියුණු කිරීමට උපකාරී වේ.
ඔබ මලබද්ධය හෝ අක්‍රමවත් ආහාර ජීර්ණය සමඟ අරගල කරන්නේ නම්, මෙම බීජ මෘදු, ස්වාභාවික පිළියමක් ලෙස යොදා ගත හැකිය. 

2. ඔබේ බර කළමනාකරණයට සහාය වේ.
ඒවායේ ඉහළ තන්තු සහ ප්‍රෝටීන් අන්තර්ගතය නිසා, කස කසා බීජ ඕනෑම බර කළමනාකරණ සැලැස්මකට අපූරු එකතු කිරීමට හැකිය. මෙම බීජ වල ඇති තන්තු ඔබට දිගු කාලයක් පූර්ණ බවක් දැනීමට, කුසගින්න අඩු කිරීමට සහ අධික ලෙස ආහාර ගැනීම වැළැක්වීමට උපකාරී වේ. මේ අතර, ප්‍රෝටීන් මාංශ පේශි අලුත්වැඩියාවට දායක වන අතර රුධිරයේ සීනි මට්ටම ස්ථාවර කිරීමට උපකාරී වන අතර එමඟින් ආහාර රුචිය අඩු කළ හැකිය. 

3. ඔමේගා-3 මේද අම්ලවලින් පොහොසත් ප්‍රභවයක් සපයනවා.
මෙම බීජ යනු ඔමේගා-3 මේද අම්ල, විශේෂයෙන් ඇල්ෆා-ලිනොලනික් අම්ලය (ALA) සඳහා හොඳම ශාක පදනම් කරගත් ප්‍රභවයකි. මොළයේ සෞඛ්‍යයට, දැවිල්ල අඩු කිරීමට සහ හෘද සෞඛ්‍යයට සහාය වීමට ඔමේගා-3 අත්‍යවශ්‍ය වේ. නිර්මාංශිකයින්ට හෝ මාළු වලින් වැළකී සිටින ඕනෑම කෙනෙකුට, මෙම බීජ ඔබේ ඔමේගා-3 අවශ්‍යතා සපුරාලීම සඳහා විශිෂ්ට විකල්පයක් ලබා දෙනු ඇත. 

4. අස්ථි ශක්තිය වැඩි දියුණු කරයි.
චියා බීජ හෙවත් කස කසා බීජ යනු කැල්සියම්, මැග්නීසියම් සහ පොස්පරස් වල විශිෂ්ට ප්‍රභවයකි - ශක්තිමත් අස්ථි සහ දත් පවත්වා ගැනීම සඳහා අත්‍යවශ්‍ය ඛනිජ මෙම බීජ මේස හැන්දක පමණක් කැල්සියම් මිලිග්‍රෑම් 76 ක් පමණ අඩංගු වේ. එය දෛනික නිර්දේශිත පරිභෝජනයෙන් දළ වශයෙන් 6% කි.
කිරි නිෂ්පාදන වලින් වැළකී සිටින හෝ අමතර අස්ථි සහාය අවශ්‍ය පුද්ගලයින් සඳහා, චියා බීජ ඔබේ ආහාර වේලට පහසු සහ ඵලදායී එකතු කිරීමකි. 

5. හෘද සෞඛ්‍යය වැඩි දියුණු කරයි.
චියා බීජ වල ඇති ඔමේගා-3 මේද අම්ල, තන්තු සහ ප්‍රතිඔක්සිකාරක වඩා හොඳ හෘද සෞඛ්‍යයකට දායක වේ. තවද, චියා බීජ වල ඇති ප්‍රතිඔක්සිකාරක මගින් හෘද වාහිනී රෝගවලට සම්බන්ධ ඔක්සිකාරක ආතතියට එරෙහිව සටන් කරයි. 

6. රුධිරයේ සීනි මට්ටම ස්ථාවර කරයි. 

කස කසා බීජ රුධිරයේ සීනි මට්ටම ස්ථාවර කිරීමට උපකාරී විය හැකි අතර, ඒවා දෙවන වර්ගයේ දියවැඩියාව ඇති පුද්ගලයින්ට හෝ එය වර්ධනය වීමේ අවදානමක් ඇති අයට විශේෂයෙන් ප්‍රයෝජනවත් වේ. මෙම බීජ වල ඇති තන්තු සහ සෞඛ්‍ය සම්පන්න මේද සංයෝජනය කාබෝහයිඩ්‍රේට් ජීර්ණය සහ අවශෝෂණය මන්දගාමී කරයි, රුධිරයේ සීනි මට්ටම ඉහළ යාම වළක්වයි. 

7. සමේ සෞඛ්‍යය ප්‍රවර්ධනය කරයි.
ක්ලෝරොජනික් අම්ලය සහ කැෆේක් අම්ලය ඇතුළුව චියා බීජ වල ඇති ප්‍රතිඔක්සිකාරක, සමේ සෛල වලට හානි කළ හැකි නිදහස් විෂබීජ සමඟ සටන් කිරීමට උපකාරී වේ. ඔක්සිකාරක ආතතිය අඩු කිරීමෙන්, චියා බීජ වඩාත් තරුණ හා දීප්තිමත් සමක් ලබා ගැනීමට සහාය විය හැකිය. 

8. ශක්තිය සහ විඳදරාගැනීම වැඩි කරයි.
මෙම බීජ සියවස් ගණනාවක් තිස්සේ ස්වභාවික ශක්ති උත්පාදකයක් ලෙස භාවිතා කර ඇත. ඇත්ත වශයෙන්ම, පුරාණ ඇස්ටෙක් සහ මායා රණශූරයන් විඳදරාගැනීම සහ ශක්තිය වැඩි දියුණු කිරීම සඳහා ඒවා පරිභෝජනය කළ බවයි සදහන් වෙන්නෙ. මෙම බීජ වල ඇති ප්‍රෝටීන්, සෞඛ්‍ය සම්පන්න මේද සහ කාබෝහයිඩ්‍රේට් සංයෝජනය ස්ථාවර ශක්තියක් මුදා හැරීමක් සපයන අතර ඒවා විශිෂ්ට පූර්ව-ව්‍යායාම කෙටි ආහාරයක් බවට පත් කර ගත හැක. 

