මීරියබැද්දේ ශෝකාන්තය

මේ නොවැම්බර් මාසයයි.  සැප්තැම්බර් සිට ජනවාරි මැද දක්වා මධ්‍යම කදුකරයට වැසි ලැබේ. මේ ප්‍රදේශවල  පැරණි පාරම්පරික ගොවි ජනතාවට මේ වැස්ස අරුමයක් නොවේ. කාලගුණ දෙපාර්තමේන්තුවේ තියරි කෙසේ වෙතත් මේ ඇත්තෝ කියන අනාවැකි නම් අකුරටම නිවරදිවේ.  

කොස්ලන්දේ මීරියබැද්ද වතුයායේ කොටසක් නායයාමෙන් පසුවත් තවමත් පටන් ගත් වැස්ස කාලසටහනකින් තොරව ඇද හැලේ. සති ගනනාවක් කදුකරයට ඇද හැළුන වැස්ස නිර්මාණය කල ජීවිත අවදානම දැන්  වැස්සේ නැති සෙයකි. එහෙත් තවමත් වැසි ඇද වැටෙන්නේය.

ස්වභාව ධර්මයාට එරෙහිව අපට උඩුගම් බලා පිහිනා යා නොහැක. ඒ බවක් මායිම් නොකරන අපේ ඇත්තෝ වානිජ මෙන්ම සුළු පරිමානයේ වගා සදහා මහ පොලොව නිරුවත් කරති. ජලාශ ඉදිකරති. ගිණි තියති.  මේ අකටයුතු කම්වලට එරෙහිවන ස්වභාව ධර්මය අපට අකාරුණිකව කටයුතු කරයි.

සුද්දන් මීරියබැද්ද තේ වගාව සදහා නිරුවත් කල නිසාදෝ  මිහිකත ට ඉවසා දරා ගත නොහී ගිය කෝපය පුපුරා ගියේ පරම්පරා පහ හයකට  පසු ජීවත්වු පරම්පරාවක් ඉලක්ක කර ගනිමින් එම පරම්පරාව විනාශකරමින් සහ අනාථයින් බවට පත් කරවමිනි.

මේ කැළඹීම හිතේ හොල්මන් කරමින් සිටියදී   මතුවු අනාථයින්ට සනාථවීමේ අරගලය සහ උනන්දුව ඉන් මතුවන ගසා කෑම, මඩිතරකරගැණීමේ අපේක්‍ෂාව දකිමින්  ඇසට කදුලක් මතු නොවුනා නම් ඔහු පෘතග්ජනයෙක් නොවේ.

දේශපාලකයාට කාගේ ව්‍යාසනය තුලද පෑදෙන්නේ රිදී ඉරකි. දැන් දැන් නොයෙක් මාධ්‍ය  ජාලයන්ද තම ව්‍යාපාරික ප්‍රවර්ධණයන්ද ගජ රාමයට කරගන යාමට  මේ ව්‍යාසනය මීරිය - බැද්ද ක් වී තිබේ. තවත් ඇත්තෝ මීරියබැද්ද විකුනා ආධාර රැස්කර යටි මඩි ගසා ගනිති.

තවත් සමහරුන්ට මීරියබැද්ද සංචාරක පරාදීසියකි. අවතැන්වුත් අසරනවූත් මේ ජනතාවට අවශ්‍ය වන්නේ නැවත විකුණා ලන්න තරම් හාල් මිරිස් තුනපහ රෙදි පිලි ටිකක් නොවේ. ඒවා තාවකාලික විසදුම්වේ. උන්හිටි තැන් අහිමිව හිසට වහලක් නොමැතිව සිටිනා මේ අසරනයින්ට පදිංචියට  ඉඩම් අවශ්‍යවේ. ගේ දොරක් අවශ්‍යවේ. දෙමව්පියන් අහිමිවු දූ දරුවන්ට  ඔවුන්ගේ  අනාගතයම අවශ්‍ය වේ.

ඒ ගැන සොයා බලා කටයුතු කිරීමට මැදිහත් විය යුත්තේ දීර්ඝ කාලීනව විසදුම් දිය හැකි ආයතනයන්ට මිසක වැහි බිරම පහවී යන විට පාවී එන  පාට පාට සරුංගල් කරුවන්ට නොවේ.

දීර්ඝ කාලීන විසදුම් දිය හැකි පලාත් සභාවකුත් මධ්‍යම රජයකුත් ඇතත් කතාවක් මිසක වැඩට බහින්න කාලය ගෙන ප්‍රදර්ශනය වෙන  බව නම් දකින්නට තිබේ. එයයි මීරියබැද්දේ ශෝකාන්තය .

notes of imaginary

Read More

පිවිතුරු හෙටක් ?.

දේශපාලන අදහස් ගැන අපට උදහස්වීමට කාරනා ඇතිවේ.

උදහස් වීම හා ආතතිය හා බැදීමක් ඇති බැවින් ආතතිය නිසා ඇති වන ලෙඩ රෝග ඇතිවීමෙන් වැලකී සිටීමට නම්  උදහස් වීමට ඇතිවන කරුණු කාරනා වලින් ඈත්වීම සුබදායකවේ. ඒ නිසාවෙන් එදිනෙදා ඇසෙන දේශපාලන ප්‍රවෘත්ති පිලිබදව නෑසු කන්ව සිටීමේ ප්‍රතිපත්තියකට මාරුවීම මගේ ප්‍රතිපත්තියක් බවට පත්ව තිබිනි.

එහෙත් මේ දිනවල අසන්න ලැබෙන්නේ ආතතිය ඇතිවීමට හේතු සාධක වන ප්‍රවෘත්ති නොවේ. මේ ප්‍රවෘත්ති සිත සැහැල්ලු කරන වර්ගයේ කොමඩි කතා බැවින් ලේ ගමන යහපත් වී ඇගපතටද සැහැල්ලුවක් ඇති කරන බැවින් ඇග පත ද රන්වන් පාටවන රූප ලාවන්‍ය ප්‍රවෘත්තින්  වේ.  එබැවින්  දේශපාලන ප්‍රවෘත්ති කියවීමට  නැවත උනන්දුවක් ඇති කරගැණිමට අදහසක් ඇති කර ගතිමි.

