පරිවර්ථනය - Translate සිංහල > TAMIL> ENGLISH

Monday, December 28, 2009

රොමානිස් සංශෝධන.

අපේ අසල් වාසියෙක් රොමානිස් . වැඩිහිටියෙක් නිසා කවුරුත් කිව්වේ රොමානිස් අයිය කියලා. සති කීපයක් ආ ගිය අතක් නැතිව හිටිය රොමානිස් අයියගේ මළසිරුර පුංචි වන රොදක් තුල තිබිලා හමු වෙන විට මිය ගොස් දින දෙක තුනක් ගත වෙලා තිබුණා.

මේ වන විට ඔහුගේ වයස අවුරුදු අසූවක් විතර වෙන්න ඇති. අපි දන්න කාලයේ සිට මනුස්සයාගේ ජීවන වෘත්තිය ආණ්ඩුවේ කැලෙන් දර කපා ගෙන ඇවිත් විකුණන එක.
ගමේ තිබුණා කම්හලක් . පිහිය මන්න කැති වගේ උපකරණ හදන. මේ කම්හලේ ලිපට ඕන කරන දර සදහා යොදා ගත්තේ ප්ර දේශයේ තිබුන “මරන් “ කියන ගස් වර්ගය. ප්‍රදේශයෙන් මේ ගස් වර්ගය වද වෙන තුරු ම දර සපයන්න ජීවිත කාලය ම කැප කර රොමානිස් අයියා මියයන වකවානුව වන විට කම්හලත් වැසී ගිහින්.

මුල් කාලයේ කැලේ දර විකුණන්න පුළුවන් වුනත් කාලයක් යන විට දර සොයා ගන්න අපහසු වුනා. ගමේ ජනගහනය පසු ගිය දශක පහේ දස ගුණයකින් විතර වැඩි වුනා. කාලයක් යන විට වැඩි වුන ජනගහනය ට නිවාස ප්‍රශ්නය විසඳන්න ආණ්ඩුවේ කැලෑව වැසියන් අතර බෙදා දුන්නා. නැත්නම් ඉඩම් අනවසරයෙන් අල්ලා ගෙන පැල් කොටයක් අටවා ගෙන පදිංචි වුනා. ගම විසින් ගිල ගත් කැලෑව ජනා වාස වුනේ ඔය විදියටයි.

කැලේ දවසින් දවස අඩු වුනා. අපේ කථානායකයා වන - රොමානිස් අයියට දර සොයා ගන්න බැරි අවස්ථාව ආවාත් ඔහු රස්සාව අත් හැරියේ නෑ. කැලේ ගස් කපලා දර බවට පත් වෙන්න හැරලා ඉන් පස්සේ විකුණන්න පටන් ගත්තා. අන්තිමේ කැලේ නැත්තට ම නැති වුනා. වන සංරක්ෂණ‍ය උදෙසා වගා කර තිබූ වන වගාව ආක්‍රමණය කරලා දරට විකුණා දමමින් පොලිසි උසාවි ගානේ යාමිනුත් මරණය තෙක් ම තම රක්ෂාව නම් අත් හැරියේ ම නැහැ. රජයේ නිලධාරියන්ගන් රැකියාවට පීඩන වැඩි වෙන කොට තාවකාලික රැකියාවකට ගමෙන් බැහැර වුනත් ටික දවසකින් ගමට ආ විට ආයෙත් පරන රස්සාවට බැස්සා.

ඔහුගේ දේශපාලනය හැමදා මත් ප්‍රතිසංස්කරනවාදියි. අප දැනුම් තේරුම් ඇති කාලයේ සිටම තදබල සමසමාජ පාක්කයෙක්. අවුරුදු හත අටකට ඉස්සර සමෘද්ධි සහනාධාර පිළි බද ප්‍රශ්ණයක් ඇතිවී එජාපයට ගිය ඔහු තද බල එජාප වාදියෙක් වුනා. ඔහු ගම් වැසියන් දරන හැම මතයම දැක්කේ එහුතේ කෝණයෙන් වැරදි මතයක් ලෙසයි. ඒ හැම මතයට ම ප්‍රති විරුද්ධ මතවාදයක් ඔහු ට තිබුණා. කැලේ විනාශ කිරීම හැර. ඒ ඔහු ගේ රස්සාව නිසා කරන වැඩේ වැරැද්දක් දුටුවේ නෑ. නිතරම කතා කලේ ගමේ සිදු වන දේවල් ගැන විරුද්ධ මතයක සිට ඔහු සෑහීමකට පත්වෙන මතවාදයක් ගමේ කවදාවත් තිබුණේ නැහැ. පාරක් හැදුවත්, ළිඳක් හැදුවත් ,ජල නල මාර්ගයක් එළුවත්, ඒ වැඩේ කරන අන්දම ගැන වැරදි පැත්තක් තමයි ඔහු දුටුවේ.

මොහු හොද කියවන්නෙක් . දිනපතා ම පුවත් පතක් කොයි තරම් අමාරු කම් මැද්දේ උනත් මිළ දි ගැණීමේ පුරුද්දක් ඔහු ට තිබුණා. කලින් “ඇත්ත , රාවය , දිවයින ,හිරු වගේ විකල්ප පුවත් පත් , පසු කාලයක ලංකාදීපය වැනි පුවත් පත් කියවන බව ගම් වැසියන් නිරීක්ෂණ‍ය කරලා තිබුණා. මේ පුවත්පත අකුරක් නෑරම කියවීම ඔහුගේ පුරුද්ද. මේවායින් ඔහු දැනුවත් වුනා. කේන්ති කාරයෙක් වුන රොමානිස් අයියා සමග වාද විවාදවල පැටලෙන්න නම් කවුරුත් කැමති වුනේ නැහැ.

ජීවිතයේ අවසාන මාස දෙක ටිකක් අවසිහියෙන් වගේ ගත කල ඔහුට ගම්වැසියන්ගේ ආධාර උපකාරයෙන් යැපෙන්න සිද්ධ වුනා. අවසාන කාලයේ දී ඔහු අවසිහියෙන් දේශපාලන මතවාදී තර්ක දොඩවන්න පටන් ගත්තා.
ව්‍යවස්ථාව ගැන අපූරු අර්ථ කථනයක් ඔහුට තිබුණා. එයාගේ මතයේ හැටියට මේ පවත්වන මැතිවරණ ප්‍රමානය ඕනාවටත් වඩා වැඩියි. මේවා ඔක්කොම එක දවසින් තියන්න පුළුවන් මැතිවරණයක් බවට පත් කරන්න ඕනි.

ජනාධිපතිවරණයයි පාර්ලිමේන්තු මැතිවරණයයි එකක් වෙන්න ඕනී. ජනාධිපතිවරණයේ දී දෙවැනි තැනට පත් වෙන එක් කෙනා පාර්ලිමේන්තුවේ අගමැති වෙන්න ඕන. ඇමති මණ්ඩලය වැඩි වුනාට කමක් නෑ. තරග කරන පක්ෂ ලබා ගන්නා ඡන්ද ප්‍රමානය අතර මන්ත්‍රීවරු පත් කරගෙන ඒ අනුව එම අනුපාතයට ම ඇමතිවරු පත් කර ගන්න ඕනී. “ ඇන කොටා ගන්නේ නැතිව බෙදා ගෙන කන්න හොද ක්‍රමයක් “ කියලා තමයි ඔහු ගේ අදහස.

අසල්වාසීන් රොමානිස් අයියගේ ව්‍යවස්ථා සංශෝධනට හිනාවුනත්, අපුරු මතවාදයක් මේ අහිංසක මනුස්සයා අවසිහියෙන් වුනත් කියවන්නේ කියලා මට හිතුණා.

මීදුම මේ අහිංසක ව්‍යවස්ථා යෝජකයාට නිවන් සුව ප්‍රර්ථනය කරනවා.

( සත්‍ය සිද්ධියකි.)

Wednesday, December 23, 2009

මහින්ද ද ? සරත් ද?.

ජනාධිපතිවරණයේ ප්‍රතිපල මොන වගේ වෙයි ද ? අනාගත ජනාධිපතිවරයා මහින්ද ද ? නැත්නම් සරත් ද?.

මීදුම බලන්ගොඩ මැතිවරණ කොට්ඨාශය ඡන්ද පදනම දෙස බලා ගෙන පල කරන මේ අනාවැකි මුළු රටේ ම ඡන්ද දායකයින්ට පොදු නො වෙන්න පුළුවන්.

මේ මැතිවරණ කොට්ඨාශයේ ජනතාව 87% ක් පමණ සිංහල බෞද්ධ. 3% ක් පමණවු මුස්ලිම් ජනගහනය නාගරික පරිසරයේ ජීවත් වනවා. වතු ආශ්‍රිත ද්‍රවිඩ ජනගහනය 8 % ක් පමණ වනවා. ඉතිරි ජනතාව විවිධ ජන කණ්ඩායම්.

බහුතර සිංහල ජන කණ්ඩායම ගේ ජීවන වෘත්තිය වන්නේ වී ‍ගොවිතැන, මීට අමතරව කුඩා ප්‍රමානයන්ගෙන් තේ වගාව, එළවළු සහ කෙසෙල් වැනි වගාවල නිරත ගොවීන් විශාල ප්‍රමානයක් සිටිනවා ඉතාමත් සුළු සංඛ්‍යාවක් රජයේ සහ පෞද්ගලික රැකියාවල නිරත වනවා.
මුස්ලිම් ජනගහනය ව්‍යාපාරික කටයුතු වල හෝ රජයේ සහ පෞද්ගලික අංශයේ රැකියාවල නියුක්ත වනවා. වතු ආශ්‍රිත ජනතාව තේ වතුවල කම්කරුවෝ. මේ පිරිස අතර සීමිත පිරිසක් පමණක් එළවළු ගොවියෝ.