9. මානසික සෞඛ්‍ය සහ සංජානන ක්‍රියාකාරිත්වයට සහාය වේ.
චියා බීජ වල ඇති ඔමේගා-3 මේද අම්ල මොළයේ සෞඛ්‍යයට තීරණාත්මක කාර්යභාරයක් ඉටු කරයි, සංජානන ක්‍රියාකාරිත්වය, මතකය සහ අවධානය වැඩි දියුණු කරනවා.
ඊට අමතරව, මෙම සෞඛ්‍ය සම්පන්න මේද වලින් කාංසාව සහ මානසික අවපීඩනයේ ඇති රෝග ලක්ෂණ අඩු කරන බව පෙන්වා දී ඇත. ඔබේ ආහාර වේලට චියා බීජ එකතු කිරීම සමස්ත මානසික යහපැවැත්මට සහාය විය හැකි අතර මොළයේ ක්‍රියාකාරිත්වය වැඩි දියුණු කළ හැකිය. 

10. ශරීරය සජලනය කරයි.
කස කසා බීජ වලට ජලය අවශෝෂණය කර ගැනීමට ඇදහිය නොහැකි හැකියාවක් ඇත - ඒවායේ බර මෙන් 10 ගුණයක් දක්වා. පොඟවා ගත් විට, ඒවා ජෙල් වැනි වයනයක් සාදයි, එය ඔබේ ශරීරයේ සජලනය මට්ටම් පවත්වා ගැනීමට උපකාරී වේ. මෙම බීජ ක්‍රීඩක ක්‍රීඩිකාවන්ට විශේෂයෙන් ප්‍රයෝජනවත් වේ, මන්ද ඒවා දැඩි ව්‍යායාම වලදී අහිමි වන තරල නැවත පිරවීමට උපකාරී වේ. 

මෙම බීජ ඔබේ ආහාර වේලට ඇතුළත් කර ගන්නේ කෙසේද?
ඔබේ දෛනික චර්යාවට කස කසා බීජ ඇතුළත් කිරීම ඇදහිය නොහැකි තරම් සරලයි. ඔබට ඒවා යෝගට් හෝ සලාද මත ඉසිය හැක, ඒවා බීම වලට මිශ්‍ර කළ හැකිය, ප්‍රබෝධමත් පානයක් සඳහා, බීජ ජලයේ හෝ යුෂ වල පොඟවා කස කසා ජලය සෑදීමට හැකියි. 

නිගමනය
ඔබේ දෛනික ආහාර වේලට චියා බීජ මේස හැන්දක් පමණක් එකතු කිරීම ඔබේ සමස්ත සෞඛ්‍යයට සැලකිය යුතු ලෙස බලපෑ හැකිය. ආහාර ජීර්ණය සහ හෘද සෞඛ්‍යය වැඩි දියුණු කිරීමේ සිට බර කළමනාකරණය සහ සමේ ජීව ශක්තිය ප්‍රවර්ධනය කිරීම දක්වා, මෙම කුඩා බීජ පෝෂණයේ බලාගාරයකි. ඔබ සෞඛ්‍ය උද්යෝගිමත් අයෙකු, ක්‍රීඩකයෙකු හෝ ඔවුන්ගේ යහපැවැත්ම වැඩි දියුණු කිරීමට බලාපොරොත්තු වන අයෙකු වුවද, කස කසා හෙවත් චියා බීජ ඔබේ ශරීරයේ අවශ්‍යතා සපුරාලීමට පහසු සහ බහුකාර්ය ක්‍රමයකි.

සටහන - සකුපෙරේරා

උපුටා ගැනීමකි මුල් හිමිකරුට ස්තුතියි !.

මෙවැනි දේවල් දැනගැනීමට Siwdesa News Facebook පිටුව follow කරන්න

A day in the life

අපේ කාලයේ වීදිය බණ්ඩාරලා

1996 මුලතිව් කඳවූර සමඟ දැවුණු අපේ කාලයේ වීදිය බණ්ඩාරලා

යටත් වීම පසෙකලා ඔවුන් මාතෘභූමියේ උස් නිදහස වෙනුවෙන් සටන් කළහ.මේ ඡායාරූපයේ ගිණි ජාලා මැද දැවී අළු වෙන්නේ මොනවාද?

වර්ෂ 1996 .07.18 අළුයම 1.15 කණිසමේ සිට දින 07 ක් තම මාතෘභූමියේ උස් නිදහස වෙනුවෙන් දිවිපිදූ මුලතිව් යුධ හමුදා කඳවුරේ ජන්මයෙන් ලත් වීරත්වයෙන් මුසු වීරත්වයේ මුද්‍රා බඳු 09 වන ශ්‍රි ලංකා සිංහ රෙජිමේන්තුවේ නිළධාරීන් සහ සෙසු නිළයන් සේම දින ගණනක් නිරාහාරව සටන් කළ 06 වන විජයබාහු පාබල රෙජිමේන්තුවේ නිළධාරීන් සහ සෙසු නිළයන් සේම ශ්‍රි ලංකා කාලතුවක්කු හමුදාවේ නිළධාරීන් සහ සෙසු නිළයන් සේම මුලතිව් පොලීසියේ සිටි පොලිස් නිළධාරීන්,යුධ හමුදා පොලීසියේ පොලිස් නිළධාරීන්, ජාතික ආරක්ෂක බළමුළුවේ සාමාජිකයන්, නාවික හමුදාවේ කිමිදුම් ඒකකයේ නාවික විරුවන් සේම සිවිල් සේවකයන් සහ ආධාරක අනුඛණ්ඩ යටතේ පැමිණ සතුරු භුමියේ අවසන් පතරොම් ගැබ දක්වා සටන් කළ වීරෝධාර රණවිරුවන් අටසිය දෙනෙකුගේ පමණ නිසල දේහයන්ය.