මාදුළුවාවේ සෝභිත හිමියෝ , අතුරලියේ රතන හිමියෝ සහ  බොදු බල සහ රාවනා ආදී කී නොකී හිමිවරු අප සාශනයට කරන්නාවු සේවය පිලිබදව බෞද්ධයෙක් වශයෙන් මගේ සිත තුල ඇතිවන බුද්ධාලම්භන ප්‍රීතිය දක්වන්නට බුදුහාමුදුරුවෝ ජීවමානව නැති හෙයින් මම කම්පා වෙමි. එතුමන්ලාට පැවදි ජීවිතය පියමන් කර ගිහි ජීවිතය ආක්‍රමණය කිරීමට සිත් පහල නොවන්නේ මන්දැයි හිමිදිරි උදෑසනක මම පිණිබිදුවකින් විමසුවෙමි.  නිහඩතාවය නිසා   යලි විමසන්නට බලන විට පිණිබිදුව වාෂ්ප වී ගොසිනි.

විධායක ජනාධිපති ක්‍රමය නොතිබෙන්නට තිස්වසරක යුද්ධය දිනන්නට ස්ථාවර රජයක් ගොඩ නගා ගන්නට නොහැකිවේ යයි  මම සිතමි. වරදාන ලබමින් ජරාව කමින් හෝ පසුගිය පාර්ලිමේන්තුව ස්ථාවරව තිබුනේ ජාත්‍යාලයෙන් නම් නොවේ.. එලියට බැස්සොත් ඇගපත වියලී තෝරුන් සේ සිටින උත්තමයින් හාල්මැස්සන් වන බැවිනි. අදද පාර්ලිමේන්තුව ඇති ආකාරයෙන් ඇත්තේ බෝර්ඩ් ලෑල්ලේ ලියා ඇගේ එල්ලා ඇති පට්ටමේ ඇති වරදානයන් සහ ජරාවේ ඇති අනුහසිනි.

මෙසේ තිබියදී විධායක ජනාධිපති ක්‍රමය අහෝසි නො කර ජනාධිපතිවරණයක්‌ පැවැත්වීමට ආණ්‌ඩුව තීරණය කළොත් ජනාධිපති මහින්ද රාජපක්‍ෂ පැරැදවීම සඳහා කළ හැකි සෑම දෙයක්‌ ම කරන බව ජාතික හෙළ උරුමයේ පාර්ලිමේන්තු මන්ත්‍රී සහ පිවිතුරු හෙටක්‌ සංවිධානයේ ජාතික සම්බන්ධීකාරක අතුරලියේ රතන හාමුදුරුවන් වහන්සේ පවසයි. එහෙත් නියරය යට සිට වක්කඩය කඩන්නට උන්වහන්සේට අදහසක් පහල නොවේ. අපිට මන්ත්‍රියෙක් නැති සමානුපාත ඡණ්ද ක්‍රමය ගැන හාන්කවිස්සියක් වත් උන්වහන්සේට සිහිපත් නොවේ.

එතුමන්ට පවතින පාර්ලිමේන්තුවේ රැදී සිටිමින් නිර්වාණය අවබෝධ කර ගන්නට නොහැකිවී ඇති බව සිතන්නට අපට කරුණු කාරනා පහලවේ.  රතන හාමුදුරුවෝ 18 වැනි ආණ්‌ඩුක්‍රම ව්‍යවස්‌ථා සංශෝධනයට පක්‍ෂව ඡන්දය පාවිච්චි කරන ලද  බව මට සිහිපත්වේ. අද වන විට උන්වහන්සේගේ 18 වැනි ආණ්‌ඩුක්‍රම ව්‍යවස්‌ථා සංශෝධනයට පක්‍ෂව ඡන්දය පාවිච්චි කිරීම වැරදි බව කියනා තැනට පත්වීමෙන් උන්වහන්සේට ලැබුන නොලැබුන මාර්ගඵලයන්හී වටිනාකමේ කිසියම් වෙනසක් ඇතිවී ඇති බව අවබෝධ වන්නට ඇතැයි එකත්පස්ව වැදගෙන සිටින උපාසක උපාසිකා අපගේ සිත්තුල කොමඩි සිතිවිල්ලක් ඇතිවේ.

පැවදිව සිටි කාලයේ උන්වහන්සේලා දේශනා කරනු ලැබු බණක බුදුරජානන් වහන්සේ ට පරිනිර්වාණය කරන ලෙස මාර දිව්‍ය පුත්‍රයා ආරාධනා කළ කල්හි ,  ආනන්ද හාමුදුරුවන් නිහඩව සිට ඇත්තේ  උන්වහන්සේට ආවේෂ වුණු මාරයා  එය වැළැක්‌වු බැවින්යැයි සදහන් වු බව සිහිපත් වේ.  18 වැනි සංශෝධනය සඳහා ඡන්දය දෙන අවස්‌ථාවේදී අපේ අතුරලියේ රතන හාමුදුරුවන් වහන්සේටත් මාරයා ආවේෂ වූවා විය හැකියයි  උපකල්පනයක් ඇති කර ගැණිමට මම උත්සහා දැරුවෙමි.  උන්වහන්සේට ආවේශවු මාරයා ගිය පසු කඩුල්ල වසන්නටත් විකල්පයන් සොයන්නටත් හදන හැටි අසමින් මම විස්සෝපයට පත්වෙමි.

පණ්ඩිත උන්නාන්සේලා අනුගමනය කිරීම හැර උන්වහන්සේලාට උපදෙස් දීමට පෙ‍ළඹවීම ගිහි අපට බ්‍රහ්ම දණ්ඩණය පැනවීමට හේතුවේ. එසේ වුව හොත් පාංශකූලයට පවා කහසිවුරු හයර් පර්චසින් කිරීමට උපාසික උපාසිකාවන්ට සිදුවීය හැකි බැවින්  එකත්පස්ව අසා සිටීම ගුණදායක බව අවවාදයක් ලෙස මේ කොමඩි වියමන යේ සටහන් කරම්හ.

notes of imaginary

Read More

මතින් කල කතාවක්.

