ජනතා විමුක්ති පෙරමුණ.

පුජාතන්ත්‍රවාදි ප්‍රවාහයට එක්වු පසු “උනුත් එකයි -මුනුත් එකයි “කියා කියන්න හැකියාව තිබු දේශපාලන පක්‍ෂයක් ලෙස ජනතා විමුක්ති පෙරමුණ මම දුටුවෙමි.උන්ටත් මුන්ටත් වඩා පරමාදර්ශී දේහපාලනයක නියළුන මේ වීරයෝ අද යන ගමන් මග කිසිසේත්ම සුබදායක ගමන් මගක් නම් නොවේ.ජාතියක් වශයෙන් අපි අද ලබා ඇති ප්‍රතිලාභ බොහොමයකටත්, කොන්ද කෙලින් තබාගෙන ඒකීය රටක් ගැන කතාකරන්නවත් උරුමය සකස් කර දීමේ ගෞරවය හිමි වන්නේ ජනතා විමුක්ති පෙරමුණටයි. රට පාවාදීමේ දේශද්‍රෝහී කුමන්ත්‍රණ , පිඹුරුපත් අක්‍රීය කල ජනතා විමුක්ති පෙරමුණ අයවැය පරද්දා මේ රජය අක්‍රීය කරන්න උත්සහා ගත්තේ ඇයිද යන්න මට පිළිතුරු නැති ප්‍රශ්නයකි.
ජනාධිපතිවරණයේදී සියළු ජයග්‍රහණ සාධක රනිල් දෙසට යොමුව තිබියදී මහින්ද ජයග්‍රහණය කරවීමට ජනතාව පෙල ගැස්වු ජනතා විමුක්ති පෙරමුණ රට මුදවාගැණිමේ මගට යොමු වන විට මහින්ද දඩුකදේ ගැසීමේ ස්ථාවරයකට මාරුවිය.එයින් අස්ථාවර තත්වයකට පත්වු ආණ්ඩුව කප්පන් ගෙවමින් එජාපයේ පිරිසක් රජයව එක්කර ගැණිමටත් විමල් වීරවංශ පිරිස ජනතා විමුක්ති පෙරමුණෙන් වෙන්වීමත් සිදුවිය. ජනතා විමුක්ති පෙරමුණ පසුකාලය වන විට එජාපයේ න්‍යාපත්‍රයකට කටයුතු කරනබවක් විද්‍යාමාන කල බවක් හැගෙන්නට විය.
විවිධ කන්ඩායම් රජයට එක්ව රජය ශක්තිමත් වුවත් ජනතා විමුක්ති පෙරමුණ රජය සමග කටයුතු කලානම් මෙතරම් විශාල ඇමතිවරු සංඛ්‍යාවක් අපට පාර්ලිමේන්තුව තුල හමුනොවන්ට බෝහෝ විට ඉඩ නිර්මාණය වන්නට තිබිණි. ජනතා විමුක්ති පෙරමුනේ මතවාදයන් සමග ශ්‍රීලනිප මතවාදයන් පෑහෙන්නේ නැතිවුවත් කවුරුත් එක්ව කපා ගත් මාර්ගයේ යාමට ‍ පෙලගැසීම ජනතාවට සාධාරනවුවකි. ජනතා විමුක්ති පෙරමුණට එය කල නොහැකි විය. ඔවුන් ස්වභාවයෙන්ම දැඩි මතධාරීන් වීම සහ සාධාරණව එකගවීමට මැලිකමක් දක්වන බවක් මම දකිනා දුර්වල කමක් ලෙස සදහන් කල යුතුය.
උදාහරණයක් ලෙස ලෝක බැංකුවේ ප්ලග් එක ගලවන්න යෝජනා කිරීම ප්‍රායෝගිකව සලකා බලමු. මෙලෙස කියන න්‍යායචාරීන් තමන්ගේ නිවස ඉදිකරන්න නිවාස ණය රැගෙන ඇත. ගමන් බිමන් යන්න රැගෙන තියෙන යතුරු පැදිය කුඩා මෝටර් රථයේ සිට ඩබල් කැබ් රථයට දක්වා ලීසිං පහසුකම් ලබා ගෙන ඇත.ඉතින් රටක් ගොඩ නගන්න ලෝක බැංකුවේ ප්ලග් එක ගලවා පුළුවන්ද ?.( මේ ඇත්තන්ගෙන් සමහරෙක් දැන්නම් ප්ලග් එක ගලවා බැරි බව තේරුම් අරගෙන ඇත )
ජනතා විමුක්ති පෙරමුණ ප්‍රායෝගික දේශපාලනයට කවදා එයිද ?.එදාට යලිත් ජය නියතය.