රතු කුරුස සංවිධානය හරහා එල්ටීටීඊ ත්‍රස්තවාදීන් සිරුරු 50 කට වැඩි සංඛ්‍යාවක් ලබා දුන්නද ,ස්ථාන ගණනාවකදී ලබා දුන් සිරුරු හැර මෙලෙස කොකාවිල් හී සීනි සහ පෙට්‍රල් දමා අළු කළ සිරුරු සහිත රණවිරුවන් (අතුරුදහන් වු හමුදා සාමාජිකයන් )ලෙස නම් කළහ.

වසර තිහකට ආසන්න කුරිරු යුද්ධය තුළ දුටු සංවේදීම රූපයක් වන මෙය දකින වාරයක් පාසා දෙනෙතට කඳුළක් නුපන් නේ නම් ඔහු මිනිසෙක් නොවිය යුතුය. පරිප්පු හැරුණු විට බත් පමණක් වු ආහාර වේලකට සහ නෙස්ටමෝල්ට් පමණක් ලද කඳවුරක නිළධාරීන් සහ සෙසු නිළයන් ගෙවුවේ කටුක ජීවිතයක්.

තම ආදරණීය සැමියා මුලතිව් කඳවුරේ රුදුරු ත්‍රස්තවාදීන් පන්දහසක් මැද සටන් වදින විට තම කුළුඳුල් දරුවා කුස දරා සිටි බිරිඳට දරුවා අහිමි වු සංවේදනා මේ මුලතිව් ඛේදවාචකය තුළ හමුවේ. තම පුතු නිවසට එන තුරු තම දෙනෙත් පියෙන්නට පෙර බලාපොරොත්තුවේ දෑස් දල්වා සිටින මව්වරු පියවරු මුලතිව් ඛේදවාචකය තුළ හමුවේ. 

කඳවුරේ සිටි වීර රණවිරු පුතුන් යම් මානසික උත්තේජනයක් ලැබුවේ සවස 4.30 ට ගැසු ක්‍රිකට් වලින් ය. එහෙත් ඔවුන් තම උපන් දේශය වෙනුවෙන් කැපවීම් කළහ. වැටුප් ගැටලු දුෂ්කර ජීවිත ඔවුන් ද භුක්ති වින්දහ. එහෙත් ඔවුන් අරගල නොකලහ.සියල්ල සමසිතින් විඳ දරා ගත්හ.
දැවී අළුවෙන මගේ අදරණීය සොයුරණේ ඔබ සියලු දෙනාගේ මතු භවය සැපවත් ම වේවා!
මීට ඔබේ හුස්මෙන් සුසුම් හෙලනා සාමන්‍ය පුරවැසියෙක් වන මා -

-රමේෂ් හසන්ත

A day in the life

මඤ්ඤොක්කා සමග ඉගුරු එකට

මඤ්ඤොක්කා හා ඉගුරු එකට ගන්න එපා.

මඤ්ඤොක්කා සහ ඉඟුරු එකට ආහාරයට ගැනිමෙන් විෂ විය හැකියි.
මඤ්ඤොක්කා සහ ඉඟුරු එකට ආහාරයට නොගන්න යැයි වැඩිහිටියන් පවසනු ඔබ අසා ඇති. එම ප්‍රකාශයෙහි විද්‍යාත්මක පසුබිමක් තිබෙනවා.
මඤ්ඤොක්කා යනු ලෝකයේ මිනිසුන් ආහාරයට ගන්නා කාබෝහයිඩ්රේට් ප්‍රභව වලින් තුන්වන තැනට පත්වන බෝගයයි.
පෝෂණ ගුණයෙන් ඉතා ඉහළ මඤ්ඤොක්කා සමහර අවස්ථාවලදී විෂ විය හැක.
එයට හේතුවන්නේ සීනි සමග සම්බන්ධවූ සයනයිඩ් ( Cyanogenic glycoside -Linamerin) සයනොජෙනික් ග්ලයිකෝසයිඩ් සංයෝගය වේ.
මෙය මඤ්ඤොක්කා අලය තුළ ඇති පිෂ්ඨය කොටසෙහි අක්‍රියව ගබඩා වී ඇති අතර සාමාන්‍යයෙන් අක්‍රීය සංයෝගයකි.
මඤ්ඤොක්කා පොත්තේ පවතින ලිනමරේස් නම් වූ එන්සයිමය මගින් සයනොජෙනික් ග්ලයිකෝසයිඩ් සංයෝගය, හයිඩ්‍රිජන් (HCN) සයනයිඩ් බවට පත් කළ හැක.මෙය ශරීරයට විෂ විය හැකියි.
තුවාල වී හුලං වැදුණු මඤ්ඤොක්කා අල (නිල්ඉරි දිවූ අල ) ආහාරයට ගැනීමෙන්ද බොහෝවිට මෙය සිදුවේ.
එවැනි අල ඉවත් කිරීමද මඤ්ඤොක්කා තැම්බීමේදී වතුර ප්‍රමාණවත් තරමට දමා භාජනය විවෘතව තැම්බීම මගින් ද Hydrogen cyanide ඉවත් කරගත හැක.
මඤ්ඤොක්කා අල පරිස්සමින් පොතු ඉවත්කර ඉන් පසු කුඩා කැබලි වලට කපා පැය කිහිපයක් හොඳින් ජලයේ පොඟවා ජලය ඉවත් කොට, අලුත් වතුරින් තම්බන අතරේ කිහිප වරක් වතුර පෙරා ගැනීම ද විෂ සංයෝග ඉවත් වීමට මනා රුකුලක් වෙයි
කෙසේ නමුත් අමු මඤ්ඤොක්කා කෑම අනුමත කළ නොහැක.
මෙයට හේතුව නම් ආහාර මාර්ගයේ සිටින ක්ෂුද්‍ර ජීවින්ගේ එන්සයිම මගින් ද සයනොජෙනික් ග්ලයිකෝසයිඩ් සංයෝගය, හයිඩ්‍රිජන් සයනයිඩ් (HCN) බවට හැරවිය හැකි බැවිනි.