මත්පැන්වලින් අය කරන බදු තවත් ඉහළ නංවා තිබේ. බියර් සදහා ලීටරයකට රුපියල් 15/= කින්ද 10%ට වඩා සැර අරක්කු වැනි මත්පැන් සදහා මිලි 750කට රුපියල් 80/= කින් සහ 33.5% වඩා සැර බ්‍රැන්ඩි විස්කි රම් ජින්  සහ වෙනත් මත්පැන් සදහා රුපියල් 100/= - 150/= වැනි මිල ගණන් වලින් බදු මුදල් සහ ඊට අමතරව නිෂ්පාදන වියදම්ද එකතුව  මිල ගණන් ඉහල ‍ගොස් ඇති බව සදහන්වේ.

නිෂ්පාදන වියදමට වඩා මත්පැන්වලින් අය කරන බද්ද මේ වන විට දෙතුන් ගුණයක් වී තිබේ.  සිගරට් වලට අයකරන රජයේ බදු මුදල්ද  මේ ස්වරුපයම ගනී. ඔබ රුපියල් 850/= මිලදී ගන්නා අති විශේෂ අරක්කු මිලි ලීටර් 750ක නිෂ්පාදන වටිනාකම රුපියග් 200/= පමණ විය හැකියි. ඉතිරි 650/= ම බදු මුදල් වේ.

මිල ඉහල ගොස් සතියක් හමාරක් වැඩිවන මිල ගණන් ගැන කතා කරන මත්ලෝලීන් ඉන්පසු සිරිත් පරිදි  පරන ස්ථාවරයටම පත්වෙති. මේ නිසා රජයට අයවන බදු මුදලේ මෙන්ම නිෂ්පාදකයාගේ අළවියේ වෙනසක්ද සිදු නොවේ. අප ආදායම් බදු , උපයන විට ගෙවන බදු , වටිනාකම මත ගෙවන බදු ආදී ගණනය කරන බදු ගෙවන විට බදු මුදල් කුවිතාන්සිය කවුන්ටරයෙන් අතට ලැබෙන්නේ   ඇගෙන් කෑල්ලක් බැංකු අයකැමි ලාච්චුවේ දමාගත් පසුවයි.

එහෙත් මත්පැන් බී නිර්වින්දනයට පත්වන මත්ලෝලීන් දිනපතා බදු මුදල් බාර් එකේ කවුන්ටරයට ගෙවන්නේ ඉතාමත් කැමැත්තෙනි. සමහරු ගෙවු බව දන්නේ පසුදා සාක්කුව අතපත ගානවිටයි.

මත්පැන් සදහා බදු මුදල් අයකිරීම මත්ලෝලීන්ට පනවන සුන්දර දඬුවමකි. සමහරු තම ආදායමේ සීමාවක් මායිමක් නොබලයි. තරාතිරමක් නොමැතිව  ඇගට පතට නොදැනී මැසිවිලි නොකියා මත්පැන් හලේ අයකැමිට  බදුමුදල් ගෙවා වැනි වැනී යති. සමහරු කාණු පල්ලේ නිදාගනිති. අමතරව දඩුවම් නියම කර ගත්දා පාරේ දඩාවතේ යන සතුන් සිව්පාවුන්  හා පිලිසදරේ යෙදෙති. කොතරම්  සුන්දර බදු ගෙවීමක්ද  ?.

සුරා බදු ඉහල ගියදා මතට තිත නොතැබු සමාජයක කතාබහට ඇහුම් කන් දී සිටියෙමි. අයෙක් අධික ලෙස මත්පැන් බී රෝහල්ගත වන පුද්ගලයන්ට ප්‍රතිකාර කිරීම සඳහා මහජන මුදල් වැය වන බැවින්  මත්පැන්වලින් යම් ප්‍රමාණයක බද්දක් අය කිරීම සාධාරණ බවට තර්ක කරයි.

තවත් අයෙක් කියන්නේ ආණ්ඩුවේ මැති ඇමතිවරුන්  මත්පැන් අලවි සහ නිෂ්පාදන බලපත්‍රධාරීන් බවයි. ඔවුන්  ගමින් ගම බාර් දමාගෙන මත්පැන් විකිණීමේ ජාවාරමේ යෙදෙයි.  මැතිවරණයකුත් කිට්ටු නිසා ආණ්ඩුව ඔවුන්ගේ සාක්කු පුරවන්න අරක්කු ගාන වැඩි කල බවට චෝදනාවකි.

දේශපාලන - ඥයෝම ආපසු හැරී මතට තිත තියන්න උද්ඝෝෂණය කරන බවට කට කැඩෙන කතාවකි..

තව කෙනෙක්ගේ මතය කුස්සිය සන්සුන් කර ( විදුලිය ගෑස් තෙල් මිල ) තබා මහත්තුරුන්ගේ කණට ගැසු බවකි. රජය  සුරා බදු ප්‍රධාන ආදායම් මාර්ගයක් කරගෙන ජනතාවගේ සාක්කුව සූරා ගැනීම ආණ්ඩුවේ උපාය මාර්ගය වී ඇති බවට තර්ක නගති.

පුදුමයට මෙන් හැමදේටම පාරට බසිනි වෘත්තිය සමිති විශ්ව විද්‍යාල ශිෂ්‍යයයෝ ‍සෞඛ්‍යය ,ගමනා ගමන සේවකයෝ මේ අසාධාරණයේදී  නිහඩ පිලිවෙතක් ගනී . සාක්කුවෙන් වැඩි පිරිවැයක් ගෙවන මත්පැන් සදහා අසාධාරණ බදු මුදලක් අයකරන විට ජනමාධ්‍ය, සිවිල් සමාජය හැසිරෙන්නේ කිසිවක් සිදු නො වූ ගානට නිදිගත්වනවයි. ඒ මත්පැන්වල ඇති ආශ්චර්යකට විය හැකියයි  අධ්‍යාපන වෘත්තිකයෙක් කියයි.