මැතිද රනිල්- කාලො අයංතෙ.

මව් බිම නැත්නම් මරණය කියා අපට ඉගැන්වු ජවිපය පසු කලක මව් බිම මහින්දයන්ට බාර දී තම පක්ෂ යට මරණය තෝරා ගත්තේය.අද ජනතාවගේ සටන් පාඨය වී තිබෙන්නේ මව්බිමයි. ඒ සටන් පාඨය අතට ගත් මහින්දයෝ වයඹත් මධ්‍යමත් ඉතා පහසුවෙන් ජයගත්තේය.

එජාපය කෙසේ වෙතත් රනිල් ගේ ගමන යෙදී ඇත්තේ සුළගට විරුද්ධ දිශාවටය.රනිල්ට ඒ ගමන යන්න හැර එජාපයට ජනතාව යන දිශාවට ගමන් ඇරඹීමට කාලය පැමිණ ඇති බවට වයඹත් මධ්‍යමත් නැවතත් බලවත් ඉල්ලීමක් කර ඇත.

වයඹටත් මධ්‍යමටත් අතවැනු පසුගිය මාස කිහිපය ‍තේ, රබර්, මෙන්ම සුළු අපනයන බෝග වලට අයහපත් කාලයක් විය. එළවළු මිල පහත වැටී තිබුන අතර පොහොර කෟෂිරසායන පිරිවැය අධික නිසා ගොවියෝ අලාබ ලබන වගා ආර්ථිකයකට මුහුන දී සිටියේය.වී ගොවිතැන පමනක් වාසිදායක මට්ටමක පැවතුන අතර පොල් වෙලද පොල සම මට්ටමක පැවතින.මේ සාධක තිබියදී පවා උතුර- නැගණහිර ප්‍රශ්නය සදහා ආණ්ඩුව ජනතාවගේ මතවාදය හා සම්පාතව කටයුතු කරන බැවින් දේශපාලන අරටු හැර මධ්‍යස්ථ මතධාරී ඡන්දදායකයෝ ආණ්ඩුවට සහයෝගය දැක්වීය.ජනාධිපතිවරයා කෙරෙහි විශාල විස්වාසයක් ඇතිබව ප්‍රකට කරන ප්‍රතිඵලයක් මිස ප්‍රාදේශීය දේශපාලකයන් ගේ ජනප්‍රියතාවය දක්වන ප්‍රතිඵලයක් ලෙස මෙම ප්‍රතිඵල තක්සේරු කල නොහැක.

වතුකරය පාන්පිටි මිල ඉහල යාමත් සහල් මිල ඉහල යාමත් අනෙකුත් පරිභෝජන ආහාර ද්‍රව්‍යය ඉහල මට්ටමක පැවතීමත් නිසා පීඩාවට පත්ව සිටියේය.නුවරඑළිය -මස්කෙළිය මැතිවරණ කොට්ඨාසය තොන්ඩමන් ,චන්ද්‍රසේකරම් ආණ්ඩුව සමග සිටියදී පවා ආණ්ඩුව කෙරෙහි ඇති විරෝධාකල්ප වෙනස් කර ගැණීමට තවත් කාලය අවශ්‍ය බව නිවේදනය කර ඇත.

මේ ජයග්‍රහණ සදාකාලික ශ්‍රීලනිප ප්‍රමුඛ පෙරමුනේ ජයග්‍රහණ නොවේ. ජනතාව අතීතයේ මෙන් දේශපාලණ අන්ධභාවයෙන් යුතුව වර්තමානයේ කටයුතු නොකරයි.රනිල් තේරුම් ‍නොගත් ඒ සත්‍යය දැන්වත් තේරුම් ගත යුතුවේ. ජනතාවට ආණ්ඩුවල අතිධාවන ක්‍රිකාරකම්වලට තිරිංග දැමීමට බලවත් විපක්ෂ යක් අවශ්‍යවේ. එය නිර්මාණයවීමට ඉඩ තබා එජාපය හැර දමා යාමට රනිල්ට කාලය පැමිණ තිබේ.