ජීවන වියදම ඉහල යාම දෛනික ආදායම් ලබන ජන කණ්ඩායම් වලට තද බල පීඩනයක් වුවත් බහුතර වී ගොවිතැන් සහ කුඩා වගා කරුවන් ඒ තරමට සැලකිල්ල කට ගත් බවක් පළවන්නේ නෑ. පොහොර සහනාධාරය සහ තම නිෂ්පාදන වල වැඩි වු වෙළද අගය මේ පීඩනය මකා ඇති බවක් පෙනෙනවා. නාගරික නොවන ජනගහනය එදිනෙදා ආහාර අවශ්‍යතාවයන් නිවසෙන් ,ගෙ වත්තෙන් සපයා ගැණීමත් ජීවන වියදම ඉහල යාම තුලනය කරන්න හේතු වන්න ඇති. සමෘද්ධිලාභී අඩු ආදායම් ලබන පවුල් පවා, ඉඩම් හිමියෝ නො වුනත් බොහෝ පවුල් අද ගොවියන් ලෙසින් හෝ ප්‍රමානවත් පරිදි වී ගොවිතැනේ යෙදෙන්නන්.

පොහොර සහනාධාරය සහ සමෘද්ධිලාභීන් ට ලැබෙන ආධාර මුදල පාසල් දරුවන්ගේ අවශ්‍යතා ඉටු වීම ආදිය ගැන සලකන ජනතා කොටස් රජය ගැන කරන විවේචන එතරම් තැකීමට ගන්නා බවක් පෙනෙන්නට නැහැ.

1977 මැතිවරණයේදී මෙම මැතිවරණ කොට්ඨාශය එජාපයට හිමි වුනා. ඉන් පසුවත් 1956 සිටමත් වාමාංශික නැඹුරුවක් දැරු මැතිවරණ කොට්ඨාශයක්. පසුගිය ආසන්නතම මැතිවරණයේ දී 60% කට ආසන්න ප්‍රතිපලයක් පොදු ජන එක්සත් පෙරමුණ ලබා ගන්න සමත් වුනා. එහි පසුබෑමක් මෙම මැතිවරණයේ දී දක්න ට නැහැ. එජාපයේ මැතිවරණ සංවිධාන කටයුතු තවමත් ඇරම්භ වී නැති තරම්. ආසන මට්ටමේ නායකයින් පවා බොහෝම උදා සීන බවකින් ඉන්නේ. ඔවුන්ට සෘජු නායකත්වයක් නොමැති කම බලවත් ගැවළුවක් බවයි එජාප ආසන සංවිධායක වරයාගේ අදහස.

පොදු ජන එක්සත් පෙරමුණ බිම් මට්ටමේ සංවිධාන කටයුතු වල කාලයක සිට රැදී සිටියත් එජාපය අවුරුදු ගණනාවකින් බිම් මට්ටමේ සංවිධාන කටයුතු සක්‍රීය තලයක පවත්වාගෙන ගොස් නැහැ. එබැවින් සම්ප්‍රදායික පාක්‍ෂිකයන් පවා සිටින්නේ අතරමං ස්වරූපයෙන්. සමහර පාක්ෂිකයන් ජවිපෙයට වාසිදායක අන්දමින් තම ඡන්දය පාවිච්චි කිරීමට අකමැත්තක් දක්වනවා. වතුකරයේ දුවිඩ ජනතාවට අලියා නැති වීම බලවත් පාඩුවක් .මේ වාසිය ලබාගන්නේ පොදු ජන එක්සත් පෙරමුණ..

යුද්ධය මේ ජනතාවට තීරණාත්මක සාධකයක් නෙමෙයි. යුද්ධය නිසා පීඩාවට පත්වුනේ හමුදාවට බැදුන දරුවන් අහිමි විමෙන් සහ ආබාධිත වීමෙන් පමනයි. දැන් ඒ තත්වයත් නිමා වෙලා. බොහෝ පවුල්වල දරුවන් රජයේ රැකියාවලට පාට භේදයකින් තොර ව පසුගිය අවුරුදු හතරේ යොමු වුනා. පොදු ජන එක්සත් පෙරමුණ ට සම්බන්ධව පවුල්වල දරුවන් ද යම් යම් විශේෂිත රැකියා අවස්ථා ලබා ගෙන තියෙනවා. එයින් ඇතිවූ විරසක බව පොදු විභාග පවත්වා ලබා දුන් රැකියා අවස්ථා අනෙක් පාක්ෂිකයනට ද ලැබීම නිසා තුලනය වී ඇති බවයි ඔවුන් සමග කතා බහේදී හිතෙන්නේ.

රජයේ දූෂණය ගැන කරන විවේචන ඒ තරම් ප්‍රතිපල දායක ලෙස සමාජ තලය පිළිගන්නා බවක් දක්නට ලැබෙන්නේ නෑ. ඒවා සාමාන්‍ය සිද්ධි ලෙස උපේක්ෂාවෙන් සිතන ස්වරූපයක් තමයි දක්නට ලැබෙන්නේ. “කොයි කා කලත් කරන්නේ ඕකම නේ.......“ යන්න බොහෝ දෙනා ගේ අදහසයි.

බලන්ගොඩ මැතිවරණ කොට්ඨාශයේ දී පොදු ජන එක්සත් පෙරමුණ ගිය වරට වඩා ඉදිරියෙන් සිටින බවක් තමා පෙන්නුම් කරන්නේ. ප්‍රකාෂ කරන චන්ද ප්‍රමානයෙන් 65% ක් පමණ මහින්ද රාජපක්ෂ මහතාට ලැබෙයි කියලායි මීදුම උපකල්පනය කරන්නේ.රට වටේ අනෙක් මැතිවරණ කොට්ඨාස මේ වගේද කියලා මීදුම දන්නේ නෑ.

මීදුම කාටවත් කඩේ යන්න හිතන්නේ නෑ. මැතිවරණ කොට්ඨාශව පිළිබදව පොදු තත්වයයි පල කලේ.

Monday, December 21, 2009

නිවරදිව දකිමු



“ඉත්තේ කොස් ලොකු වුනාට  - ඇත්තේ ගෙඩි පුස්
ගත්තේ දෙවි වෙස් වුනාට         - නැත්තේ අනුහස්
රැක්කේ පෙහෙවස් වුනාට          - දැක්කේ වස් දොස්
හක්කේ බුදු රැස් වුනාට              - බොක්කේ දඩ මස්.”


කතෘ අප්‍රකාශිතයි. පැරණි ජන කවියකි

Monday, December 14, 2009

බොඳ වී යන සිහිනය .

දේශපාලනයට පිවිසෙන විට සාදරයෙන් පිලි ගත්ත ජෙනරාල් වරයා අද දේශපාලන ළදරුවෙක් වෙලා.
දඹ රන් පිළිරුවක් ලෙසින් ජනතාව අතරට පත් ඔහු ඒ පිළිරුව රනින් නොව තඹ වලින් කර රන් ආලේප කල පිළිරුවක් බව ජනතාවට පෙන්වා දෙමින් සිටිනවා. දවසින් දවස ඒ තඹ දේශපාලන වා තලයේ ඇති ඔක්සිජන් සමග ගැටෙමින් තම පිළිරුව මත තඹ ඔක්සයිඩ් ආවරණයක් සදා ගනිමින් තම ප්‍රතිරූපය විනාශ කර ගනිමින් සිටිනවා.
සමූහව යුධ ක්‍රියා දාමයකට එක්ව රට වෙනුවෙන් කටයුතු කළ කණ්ඩායමක් අද දෙපස ට වී මඩ ගසා ගන්නවා. කෙනෙක් ගසන මඩ සෝදා හැරීමට අනෙකා කරුණු ඉදිරිපත් කරනවා. රටට හිතැති ව එක කණ්ඩායමක් ලෙස ගත් තීන්දු තීරණවල වගකීම් වල අප්‍රසන්න කොටස කලේ මම නොවේ කියලා කියනවා. ප්‍රසන්න කොටස මගේ කියනවා.

“වල් ඌ රෝ කැකුණ තල න කොට හබන් කුකුළන්ට මඟුල්” කියලා කතාවක් තියෙනවා.

රටට ප්‍රභාකරන්ගේ නික්ම යාම සටහන් කල අන්තිම දවස් ටිකේ ආ බලපෑම් අපට මතක් වෙනවා. ඉන් පසුව ඇමරිකාව ඇතුළු යුරෝපා ප්‍රජාව හැසුරුන අන්දමත් මහින්ද , ගෝඨාභය සරත් ෆොන්සේකා ඇතුළු කණ්ඩායම ජාත්‍යන්තර යුධ අධිකරණයකට යොමු කිරීමට ගත් වෑයමත් අපට මතක තියෙනවා. ඒ අභියෝග ඉතාමත් සාර්ථකව විසඳා ගන්න මහින්දටත් මහින්දගේ රජයටත් මෙතෙක් හැකි වෙලා තියෙනවා. තවමත් ඒවා ඉවර වෙලා නැහැ. ඇමරිකාව ඉරාකයේ දී කලේ තමන්ට අභියෝග කල නායකයෙක් එල්ලා මරලා තමන්ට හිතැති පාලනයක් රට තුල ස්ථාපිත කර ගැණීම. මීදුම මෙම ජාත්‍යන්තර බාධක හඳුනා ගන්නේ මහින්දට පෞද්ගලිකව කරන බාධක ලෙසින් ම නොවෙයි. අද පැමිණිලි පක්ෂ‍ යේ සාක්ෂි‍ කාරයාගේ කොටස කරමින් ජෙනරාල් වරයා කරන්නේ මහින්දට තරවටුවකට වඩා රටට ‍ද්‍රෝහී වීමක්.