ජාතික මැතිවරණයක් අභියස නායකයින්ට උපදේශ දෙන   කාරකාදීන් දී ඇත්තේ දිරච්ච ලනුවකි. අපේ රටේ මත්පැන් බොන ඇත්තන් ගේ ඡණ්දය වැරදුනොත් මේ ආණ්ඩුවට ගෙදර යන්න සිද්ධ වෙන්නේ ඇදුමත් නැතිව බව හොදටම වෙරිවු නෙනෙක් අභියෝග  කරයි.

කෙසේ වෙතත් අයවැයට කිට්ටු වෙන මේ දිනවල වම් අතින් අරගෙන දකුණු අතට සහන ලැබෙන බවට ඉගියක් නම් කල හැකිවේග අන්තිමේදී අපි  නතර වන්නේ හිටපු තැනටත් පහලට වැටී බව නම්  නියතයකි.

notes of imaginary

Read More

අසල්වාසියාගේ සටන

අසල්වාසියාගේ සටහන ලියපු මට අසල්වාසියාගේ සටන ගැනත් ලියන්න අවස්ථාව සැලසුනා.

පසුගිය දිනක රාත්‍රියේ කඩා පැන්න මැර හමුදාවක් සබරගමුව සිසුන්ට පහර දීලා. ඔවුන් ඉදිකල  අට්ටාලෙත් “දියව් සහ ගනිව් “ කියලා ප්‍රදර්ශනය කරලා තිබුන පෝස්ටර් කුළුනුත් ගිණි තියලා පලා ගිහින් !. සබරගමුව සිසුන්  කිහිප පොලකට තුවාල කරලා රෝහල් ගත වෙන්න වැඩ සලස්වලා.

බිම ඉදගන්නත් ඇත්ත කියන්නත් බය වෙන්න එපා කියලා  හිතුවත් මේ සිද්ධියේදී මොකක්දෝ අඩුපාඩුවක් වෙලා කියලා අසල්වාසියාට හිතුනා.

සබරගමුව විශ්ව විද්‍යාලයේ සටන්කාමී දරුවන්ට මැර ප්‍රාහාරයක් එල්ල කරපු එක ගැන අසල්වාසියාට ඇතිවුනේ බලවත් විරෝධයක් සහ කේන්තියක්.

මේ මැරයෝ අතර නායක මැරයා ලදරු දේශපාලන - ඥයෙක් . කියලයි කියන්නේ. ලදරුවන්ට චූ කරන්නවත් පාලනයක් නැහැනේ.සිසුන් අට්ටාලගතවෙලා - විශ්ව විද්‍යාලය දින නියමයක් නැතිව වහලා. සිසුන් කර ගන්න වැඩේ හරි කියලා කවුරුවත් වගේ අසල්වාසියත් පිලි ගන්නේ නෑ.බල්ලාගේ වැඩේ බල්ලට පවරලා බූරුවගේ වැඩේ බුරුවා කරනවා නම් විශ්ව විද්‍යාලේ වහන්න හේතු ඇති වෙන්නේ නෑ.

ඒ මැදට ඌරොත් පැන්නම වැඩේ තවත් මඩ වෙනවා. දැන් වෙලා තියෙන්නේ ඒ වගේ වැඩක්.  ගමේ දේශපාලන - ඥයෙක් කාඩ් එක ගහගන්න කරපු වැඩකින් උන්නැහේට වෙලා තියෙන්නේ අනුන්ගේ පලංචිවල කූඤ්ඤ ගලවන්න ගිය වදුරට වුන වැඩේ. දැකපු සිහින බොද වෙලා වල්ගේ හිර වෙලා හිරේ විලංගුවේ වැටෙන්න මග පාදා ගෙන.

අම්ම - තාත්තගේ  පපුවේ ගින්දර පත්තු කරන්නේ නැතිව දේශපාලන ලනු ගිලින්නේත්  නැතිව උපේක්‍ෂාවෙන් දරුවෝ අකුරු කර ගන්නවා නම් කොයිතරම් අපූරුද ?.

notes of imaginary

Read More

සැරද ! ජයලලිතා.

දේශපාලනය අමුතු දෙයක්. බලයත් එක්ක ධනය ගලා එන්නා වගේම බලය නැතිවුනහම ධනය විතරක් නෙමෙයි තමුනුත් පිරිහිලා අවලංගු කාසි බවට පත්වෙනවා.
තමිල්නාඩුවේ මහ ඇමතිනි ජයලලිතා මහත්මියගේ ජීවන චරිතය මේ දිනවල අර්බූදයට ලක්වෙලා. 
ඈ අහසින් පොලොවටවත් වඩා පහලට පත් වෙලා.මේ බලන්න ඇයට බලයත් සමග ලැබුන දේවල් ! .

notes of imaginary

Read More

අසල්වාසියාගේ සටහන.

සබරගමුව විශ්ව විද්‍යාලය ආයෙත් දින නියමයක් නැතිව වහලා.

ඌව පලාත් සබා මැතිවරණයට නාමයෝජනා දෙන්න ඔන්න මෙන්න කියලා කොළඹ - මඩකලපුව ( ඒ 4 )   මාර්ගයේ පඹහින්න මංසන්දියේ වේදිකාවක් හදාගත්ත සිසු පිරිසක් පටන් ගත්ත විරෝධතාවයක් කරමින් වාඩිවෙලා ඉන්නවා. මේ පිරිස තාමත් ඒ වේදිකාවේ. උපවාසයක් කරනවා  කීවට මේක වීරවංශ වර්ගයේ උපවාසයක්. සේවා මුරයට මාරුවෙන්න වගේ කකා බිබි මාරුවෙන් මාරුවට කරන උපවාසයක්. මේ වැඩේ අවුරුදු ගානක් මේ විදියට පවත්වා ගෙන යන්න පුළුවන්. නිතර දෙවේලේ දකින අපිට මේ වැඩේ පිලිබදව හැගීමක් නැහැ. පිස්සු වැඩක් කියලයි හිතෙන්නේ. ඉතින් උසස් අධ්‍යාපන ඇමතිතුමාටත් එහෙම හිතෙනවා ඇති.