මධ්‍යම සහ වයඹ

ආණ්ඩුව උත්තර පත්‍රයකුත් එජාපය සහ ජවිපෙය ප්‍රශ්න පත්‍රයකුත් මධ්‍යමම සහ වයඹ
ඡන්දදායකයින් වෙත බෙදා දී තිබේ. 14 දා පස්වරු 4.00වන විට ඡන්දදායකයින් මේ ගොල්ලන්ගේ උත්තර පත්‍රය නැවත සමීක්ෂයණය කර , ප්‍රශ්න පත්‍රවලට උත්තර සකස් කර දෙනු ඇත.
ආණ්ඩුවේ වේදිකාව මහින්ද සහ මහින්දට කඩේ යන අති දක්ෂ නඩයෙන් පිරී පැවතිනි. රනිල්ට තිබුනේ බොල් නිසරු තර්කත් දියාරු කටවල් කිහිපයක් සමග ජනතාව සමග උදාසීන පොරයකි.
මහින්ද යුද්ධය අලවි කරනවිට , යුද්ධ‍ය ඉවරනම් කන්න දියව් යයි - රනිල් සහ ජවිපෙය බඩ අලවි කරන්නට උත්සහා දැරීය. මේ දිනවල ජනතා අවධානය උතුරේ යුද්ධය නිසා බඩට තවමත් මුල් තැන ලැබී නැත.
නුවරඑළිය දිස්ත්‍රික්කය එජාපයට අති විශාල බහුතරයක් ඇති දිස්ත්‍රිනක්කයකි. ජනාධිපතිවරණයේ ප්‍රතිපල හා සසදන විට නුවරඑළිය දිස්ත්‍රික්කය ආණ්ඩුවට අභියෝගයකි. එහෙත් තොන්ඩමාන් සහ චන්ද්රිසේඛරම් සාධකය ආණ්ඩුව සමග සිටින නිසා යම් සහනයක්ආණ්ඩුවට ලැබුනත් මනෝ ගනේෂන්ගේ අත්හදා බැලීම් ආණ්ඩුවට කිසියම් බලපෑමක් වනු ඇත.
සිංහල බහුතර ඡන්දදායකයින් ආණ්ඩුවට සහයෝගය දක්වනුයේ යුද්ධයත් සමග රනිල්ගේ අදක්‍ෂ දේශපාලන කළමනාකරනයත් සැලකිල්ලට ගන්නා නිසාය. ජාතික දේශපාලනය තුලදී එස්.බී. ජනප්‍රිය චරිතයක් බවට පත්ව තිබුනේ අතීතයේදීය. ඔහුගේ හැකර කට දකුණු ඉන්දියාණු චිත්‍රපටියක ජෝකරයෙකුගේ කටට නොදෙවිනි නිසා අද අවලංගු කාසියක් බවට පත්ව ඇත. ඔහුගේ උපන් ගම යම් තරමකින් සැලකුම් කලත් එය දිස්ත්‍රික්කය තුල එජනිස ඡන්ද පදනමට විශාල හානියක් නොවනු ඇත.සියළුම පක්ෂප වයඹට වඩා මධ්‍යමට වැඩි අවධානයක් තිබුනේද යයි සැක ඇතිවන තරමට ප්‍රචාරක කටයුතු මෙහෙවුන බවක්ද පෙනෙන්නට තිබිනි.
පසුගිය මාස කිහිපය සුළු අපනයන බෝග සහ තේ වලට අඩු මිලක් ලැබීම එලවළු පොහොර කෘෂි රසායන වලට වැඩි වියදමක් දැරීම වගේම නිෂ්පාදිත එලවළු සදහා සාධාරන වෙළද පොලක් නොලැබීම යන කරුණුද පලාත් දෙකේම අසන්නට ලැබෙන අසහනාකාරී මැසිවිලිය.
මේ සියල්ලටම පුතිචාර 15 දිනට හිරු පායනවිට අපට දක්නට ලැබෙනු ඇත.

ස්තුතියි රනිල්.

කාලයට ප්‍රශ්නය තල්ලු නොකර ප්‍රශ්නය කරට ගෙන වි‍වේකයක් විරාමයක් නොදී මාවිල් ආරු වල සිට මුලතිව් දක්වා පැමිණි ගමන අද කාටවත් විස්තර කලයුතු පැහැදිලි කලයුතු ගමනක් නොවේ.එම ගමනේ නන්වැදැරුම් දුෂ්කරතා ජය ගනිමින් ආ මගට නායකත්වය ක්‍රියාශිලිත්වය දැරු විවිධ තරාතිරමේ උත්තමයින්ට මවුබිම වෙනුවෙන් ප්‍රනාමය පුදකිරීමට එක්වූවාට ....... ස්තුතියි රනිල්.