ජෙනරාල් වරයා කාගේවත් පොදු අපේක්ෂකකයා නොවී , ජනතාව ගේ පොදු අපේක්ෂකයා බවට පත්ව ජනධිපතිවරණයට තරග කලා නම් කොයි තරම් යහපත් ද කියලා මීදුම හිතනවා. අද දවසින් දවස ජනතා අපේක්ෂාව බවට පත් වෙමින් ලකුණු රැස් කරන්නේ මහින්දයි.

සරත් ෆොන්සේකා කියවන කතා පිටපත් රචනා කරන අය ජනතාවට චුවිංගම්, ‍බ්‍රෙස්ලට්, ඩෙනිම්,දීපු යුද්ධෙ පවතින අවස්ථාවේ පාමංකඩ, මැදවච්චි, ගිය තොප්පිගල කියන්නේ කැලෑවක් කියපු යුද්ධ කරන්න ඕනෑම ගොනෙකුට පුළුවන් යයි කියපු අය නම් , යුද්ධය උපරිම තලයක ප්‍රභාකරන් පීඩනයට පත් කරන විට පාර්ලිමේන්තුව අස්ථාවර කරමින් අයවැය පරාජය කරන්නත් ඒ මගින් යුද්ධය නතර කරන්න හැදු උදවියත් නම් එතුමාගේ චින්තනයත් ඒ අයුරින් නිර්මාණය වී ඇති බව ජනතාව හඳුනා ගනිමින් සිටිනවා.

ඒ නිසා පොදු අපේක්ෂතකයා ගේ ජනාධිපති සිහිනය දවසින් දවස බොඳ වී යනවා.

Saturday, December 12, 2009

’SORRY’ කර ගන්න එපා.

රජයේ සේවකයන්ගේ වැටුප රුපියල් 10,000/= කින් වැඩි කරන බව ජෙනරාල් සරත් ෆොන්සේකා මහතා පුකාශ කරයි. එතුමා වැදගත් හොද මහත්මයෙකි. ආවාට ගියාට පොරොන්දු නො දෙන බැවින් දෙගිඩියාවෙන් සිටින රජයේ සේවකයන් ට තීරණයක් ගැණීමට අත්වැලක් සපයා දී තිබේ.

ලංකාවේ සහල් මිල පාලනය කරන ගොවියාත්, පාරිභෝගිකයාත් සූරා ගෙන කන සමාගමක ගරු කටයුතු සාමාජිකයෙක් කලබල වී ජෙනරාල් සරත් ෆොන්සේකා මහතාගෙන් රුපියල් 10,000/=ක් දෙන්නේ කොහොම දැයි ප්‍රශ්න කරයි.
ආර්ථික විශ්ලේෂකයෝ කලබල වී මාධ්යන්ට පුකාශ නිකුත් කරමින් රුපියල් 10,000 X 120,0000 = 1200000,0000 ක් අවුරුද්දකට ගෙවන්නේ කෙසේ දැයි විමසති. මේක අවුරුද්දක් නොවේ රාජ්‍ය සේවයේ යලිත් වැටුප් යාවත්කාලීන කරන තුරු ගෙවිය යුතු වේ. ඉන් පසු වද නො නවත්වා වැටුප් වැඩිවේ.

මහින්ද ට ජවිපෙ පැත්තෙන් නිතර කරන වර්ජන තර්ජනත් පහ වී අනාගතයේ දී වර්ජන තර්ජන සදහා පහලවිය හැකියැයි අප බියට පත් කරවන ප්‍රකාශ මගින් පෙන්වා දෙන හමුදා මැදිහත් වීම් ආදී යත් ඇති නොවන පුවේශයකට ජෙනරාල් සරත් ෆොන්සේකා මහතාගෙන් හොද උත්තරයක් දී තිබේ .

වැඩි වැටුප් ලාබෙන විට මොන වර්ජන තර්ජන ද ?. දැනට අවම වැටුප රුපියල් 14,000/= පමන වන සේවකයෝ එක්වර රුපියල් 24,000/= ක වැටුපකට හිමිකම් ලැබෙන විට එය නම් කෙතරම් අසිරියක් ද ?.

වැඩේ සිම්පල් බව නම් මීදුම දනී. ඇති තැන් හඳුනා ගෙන නැති තැනට යොමු කල විට වැඩේ කෙරේ. එය කල හැක්කේද ජවිපෙටත් ජෙනරාල් සරත් ෆොන්සේකා මහතාටත් පමනි.

120,0000ක්වු රජයේ සේවකයන් සහ පවුල් වල සාමාජිකයෝත් ජනාධිපතිවරණයේ දී තීරණයක් ගැණීමට ලබා දී ඇති මෙම අත්වැල නම් අවධාරණයට ලක් කල යුතු වේ.

කපුටා සහ කේජු කෑල්ලේ කතාව සිහිපත් වී මෙන් මහින්දට ඡන්දය දෙන්න හිත හදා ගත්තොත් වැඩි වෙන රුපියල් 10000/=ට ‘සොරිම තමයි”

Monday, December 07, 2009

දැන් රග දැක්වේ.....“ජවිපෙය”

ජනතා විමුක්ති පෙරමුනේ මහත්වරුන්ගේ හැසිරීම් රටාව ජනතාවට විහිළු සපයන රංගනයකට පත්වී තිබීම මීදුම වර්තමානයේදී දකියි.අතිතය හරබර තාර්කික දේශපාලන සංවාදවලට ජනතාව යොමු කල පක්ෂයක් අද බුද්ධිමය බංකොලොත්භාවයකින් නන්දොඩවමින් අපේක්ෂා භංගත්වු බවට පත්වු ප්‍රදර්ශණය කරමින් වෛරය ද්වේශය කෝපය වේදිකාවේ මුදාහරිමින් සිටී.මේ වෙනස එතුමන්ලා බුද්ධිමය පරිහාණියකට පත්වී ඇති බව දක්නට ලාබෙන ලක්ෂණයකි.

සෝමවංශ අමරසිංහ මැතිතුමා ( සහෝදරයා ලෙස වර්තමානයේ හදුන්වන්නට මීදුම අකමැති වෙයි. ) විදේශීය සංචාරයකට ගොස් අපේ මවුරටට ගොඩ බැස්ස මොහොතේ වික්ටෝරියානු ක්‍රමයට අත් දෙකෙන්ම ඇගිලි වලින් “ V ” අකුර පෙන්වා ජයග්‍රහනය සංකේවත් කරමින් ඔහු සංචාරය කල රටවල රාජ්‍ය නායකයින් හමුවී රටට ලැ‍බෙන්න තියෙන GSP බදු සහනය දෙනවාට බාදක ඇති කල බව ප්‍රකාශ කලේය. අපි මාධ්‍ය තුලින් දුටුවේ ඔහු මහත් ජයග්‍රහනයක් කල මානසිකත්වයෙන් ඒ බව රටට ප්‍රකාශ කල බවකි. ( සටහනට පිවිසීමට පෙර රාජ්‍ය මාධ්‍ය හැසිරෙන අන්දම ගැන විරෝධතාවය පමනක් සටහන් කරන්නේ මතු වියමනක් ඒ වෙනුවෙන් කරන්නට මීදුම අදහස් කරන බැවිනි.)


GSP බදු සහනය නිසා බඩ වියත රැක ගන්නේ ප්‍රධාන කොට නිදහස් වෙලද කලාපයත් රට වටා පිහිටුවා ඇති ඇගළුම් කර්මාන්ත ශාලා වල සේවය කරන සේවක තරුන තරුනියන් විශාල ප්‍රමානයක් විසිනි .ඒ දරුවෝ වර්තමානයේ සෝමවංශ අමරසිංහ මැතිතුමාගේවත් රනිල් වික්‍රමසිංහ මැතිතුමාගේ වත් පැලන්තියේ අය නොවේ. තුන් වේල නොදකින මේ අසරනයින්ට අවැඩක් කර ලබන යස ඉසුර , විප්ලවයක් කර පීඩිත ජනතාවට ඉසුරු ලබා දීමට 1971 ටත් පෙර සිට සැලසුම් කල මැතිතුමන්ලාගේ සිත්තුල පහලවුයේ ජනතාවගේ පින් පිරිහී ඇති නිසාද? ජවිපෙය අප හදුනා ගන්නේ දේශපෙමී දේශපාලන මතිමතාන්තර වලින් පෝෂිතවු පුද්ගලයෙක් වටා කේන්ද්‍ර ගත නොවු පක්ෂයක් ලෙස නම් මේ පෙරළියේ අරුමය තේරුම් ගත නොහැක. මේ දරුවන්ගේ රැකියා අවදානමකට ලක් කර අපට නම් සතුටක් ලබා ගත නොහැක.

මහින්ද සමග තියෙන වෛරයට GSP බදු සහනයට වැට බදින්නේ නම් එය ජාතිහිතෛෂි තීරනයක් වන්නේ කෙසේද යන්න සිතන්නට ජනතාව බුද්ධි මත් වනු ඇත. ‍‍‍‍‍‍

මහින්දගේ වත් රනිල්ගේවත් සෝමවංශ අමරසිංහ ගේවත් සරත් ෆොන්සේකාගේවත් අභිලාෂයන් ජනතාවගේ අභිලාෂයන් වන්නේ නැත. ජනතාවගේ අභිලාෂයන් නියෝජනය කරන අය සිටී නම් ඔවුන්ගෙන් කෙනෙකුට මේ මැතිවරනය ජයග්‍රනහණය කල හැක.අපට ඒ බව මැතිවරණ ප්‍රතිඵල තුලින් අනාගතයේ දකින්නට ලැබෙනු ඇත.ඒ සදහා නිකරුනේ මුදල් වියදම් කරමින් සෝබන වර්ගයේ වේදිකා රංගන අවශ්යඵ නැත. ඒවාට මුලාවෙන ජනතාවක් අද නැති අතර මනා විශ්ලේෂණයෙන් කටයුතු කිරීමට ජනතාව බුද්ධිමත්ය.