මේ විශ්ව විද්‍යාලය පටන් ගත්තේ ජයවර්ධණ පුර සරසවියේ අනුබද්ධ ආයාතනයක් වශයෙන්. 1991  තරම ඒ කාලේ සමනල වැව ඉදිකිරීම් කටයුතු සදහා පැමිණි ජපන් කාර්ය මණ්ඩලයට ඉදිකර තිබු නේවාසික සහ කාර්යාල පරිශ්‍රයේ ගොඩනැගිලි වල තමයි විශ්ව විද්‍යාල අනුබද්ධ ආයාතනය පිහිටවුයේ. එකම ස්ථානයක අධ්‍යාපන පීඨ පිහිටුවා ගන්න ගොඩනැලි පහසුකම් නොතිබුන නිසා කෟෂි පීඨය පවත්වාගෙන ගියේ බොරලන්දේ - රහංගල. කෘෂිකර්ම දෙපාර්තමේන්තුවට අයත්ව තිබු භුමියක. විද්‍යා පීඨය පවත්වාගෙන ගියේ බුත්තල. මහපොල සදහා ඉදිකරන ලද ගොඩනැගිලි පරිශ්‍රයක. මෙහෙම තැනින් තැන තිබුන විශ්ව විද්‍යාල පීඨ කලින් කලට කරන ලද ගොඩනැගලි සංවර්ධණ කටයුතු නිසා අද වන විට එක තැනකට එකතු වෙලා.

සිසුන් කියන්නේ ඒ ගොල්ලා කරන ලද සටන්වල ප්‍රතිපලයක් ලෙස එහෙම වුනා කියලා. රජයකට එකපාරම මවන්න බැරිවුන ඉදිකිරීම් පසුගිය අවුරුදු විස්ස තුල වාර්ෂිකව එකින් එක නිම වෙමින් පැවතුනා.තවත් ඉදිවෙමින් පවතිනවා. අපේ රටේ යුද්ධයක් කියලා එකක් තිබුන කාලේ මේ ඉදිකිරීම් මන්දගාමීව සිදුවුනත් යුද්ධයෙන් පසු අවුරුදු දෙක තුන තුල සංවර්ධණ කටයුතුවලට යම් ප්‍රවේගයක් ලැබිලා තියෙනවා. අද විශ්ව විද්‍යාල භුමියට ඇවිත් බලන්න ඕනී එදත් - අදත් වෙනස.

“දියව්”  කිවුවත් අම්මලා තාත්තලාට උනත් දෙන්න පුළුවන් ප්‍රමානයක් තියෙනවා. අම්මලා තාත්තලාට උනත් තව දරුවෝ ඉන්නවා නම්  ඒ ගොල්ලන්ටත් කන්න බොන්න දෙන්න ඕනී කියලා සාධාරන මනසක් මේ දරුවන්ට නැහැ.රජය අයවැයෙන් මුදල් වෙන් කරන කොට සබරගමුව විශ්ව විද්‍යාලයට විතරක් මුදල් වෙන්කලා නම් එක් රැයෙන් සර්ව සම්පූර්න ‍විශ්ව විද්‍යාලයක් හැදේවි. ඒත් එහෙම වෙන්නේ නැහැ. 

උණු ආප්ප බාන්නා වගේ වැඩ අපේ දරුවන්නට තියෙන්න ඕනී. එයාලා හිතන්නේ “අපි දියව් “ කියන තරමට තමයි අපිට ලැබෙන්නේ කියලා. දියව් කියලා අවුරුදු දෙකකින් තුනකින් කරගන්න පුළුවන් උපාධිය කරගන්න අවුරුදු හතර පහ දක්වා මේ දරුවෝ කාලය ගන්නවා . විශ්ව විද්‍යාලය නිවාඩු ගන්නවලා. ඒවට කැමති නැති දරුවොත් අකමැත්තෙන් මේ පරිප්පුව කනවා. “ උපාධියට නියමිත කාලය අරගෙන විශ්ව විද්‍යාලයෙන් පිටවෙලා වරෙව්” කියලා උද්ඝෝෂණය කරන්න දෙමව්පියන්ට සිද්ධ වෙන කාලයත් ලගදීම එයි කියලා මට හිතෙනවා.

සල්ලි තියෙන දෙමව්පියෝ එතෙර විශ්ව විද්‍යාලවලට දරුවෝ යවන එක සාධාරනයි . මේ ප්‍රවනතාවය දවසින් දවස වැඩිවෙනවා. පෞද්ගලික අංශයේ රැකිය වෙළදපොල මේ ලමයින් රැකියා සදහා බදවා ගැණිමට වැඩි  කැමත්තක් දක්වනවා. ඒ අනාගතය දකින දෙමව්පියෝ තම මුදල් වියදම් කරන්නට පසුබට වෙන්නේ නෑ . තව තවත් පෙළබෙනවා.

අන්තිමට වෙන්නේ “ නිදහස් අධ්‍යාපනයෙන් සෙතක් නෑ !. නව පෙලන්තියක් වරප්‍රසාද ගන්නවා !  අපට රැකියා දියව්” කියලාත් උද්ඝෝෂණය කරන්න.