එතුමන් මෙතුවක් කල් මංමුලාව සිටියා විය හැකිය.කාගේත් අරමුණ එතුමන්ගේ දේශපාලන අරමුණු තුල නොතිබුන නිසා එතුමා අපේ විපක්ෂ නායකයා වීමට පින් පිරුනේ විය. එතුමා කිසි දවසක ජනතා අභිලාෂයන් තේරුම් ගත්තේ නැත.එතුමා මෙහෙවන කොටස පැහැදිලිවම අංක එකට තමන්ට බලය අවශ්‍ය බව ප්‍රකට කරන්නෝ පිරිසක් බව බහුතර ජනතාව අදහන්නෝය.ඔවුන් බලය ජනතා සේවයට නොව පෞද්ගලික සේවයට යොදා ගත් පිරිසක් ලෙස ජනතාව පිලිකුලෙන් සිතන්නේ අත්දැකීම් තුලින්ය.

ජනතාව ඒකීය රටක් අපේක්ෂාවෙන් සිටින විට එතුමා පාර්ලිමේන්තුවේ යතුර බාරගෙන හොර රහසේ නෝර්විජියානුවන් හා පිරිබාහරන් ලියා දුන් ගිවිසුමකට අපේ රට පාවාදුන්නේය. ජනාධිපතිවරනයේ ජයග්‍රහණය පිලිබද සියළු සාධක එතුමන්ට පෙල ගැසී තිබියදී මහින්ද ජනාධිපතිවරයා වූයේ මානුෂික මෙහෙයුම කරන හිසට වහලක් තනන්නට බිම් අගලක් නැති දුප්පත් කොල්ලන්ගේත් උන්ගේ දෙමව්පියන්ගේත් අභිලාෂය නිසා බව අමතක කලයුතු නැත.

මෙතුවක් එතුමන් මානුෂික මෙහෙයුම දුටුවේ මහා විනාශයක් ලෙසය. සියළු දේශපාලන ව්‍යාපෟති පෙල ගැස්සුවේ මානුෂික මෙහෙයුමට එරෙහිවය.එතුමන්ගේ කේවට්ට පුරෝහිතයෝ එතුමන් දක්කාගෙන ගිය මාවත විවර වන්නේ නෝර්විජියානුවන් ඇතුළු රාජ්‍ය නොවන සංවිධාන පවත්වාගෙන යමින් රට කන නඩයට සහ රට යකාට ගියත් බඩ පිරුනොත් ඒ ඇති හිතන නඩයේ අභිලාෂයට බව ජනතාව දකින බව එතුමා දුටුවේ නැත.

බලය පිලිබදව පමනක් දේශපාලන ව්‍යාපෘති පවත්වාගෙන යාම නතර කර දැන්වත් රට වෙනුවෙන් එකමුතුව ඊලග මෙහෙයුම වන සාමය සහ ආර්ථිකය ජය ගැණීම සදහා තම දේශපාලන දර්ශණය වෙනස් කරගෙන පාලනයට හවුල්ව කටයුතු කලොත් ඉතිහාසය විසින් රට වෙනුවෙන් කැපවු ජනනායකයෙක් ලෙස එතුමා හදුන්වා ගිවිසුමේ පාපයෙන් ආත්මය ගලවා ගැණීමට දෙවියන් වහන්සේ ආශිර්වාද කරනු ඇත.
නැත්නම් එතුමත් දේශපාලක ගොන්නට එකතුව අපා ගතවනු ඇත.

SB.

මේ දවස්වල අපූරු කතා කියවන උත්තමයෙක්. මම කවදා හරි ජනාධිපතිවෙනවා කියලා එක දවසක කියනවා. ආයෙත් දවසක මම ඒකාධිපතියෙක් වෙනවා කියලා සද්දයක් දානවා. මම සියක් කෑලෑ හමුදාවකින් සන්නද්ධයි කියලා තර්ජනය කරනවා. අනේ මන්දා අපිට මොනවා වෙයිද කියලා.
අපි චන්දේ දෙන්නේ අපිට රටට වැඩක් වෙනවා දකින්න මේ ගොල්ලෝ චන්දේ ඉල්ලන්නේ බලය ධනය තර කරගන්න. අපිටයි රටටයි වැඩක් කරලා අපිත් කීයක් හරි හොයා ගන්නම් කියන්නේ නැතිව අපිටයි රටටයි වැඩක් දීලා මගේම බඩ කට පුරවා ගන්නම් කියලානේ මේ කියන්නේ.
චන්ද කතා කාලෙන් කාලෙට වෙනස් වෙන්න ඕනි . නැත්නම් පරන රෙකෝර්ඩ් ම ගහලා වර්තමානේට හරියන්නේ නෑ. SB මහත්තයාගේ රෙකෝර්ඩ් එක චන්ද්රිකා කාලේ එකක් අනේ ඔය HIFI වලට අපි දැන් චන්දේ දෙන්නේ නෑ. ගහන්න ඕනි හේමකුමාර මහත්තයාගේ ,රාජිතමහත්තයාගේ, විමල් වීරවංශ මහත්තයාගේ අපේ මහින්ද මහත්තයාගේ වගේ බුදු ටෝක් එකක් ඒවනේ දැන් නැගලා යන්නේ .
හගුරන්කෙත පැත්තේ සහෘදයෙක් ඉන්නවනම් දෙමුකෝ පොඩි ඇඩ්වයිස් පාරක් පොරට මහ ඇමතිවත් වෙන්න.දැන් මාකට් එකේ තියෙන්නේ දේශානුරාගේ. මාරු කරන්න කියලා පරන කතා.