වෛරය ද්වේශය කෝපය වපුරවමින් වේදිකාව දෙදරවන මේ මැතිතුමන්ලා පැරනී ද්‍රවිඩ චිත්රතපටි වල අප දුටු නම්බියාර් වර්ගයේ රංගනයක යෙදෙමින් කතා පවත්වති. මේ කතා වර්තමානයට ගැලපේ දැයි එතුමන්ලාම විමසීම වටි. උදාහරනයක් ලෙස ආණ්ඩුක්‍රම ව්‍යවස්ථාව ගැන කරන කතා මේ ඇත්තෝ එය පැය විසි හතරකින් , එක පෑන් පහරකින් කල හැකි වෙනස් කමක් ලෙස අපට තහවුරු කරන්න “තටමයි”. එහෙත් එතනට යාමට ආණ්ඩු ක්‍රම ව්‍යවස්ථාවෙන් සපුරා ගත යුතු සීමා අපට නොපෙන්වන්න පරිස්සම් වෙති. එමෙන්ම එතනට යාමට ඇති ඉඩ කඩ අසුරා කටයුතු කිරීමටද පරිස්සම් වෙති.

මැතිවරණ කොට්ඨාශ මට්ටමේ නියෝජිතයන් පත්කිරීමේ චන්ද ක්‍රමයකට යාම චන්ද දායකයාට ප්‍රතිඵලදායක ක්‍රමයකි. එහෙත් එකද නායකයෙකු වත් එතනට යාමට අකමැතිවෙති. එසේවුව හොත් ජනතා විමුක්ති පෙරමුන වැනි පක්ෂ වලට එකම නියෝජිතයෙක්වත් පත් කරවා ගන්නට නොහැකිය.වර්තමානයේ නම් එජාපයටද සිදුවන්නේ ආසන දහයක පමණ රැදී සිටීමටය.

සුළු ජාතීන් , සහ ජවිපෙ වැනි දේශපාලන මතධාරී පක්‍ෂවලටද වෙනත් දේශපාලන ආයාතන වල නියෝජනයක් වන පරිදි , පාර්ලිමේන්තුවේදී කරන ලබන සංසෝධනයකදී මැතිවරණ කොට්ඨාශ මට්ටමේ චන්ද ක්‍රමය ප්‍රතිනිර්මාණය කර ආණ්ඩු ක්‍රම සංසෝධනයක් සිදු කලහැකිවූවත් මේ සදහා දේශප්‍රේමයෙන් මොරදෙන හැත්ත කවර කවදාකවත් එකග නොවී විවිධ හේතුන් දක්වමින් මග හරිමින් සිටින බව රටට මෙතෙක් කරන ලද ක්‍රියාකාරකම් වලින් පැහැදිලි කර දී ඇත.

වේදිකාවේ දෙන රංගනය වේදිකාවෙන් බැස ගියාට පසුව නැත්නම් මේ බොරුවෙන් ජනතාව රැවටිය හැක්කේ වරක් දෙවරක් හෝ තුන්වරකි. හැමදාමත් ජනතාව රැවටිය නොහැක.

Tuesday, December 01, 2009

SF මෙහෙයුම

දේශපාලනය යනු දැලි පිහියෙන් කිරි කෑ යුතු විෂයයකි. දැන යා යුතු මගකි.

පලමු මාධ්‍ය හමුවේදීම සරත් ෆෝන්සේකා මැතිතුමා මෙම විෂයය පිළිබද අත්දැකීම් නොමැති බවත් උපදේශකයන් එතුමා පිටුපසින් සිටින බවත් ඒ අයගේ පිහිටෙන් රට නිසි මාවතට පත්කරන බවත් පුකාශ කිරීමට නිහතමාණීවීම පිළිබදව මීදුම එතුමාට ස්තුතිවන්තවේ.

මීදුම කිසිවිටකත් සරත් ෆෝන්සේකා මැතිතුමා නම් යුද වීරයා හෑල්ළුවට පත්වීම නොඉවසයි.ඔහු ගැලවීමේ හමුදාවටවත් නායකත්වරය දිමට නොසුදුසුයැයි කී විටත් , ඕනෑම ගොනෙකුට යුද්ධ කල හැකියයි කී විටත් මීදුමට එසේ කී විද්වතුන්ට සහ විශ්ලේෂකයින්ට එරෙහිව හිතේ ඇතිවුන වෛරය තාමත් හිතෙන් පහ කිරීමට නොහැකිවීම පෘථග්ජන මනසක පිළිසිදන ලද හැගීමකි.

සරත් ෆෝන්සේකා මැතිතුමා එසේ නොවේ. එතුමා මීදුමට වඩා දියුණු මනසකින් යුත් උතුමෙකි. ඒ නිසාදෝ එජාපයට ත් ගොන් මනසින් පිරි මහත්වරුන් රැලක් ගලවා ගැණීමටත් “ ගලවා ගැණීමේ මෙහෙයුමක්” ආරම්භ කර අනාගත ශ්‍රී ලංකාවේ සෞභාග්‍ය උදෙසා ඔවුන්ගේ උපදෙස් රැගෙන කටයුතු කිරීමට අපෙන් ජනවරමක් අයදියි. සරත් ෆෝන්සේකා මැතිතුමා දශක ගනනාවක් හමුදා සේවයෙන් මනසට ජීර්ණය කරගත් ආභාශයෙන් නිර්මාණයවු පලමු ප්‍රචාරක පෝස්ටරය මගින් එතුමාගේ මැතිවරණ ව්‍යාපාරය ‘SF මෙහෙයුම" ලෙස රටට හදුන්වා දී තිබේ.හමුදා වර්ණවත් පසුබිමේ “ALGERIAN ” අක්ෂරයෙන් මුද්රිතවු මෙම පොස්ටරය දුටු ගමන් සිහි වන්නේ එතුමායග් හමුදා චින්තනයයි.

මීදුම ජෙනරාල් වරයෙකු ශ්‍රී ලංකා ප්‍රජාතන්ත්‍රීය සමාජවාදී ජනරජයේ ජනාධිපති මැතිවරණයට පොදු අපේක්ෂකයෙකු වශයෙන් ඉදිරිපත් වීම අගේ කොට සැලකුවෙකි.මේ රට ආපස්සට ගෙන යන “ දියව් “ කාරයින්ටත් දූෂිත අක්‍රීය රාජ්‍යතන්ත්‍රයටත් තම ආකල්ප වෙනස් කරගෙන රටට වැඩදායි ලෙස ක්‍රියාත්මක කරවීමේ සක්‍රීය මෙහෙයුමක් උපන්දා සිට ජනතාව සමග ගැවසෙන කුරහන් පාට සළුධාරී මහින්දට වඩා හමුදා විනයෙන් සහ නායකත්වයෙන් පන්නරය ලැබු තේජස්වී ඇදුමකට හිමිව සිටි ජෙනරාල් වරයෙකුට හැකිවේයැයි මීදුම සිතුවිලි අතර රදවා ගෙන සිටියෙකි.

මාළුවාට ජලය නැතිව ජීවත් වීමට බැරිවා සේම දේශපාලකයාට මිනිසුන් නොමැතිව තම දේශපාලන වෘත්තිය පවත්වා ගෙන යා නොහැකිවේ. ඔවුන් මල නොතලා රොන් ගන්නා න්‍යාක හෝ සාස්ත්‍ර කියා මිනිස් සිත රවටමින් මුදල් කඩා ගන්නා අහිකුන්ටිකයන් මෙන් ජනතාව රවටා චන්දය කඩාගෙන යස ඉසුරෙන් ජීවත්වේ. මිදුම හිතේ මවා ගත් ජෙනරාල්වරයා එවැනි “ අළුගුත්තේරුවෙකු” නොව සැබැ ජනහිතකාමී දේශප්‍රේමියෙකි.

එහෙත් සරත් ෆෝන්සේකා මැතිතුමා යන පාර මංමුලාවු සෙයකි.

මේ රට විකුනාගෙන කෑ ඔප්පු පිටින්ම නෝර්වේ බ්‍රෝකර්වරුන් හරහා ප්‍රභාකරන්ට ලියා දුන් , ප්‍රභාකරන්ට එරෙහි සටනේ තීරණාත්මක මොහොතේ පවා රටට එරෙහිව දේශීය මෙන්ම විදේශීය කුමන්ත්‍රණ කරුවන් සමග සිටගත් දේශද්‍රෝහී සර්පයින් ආධාරකරුවන් සහ උපදේශකයින් ලෙස ඔලගුවේ දමාගෙන යන මේ ගමන දේශප්‍රේමී ගමනක් ලෙස මීදුම දකින්නේ නැත.මීදුම සරත් ෆෝන්සේකා මැතිතුමාගේ මේ ගමන් මග තෝරගැණීම ගැන කම්පාවේ.

තමන්ටවු පෞද්ගලික අව තක්සේරුවන් නිසා රටට හාණිවුවත් මම ජයගෙන හොදපාඩමක් මහින්දට උගන්වන්න යන මේ ගමන තුල කිසිදු දේශ හිතෛෂී ස්වරූපයක් නොමැති බව මීදුම සටහන් කරන්නේ සංවේගයෙනි.