ඒ වගේම ඉඟුරු තුළද ලිනමරේස් එන්සයිමය බහුලව පවතින අතර එමගින් මඤ්ඤොක්කා වල පවතින සයනොජෙනික් ග්ලයිකෝසයිඩ් සංයෝගය, හයිඩ්‍රජන් සයනයිඩ් බවට පත් විය හැක.
එනිසා මඤ්ඤොක්කා සමඟ ඉඟුරු හෝ ඉඟුරු වලින් සාදන ලද කිසිදු ආහාරයක් නොගත යුතුය. (ඉඟුරු බිස්කට් ජින්ජර් බියර්… වැනි) සමහරුන් මාංශ පිළියෙළ කරනවිටද ඉඟුරු දමයි. මස් හොදි සමඟ මඤ්ඤොක්කා කෑමට ගෙන මෙම රෝග ලක්ෂණ පහළ වූ අවස්ථා පිළිබඳවද අසන්නට ලැබේ.
මඤ්ඤොක්කා විෂවීමකදී පහත ලක්ෂණ පහළ විය හැක.

හුස්ම ගැනීමේ වේගය වැඩිවීම (Rapid Respiration)
රුධිර පීඩනය සාමාන්‍ය මට්ටමට, වඩා පහත මට්ටමකට වැටිය හැක ( Dropping of Blood Preassure)
පපුව ගැහෙන බව (Palpitation, Rapid pulse)
නිදිමත ගතිය හා හිසරදය.(Drowsiness and Headache)
ආමාශ හෝ බඩේ වේදනාවන් (Stomach pain)
වමනය (Vomiting)
දියරමය මළ පහ වීම , පාචන තත්වයන් (Diarrhoea)
මනස ව්‍යාකූල වීම ( Mental Confusion ),
මාංශපේශීන්ගේ ඇති වන හිරිවැටීම් හා ගැස්සීම් (Twitching)
ක්ලාන්තය හා සිහි නැතිවීම ( Convulsions) දීර්ගකාලීනව විෂ සුළුවශයෙන් ශරීර ගතවීමෙන් ගලගණ්ඩය ( Goitre)
යකඩ උරාගැනීම අඩු වීම
ඇවිදින විට විසීවෙන සුළු ගතියක් ( Unstable gait) පවා ඇති විය හැක.
විශාල ප්‍රමාණවලින් සෑහෙන කාලයක් ආහාරයට ගතහොත් ක්‍රමක්‍රමයෙන් ශරීරයේ සයනයිඩ් ප්‍රමාණය වැඩිවී මරණය පවා සිදුවිය හැක.
 ආහාරයට ගැනීමෙන් පසු ඉහත ලක්ෂණ පහළ වුවහොත් ඉතා ඉක්මණින් වෛද්‍ය උපදෙස් ලබා ගැනීම යෝග්‍යය.

Source - ප්‍රජා විශේෂඥ වෛද්‍ය Uthpala Amarasinghe. (සුව වරුණ)

උපුටාගැනීමකි .

මුල් හිමිකරුට ස්තුතිය

A day in the life

සෝයා ආහාර .

සෝයා මීට් විසි එක්වැනි සියවසේ සුපිරි ආහාරය ලෙස හැඳින්වෙයි. නිර්මාංශිකයන්ට අවශ්‍ය ප්‍රොටීන ප්‍රමාණය සපුරාගන්නට මෙමගින් ලැබෙන අවස්ථාවත් එයට රුධිරගත කොලෙස්ටරෝල් මට්ටම අඩු කරන්නට ඇති හැකියාවත් පසුගිය දශක දෙක තුන ඇතුළත බෙහෙවින්ම ප්‍රශංසාවට ලක්ව තිබුණා. ආසියාවේ සෝයා මීට් සම්බන්ධයෙන් මහත් පුනරුදයක් ඇති වුණු අතර මේ හා සබැඳී නිෂ්පාදන රාශියක් ඒත් සමගම වෙළඳපොළට පැමිණුනා.

ඒත් දිගින් දිගටම සෝයා වලට ස්වකීය කීර්තිනාමය පවත්වා ගැනීමට වාසනාවක් නෑ. දැන්, දැන් පෝෂණවේදීන් සෝයා ආහාර බරපතල ලෙස ප්‍රශ්න කරනවා. මේ සම්බන්ධයෙන් ජගත් ව්‍යාප්ත සංවාදයක් පැවතුණත් ලාංකේය අප මේ සම්බන්ධයෙන් දැණූවත් නෑ. සෝයා සම්බන්ධයෙන් මෙකල පවතින විද්වත් කතිකාවත් ඇසුරේ ඔබේ දැණුම වපසරිය පුළුල් කිරීම අපේ මේ ලිපියේ එක් අරමුණක්.