මට චන්දේ දෙන්න.

අපේ පාර්ලිමේන්තුව ලෝකයේම ඇමතිවරුන් වැඩිම ගණණක් සිටින එකම පාර්ලිමේන්තුව විය හැකියි. ඒත් කමක් නෑ කියල හිතමු. මේ මැතිතුමන්ලා ට භාර විෂයය පථය ගැන එතුමන්ලා විශේෂඥයෝ නම්.අපිට නම් රැකියාවකට අයදුම් කලාම අධ්‍යාපන සුදුසුකම් , වෘත්තීය සුදුසුකම් , සේවා පලපුරුද්ද මේ සේරම බලලා තමයි අඩුම තරමේ සම්මුඛ පරීක්ෂණයකටවත් කැදවන්නේ. මෙතුමන්ලාට ඒ කිසිම වැට කඩුල්ලක් නෑ ඉහලම ඇබෑර්තුව ලබාගන්න.
ඉහලම ඉන්නේ හයක් හතරක් නොතේරෙන උත්තමයෙක් වුනාම පහලට ගලා එන්නේ අසාර්ථකත්වය මිසක් වෙන මොනවද ? .
අපි චන්දය දෙන්නේ කාටද ?. බලයට එන්න දගලන පක්ෂ දෙකයි නේ තියෙන්නේ.ඒ ගොල්ල ඉදිරිපත් කරන අපේක්ෂක ලැයිස්තුවට එපාය චන්දේ දෙන්න.ඔය ලැයිස්තුවට රිංගන්න සල්ලි ඕනි,තාත්තා අප්පච්චි ඩඩා හරි අම්මා අයියා වගේ කෙනෙක් කලින් දේශපාලනේ ඉන්න ඕනි. ඔය මොනවත් නැත්නම් සල්ලිත් තිබිලා අඩුම තරමේ එක්කෙනෙක්වත් මරලා තියෙන්න ඕනි.එහෙම නැතිව ඔය ලැයිස්තු වල ඉන්නවනම් සියයට එක්කෙනෙක් තමයි.