එස්‌. බී. දිසානායක ඇමතිතුමායි  විශ්වවිද්‍යාල සිසුනුයි හරියට නයයි මුගටියයි වගෙයි.  විශ්වවිද්‍යාල සිසුන්ට  එස්‌. බී. දිසානායක ඇමතිතුමා පේන්න බැහැ. අපි දන්න කාලේ ඉදන්   විශ්වවිද්‍යාල සිසුන්ට  කොයි අධ්‍යාපන ඇමැති හිටියත් ඒ ඇමති එක්ක  හොදින් කටයුතු කරනවා දැකලා නැහැ. රනිල් වික්‍රමසිංහ උසස්‌ අධ්‍යාපන ඇමැතිව සිටි කාලයේදීත් ඔහු අධ්‍යාපන ධවල පත්‍රිකාව ඉදිරිපත් කළ විට විශ්වවිද්‍යාල ශිෂ්‍යයෝ කරපු දේවල් මතකයි. ඒත් අධ්‍යාපන ධවල පත්‍රිකාව නතරවුනේ නෑ. මේ වන විට කාලයත් සමග ටිකින් ටික ක්‍රියාත්මක වෙලා.

සරසවි සිසුන්ටත් දේශපාලනයක් තියෙනවා නේ . මේ හැම ගැටුම පිටිපස්සෙත් දේශපාලනයක් තියෙනවා. මැතිවරණ සිතියම දිගහැරලා තියෙන මේ කාලේ ගෙවෙන කම් සිසුනගේ අරගල පවත්වාගෙන යන්න උවමනාවක් තියෙන කොටසකුත් ඉන්නවා . ඒ ගොල්ල බිලි ගන්නේ සිසුන්ගේ අධ්‍යාපනයට තියෙන කාලය. දෙමව්පියන්ගේ බලාපොරොත්තු.

තවත් කෝටි 40 වියදමින් ඉදිකරන්න යෝජිත නේවාසිකාගාරයකට මුල්ගල තිබ්බම ඒක  හමුදා කඳවුරක්‌ ආසන්නයේ තිබෙන බවක් කියනවා.  අනාගතයේ නේවාසිකාගාරය තුළ බෝම්බ හදන්න බලාපොරොත්තුව ඉන්නවද මන්දා ?.මෙතන තියෙන්නේ හමුදා කදවුරක් නෙමෙයි හමුදාව විසින් නඩත්තු කරන සංචාරක නිකේතනයක්.

නේවාසිකාගාර ගොඩනැඟිල්ලක් විවෘත කරපුවමත් තවත් ගොඩනැගිල්ලක් හදන්නත් එපා කියලා  විරෝධතාවයක් කරන්නේ මොන උගතද කියලා අහන්න තරම් අපි නූගත් වෙලා.  

notes of imaginary

Read More

බුදුරුවගල - වැල්ලවාය.

නැගණහිරෙන් ආ වැස්ස බුත්තලට නියගය හමාර කර ඇත. දැඩි නියගයෙන් හෙම්බත්ව සිටි ගහ කොල  කොළපාටින් බැබලෙන්න දැඩි උත්සහායක් දරමින් සිටි සැප්තැම්බරයේ අවසන් සතියේ මම බුදුරුවගලට යාමට වාසනා ලද්දේය.

මට  වැල්ලවාය නගරයේ සිට තිස්සමහාරාම පාරේ තිස්සමහාරාමය දෙසට කිලෝමීටර් හතරක් පමන පැමිණ වමට හැරී අතුරු පාරක තවත් කි.මි. 4 ක් පමණ ගිය තැන හමුවු  වන ගහණය තුළ  ගල් තලාවේ  නෙලා ඇති  බුද්ධ ප්‍රතිමාවක් ප්‍රධාන කොට තවත් බෝසත් ප්‍රතිමා  කිහිපයක්  දැක ගැනීමට ලැබිනි. මෑත කාලයක් වනතුරුම මෙම ප්‍රදේශයේ අලි ඇතුන්ගෙන් ගහණ හුදකලා ප්‍රදේශයක් වශයෙන් පැවැතුන බව මට හමුවු සාමනේර ස්වාමීන් වහන්සේ පැවසීය.

නව ගොඩනැගිලි කිහිපයක් ඉදිවෙමින් ඇත. සංචාරක මණ්ඩලය විසින් ඉදිකල ගිමන් හලක් දක්නට තිබිනි. මේ හැරෙන්නට ලංකාවේ ඇති පිහිටි ගලක නෙළන ලද උසම ප්‍රතිමාව ලෙස සැලකෙන බුදුරුවගල ශෛලමය බුද්ධ ප්‍රතිමාවට තනි රකින්න කවුරුවත් නැති බවක් මගේ හිතේ සටහන් විය.

හිටි ඉරියව්වෙන නිරූපිත බුද්ධ ප්‍රතිමාව උස මීටර 13 ක් පමණ වෙයි. ප්‍රතිමාව සමඟ දෙපස තවත් ප්‍රතිමා හයක් මෙම ගල් බිත්තියේ පෙළට නෙළා තිබෙයි. ගල් බිත්තිය අඩි 70 ක් පමණ දිගය. ගල් තලාවක් මත නෙළා ඇති දැවන්ත බුදුරුව නිසා බුදුරුවගල වශයෙන් ප්‍රසිද්ධියට පත්වන්නට ඇත.

කවුරුන් විසින් කවර දා කරන ලද්දැක්දැයි නිශ්චිතව තහවුරු කර ගෙන නොමැති මෙම කලා නිර්මාණයන්ගේ ස්වභාවය අනුව මෙය ක්‍රි.ව. 8 – 9 සියවස් වලට අයත් මහායානිකයන් විසින් කළ නිමැවුමක් බව පුරාවිද්‍යාඥයන්ගේ අදහස වෙයි.

ගල් පව්වේ බිත්තිය මධ්‍යයේ දැවැන්ත ප්‍රතිමා නෙලා ඇත්තේ අර්ධ උන්නතව ය. බුදුරුව දෙපස පරිවාර ප්‍රතිමා තුන බැගින් දර්ශනය වෙයි.

බුද්ධ ප්‍රතිමාවේ විශාලත්වය සහ දෙපස සෙසු ප්‍රතිමාවන්ගේ ස්වරූපය නිසා මෙය දීපංකර බුදුරදුන්ගේ පිළිබිඹුවක් බව අනුමාන කෙරේ.