දශක තුනක් තිස්සේ වද විදි ත්‍රස්තවාදය මහින්ද නම් කුරහන් පාට සළුධාරීයාගේ කොන්ද දේශීය හා විදේශිය බලපෑම් හමුවේ කෙලින් තිබු නිසා අද්විතිය ජේ.ආර්ටත්, ජනතා විමුක්ති පෙරමුනේ තරුන දේශපාලන නැගිටීම පුනරුත්තාපනයනින් තොරව ජෙනරාල්වරුන්ගේ පිහිටෙන් අතුගා දැමීමට හැකිවු ආර් .ප්‍රේමදාසටත් සහ නෝබල් තෑග්ගට පවා නම කියවුන චන්ද්‍රිකාටත් මෙල්ල කිරීමට නොහැකිවුන පුභාකරන්, නන්දිකඩාල් කලපුවේදී අපායට යවිමට ජෙනරාල්වරුන්ට හැකිවිය .

එහිදි සියළු පොදු සාධකයන් වරහන් තුලින් ඉවතට ගෙන සමීකරනය විසදු විට වරහන් තුල ඉතිරිවන්නේ රට තුල සාමය ස්ථාපිත කල එක් අයෙකුගේ නමක් පමනි .අනෙක් සියළු නම් පොදු සාධකයවී වරහන් වලට පිටතින් පිහිටන්නේය.

Monday, November 30, 2009

මුනි සිරිපා පියුමේ – රොන්සුනු සිත තැවරේ

අද උදුවප් පෝයයි. ශ්‍රීපාද වන්දනා සමය මෙම පෝයත් සමග ආරම්භ වේ.
චිරාගත සම්ප්‍රදායනට අනුව පැල්මඩුල්ල ගල්පොත්තාවෙල කීර්ති ශ්‍රී රාජසිංහ රජමහා විහාරයේ සිට මැයි- දෙසැම්බර් දක්වා ශ්‍රීපාද වන්දනාවේ නොයන අවාරයේ තැන්පත්ව පවතින සුමන සමන් දේව ප්‍රතිමාව සහිත පුරා වස්තු ශ්‍රී පාදයට උත්සවශ්‍රීයෙන් වැඩමවාගෙන යාම උදුවප් පෝදා සිදුවේ.
එතැන් සිට වන්දනා සමය ඇරඹුනා යයි සලකනු ලැබේ.

අපි අද ශ්‍රී පාද වන්දනාවේ යමු.

ශ්‍රී පාද වන්දනාව පිලිබදව ශාස්ත්‍රීය කතිකාවකට යනවාට වඩා දශක දෙකකට තුනකට එහා වන්දනා නඩයකට එකතුව ශ්‍රී පාදය වන්දනා කරන්නට යාම සිත් සනසන බැතිබර අත්දැකීමකි.
දැන් දැන් නම් ශ්‍රී පාද වන්දනාව විනෝද චාරිකාවකි. අපි අතීත නඩයක් සමග ශ්‍රී පාදයට කරුනා කරමු.

“සුර රද සමන් සමගින් සුරගන එවර
පැහැනද මදාරා පරසතු මල් පතර
කැර පුද වදින රැදිමුනි සිරිපා තඹර
සකිසද පෙනේ සමනල ගල නැගනහිර ”

සැළලිහිණියා ට සැළලිහිණි සන්දේශ කතුවරයා ශ්‍රී පාදයට මග දක්වන විට

හංස සන්දේශ කතුවරයා හංසයාට මග පෙන්වන්නේ මෙලෙසනි.

සමනොල මුහුල සිරිපද ඔබන මගුලට
නිකසල මහ සගන ගෙන වඩින මුනිදුට
පැහරදුල සුනිල් මැණිකෙන් කළ මග ලෙසට
මනදොල පිරෙයි ගග සිරි සර දුටු තොපට

………………මහින්ද හිමියෝ

මුනි සිරිපා සිඹිමින් නේ
සමනල ගල පෙදෙසින් නේ
මද සුළගයි මේ එන් නේ
මගේ පුතා නැළවෙන් නේ

යනුවෙන් සිහිපත් කරන විට “ අපට මේ වසර තැන තැන බෝම්බ පුපුරන්නේ නැති හෙයින් පුතාට නැලවෙන්න ඉඩක් ඇති බව නම් සිහිවෙයි.

දශක දෙකකට තුනකට එහා සිරිපා වන්දනාව මෙත් සිතින් ගරු සරුව අනෙක් වන්දනා කරුවන්ගේද සිත සුව සදමින් කල වන්දනාවක් විය. ගමනේ මහන්සියත් දුෂ්කරබවත් නිවි පහන් වුයේ සිත් සනසන මෙවැනි ගායනාවන් ගෙනි.

“බුද්ධං සරණේ සිරස දරා ගෙන
ධම්මං සරණේ සිත පහදා ගෙන
සංඝං සරණේ සිවුරු දරා ගෙන
ඉඤ්ඤයි තුන් සරණේ අදහා ගෙන”
සිරිපා වැද පුදා ආපසු බහින නඩයක් අතරමගදී හමුවන නන්නාදුන වන්දනාව සදහා මලුව වෙත කරුණා කරන නඩයකට වුවද ආශිර්වාද කරණුයේ,
“වදින්න යන මේ නඩේට - සුමන සමන් දෙවි පිහිටයි”
යනුවෙන් ඉතා බැතියෙන් යුතුවය.
එවිට නිතැතින්ම “වැදලා බහින මේ නඩේට – බුද්ධං සරණේ සරණයි.” පිළිතුරු ආශිර්වාදයක් ලැබේ.මෙ අයුරන් වන සංවාදයන් කොයිතරම් අපූරුද.

“වදින්න යන කිරි කෝඩුට – සුමන සමන් දෙවි පිහිටයි
වැදලා බහින කිරි කෝඩුට – සමන් දෙවිදු කරුණාවයි” සිරිපා කරුණාකරන පුංචි එකෙකුට කරන ආශිර්වාදයකි.
වෙහෙස මහන්සිය නිමාගන්න තැනක් හමුවු විට
“මෙන්න මෙතන තැනිතලාව – කෝපි බොන්න හොද වෙලාව”
යනුවෙන් පැවසීමෙන් නඩේ අවධානය විරෝධයකින් තොරව ලබා ගැණීමට කරනු ලබන හොද යෝජනාවකි.

වේගයෙන් ගමන් යන තරුන පිරිස් ගාටන අන් අයගෙන් මග ඉඩ ඉල්ලන්නේ
“දෙන්න අපට සන්හිදේ – දුන්න අයට පින් පිරේ” යනුවෙනි.
අළුත විවාහවු යුවලකට හෝ තරුන යුවලකට කරන සුහද විහිළුවකට පිළිතුරු ලැබෙන්නේ
“අපේ බුදුන් – අපි වැදගෙන - ගමට යන්න යනෝ
- එන මත්තේදි කෝඩු සමග බුදු පුදයට එනෝ.” ………. යනුවෙනි.

පහසු ගමන් මගේදී මද රිද්මයකින්
“දිදි සාදු නාදේ – යමු අපි සිරිපාදේ ” යනුවෙන්ගායනය කලත්

හෙල ගමන් මග අපහසුවු විට මහන්සිය දුරුලන්නෙ වේග රිද්මයකට ගමන දිරිමත් කරන රිද්මයකිනි.

“අපේ බුදුන් – අපි වදින්න
පෙරලි පෙරලි - අපි වදින්න
සමන් දෙවිදු පිහිට වෙන්න
නළල තබා - අපි වදින්න
දොහෙතේ නගා - අපි වදින්න
දෙ‍දන නමා - අපි වදින්න
මලුත් පුදා - අපි වදින්න
තෙලුත් පුදා – අපි වදින්න
සුවද පුදා – අපි වදින්න
පහන් පුදා – අපි වදින්න…………….” .

පුංචි එවුන්ට ගමනේදී ගැම්මක් දෙන්නේ “අග්ගල කං ඩෝං පුතා - හෙලේ නගිං ඩෝං පුතා ” අයුරුන්ය.

ශ්‍රී පාද වන්දනාවේදි භාවිතාවන විශේෂිත පද කිහිපයක්ද වේ. වන්දනාවේ ගෙන යන අඩුම කුඩුම පොදිය කර තබාගෙන යන තරම් බරවුවත් හදුන්වන්නේ “සැහල්ලුව”යනුවෙනි. පලමුවරට වන්දනාවට එක්වන පිරිස “කෝඩු” වන අතර කිහිප වරක් වන්දනාවේ යෙදුන වැඩිහිටියෝ “දඩු කෝඩු ”වෙති.පුංචි එවුන් “කිරි කෝඩු” වෙති.

අමරදේවයන් ගේ හඩ
“මුනි සිරිපා පියුමේ – රොන්සුනු සිත තැවරේ
නිවි පහන් වී – සිත සැනසේ. ………………………”

නිසංසල මොහොතක ඇසෙනවිට අපිටත් මේවාරයේ සිරිපා කරුනා කිරිමට සිත් පහල වෙනු ඇත.

-කඩුල්ල පල කල සටහනකිනි

Saturday, November 28, 2009

මහින්ද සහ දූෂණය.

මහින්ද යුද්දෙට හොදයි. දුෂණයට සහ නාස්තියට නම් ගැලපෙන්නේ නෑ කියලා මතයක් තියෙනවා. මීදුම මේ මතවාදය ගැන යමක් සටහන් කරන්න උත්සහා කරනවා. ඌණ පුරණය කරන්නත් සමබර කරන්නත් ඔබට බාරයි.