දැන් තිබෙන්නෙ ජාන වෙනස් කරපු සෝයා මීට්

සෝයා ආහාර උපන්බිම පෙරදිග ආසියාවයි. ඒත් ලෝකයේ වත්මන් සෝයා අස්වැන්නෙන් වැඩි හරියකට උරුම කියන්නේ ඇමෙරිකාවයි. ඉස්සර නිෂ්පාදනය කළ සෝයාත් දැන් වවන සෝයාත් අතර ප්‍රධාන වෙනස්කමක් තිබෙනවා. අද වන විට අප ආහාරයට ගන්නා සෝයා වලින් සියයට 90 කටක් වැඩි ප්‍රමාණයක් ජාන වෙනස් කර වවන ලද සෝයායි. එසේම මේ සෝයා වලට රවුන්ඞ්අප් නමැති වල්නාශකය නිශ්චිත වශයෙන්ම යොදනවා. රවුන්ඞ්අප් වකුගඩු රෝගී කරන ප්‍රබල වල් නාශකයක්. එය පසුගියදා අපේ රටේ තහනම් කරනු ලැබුවා.

සෝයා මීට් වල පෝෂණීය ගුණය

සෝයා 100 ග්‍ ශක්තිය කැලරි 100ග් ක් තිබේ. මේදය 9ග් ක්ද.. කාබෝහයිඩ්‍රේට 10ග් ක්ද ප්‍රෝටීන 17ග් ක්ද අඩංගුය. මෙහි ඇති ප්‍රෝටීන මස්වල.. බිත්තරවල ඇති ප්‍රෝටීන තරමට පෝෂණීය නොවේ. එහෙත් අන් කවර ශාක ප්‍රෝටීනයකටත් වඩා සෝයා ප්‍රෝටීන පෝෂ්‍ය ගුණයෙන් ඉහළය. හැබැයි මේදය සැළකූ කළ.. මෙහි ඇත්තේ බහු අසංතෘප්ත මේදයයි. එම නිසා සෞඛ්‍ය සම්පන්න ජීවිතයක් අගයන අයට එතරම් සුදුසු වන්නේ නැහැ.

මිලෙන් අඩු නිසා සෝයා ආහාර කර්මාන්තයක් වශයෙන් ලෝකයේ ජනප්‍රිය වුණා, සියල්ල සිදුවුණේ ,ඊට පස්සෙ… ?

සෝයා ඇට වලින් ගන්නා මූලික නිෂ්පාදනය සෝයා තෙල්ය. තෙල් ලබාගත් පසු ඉතිරි වන රොඞ්ඩ සෝයා ආහාර සැකසුමට යොදාගනියි. සෝයා මිලෙන් අඩුය. එසේම ආහාර සැකසීමේදී ඒවායේ ප්‍රගස්ත නිෂ්පාදන පහසුකම් ඇතිවේ. මේ අනුව සෝයා ආහාර බෙහෙවින් ජනප්‍රියය. සෝයා වලින් ළදරු ආහාරද සැළකිය යුතු ප්‍රමාණයක් නිපදවනු ලබනවා.

සෝයා ඔබේ තයිරොයිඩ ග්‍රන්ථිය විනාශයට පත් කරයි .

තයිරොයිඞ් ග්‍රන්ථිය මගින් සිදු කරන අයඩින් සමායෝජනය අඩාල කරන ආහාර .ගොයිට්‍රොජිනික ආහාර. ලෙස හඳුන්වමු. තයිරොයිඞ් හෝමෝන ශ්‍රාවයට අහිතකර බලපෑම් ඇති කරන ගොයිට්‍රොජිනික ආහාර රැසක් මේ වන විට හඳුනාගෙන තිබේ. ඒ සියල්ලෙන්ම රජු ලෙස සැළකෙන්නේ සෝයා ආහාරයි.

සුපිරි ආහාරයකැයි බෞතීස්ම ලැබූ සෝයා වල චරිත සහතිකයට කළු පැල්ලමක් එකතු වූයේ ඇයි ?

ශරීරයට කෘතිමව ලිංගික හෝමෝන බෙදාහරින පයිටොඊස්ට්‍රජන් ය

දැනට හඳුනාගෙන ඇති පයිටොඊස්ට්‍රජන වැඩි වශයෙන්ම අඩංගු ආහාරය සෝයා වෙයි. පයිටොඊස්ට්‍රජන යනු අප ශරීරයේ තිබෙන ඊස්ට්‍රජන් හෝමෝනයමය. සෝයා වල වෙනසකට ඇත්තේ එකී ප්‍රෝටීන සම්භවයකින් යුක්ත වීමයි. පසුගිය කාලය පුරාවටම අසන්නට ලැබුණේ පයිටොඊස්ට්‍රජන වල ගුණ ගැනය. 

නමුත් ඒ පර්යේෂණවලට මුදල් වියදම් කළේ කවුද ? සෝයා කර්මාන්තයෙන් අධික ලාභ ලැබූ ව්‍යාපාරිකයන්ය.

බාහිරින් මෙවන් හෝමෝන වලට සමාන රසායනයක් ලැබුණු විට ශරීරය එයට ප්‍රතිචාර දක්වයි. ලිංගික හෝමෝන කෘතිමව ලැබීම නිසා ස්වාභාවික ශරීරගත හෝමෝන ක්‍රියාකාරිත්වයට ඇති කරන බලපෑම අති විශාලය. ඊස්ට්‍රජන් හෝමෝනය අධිකව ක්‍රිරියාත්මක වීමේ ප්‍රතිඵළයක් ලෙස ඇතිවන රෝග අතර පියයුරු පිළිකා, එන්ඩොමෙට්‍රියෝසියාව, ෆයිබ්‍රොයිඩ, දරුවන් නැතිකම මෙන්ම ලිංගික බෙලහීනතාවය මූලික වෙයි.  

දරුවන් සඳහාද සෝයා නිෂ්පාදන අද අලෙවි කෙරේ.