ප්‍රධාන බුද්ධ ප්‍රතිමාවේ දකුණු පස ඇති ප්‍රතිමා ත්‍රිත්වයේ මැද නෙළා ඇත්තේ අවලෝකීතේශ්වර බෝධි සත්ව ප්‍රතිමාවකි. එහි උස මීටර් 7.16 කි.  එම ප්‍රතිමාවේ වම් පසින් නෙළා ඇති ත්‍රිභංග ඉරියව්ව පිළිබිඹු කරන තාරා දේවී ප්‍රතිමාවේ උස මීටර් 5.98 ක් පමණ වෙයි.  මහායානිකයන්ට අනුව තාරාදේවිය අවලෝකීතේශ්වර බෝධිසත්වයන්ගේ භාර්යාවය. අවලෝකිතේශ්වර බෝධි සත්ව රූපයයේ දකුණු අත පැත්තේ දකින්නට ලැබෙන ප්‍රතිමාව සුධන කුමාර ප්‍රතිමාවයි. මහායාන සම්ප්‍රදායට අනුව සුධන කුමාරා ද බෝධිසත්වවරයෙකි. එහි උස මීටර් 6.53 ක් පමණ වෙයි.

ප්‍රධාන බුද්ධ ප්‍රතිමාවේ වම් පසින් දිස්වෙන රූප ත්‍රිත්වයේ මැද නෙලා ඇති ප්‍රතිමාව මතු බුදු බව ලබන මෛත්‍රී බෝධිසත්ව ප්‍රතිමාවය. මෙහි උස මීටර් 7.3 කි. එම බෝධිසත්ව රූපයේ වම් අත පැත්තේ නෙලා ඇති ප්‍රතිමාව වජ්‍රපානී බෝසත් ප්‍රතිමාවය. මෙහි උස මීටර් 6.4 කි. මෛත්‍රී බෝසත් රුවෙහි දකුණු අත පැත්තේ නෙලා ඇති රුව මංජු ශ්‍රී බෝධිසත්ව ප්‍රතිමාවයි. 

මේ අනුව බුදුරුවගල ඇති ප්‍රතිමා හත වම් අත සිට දකුණට පිළිවෙලින් නම් කළහොත් මෙසේ හඳුනාගත හැකිය. සුධනකුමාර, යෝගී අවලෝකීතේශ්වර, තාරා, දීපංකර බුද්ධ, මංජු ශ්‍රී, මෛත්‍රී හා වජ්‍රපානී වශයෙනි.

notes of imaginary

Read More

අසුබ නිමිත්තක්.

මාස ගණනාවක් පීඩා කරන ලද නියගය අවසන් කරන  මහ වැස්සක පෙරනිමිති අහස පුරා පැතිර ඇත. වැස්සට පෙර පැවත්වෙන විවාහ මංගල්‍ය සාදය අවසන් වුවහොත් යහපත් යයි මගේ සිතිවිලි අතරට ගොනු වෙමින් තිබිනි. දැහන බිද වැටුනේ “ සර් බිල් එක “ යයි වසන්ත කියු හඩෙනි. 

සාදයේ අවසන් අදියරට පැමිණ සිටියත් සහභාගීවු පිරිසත් ඇනවුම් කරන ලද මධුවිතෙහි  මිලි ලීටර් ගණනත් හා සසදන විට මේක නම් එවර නොවන සාදයකයයි   සිතිවිල්ලක් ඇතිවී තිබිනි. පස්වරු හතර පමණ වී ඇත.   සංගීතයද එකවර  නතරවිනි.ඒ පිරිසට විසිර යන්නට දුන් සංඥාවක් යයි මම සිතුවෙමි.

මම සකස් කල බිල්පත ඉහල සිට පහලට නිරීක්‍ෂණය කරන්නට විනි. සාදයේ  හරි අඩක් පමණ වැය වී ඇත්තේ මධුවිතත් අවුළුපත් සදහාත් වීම නිසා “වසන්ත,  අද කාන්තා පක්‍ෂයත් හොදටම  බීලද ? යයි විමසු වෙමි.” නෑ සර් වැඩිය හිටියේ තරුනයෝ “ වසන්තගේ උත්තරය විනි.

අන්තිකාරම් මුදලත් අඩුකර සකස් කල බිල්පතේ ඉතිරිය ලබා ගැණිම වසන්තගේ රාජකාරිය වුයෙන්  “ සර් ඉක්මන් කරන්න “ මට විධානය කරන්න තරම්  වසන්තට හයියක් ඇතිවිනි. ඊලග විනාඩි කිහිපය ගෙවී යද්දී මම වෙනත් වැඩකට යොමු වී සිටියදී වසන්ත දුව ආයේ. “ සර් දැන් පනහක් දෙන්නම්  කියනවා - ඉතිරි මුදල හෙට උදේ දෙන්නම් කියනවා ? මොකද කරන්නේ ?. ප්‍රශ්න වැලක් අසමිනි.

සාමාන්‍ය සම්ප්‍රදායන් බිද වැටෙමින් ඇතිවන අළුත් ප්‍රශ්න වලට වසන්තට උත්තර නැතිවාක් මෙන්ම මටද කට උත්තර නැති මෙවැනි ප්‍රශ්න සේවා කාලය  තුලදී ඇතිවේ. විවාහ මංගල්‍ය උත්සවය සදහා ශාලාව වෙන් කරවා ගෙන ඇත්තේද වසන්ත ගෙනි. මෙනුව තෝරා ගෙන අත්තිකාරම් ගෙවා දින වකවානු වෙන් කර ගෙන ඇත්තේද වසන්ත ගෙනි. ඇනවුම ක්‍රියාත්මකව  උත්සවය අවසන් කර ඇත්තේද වසන්ත ‍විසිනි.ආයාතනය පැත්තෙන් ගෙන බැළුවිට වගකිව යුත්තා අසරනවු වසන්තය.  රුපියල් දාහේ ඒවා දෙසියකින් පමණ පියවෙන බිලට පනහක් ලබා ගෙන අවුරුද්දක් පමන ආයාතනයට නොමිලේ කඹුරන්නට වේයයි සිතිවිල්ලක්  වසන්තට ඇතිවුවා විය හැක. අවසානයේ   කලබලවු මනස නිවන්නට මම ඔහුට හදිසි උපකාරකය වී තිබේ.