මහින්ද පටන් ගත්ත තැන ඉදලා ජනාධිපතිවරයෙකු වෙනකම් දුෂණ මඩ තවරා ගත්තේ ගිය ජනාධිපතිවරණය වෙලාවේ හෙල්පින් හම්බන්තොට ගණුදෙණුව ගැන කතා කරමින්. ජනාධිපතිවරණය උදෙසාම කරළියට ආ මේ කතා ඉන් පසු ව ඉදිරිපත් කල අය විසින්ම අමතක කරලා දැම්මා. ජනාධිපතිවරයෙකු වු පසු මිළ මුදල් හම්බු කර ගත්තා කියන කතාව දැන් වේදිකාවට ඇවිල්ලා. මාධ්ය වලින් පල වෙන ඕපාදුපත් කටින් කට ( දැන් යොදා ගන්නේ දුරකතන) පතුරුවා හරින ඕපාදුපත් හැරෙන්න මේවා තහවුරු කරන වාර්තා ලිං මැඩියන් සහ බයියෝ වන අපට ලැබෙන්නේ නැහැ. ඒ නිසා මේ වෝදනා සත්යද අසත්යද කියලා අපිට හිතා ගන්න බැහැ.

මහින්දගේ පාලනය නම් වියදම් අධික පාලන රටාවක්. ඒකට අපිත් වග කිවයුත්තෝ වෙනවා.

පොදු ජන එක්සත් පෙරමුණ 2005 පාර්ලිමේන්තු මැතිවරනයේදී අපේක්ෂකයෝ ඉදිරිපත් කරන කොට දිස්ත්රික් ලැයිස්තු වල ජනතා විමුක්ති පෙරමුනේ අපේක්ෂකයොත් හිටියා. ශ්රී ලංනිප අපේක්ෂකයින්ට චන්දේ දෙන ගමන් මනාප තුනෙන් අපි කොල්ලෝත් ඉන්න ඕනිනේ කියලා එක මනාපයක් ජවිපෙ අපේක්ෂයටත් දුන්නා.රිමෝට් කන්ට්රෝලරය අතට ගත්ත මේ ඇත්තෝ යුද්ධෙ උපරීමව ප්ර්භාකරන් මහත්තයාව පීඩනයට පත්කරන වෙලාවේ, අයවැය ලේඛණය චන්දේ වෙලාවේත් මහින්දට ගනන් පෙන්නුව. ජවිපෙ චන්ද පදනම පිම්බුව අපිට ...දෙයියෝ මතක් වුනේ ඒ වෙලාවේ.

අපේ වීරවංශ සහෝදරයාගේ “ඇත්ත හා නැත්ත” පොතට අන්තර්ගතය වෙලා තියෙන්නේ ජවිපෙ සෝමවංස අමරසිංහ මැතිතුමා ( සහෝදරයා කියන්න බැහැනේ) ටිල්වින් මැතිතුමා වගේ මැතිතුමන්ලා එතුමන්ලාගේ දේශපාලන මණ්ඩලයේ දී හුවමාරුවු ලේඛණ සහ අදහස් .ඒවා කියවන කොට මේ තිරණයට සෝමවංස අමරසිංහ මැතිතුමා (එකල) රජයත් සමග සිටිය යුතුයැයි දරන ලද අදහස්තුල සිටි බව දක්නට ලැබෙනවා. ඒත් කුමක්දෝ රටේ අහේතුවකට ඔවුන් මහින්ද සමග විරසකවුනා.

එයාලා ආණ්ඩු‍ව පීඩනයට පත්කරන විට ආණ්ඩුවට එකතුවු එජාපයේ පිරිසටත් කරු ජයසූරිය මහතා අපසු ගියත් මීදුම කෘතවේදිත්වය රට වෙනුවෙන් පල කරනවා.නැත්නම් ප්රභාකරන්ගේ රාජ්‍යයේ අපි තාමත් මර බියෙන්.

මේ ව්යවස්ථාවම තම පක්ෂය අත්හැර ආණ්ඩු පක්ෂයට එකතු වන්නන් ආරක්ෂා කරන්න විධි විධාන ඇති කරලා තියෙනවා. ජනාධිපතිවරයා අභිමත ව්යාපෘතියක් පැවරීමෙන් ( ඇමති කමක්) තමන් නියෝජනය කරන්නාවු පක්ෂයෙන් විනය කටයුත්තක් කර මංත්රී ධුරයෙන් නෙරපන්න බැරි නීතිමය ආවරණයක් ලැබෙනවා.මේ ආවරණය ඇමති කමක් ලබා ගැණිමේ සාදාචාර සම්පන්න ඇමක් බවට වර්තමානයේ පත්ව තිබෙනවා. මේ ආකාරයෙන් ලෝකයේ වියදම් අධිකවූ ලොකුම ඇමති මණ්ඩලය ශ්රී ලංකාවේ ඇතිවීමට හේතුවී තිබෙනවා.මෙය මහින්දට පමනක් පාලනය කල හැකි දෙයක් නොවෙයි.ධාර්මිෂ්ඨර් කාලයේ සිටම පැවත එන්නක්.

අපිට හිතන්න වෙනවා.....
සමානුපාතික නියෝජන ක්රමයන් බිහිවුන වල් බූත චන්ද ක්රමයෙන් තනි පක්ෂයකට බලයට එන්න මේ කපේදී බැහැ. බලය පවත්වා ගෙන යන්න නම් එක්කෝ පූට්ටු කරගෙන එන්න ඕනී . නැත්නම් ඇවිත් පූට්ටු වෙන්න ඕනී. කෑලී කෑලි පුට්ටු කරගන්න වරදාන දෙන්න සිද්ධ වෙනවා මංත්රී ගොල්ලන්ට. අධික වියදම් රටාවක් නිර්මාණය වන්න පටන් ගන්නේ එතනින්.එහෙම උනේ නැත්නම් චන්ද කොමසාරිස් වරයාට වෙන්නේ මාසයකට වරක් මැතිවරණයක් පවත්වන්න.


මහින්දට යුද්ධෙ කරන්න උනේ දේශීය හා විදේශිය බලවේග බාහිරෙන් එල්ලකරපු විවිධ කෙනෙහලි කම් වලට මුහුණ දෙමින්. ඒවා අපි දැක්කේ පාමංකඩ, කිලිනොච්චි, ගැලවීමේ හමුදාව වගේ දේශිය වචන වලින් සහ විදේශිය තහංචි වලින්.මහින්දට තිබුනේ කතානායකවරයා තම පක්ෂයෙන් පත්කරගන්න පාර්ලිමේන්තුවේ ආණ්ඩු පක්ෂයට බහුතර ඡන්ද නොතිබුණු ආණ්ඩුවක්. අධික පිරිවැයක් දරමින් මේ මංත්රීවරුන් සල්ලි වලින් නඩත්තු කරන තත්වයක් තුල අන්තිමට පාර්ලිමේන්තුව ආරක්ෂා කරන්නත් පාර්ලිමේන්තුව පවත්වාගෙන යන්නත් පුළුවන් වෙලා තියෙනවා.

මේ තත්වයන් මහින්දට විතරක් බැර කරන්න බැහැ. ජේ.ආර්ගේ පටන් අද දක්වා පාර්ලිමේන්තුවේ බලය රදවා ගෙන තියෙන්නේත් තුලනය වෙලා තියෙන්නෙත් මේ ක්ර්මයටයි.මේක වෙනස් කරන්න 2/3 බලයක් ජනමත විචාරණයක් එක්ක තවත් ඩිංගක් ඕනී. ඒක කවදාද අපි දෙන්නේ ?. කාටද දෙන්න පුළුවන් විස්වාසවන්තයා?. අපිට පිළිතුරක් සොයා ගන්න බැහැ.

දැන් පොදු අපේක්ෂකයා නිරාවරණය කරලා ඉන්නේ. ජෙනරාල් සරත් ෆොන්සේකා.එයා බලයට ඇවිල්ලා මේ වැඩේ කරන්න පුළුවන්ද?. බලය පාර්ලිමේන්තුවේ පවත්වා ගෙන යන්න එතුමාට වියදම් කරන්නේ නැතිව පුළුවන්ද?. උත්තරය බැහැ. එක ක්ර මයක් තියෙනවා. ආණ්ඩු ක්ර්ම ව්ය වස්ථාව බල රහිත කරලා හමුදා ආණ්ඩුවක් පිහිටුවලා එතුමාට අවශ්ය දිනක අවශ්ය විදියට නැවත ආණ්ඩු ක්රිම ව්යාවස්ථාවක් ඇති කරලා මේ ක්රමය වෙනස් කරන්න පුළුවන්. ඔය හමුදා පාලකයෝ ඉන්නා රටවල් පූර්වාදර්ශයට අරන්.දැන් තියෙන ධාර්මිෂ්ඨර් මොඩලය වෙනස් කරන්න චන්ද ක්රමයෙන් නම් බොරු.

අපි ඒකට ඉඩ කඩ සලසමුද ?.

Friday, November 27, 2009

නාමයෝජනා 17 වෙනිදා.

ජනාධිපතිවරණයට නාමයෝජනා දෙන්නත් අපිට චන්දය දෙන්නත් දින නියම වෙලා. දැන් දැන් අපට වේදිකාවෙන් රස කතා ඇහෙන්න පටන් ගන්න කාලේ ඇවිත්.මේ උත්තමයෝ කට අරින්නේ අපි මැරිලා අද උදේ උපන් ගානටනේ.