පාර්ලිමේන්තුවේ දවසක් ගැන හිතමු. විරෝධය පාන්නේ අදහස් උදහස් ඉදිරිපත් කිරීමෙන් නෙමෙයි. අම්මා මෝ නැතිව රෙද්ද උස්සා ගෙන.ප්‍රතිඋත්තර ලැබෙන්නෙත් ඒවයින්මයි.කථානායක තුමාගේ කාරිය සන්සුන්වන්න .. සන්සුන්වන්න ..කියන එක.ඇයි මෙහෙම වෙන්න හේතුව.අපි පත්කරලා තියෙන්නේ පාර්ලිමේන්තුවට යන්න ඕනි අය නෙමෙයිනේ. බන්ධනාගාරයට යන්න ඕනි අයනේ පාර්ලිමේන්තුවට පත් කරලා තියෙන්නේ.
අධ්‍යාපන වටපිටා වෙන් ,මානව හිතවාදී ගුණයෙන් පිරිපුන් , ජන විඥාණය හදුනාගත් දේශයේ සංස්කෘතිය , සංස්කෘතික උරුමයන් ගරු කරන,යහගුණ දත් යහපැවැත්ම ඇති අය තුලින් සැබෑ දේශපාලඥයකු නිර්මානය වෙන බවත් . එවිට යහපත් දේශයක් ‍ඉබේටම නිර්මානය වන බවටත් මතයක් මම අහලා තියෙනවා.
එවන් සමාජයක් අපට කවදා දක්නට ලැබෙත්ද ?.
මට මේ සියල්ල සිහිපත්වූයේ හිගන්නාගේ තුවාලයවු උතුරු නැගණහිර අර්බූදය ගැන හිතලා.මුලතිව් නගරයට කි.මි පහක් ආසන්නයට හමුදා ඇවිත්. මර බියේ කොටුවෙලා ඉන්න කොටි රැළට ඹක්සිජන් දෙන්නත් උන් ඉන්නවද නැද්ද ගානට ඉන්න පුළුවන් අපේ ඇත්තෝත් ඉන්නවනේ. මේ ඇත්තන්ට තුවාලේ සනීප කරලා සර්වාංගයට වෙදකම් කරන්න හිතන්නේ නෑ කියලා මතක් වුනහම.
කොටි සුද්ධය එවරවුනාම තමයි ආණ්ඩුවට නියම මානුෂික මෙහෙයුම පටන් ගන්න වෙන්නේ.ඒකට එකතුවෙලා මුහුණ දුන්නොත් රට ගොඩ කියලා හිතුවොත් කොයිතරම් අපූරුද ?.එහෙම හිතන්න ප්‍රඥාව පහල නොවන්නේ පාර්ලිමේන්තුවෙත් පාර්ලිමේන්තුවන් පිටතත් ප්‍රධාන පක්ෂ දෙකේම ඉන්න ඇත්තන්ගේ නූගත් කුහක පිලිවෙත නිසා කියලයි මම හිතන්නෙ.අනෙක් කොන්ත්‍රාත්කාරයින්ගේ නම් සද්දේ විතරයි.ටෙන්ඩර් දානවා වැඩ ලැබෙන්නේ නැහැනේ.
ආයෙත් චන්දයක් ආවමවත් අපිට චන්දේ දෙන්න පුළුවන් වෙන්න අපේක්ෂක ලැයිස්තුවක් ඉදිරිපත් කරලා සුදුසුකම් තියෙන ඇමති මණ්ඩලයක් පත්කරගන්න පුළුවන් දිනන අයගෙන්.එහෙම සුදුසු අපේක්ෂක ලැයිස්තුවක් ඉදිරිපත්කරන්න නොකෙරෙන යෝජනාවක් අපි ඉදිරිපත් කරමු.

Anonymous - මේ යුද උන්මාදයද ?.

