දෙවියෝ ඉන්නේ මොන පැත්තෙ ද ? - මානිගේ තීරුව

මේ යුද්දෙදි දෙවියො ඉන්නෙ කාගෙ පැත්තෙද?
යුද්දයට පැටලී සිටින ඇමරිකන්,ඊශ්‍රායල් හා ඉරාන යන ජාතීන් තුනම දෙවියන් අදහන්නෝය.ඒ නිසා මේ තුන්ගොල්ලම සිතනවා ඇත්තේ දෙවියන් සිටින්නේ තමන්ගේ පැත්තේ යැයි කියාය.එහෙත් ඇත්තටම දෙවියන් සිටින්නේ කාගෙ පැත්තේද?
ඒ ප්‍රශ්නය ඇසීමේ අදහසින් මම දෙවියන් හමුවීමට ගියෙමි .
මා පැමි⁣ණ සිටි බව දැනගත් දෙවියෝ නිදිගැට කඩමින් එළියට ආහ.
"රෑ එළිවෙනතුරු ටෙලිවිෂන්නෙකේ යුද්දෙ බල බල ඉඳල මාර නිදිමතයි ඕයි "දෙවියෝ ඈනුමක් හරිමින් කියා සිටියහ."ඒක නෙවෙයි තමුසෙ හිතන්නෙ කවුරැ දිනයි කියලද මේකෙන්?"
ඒ කතාවෙන් මට පුදුම හිතුණේය .
"දෙයියොත් කියන්නෙ යකාගෙ කතාවක්නෙ.මේක ක්‍රිකට් මැච්⁣චෙකක්වත්, දෙයියො කමෙන්ටේටර් කෙනෙක්වත් නෙවෙයිනෙ දිනන්නෙ කවුද පරදින්නෙ කවුද කිය කිය ඉන්න"මම වහාම කියා සිටියෙමි."ඇයි දෙයියො වහාම මේක නවත්තන්න මැදිහත් වෙන්නෙ නැත්තෙ?"
"මේකයි බං වැඩේ.මුන් හැම එකාම යාඥා කරන්නෙ යුද්දෙ දිනවල දෙන්න කියලනෙ .ඒ වුණාට එකෙක්වත් යාඥා කරන්නෙ නෑනෙ සාමය ඉල්ලල"දෙවියෝ කළකිරැණු හඬින් කියා සිටියහ."දෙයියොන්ට වුණත් පුළුවන්කමක් නෑ කවුරැවත් ඕඩර් කරපු නැති බඩුවක් සප්ලයි කරන්න"
"ඒ වුණාට දෙයියන්ට තියෙනවනෙ දේව බලේ"මම දෙවියන්ට මතක් කර දුනිමි ."ඒ බලෙන් බැරිද අපි ත්‍රස්තවාදී ආරක්ෂක පනතෙන් කරනව වගේ සාමාන්‍ය තත්ත්වයන් යටතේ කරන්න බැරි දේවල් කරන්න.ඒ කියන්නෙ ඉල්ලීමක් නැතුවත් ලෝක සාමය ඇති කරන්න"
"තමුසෙට මැන්ටල්ද ඕයි ? ලෝක සාමය ඇතිවෙනව කියන්නෙ යුද්ද, හමුදා,බෝම්බ,තුවක්කු ඔක්කොම නැතුව ගිහින් ලෝකෙ පට්ට බෝරිං වෙනවටනෙ" දෙවියෝ පුදුම වෙමින් කියා සිටියහ. "අනික බං ලෝකෙට වීරයො කොහෙන්ද යුද්දයක්වත් නැත්නම් "
මට දැනගන්නට තවත් දේවල් තිබුණේය .
"එතකොට දැන් මිලියන ගානක් යුද්දෙ දිනවල දෙන්න කියල දවස ගානෙ දෙයියන්ට යාඥා කරනව ඇතිනෙ" මම විමසුවෙමි ."දෙයියො කියලත් කොහොමද එච්චර යාඥා තොගයක් කළමනාකරණය කරගන්නෙ?"
ඒ අසා දෙයියන්ට හිනා ගියේය .
"ඒකටනෙ බං දිව්‍ය ඥානය කියල දෙයක් තියෙන්නෙ" දෙයියෝ කියා සිටියහ."මැදපෙරදිග දේව කන්නලව් අහන්න මම චැනල් දෙකක් දාල තියෙනව.සාමෙ ඉල්ලන චැනල්ලෙක නම් මම අහනව.යුද්දෙ දිනවල දෙන්න කියන චැනල්ලෙකේ සවුන්ඩ් මියුට් කරලයි තියෙන්නෙ"
"පත්තර රස්සාවෙදි අපිට කවුරැහරි කියන්න එපා කියල රහසක් කිව්වොත් අපි ඒක උසාවියකටවත් කියන්නෙ නෑ"මම දෙවියන්ට කීවෙමි."ඒක නිසා මට විතරක් කියනවද දෙයියො කාටද යුද්දෙදි සපෝට් කියල"
"දැන් ඔය තුන්ගොල්ලම මට යාඥා කරල මිසයිල යවන එවුන්නෙ "දෙවියෝ අසරණ ලෙසින් කියන්නට වූහ."ඒක නිසා මටත් උඹලගෙ ආණ්ඩුව වගේ ඉන්න වෙලා තියෙන්නෙ බං"
අන්තිමේදී මම යන්නට නැගිට්ටෙමි.
"දෙයියන්ට මතකද ට්‍රම්ප්⁣ කමෙයිනිව මරපු දවසෙ කිව්ව මම ලෝකෙ නපුරුම මිනිහව මැරැව කියල" මම අවසාන වශයෙන් කියා සිටියෙමි."ඒ වගේ දෙයියොන්ට දිවැසින් බලල කියන්න පුළුවන්ද ලෝකෙ ඉන්න පිස්සුම මිනිහ කවුද කියල"
දෙවියෝ මට රවා දිව්‍ය භවන ඇතුළට ගොස් මහ හඬින් දොර වසා ගත්හ.

සුන්දර නිහතමානි ද මැල්

A day in the life