මම උත්සවයේ පසුබිම හිතට ගන්නට වසන්තගෙන්ම කරුණු කාරනා එකතු කරන්ට විනි.ඒ අනුව ‍ මනාල දෙපලම පැමින සියළු ඇනවුම් ලබාදී ඇති අතර වැඩිහිටියන් කිසිවෙක් මේ කටයුතු සංවිධානයේ නොසිටි බව තේරුම් ගතිමි. ප්‍රශ්ණ ගැටළු නිරාකරණය කර ගත යුත්තේ මනාල යුවලගෙනි.  ජීවිතයේ වැදගත්ම අවස්ථාවක සාකච්ඡා කිරීමට මට ඉතිරිව ඇත්තේ අප්‍රසන්න මාතෟකාවක් යටතේම ලියවුන කතාන්දරයකි.

සන්සුන් වීම වැදගත් යයි  මගේ මනස මට පලමු උපදේශය විධානයක් ස්වරූපයෙන් නිකුත් කලෙන් මම ඊට අවනතවිමි. පැමිණි අමුත්තන් විසිර ගොසිනි. වසන්තගෙන් විමසු තොරතුරු අතර  මනාල යුවල පිටතට නොගොස් හෝටලයේම  කාමරයක් වෙන් කර ගෙන ඇති බව සදහන් විනි. “ වසන්ත සමහර විට ලැබුන තෑගී බලල බිල පියවන්න හිතනවා ඇති.  අපි  එහෙනම් එතකම් තියෙන පනහ ගනිමු. ”වසන්තට එදින රෑට නින්ද යන පිලිතුරක් මගෙන් ලැබී ඇත. “ බිලට වඩා තෑගී හම්බු වෙලා තිබුනොත් අපි ගොඩ  සර් !. වසන්ත පනහ රැගෙන එන්න ඉගිලිනි.

මම මට වෙන්වුන කටයුතු වල ගිලෙමින් සිට වෙනදා මෙන්ම පසුදාට පහන් කරන්නට  ඇදට වැටුනත් මේ යුවල කටයුතු කර ඇත්තේ කොතරම් අවදානමක් ඇති කර ගෙනද යන්න විමසමින් නිදිවරන්නට මට සිදුවිනි. පැමිණි අරාධිතයන්ගෙන් පිදුම් ලද  මුදල් ත්‍යාගයන් හෝටලයේ බිල ඉක්මවා නොගියහොත් ? . ඔවුන් හා වසන්ත පත්වන අසරනත්‍වයට පිලිතුරු පසුදා මට තිබිය යුතුය. ඒ  පිලිතුර අප සියල්ලම ගොඩ යා යුතු පිලිතුරක්ද විය යුතුය.

මාස තුනකට පමණ පෙර ඇනවුම් කර සැලසුම් කරන ලද විවාහ මංගල්‍ය උත්සවයක පිරිවැය ගෙවීමට සුදානමක් නැතිව හෝටලයකින් පිටත්ව යා හැක්කේ පොලිසියකට යයි මේ යුවලට අවධානමක් තිබී නැත. අවමංගල්‍ය උත්සවයක් වැනි හිටි හැටියේ කඩා වැටෙන උත්සවයකට  - විවාහ මංගල්‍ය උත්සවයක් සමාන කල නොහැක.

අපේ ඇත්තන්ට අතේ ඇති හැටියට උත්සවයක් සංවිධාණය කර ගන්නට කැමති නැත. උත්සවයෙන් පසු පම්පෝරි ගැසිය හැකි මට්ටමක උත්සවය තිබිය යුතුය. මංගල බෙර කරුවන් , මංගල පෝරුව, ජයමංගල ගාථා , පිලිගැනීමේ ගීතය, සෙටි බෑක් එක ,අෂ්ඨක කියු කලා කරුවා,   උත්සව ශාලාවේ සැරසිලි, උත්සව ශාලාව ආහාර පාන ,මධුවිත ,අවුළුපත් මේ කී නොකී සියල්ලම ගෙවිය යුතු මුදල්ය.එකතු කර ගත් විට මහ ලොකු පිරිවැයක්ය. ඒ ගැන හිතන්නට උවමනා නැත.

පසුදා  බිල පියවීමට නගරයේ බැංකුවකින් අත්තිකාරමක් ලබා ගැනීම සදහා මනාලියගේ ගෙල බැදි මාලය සුරකීමට තබා දෙවන ගමන යන්නට සිදුවන මනාලියකගේ හදවතේ හඩා වැටීමත් කඩා වැටීමත් - මගේ මනසට පීඩාවක් විය. එහෙත්  බිල් පතේ වටිනාකම සදහා සුරැකුමක් ආයාතනයට ලබා දිය යුතුය. නැත්නම් වසන්තත්- මමත් කොට උඩ යාම සිකුරුය.  බිල්පත ගෙවීමට කාල සීමාවක් ලබා දී  නිදහස් කිරීමට  හැකි වුනත් අනන්‍යතාවය තහවුරු කිරීමට මේ යුවල - සුදුසු පුද්ගලයෙකු  ඉදිරිපත් කිරීමටත් එකගතාවයක් නොමැත. අවසානයේ සුරැකුමක් - ගිවිසුමක් සදහා පොලිස් පොත යෝජනා කිරීමට සිදුවිය. ඔවුන් එයට කැමති විය.  

කොයිතරම් අසුබ නිමිත්තක්ද ?

මමත් - වසන්තත් තාවකාලිකව සැනසුන බව අවසානයට සටහන් කල යුතුය.

notes of imaginary

Read More