මා චින්තනට කඩේ යන බව ක්ෂනිකව හදුනා ගත්තත් සත්‍ය එසේ නොවන බව සදහන් කරමි.
මම මේ පුංචි රටට ආදරේ කරමි. අපිට එක වහලක් යට එකට බතක් උයාගෙන කන්න තරම් වාසනාවන්ත දවසක් එනතුරු මම බලා සිටිමි.
දශක හයක පමණ කාලයක් මේ පුංචි රට ලබන ලද අත්දැකීම් ඉතාමත් සරලව මම සදහන් කරමි.
ජනවාර්ගීක අර්බූදය තුන්කල් දුටු ජන නායකයා මම හිතනා අයුරින් මහාමාන්‍ය ඩී.එස් සේනානායක මැතිදුන්ය.එතුමන් උතුරත් දකුණත් යාකරන්නට උපක්‍රමශීලීව නැගණහිරත් උතුරේ යම් යම් ප්‍රදේශවලත් ගොවිජනපද ව්‍යාපාර ඇතිකරමින් සිංහල දෙමළ මුස්ළිම් ජාතීන් එකම පදේශවල පදිංචි කරවීය.එතුමන් මේ ජනවර්ගයන් සාමයෙන් සහජීවනයෙන් පරම්පරා කිහිපයක් ජීවත්වනවිට නෑදෑ හිතවතුන් වන බව කල් තියා නිරීක්ෂනය කලේය. අද මේ පදිංචිකරුවන්ගේ හතරවන පරපුර පවා වැඩිහිටියෝය.
ඩොලර් ෆාම් සහ කෙන්ට් ෆාම් වලට එල්ලවු මුල්ම ප්‍රහාරය සිහිපත් කලහැකිද ?. කොටි සමුල ඝාතනය අරඹමින් මරා දැමු එම අසරන ගොවි පවුල් වලින් සංකේත කරනුයේ එම ප්‍රදේශ ද්‍රවිඩීයකරණය කිරීමෙන් ඩී.එස් සේනානායක මැතිදුන් ගේ දුරදත් පිළිවෙත නිෂ්ක්‍රීය කරනු ලැබීමය.
අප ජාතින් තුළ වෛරය පිළිසිදවා වර්ධන‍ කර අවිස්වාශය ඇති කර වෛරක්කාරයින් බවට පත්කිරීමට මග පෙන්නුවේ ජනනායකයන් නොව දේශපාලකයන්ය.ඩඩ්ලි-චෙල්වනායකම් , බණ්ඩාරනායක - චෙල්වනායකම් ගිවිසුම් වල මූලික හරය බලය බෙදාහැරීමය. මෙම අරමුණ එජාපය ඉටුකිරීමට සැරසෙන විට ශ්‍රීලනිපයට විෂ බදුනක්ය. ශ්‍රීලනිපය ඉටුකිරීමට සැරසෙන විට එජාපයට විෂ බදුනක්ය.
මේ දෙගොල්ලෝම බලය උදෙසා අවස්ථාවාදීව බහු ජාතියවූ සිංහල ඡන්දදායකයින්ගේ ඡන්දය පමනක් බලාපොරොත්තුවෙන් කටයුතු කලාය. මේ නිසාම දෙමළ සහෝදරත්වය අවිස්වාශය පදනම් කරගෙන බිදී ගියබව පැහැදිලිය.
වසර පහක හයක පාර්ලිමේන්තු ආයුෂ හැරෙන්නට වෙනත් සම්පතක් මේ උන්නැහේලාට තිබුනේද?. මේ අදත් හිතන්නේ ඊලග ඡන්දය ගැන මිසක රට ගැන යයි අපට සිතීමට සාධක ඇත්ද ?.
1958 භාෂා අරගලයත් 1983 ජූලි කලබලත් අවුළුවා ද්‍රවිඩ ජනතාව ඝාතනය කර මංකොල්ලකන්නට මග පෙන්නූවේ කවුද?. සුදු රෙදි ඇන්ද දේශපාලකයන් නොවෙයිමද?. ප්‍රතිඋත්තර වශයෙන් යාපනය වැනි නගරවල ව්‍යාපාරික කටයුතු කල සිංහල ව්‍යාපාරිකයනට ආපසු ගෙදර එන්න සිදුවුවා මට මතකය.අපි විරසක කර සතුටු කරන්න ගිය උන්නැහේලා ඇන ගත්තේ පිරිබාකරන්ගෙන්ය.
අපේ පුංචි රටේ ප්‍රජාතන්ත්‍රවාදීව පිහිටුවා ගත් ආණ්ඩුවට, ආණ්ඩුවකට එරෙහිව ආයුධ ගත් ජවිපෙයත් කොටි සංවිධානයත් අරමුණු වෙනස් වුවත් කරනු ලබන්නේ එකම වරද බව අමතක නොකල යුතුය. ජවිපෙය මර්ධණය කල අයුරින් කොටි සංවිධානය මර්ධණය කිරීමට නොයෙක් බාධා ඇතිවූයේ වෙනස් ජන වර්ගයක් මෙ‍ම නොකටයුත්තට පාර්ශව වු බැවිනි.ජේ.ආර් වැනි පාලකයින්ගේ පටන් චන්ද්රිකා දක්වා කාලයාට ප්‍රශ්ණය විසදීමට ඉඩ හැර බලා සිටි බවක් නිරික්ෂණයවන්නේ නැත්ද?.
රනිල් ගේ ප්‍රවේශය වැරදි නැත. එහෙත් සත්භාවයෙන් සටන් විරාම ගිවිසුම ක්‍රියාත්මකවිනිද ?. නැත. ක්‍රියාත්මක නොවුනු තැන ගත යුතු ක්‍රියාමාර්ගය ගැණීමට රනිල්ට කොන්ද පණ නොතිබිනි. ඔහුත් සිදුවෙන දෙයක් වෙන්න හැර කල්මරන ස්ථාවරයට මාරුවිය.ඒ අතර ජාතියේ ( සිංහල.දෙමළ,අනෙකුත් ජාතීන් සමග ) පිණට ඒ කාර්ය සාටකය වෙතට ජනතාව විසින් මාරු කරන ලද්දේය.
සාටක‍ය විසින් ත්‍රස්තවාදය ත්‍රස්තවාදයෙන්ම තුරන්කර කොළඹට කේන්ද්‍ර කර ගන්නට හැමදාමත් වලිකන බලය රටටම බෙදා හැරියොත් ජන නායක ගොන්නට එකතු විය හැක.

නැත්නම් රනිල් මෙන්ම අවලංගුව මුල්ලකට විසිවනු ඇත.

සිරසයි ලසන්තයි.

