අතීතය අතහරින්න ...

අතීතය අතහරින්න ...
රාජාලියෙක් වගේ ජීවත්වෙන්න.!!
(Forget everything in the past..
Let’s live like an Eagle. Turn unfavorable
Event into strength……! )
**********************************

 

සාර සොබාවට හිනැහෙන උන් ළඟ
කඳුළු තියෙන්නේ පපු මැද්දෙයි
ගිනිකඳු ලාවා ගලා හැලෙන්නේ
විදාරණය වී ගිය පසුවයි.

ගොදුරු සොයා ඉගිළෙන රාජාලිය
මළකුණු දෙස කිසිදා නොබලයි
අතීතයක් ගැන සිතමින් වැළපෙන
එකම සතා මිනිසා පමණයි.

මතකය මිහිදන් කරමින් දළුලන
සිතිවිලි අතරේ සිත රන්දා
වාන් දමන්නට ඉඩක් නොදී දුක
ඇතැමුන් වෙස් මුහුණක් බැන්දා

ඉර හඳ පායන එකම අහස යට
සතුට හුඟක් මිළ වැඩි හින්දා
සෝලි නොගෙන දුක වසා තබන්නට
දලදර සුදු සේලය ඇන්දා .
(දලදර =වළාකුළු )

චණ්ඩ මාරුතේ පුංචි කුරුල්ලන්
තැති ගෙන සැඟවෙන අතරතුරේ
රාජාලියෙකුට ,ඒ සැඩ සුළඟම
ඉහළට ඔසවා තබයි වැරේ

බාධක අබියස නො වැටී ඉන්නට
ජවයක් ඇත්නම්, මා මිතුරේ
සොවින් තැවෙන්නට කාලය දී නැත
හිනැහෙමු අරුණළු දැක අඹරේ .

රෝ.සි.

A day in the life