සෝයා මීට් වට්ටෝරුවකින් සමන්විත ආහාර වේලක් ගැනීමේදී මේ නොදරුවාටද උපත් පාලන පෙති හතරක හෝමෝන ශරීරගත වන බව පර්යේෂකයන් කණ්ඩායමක් ප්‍රකාශ කළේය. අද කාලයේ ඇතැම් දරුවන් වයස අවුරුදු හතේ අටේදී වැඩිවිය පත් වීමට මේ බලෙන් පැටවූ සෝයා ආහාර සිරිතද එක් චූදිතයෙක් වනවා

සෝයා ආහාර මගින් තයිරොයිඞ් ග්‍රන්ථියේ ක්‍රියාකාරිත්වයට විශාල බලපෑමක් කරන බව පසුගියදා මාධ්‍ය මගින් ඉමහත් ප්‍රසිද්ධියට පත්වූයේ සෝයා නිෂ්පාදන මහත් අභිරුචියෙන් ආහාරයට ගත් ඇමෙරිකාවේ ඔප්රා වින්ෆ‍රීට සිදුවූ අකරතැබ්බයක් හේතුවෙනි. 

නිලියක්.. රූපවාහිනී නිවේදිකාවක් වශයෙන් දැවැන්ත මාධ්‍ය භුමිකාවකට පන පෙවූ ඔප්රා වින්ෆර හිටි අඩියේ චප්පදෝරු ශරීරයකට හිමිකම් පෑවාය. ඇගේ ජීව ශක්තිය කෙමෙන් අඩුවන බවක් මෙන්ම මනෝභාවයන්හී පිරිහීමක්ද ඇතිවන බව ඇයට හැගී ගිය නිසා ඇය වෛද්‍ය පරීක්ෂණ වලට ලක්වීමේදී අයඩින් හිගතාවය නිසා ඇතිවන හයිපොතයිරොඩිසම් රෝගයට ඇය ලක් වී ඇති බව වෛද්‍යවරුන් සොයාගන්නා ලදී. මෙයට බලපෑ ආසන්න හේතුව ලෙස ඇගේ සෝයා ආශක්තතාවය බව හෙළිදරව් වීමත් සමගම සෝයා ආහාර සම්බන්ධයෙන් විශාල ප්‍රතිරෝධයක්ද බටහිර රටවල ඇති විය.

එන්සයිම අවශෝෂණය අඩාල කරන පයිටේට

පයිටේට – ඇට වර්ග.ධාන්‍ය හා රනිල කුලයේ ආහාර වල තිබේ. සෝයා වල මේවා විශාල වශයෙන් තිබේ. පයිටේට මගින් ශරීරයේ ඛණිජ අවශෝෂණය දුර්වල කරයි. අනෙකුත් ආහාර වල මේ ක්‍රියාවලිය සිදුවන්නේ නොගිනිය හැකි ප්‍රමාණයකිනි. නමුත් පයිටේට වල අධි සාන්ද්‍රණයක් ඇති නිසා සෝයා ආහාර මගින් ශරීරයේ ඛණිජ අවශෝෂණය සැළකිය මට්ටමකින් ප්‍රමාණයකින් දුර්වල කරන බව හෙළිදරව් වී තිබේ. මෙයින් මිදීමට ක්‍රරමයක් තිබේ. සෝයා ආහාරයට ගැනීමට පෙර පැසවීමකට ලක් කළ යුතුය.

ට්‍රිප්සීන් නිසා ආහාර ජීර්ණයට බාධා පැමිණෙයි.

ට්‍රිප්සින් යනු ජීර්ණක එන්සයිමයකි. ට්‍රිප්සින් නැති විට නියමිත පරිදි ශරීරයේ ආහාර ජීර්ණයක් සිදු වන්නේ නැත. එවිට පාචනය.. කෙණ්ඩා පෙරළීම්.. රුධිරවහන ආදිය ඇතිවේ. සෝයා ට්‍රිප්සීන් වල ක්‍රියාකාරිත්වය අඩාල කරන බවට හෙළිදරව් වෙලා තිබෙනවා. ඉන් සමස්ත ජීර්ණක ක්‍රියාවලියට බාධා පැමිණේ. මේ නිසා අග්න්‍යාශයේ රෝග ඇතිවීමට ඇති අවකාශ ඉහළ යයි.

මේ හැරුණු විට සෝයා සතුව ඇති පහත දැක්වෙන අවගුණයන්ද පර්යේෂණාත්මකව සනාථ වී තිබෙනවා.

සෝයා වල ඇති විටමින් බී ප්‍රතිසතමය අවශෝෂණයක් සිදු නොවේ. සමස්ත ප්‍රතිඵලය වන්නේ ශරීරයේ බී 12 විටමින ඌණතාවයක් ඇති වීමයි.

සෝයා ආහාර නිසා ශරීරයේ විටමින් ඞී අවශ්‍යතාවය ඉහළ නැංවෙයි.

සෝයා ආහාර සැකසීමේදී විෂකාරක ලයිසිනොඇලනින් හා අධි පිළිකාකාරක මෙන්ම නයිට්‍රොසොඇමීන් උත්පාදනය වෙනවා.

ඔබ දැනටමත් හානිකර යයි සළකන නිදහස් ග්ලූටමික් අම්ලයද සෝයා ආහාර නිෂ්පාදනයේදී උත්පාදනය වෙයි. සෝයා වල ඇති අමු රසය නැති කිරීමට සැකසූ ආහාර වලට මේවා කෘතිමව එකතු කිරීමක්ද සිදුවේ.

සෝයා වල අධික ලෙස ඇළුමිනියම් ඇත. මේවා ස්නායු පද්ධතියටත්.. වකුගඩුවලටත් හානිකර බව අමුතුවෙන් කිවයුතු නොවේ.

සෝයා සම්බන්ධයෙන් සමාජයේ ඇති වැරදි විශ්වාස

සෝයා ආහාර සම්බන්ධයෙන් වැරදි විශ්වාස විශාල සංඛ්‍යාවක් සමාජගත වී තිබේ. අප ඒවායේ සත්‍ය අසත්‍යභාවය විමසමු.