තෙවෙනි පන්තියේ කතාවලින් ඉල ඇදෙන ඒවා අතහැරපුවම , ඒ පැත්තට මේ පැත්තට මඩ පාරවල් විසිකරපුවම , ද්වේශය වෛරය වපුරපුවම චන්ද ගොඩ ලොකුවෙයි කියලයි මේ උත්තමයෝ හිතන්නේ. මේ කතා කාරයින් හරියට සීතාම්බර පට සළුව දාගෙන ගිය රජතුමා වගෙයි. අපි හිනා වෙන කොට අත්පුඩි තලනවිට බූරු පැටව් හිතන්නේ වැඩේ හරි කියලා. චන්ද ගොඩ ගනන් කලා දාට තමයි ඇගේ නූල් පොටක්වත් නැති බව තේරෙන්නේ.

මැතිවරනේ සයිස් එකට තමයි මඩ නිර්මානය වෙන්නේ. small, large , xl ,xxl වගේ. ප්‍රාදේශිය සභා, නගරසභා small සයිස් එකේ .පලාත් සභාවලට එන කොට large සයිස් එකේ පාර්ලිමේන්තුවට xl ජනාධිපතිවරණයට එන කොට xxl සයිස් එකේ මඩ එහාට මෙහාට විසිවෙන්නේ.

ආසන්නතම මැතිවරණයේ මහින්ද මහත්තයාගේ දෙණියායේ මාලිගාව මඩ ගොඩක් වුනා. වැඩේ වැරදි කිවුව උත්තමයෝ, මාළිගාව වටලපු උත්තමයෝ මැතිවරණයෙන් පස්සේ මාළිගාව අත්හැරලා දෑම්මා.දැන් ඒ වැඩේ වැරදි නැහැ වගෙයි. ඔන්න ඔහොම තමයි දෑන් xxl සයිස් එකේ මඩ ප්‍රහාරත්. බිලියන ගනනේ ගනුදෙණු ගැනත් අනිත් කෙළවරෙන් බෝධිසත්වයෝ ගැනත් කතා කරාවි.දෙකෙලවරෙන්ම වෑහෙන දුර්ගන්ධේය අපිට ඉවසා ගෙන ඉන්න වෙනවා ජනවාරි 26 වෙනිදා වෙනකම්ම.ඊට පස්සේ ඔක්කොම අමතක කරලා උත්තමයෝ එකගෙයි දා ගෙන අපිව මරා ගෙන කනවා.

මාතෘකාවට අදාල නැතිවුනත් යුද්ධෙ ගැනත් පුංචි සටහනක් මේ මඩ අස්සේ තබන්න මීදුමට ඕනෑ උනා.

ප්‍ර භාකරන් ඒ දවස්වල කියලා තිබුනා දකුනේ ජනාධිපතිවරු එනවා යනවා . ජේ.ආර්. ., ෙප්‍ර්මදාස,ඩී.බී ,චන්ද්රි කා, අග්‍රමාත්‍ය රනිල් ආවා ගියා. මහින්ද ආවා .ඒත් උතුරේ හිටියේ එක ප්‍රභාකරන් කෙනෙක් විතරයි කියලා.

යුධ හමුදාපතිවරුත් ඔය අස්සේ කීදෙනෙක් ඉන්න ඇද්ද.අපේ සරත් ෆොන්සේකා මහත්තයාත් හිටියා.ඒත් යුද්දේ තිබුනා. ඩෙන්සිල් කොබ්බෑකඩුව වගේ රණවිරුවෝ ප්‍රභාකරන්ට තිත තියන මොහොත දක්වා ගමන් කලා. නොයෙක් බලපෑම් හමුවේ සේනාධිනායකයා නොහොත් ජනාධිපතිට කොන්ද කෙලින් තියා ගන්න බැරි උන හින්දා ප්‍රභාකරන් අපිව පෝරකයට යවමින් උතුරේ නිල වශයෙන් සහ දකුනේ නොනිල පාලකයා වශයෙන් අපිව බිලි ගනිමින් වැජඹුනා.

අද ජනතාව නිරුපද්රිහතව ජීවත් වෙනවා. ඒ මහින්දට කෙලින් තියෙන කොන්දක් තිබුන හින්දා. සහ තියෙන හින්දා.නැත්නම් අපි තාමත් ප්‍රභාකරන්ගේ ප්‍රාන ඇප කාරයෝ. මිදුම මෙහෙම සටහන් කලාට උතුරේ ද්‍රවිඩ ජනතාවගේ ප්‍රශ්නවලට ගැටළුවලට තාම විසදුම් ලැබිලා නැහැ. ඒ වැඩේ ගැන දැන් දෙපැත්තෙම උදවිය කතා කරන්නේ අඩුවෙන්.එකතු වෙලා කරන්න ඕනී වැඩ කරන්න හදන්නේ තනියෙන්.මේක වෙනම කතා කරන්න ඕනී මාතෘකාවක්.

සල්ලි තිබුනට ගොඩනැගිල්ලක් හදන්න තනියෙන් බැහැ.අත්වැඩකාරයෝ, මේසන්ලා ,වඩුවෝ ,පින්තාරු කරන්නෝ වගේ ශිල්පකාරයෝ එකතු කරගෙන සාමුහික ප්‍රයත්නයෙකින් තමයි ගොඩනැගිල්ල නිම වෙන්නේ . මේසන් තම ශිල්පයේ දක්ෂව වුනාට වැඩක් නැහැ,වඩුවා අබ්ලික් පොරක් නම්. ඔක්කොම තිතට කලත් වැඩක් තියෙනවද පින්තාරුව නියමෙට කලේ නැත්නම්. මේ ඔක්කොම නියම විදියට තෝරාගෙන කන්ඩායම හසුරුවන නායකයාගේ (ඉංජිෙන්රුවා)දක්ෂවකම මත තමයි යහපත් ගොඩනැගිල්ල නිම වෙන්නේ.

වඩුවා දක්ෂයා කියලා ගොඩනැගිල්ල හදන්න බාර දුන්නොත් මොකද වෙන්නේ ?.

මීදුම අද මහින්දට කඩේ ගියා., කියලා කියයි. එහෙම නැතිව ඉදිරියේදී කරන වියමන් ගැනත් අවධාණය යොමු කරන්න.

Wednesday, November 25, 2009

මේ ගුරු පාරේ



මේ ගුරු පාරේ -මේ දොල අයිනේ
අපේ රහස් ඇත සැගවීලා - අපේ රහස් ඇත් ලියවීලා
පටු මාවත් වල දූවිලි අතරේ - අපගේ ඉපැරණි පිය සටහන් ඇත
පටු මාවත් වල දූවිලි අතරේ - අපගේ ඉපැරණි පිය සටහන් ඇත
පටු මාවත් වල දූවිලි අතරේ - අපගේ ඉපැරණි පිය සටහන් ඇත
දොල මත දිදුලන පෙන පිඩු අතරේ - අපේ කතාවේ කෙටි පටුනක් ඇත.
මේ ගුරු පාරේ - මේ දොල අයිනේ
අපේ රහස් ඇත සැගවීලා -අපේ රහස් ඇත ලියවීලා
ඉර හද ඇසුවා ඇල දොල දුටුවා - අතිනත්ගෙන අප දෙඩු කතා බහ
ඉර හද ඇසුවා ඇල දොල දුටුවා - අතිනත්ගෙන අප දෙඩු කතා බහ
එනමුදු එදවස් සගවනු හැකිවී - ඉරට හදට ඇල දොලට කතා බැහැ
මේ ගුරු පාරේ මේ දොල අයිනේ
අපේ රහස් ඇත සැගවීලා - අපේ රහස් ඇත් ලියවීලා

-ආචාර්ය අමරදේවයන්
දර්ශනය ෙප්රාෙදණිය උද්භීද උද්‍යානය.

Friday, November 20, 2009

ජනරාල් සාදරෙන් පිළිගනිමු.

පොදු අපේක්ෂ්කයා තවමත් නිර්නාමිකය. නොයෙක් කතා පොදු අපේක්ෂකයාට පුර්ව ප්‍රචාරක පට බවට පත්ව අැත.

පොදු අපේක්ෂ්කයා කවුරුන් වුවද ජනරාල් වරයෙකුට මීදුමද වැඩි කැමැත්තක් දක්වයි. ඒ ජනරාල් යනු හමුදා චින්තනයක් ඇති වරිතයක් බැවිනි. ජනරාල් තනතුරට හමුදාව තුල නිකම්ම පැමිනෙන්න බැරිය.ඒ ආ ගමන තුල දැඩි ස්වයං විනයකුත් අන් හමුදා සාමාජිකයන් තුල දැඩි විනයක් ඇති කිරීමේ සංකල්පයන් යුත් නම්‍යශීලි නොවන චින්තනයකුත් තමන්ට වෘත්තීය තුලින්ම ආරෝපනය වී තිබිය යුතුය. හමුදාවෙන් ඉවත්ව ගියද දශක තුන හතරක් මනසට ජීර්ණයවු හර පද්ධතින්ගෙන් මෙම මනුස්ස සතාට මිදෙන්න බැරි නිසා පාලකයෙක් නායකයෙක් වශයෙන් ජනරාල්වරයෙකු අපේ රටේ පාලකයා වශයෙන් හොදටම ගැලපෙන්නේය.

සංධාණ ගත පක්ෂත් ජවිපෙයත් වක්කඩය යට සිට එම වක්කඩය කඩා ගන්නට හැදීම ඔවුන්ගේ පැත්තෙන් මෝඩ කමක් වුනත් ජනතාවගේ පැත්තෙන් නම් මේ තීරණය සුබදායි තීරණයක් බව පල නොකරම බැරිය.