සිරසට ප්‍රහාරයක් එල්ල වූ විට ආණ්ඩුවවට ඇගිල්ල දික්විය. දවස පුරාම ආණ්ඩුවවට එරෙහිව මාධ්‍ය ලොක්කන්ගේ ප්‍රකාශ , තව තවත් අයගේ ප්‍රකාශ ඒක පාර්ශවිකව සිරස සියළු වැඩ සටහන් නතර කර විකාශනය කලේය. මාස ගානකට සුව නොවේයැයි සිතන තරමින් වේදනාවෙන් අදෝනා නැගු සිරස පසුදා වන විට සුවපත්ව යථා තත්වයට පත්වී ක්‍රියාත්මක විය. මේ අතර සීමිත කාලය උද්ඝෝෂණ විරෝධතා සංවිධානය වී ජාත්‍යන්තර මාධ්‍ය ජාලා ඔස්සේ ජාත්‍යතන්තරයද ගිණි තැබුනේය.
සන්ඩේ ලීඩර් කතෘ ලසන්ත වික්‍රමතුංගයන් ඊයේ ( ජනවාරි 08 ) ඝාතනය විය. ආණ්ඩුවට සිදුවූයේ සිරසට එල්ලවු ප්‍රහාරයේ දී විදින්නට වු කටුක අත්දැකීමට යලිත් මුහුණ දෙන්නටය.
සිදුව ඇත්තේ ගමේ යම් මැර කටයුත්ත සිදුවු විගසම අපි වගකීමකින් තොරව පුර්ව නිගමනයකට පැමින “ ඕක කලේ හරමානිස්- ඌ චන්ඩියානේ” යැයි ගමේ චන්ඩියාගේ ගිනුමට බැර කරන මැර කටයුත්ත ‘බී’ වාර්තාවක් මත හරමානිස් අධිකරනයට ඉදිරිපත්කර මාස ගානක් රක්ෂිත බන්ධනාගාරයේද තැප ගෙදර එනවිට වැඩේ කලේ ජුවානිස් බව හදුනාගන පශ්චාත්තාප වන පරිද්දෙන් වගකීමකින් තොරව සියළු නොකටයුතු ක්‍ෂණිකව ආණ්ඩුවට බැර කර ආණ්ඩුව අපහසුතාවයට පත්කිරීමය . හරමානිස්ට සිදුවන්නේ නොකල වරදකට හිරේ තැපීමටය. ආණ්ඩුවට වන්නේ නොකල වරදකට ජාත්‍යන්තරය හමුවේ බාල්දු වන්නටය.තත්වය භයානකවන්නේ මේ අවස්ථාවේ ආණ්ඩුවවයි -ජාතිය යි හදුන්වන්නේ දෙකක් නොව එකක් නිසා ආණ්ඩුවයි ජාතියයි මේ දුක ඉවසා ගත යුතුවීමය. ජාත්‍යන්තරය තුල බාල්දු කර නසන්නට හදන්නේ ආණ්ඩුවයි රටයි දෙකම බව මේ හාදයෝ කවදා තේරුම් ගනීද ?.
‘ධාර්මිෂ්ඨ සමාජයක්’ තුල පිලිසිද ‘නැති බැරි අය ඇති හැකි අය කල’ සමාජයේ උත්පත්තිය ලද භීෂණය හා ඝාතනය වරින් වර විවිධාකාරයෙන් තවමත් හොල්මන් කරන බව අපට දක්නට ලැබෙන්නකි. මේ ක්‍රියාවිධි වඩාත්ම ලාබදායි ලෙස පාවිච්චි කරනු ලබන්නේ කුමන පාර්ශවයන් විසින්ද යන්න නිශ්චිත කිරීම එක් අතකින් වැදගත් කටයුත්තකි. වත්මන් ආණ්ඩුව වුවද ක්‍රම ශිල්ප ක්‍රියාත්මක කරනු ඇතිවුවත් මේ අවස්ථාවේ ජාත්‍යන්තරය හමුවේ අශූචි බාල්දියක් ඔළුවේ වක්කර ගන්න තරම් පිස්සුවක් ආණ්ඩුවට ඇතිවිය නොහැක.
ලසන්ත වික්‍රමතුංගයන්ගේ මාධ්‍යයේ භාවිතය ආකර්‍මනශීලී පිලිවෙතකවු බැවින් විවිධ විරුද්ධවාදීන් ඇතිවී සිටියා විය හැක. ඔහුට වෙනත් විරුද්ධවාදීන්ද සිටියා විය යුතුය. එක ගලෙන් කුරුල්ලන් දෙදෙනෙකු බිම දාගන්නට අවස්ථාවක් නිර්මානය කර ගත්තාවත්ද ?.
ආණ්ඩුව., ජාතිය මේ මර උගුලෙන් ගැලවන්න අපරාධකරුවන් නොපමාව නීතියේ රැහැනට අසු කර ගත යුතුය.