සෝයා වසර දහස් ගණනාවක් පැරණි ආහාරයකි

සෝයා මුලින්ම ආහාරයට ගත්තේ චීනයේ ක්‍රි.පූ. 1134-246 සමයේ විසූ චොවු අධිරාජ්‍යයය. සෝයා අමුවෙන් ආහාරයට ගැනීම විෂ සහිතය. මේ නිසා සෝයා පැසීමට ලක් කිරීමෙන් චීන වැසියෝ ඇතැම් ආහාර රසවත්ව නිෂ්පාදනය කරනු ලැබුවා.

ආසියානුවන් විශාල වශයෙන් සෝයා ආහාර අනුභව කරනු ලබනවා.

චීනයේත්, ජපානයේත් යන දෙරටේම දෛනික සෝයා පරිභෝජනය එක් පුද්ගලයෙකුට තේ හැඳි දෙකකට වැඩි නොවේ. සමස්තයක් ලෙස ආසියානුවන් මෙය මාංශල ආහාර වලට ආදේශකයක් ලෙස ප්‍රයෝජනයට ගන්නේ නැත.

පැරණි සෝයා ආහාර තරමටම නූතන සෝයා ආහාරද සෞඛ්‍ය සම්පන්නය

නූතන ආහාර සැකසීමේදී සිදුවන්නේ පැසීමට ලක් කිරීමෙන් එහි ඇති විෂ උදාසීන කිරීමයි. මෙහිදී ප්‍රෝටීන වල මුල් අණූක සැකැස්ම වෙනස් කිරීමක් සිදුවේ. එය සෞඛ්‍යයට හානිකරය. එසේම මේ ක්‍රියාවලියේදී විශාල පිළිකාකාරක ප්‍රමාණයක් ඊට එකතු වන්නේය.

සෝයා ආහාර වලින් සම්පූර්ණ ප්‍රෝටීන් අවශ්‍යතාවය සපිරෙනවා.

එය වැරදි මතයකි. සියළුම රනිල භෝග වලට ඇති නොහැකියාව, එනම් ගෙන්දගම් සහිත ඇමිනෝ අම්ලය නොමැති වීම.. මිතියොනයින් හා සිස්ටින් යන සංඝටක ඌණතාවය මේ සෝයා ප්‍රෝටීනවලද එලෙසමය. නූතන ආහාර නිෂ්පාදන ක්‍රියාවලිය තුළදී පහසුවෙන් බිඳෙනසුළු ලයිසින් විනාශ වීම තවත් බරපතල අඩුවකි. එවිට ලැබෙන්නේ බාගෙට ප්‍රෝටීන සැපයුමකි.

සෝයා පැසවීමට ලක් කිරීම නිසා විටමින B 12 අවශ්‍යතාවය සම්පූර්ණ වන්නේය

සෝයා වල තිබෙන මේ විටමින් බී 12 ශරීරය තුළ ප්‍රයෝජනය වන්නේ නැත. ඒ නිසා එම විටමින වල ඇති ගුණයක් නැත. මෙහිදී ඇත්තෙන්ම සිදු වන්නේ විටමින් බී 12 තිබුණාටත් වඩා අඩුවක් නිර්මාණය වීමයි.

සෝයා ආහාර වට්ටෝරු ළදරුවන්ට ඉතා පෝෂ්‍යදායකය.

ට්‍රිප්සින් නිෂේධක ආහාරයට ගැනීමෙන් මිටි බව ඇතිවන බව .හා අග්න්‍යශයේ ලෙඩ රෝග ඇති කරන බව සත්ත්ව අධ්‍යයන වලින් සනාථ වී තිබේ. දරුවෙකුට දත් හා අස්ථි වර්ධනයට විටමින් ඞී.. තීරණාත්මක කාර්යක් ඉටු කරයි. දරුවන්ට සෝයා වට්ටෝරු ලබාදීමෙන් ශරීරයේ විටමින් ඞී අවශ්‍යතාවය ඉහළ නැංවන බව හඳුනාගෙන තිබේ.

යකඩ හා තුත්තනාගම් බිළිඳු මොළයේ වර්ධනයට අවශ්‍ය වේ. සෝයා වල ඇති පයිටික් අම්ලය මේ යකඩ හා තුත්තනාගම් වල ක්‍රියාකාරිත්වය අඩාල කරන බව හෙළිදරව් වී තිබේ. මේ කාලයට දරුවන්ට කොලෙස්ටරෝල්ද අවශ්‍ය කරයි. සෝයා වල කොලෙස්ටරෝල් සංයුතිය අඩුපාඩු සහිතය.

සෝයා වල ඇති පයිටොඊස්ට්‍රජන නිසා ඉතා අඩු වයසෙන් ලිංගික පරිණතියට දරුවන් පත්වීමේ ගැටළුව මේ ලිපියේම අන් තැනක අප කතා කළෙමු.

මේ සියළු කාරණා විමසීමේදී හයක් හතරක් නොතේරෙන දරුවන්ට සෝයා වට්ටෝරු නිතිපතා දීම කෙතරම් සුදුසුද යන්න නැවත සමාලෝචනය කිරීමට සිදු වේ.

සෝයා ආහාර ඔස්ටියෝපොරෝසිස් වළක්වයි .

සෝයා ආහාර ගැනීම නිසා කැල්සියම් හා විටමින් ඞී යන පෝෂ්‍ය පදාර්ථ දෙකටම ගැටළු මතු වෙයි. මේ දෙකම අස්ථි සුවසෙත කෙරෙහී බෙහෙවින් වැදගත් වන බව ඔබද දන්නා කරුණකි. මේ නිසා සෝයා අස්ථි සවිමත් කිරීමට කිසිසේත් සම්මාදමක් වන්නේ නැත.

නූතන සෝයා ආහාර ගැනීමෙන් පිළිකා විශාල ප්‍රමාණයක් වැළඳීමෙන් ඔබව ආරක්ෂා කරයි

මෙයද වැරදි මතයකි.  

බ්‍රිතාන්‍ය රජය විශේෂ වාර්තාවක් නිකුත් කරමින් සෝයා ආහාර ගැනීමෙන් පිළිකා ඇතිවීම වළකින බවට ඇති සාක්ෂි එතරම් සවිමත් නොවන බව පෙන්වා දෙයි. ඇත්තෙන්ම මේ ගැන ගැඹුරින් විමසන කළ පිළිකා ඇතිවන අවස්ථා වැඩි කිරීමට නම් සෝයා හේතු වන බවට විද්‍යාත්මක කරුණු බොහෝ තිබේ.

සෝයා ආහාර ඔබව හදවත් රෝග වලින් ආරක්ෂා කරයි

ලොව පුරා සිදුවූ අධ්‍යයන වලට අනූව සෝයා ආහාර ගැනීමෙන් ඇතැම් ජන කොටස් වල කොලෙස්ටරෝල් මට්ටම අඩු කරන බවට සාක්ෂි පවතී. එහෙත් සෝයා ප්‍රෝටීනවලින් හදවත් රෝග ඇතිවීම මර්ධනය වන්නේද යන්න විමසිය යුත්තකි.

සෝයා ඊස්ට්‍රජන් ඔබට යහපතක් සිදු කරයි

සෝයා.. නිර්නාල ග්‍රන්ථි අවහිරකයකි. ස්වාභාවික ශරීර හෝමෝන වල ක්‍රියාකාරිත්වයට මෙමගින් ඇති කරන්නේ බාධාවකි. ආහාර ප්‍රයෝජ්‍යය මට්ටමෙන් ගත් විට සෝයා ආහාර ගැනීමෙන් කාන්තාවන්ගේ ඩිම්බ මෝචනයට බාධා පැමිණෙයි. පිළිකා අවදානම ඉහළ නංවයි. එය මික්සිඞීමා නොහොත් තයිරොයිඞ් ග්‍රන්ථියේ අයඩින් නිෂ්පාදනය අඩාල කිරීමේ වරදටද හේතු වෙයි.

සෝයා වල ඇති පයිටොඊස්ට්‍රජන මනස සුසර කරයි .

මෑතකාලීන අධ්‍යනයකට අනූව කාන්තාවන්ගේ රුධිරයේ වැඩිම ඊස්ට්‍රජන් සංයුතියක් ඇති අවස්ථාවේදී ඔවුන් අඩුම ප්‍රජානන ක්‍රියාකාරත්වයක් ප්‍රකට කරන්නේය. ඇමෙරිකාවේ.. ජපානයේ ටොෆු.. ජනප්‍රිය ආහාරයකි. මේ සෝයා වලින් හදන ආහාරය අනුභවයෙන් පසුකාළීනව ඇල්ෂයිමර් රෝගයට ලක්වීමේ අවදානම ඉහළ නැංවෙන බව හඳුනාගෙන තිබේ.

ආර්තව අභාවයට පසු කාලය ගත කරන කාන්තාවන්ට සෝයා ආහාර වඩාත් හොඳය .

සෝයා ආහාර මගින් ඊස්ට්‍රජන් මත ක්‍රියාකාරී වන අර්බුද, පිළිකා ආදිය බලගැන්වීමේ අවස්ථාව වැඩිය. එය තයිරොයිඞ් ග්‍රන්ථිය ආශ්‍රිත රෝග වලටද අත වනයි. තයිරොයිඞ් ග්‍රන්ථියේ අවක්‍රියාකාරිත්වය හේතුකොටගෙන ආර්තව අභාව රෝග ලක්ෂණ වඩාත් දුෂ්කර තත්ත්වයකට පත්වේ.

සෝයා ආහාර ඔබේ ලිංගික සෞඛ්‍යය සාරවත් කරයි

සත්ත්වයන් යොදාගෙන සිදු කරන ලද පර්යේෂණ වලට අනූව සෝයා සාඵළ්‍යතාවය නොහොත් වර්ගයා බෝ කිරීමට බාධා කරමින් අහිතකර ක්‍රියාකාරිත්වයක යෙදෙන බව හෙළිදරව් වී තිබේ. මේ හැරුණු විට මැදි වයස් පුද්ගලයන්ගේ රෝම වර්ධනය වැඩි කරන බව හඳුනාගෙන තිබේ. මෙය ටෙස්ටස්ටරෝන හෝමෝන හීන වන බවට සළකුණකි.

සෝයා පරිසරයට මිතුරු වගාවකි

දැනට වවන සෝයා වලින් සියයට 90ක්ම ජාන වෙනස් කරන ලද සෝයා වෙයි. මේවා ගැටළු රාශියක් පාරිසරික ජෛව ක්‍රියාකාරීන් විෂයෙහි ඇති කරයි.

සෝයා ආහාර දියුණු වන රටවල ජනතාවට වඩා හොඳ ආහාර තේරීමකි .

දියුණු වන රටවලට ආවේණික ධාන්‍ය තිබේ. වී, කුරහන්, මෙනේරි, මුං, මේ කිසිවක් සෞඛ්‍යට අහිතකර නැත. ප්‍රචාරයට මුවාවී සෝයා ප්‍රචලිත කිරීමෙන් මේ ගුණවත් ආහාර ජනතාවෙගෙන් ඈත් වී යයි.

මේසා විපරීත පැටිකිරියක් සහිත සෝයා ආහාර පුරුද්දක් ලෙස පරිභෝජනයට ගැනීමෙන් රටක ජනතාවට සිදුවන යහපතක් නැත. මේ නිසා සුලබව සෝයා නිෂ්පාදන ආහාරයට ගන්නා පාරිභෝගිකයන් මේ ගැන යලි යලිත් සිතනු වටී.

උපුටා ගැනීමකි.

මුල් හිමිකරුට ස්තූතියි

A day in the life