අපේ දේශපාලන ඉතිහාසයේ හමුවන හමුදා චින්තනයක් යුත් දේශපාලන චරිතය සර් ජෝන් කොතලාවල මහතාය.එතුමා ද මීදුම දකින්නේ අර්ධ හමුදාමය සහ අර්ධ දේශපාලන චරිතයක් ලෙසය.කෙලින් කියා කියු දේ කරන්න ගිය සර් ජෝන් ගැන රසකතා බොහොමයක් අප අසා ඇත. 1956 බණ්ඩාරනායක ජයග්‍රණයෙන් පසු වැල නොකැඩී ආ වර්ජන තර්ජන ගැන සර් ජෝන් කීවේ “ මම බැදලා තිබු බල්ලෝ ටික බණ්ඩා ලිහා ගත්තා ” යනුවෙනි. විනයක් නොමැති රාජ්ය ,සංස්ථා ,මණ්ඩල සහ රාජ්‍ය උසස් අධ්‍යා පන ක්ෂෙත්‍රයේ මහත්වරුන් සහ නෝනා මහත්වරුන් බැද දැමීමට අද විනයක් අවශ්‍යමය. එය කුඩු කෑ දේශපාලනඥයින්ට කවදාමත් කරන්න බැරි කටයුත්තක් බව පසු ගිය දශක කිහිපයම අපට පෙන්වා දී ඇත.

අද වර්ජන ගර්ජන පවා ඇති වන්නේත් ශිෂ්‍ය සටන් ව්‍යාපාර ඇතිවන්නේත් පූර්ව මැතිවරණ ව්‍යාපාර බලා ගෙන මිසක ජනතාහිතවාදීව නොවන බව ඉතාමත් පැහැදිලිය.ජනතාවගේ හුස්ම හිරකර දෙනවද නැද්ද අසන මේ අවලං ව්‍යාපාරත් , දුප්පත් මව්වරුන්ගේ සහ පියවරුන්ගේ දූ දරුවන් ගේ අධ්‍යාපනය කඩාකප්පල් කරන යක්ෂයිනුත් මෙල්ල කිරීමට නම් තුවක්කුව පිටිපස සිටිය මනුෂ්‍යයෙකුට මිස ජනතාව සමග සිටින මනුෂ්‍යයෙකුට අපහසුය.

අපේ රට නායකයාගෙන් නායකයාට අත්හදා බැලීමේ ව්‍යාපෘති පටන් ගන්නා රටක් මිස ජාතික ප්‍රතිපත්තියක් මත පවත්වා ගෙන යන රටක් නොවේ යයි මීදුම උපකල්පනය කරයි. 1948 සිට ජාතික ප්‍රතිපත්තියක් මත පාලනය හිමිවු ඇත්තන් ප්‍රතිපත්ති යාවත්කාලීන කරමින් රට පවත්වා ගෙන ගියා නම්. අවුරුදු 62 ක් වයස ශ්‍රී ලංකාව අද සිටිය යුත්තේ හිගමනේ නොවන්නේය.අපි තවමත් හිගමන් යදින ජාතියක් ව IMF ,GSP දෙස බලා සිටිමු. යුද්ධයට වෙන්කරන ලද මුදල්ද යුද්ධය වවා ගෙන කමින් ඒ සදහා වියදම් කල මුදල්ද ජාත්‍යන්තරයෙන් ගත් ණය මුදල් ලෙස සැලකිය හැකිය.
බටහිරයන් අපට ණය දෙන්නේ ආදරයට නොව අප බල හීනයන් ලෙස පවත්වා ගෙන යාමේ අරමුණින් බව තුන් වේලබඩ පුරවා ගෙන රූපවාහිණී තිරය දෙස විවේක සුවයෙන් සිටින අපට තේරෙන්නේ නැත. ගමේ සිටින කපටි මුදලාලියා ගම්වැසියන් ගේ දේපල දෙස බලා ගෙන ඇප උපකාර කරමින් පලමුව ණයකාරයෙක් කර පසුව ඉඩකඩම් අත්පත් කරගන්නා ස්වරූපය බටහිරයන් තුල ඇති බව අපට නොපෙනේනේ අපි අන්ධව විවෘත ආර්ථිකය බදා ගෙන සැප සම්පත් බදා ගෙන සිටින නිසා විය හැක.

මේ සියල්ල වෙනස් කරමින් රට සංවර්ධණය කිරීමට දෑඩි පාලනයක් රටට අවශ්‍ය වන්නේය. වල්බුරු නිදහස පාලනය වී විනයාත්මක නිදහස භාවිතයට ගැණිම මුලින්ම අසීරු කටයුත්තක් බව පිලිගත යුතුය.සමාජය තුලින් ගොඩ නැගුණ පාලකයෙකුට වඩා හමුදාව තුලින් ගොඩනැගුණ නායකත්වයකට ඒ සත් කාර්ය කිරීමට හැකිවෙන බව සක්සුදක් මෙන් පැහැදිලිය.

අනාගතයේ වර්ජන තර්ජන ශිෂ්‍ය සටන් නැති පාලනයක් බිහිවනු දකින්නට ජනතාව සිහින දකිමින් සිටින අතර , ඕනෑ වුන විට පුටුවටත් - එපාවුන විට අටුවටත් දමන්න බැරි පාලනයක් තුල වියකි සිදී බිදි යන “බණ්ඩා විසින් ලිහාදමන ලද - ජෝන් විසින් බැද දමන ලද ” පැලැන්තිය ගැන දැන් සිටම අනුකම්පා කිරීමට ජනතාව පුහුණු වෙමින් සිටන බව සටහන් කරමු.

“ජනරාල් වරයෙකු පොදු අපේක්ෂකයා වේවායි” මීදුම ප්‍රාර්ථණය කරයි.

Wednesday, November 18, 2009

සංඝාඥා



සංඝාංඥා වක් නිකුත් කිරිමේ අනතුරු හැගවීමක් ජනරාල් වරයාට පසු ගියදා නිකුත් කර තිබිණි . මීදුම අවදානය යොමු කරන්නේ මේ අනතුරු හැගවීමට නොව ආඥාව මොකක්ද යන්නට සහ එයින් “කරන්න පුළුවන් කෙං ගෙඩිය” මොකක්ද යන්නටය.
‘අප දන්නා සංඝාංඥා පැනවිය හැක්කේ , ධර්මයට සහ සමාජයට අහිතකර ක්‍රියාවක යෙදෙන හෝ අත්‍යවශ්‍ය අ හිතකර ක්‍රියාවක නොයෙදෙන හෝ පුද්ගලයන්ට එරෙහිවය.එවැනි පුද්ගලයින්ගේ ධර්මාණුකුල කටයුතු වලට සහභාගී නොවිමේ සිට පොදු ආගමික සමාජ කටයුතු වලදි ඔවුන් ප්‍රතික්‍ෂෙ කිරිම දක්වා සංගාංඥාවල බලය විහිදිය හැකිය.
එහෙත් ඒ ඕනෑම ආඥාවක් පැනවීම යථාර්ථයක් වන්නට නම් , ඒ ආඥා හෙවත් නිති පිලිගැණිමට කැමති පුද්ගලයින් සිටිය යුතුය.අතීතයේදී රජවරුන්ට හෝ අන් අයට එරෙහිව සංඝාංඥා පනවන්නට හැකියාව තිබුනේ නම් ඒ, එසේ බලපැමක් කිරිමට තරම් ගෞරවාන්විත හා බලවත් පැවදි දිවියකට භික්ෂුන් උරුම කම් කි නිසාය. ”
-15 රාවය - කේ.ඩබ්.ජනරංජන
වර්තමාන සමාජයට එවැනි සංඝාංඥා අපේ හාමුදුරුවරුන්ට කල නොහැකිය. අපි හාමුදුරුවරුන්ගෙන් බලාපොරොත්තුවන පුර්වාදර්ශ අද එතුමන්ලා තුල නොමැත. ඉතාමත් සංවර දිවිපෙවෙතක අල්පේච්ඡ ජීවිත ගත කරන ,සමාජයට ගුරුහරුකම් දෙමින් ආගමික සංවර්ධණයේ යෙදෙමින් පන්සල් තුල වැඩ වාසය කරන හාමුදුරුවරු අද නැත.
එතුමන්ලා බොහෝ කාර්ය බහුලය. ගිහියෙකුගේ දානයයකට බැතිසිතින් වඩම්මවා ගන්නද පන්සලට දානය ගෙන ගොස් පුජා කරන විට බාරගන්න තරම්වත් එතුමන්ලාට විවේකයක් නැත. එක්කෝ රැකියාවකය. නැත්නම් රැකියාවක් ඉලක්ක කරගත් අධ්‍යාපනයකය. තව තවත් අය දේශපාලන වේදිකාවේ පලාත් සභාවේ සහ පාර්ලිමේන්තුවේ වැඩ වාසය කරමින් ශිලයේ පිහිටා කටයුතු කරන්නේය. පන්සල පාළුවට ගොස් පන්සල් පරිසරය විනාශයට ගොස් ඒ තුල නන් වැදෑරුම් ව්‍යාපාර ඇරඹි සාදු මචංලා ,අයියලා සහ නංගිලා වැද සමුගන්නවා වෙනුවට පිටට තට්ටු කර “යන්නම් සාදු ” කියන තැනට පන්සල් පැවතුම් වෙනස් වන විට ආඥා බලපවත්වන්නට බැරි බව සිහිපත් වන්නේය.
අපේ හාමුදුරුවරුන් හට ගිහි සමාජයට බලපැමක් වන අන්දමින් ජීවත් වීමේ පරිසරය අහිමි කර ගන්නා කාලය 1956 සිට ඇරඹුනා විය හැක. සග-වෙද-ගුරු-ගොවි -කම්කරු බලවේගය දේසපාලනයට පිවිසි එම වකවානුවෙන් පසු ගුරු වාත්තිකයා හට ජන හදවත් තුල තිබු ගෞරවය නැති කරගෙන නිකම්ම වැටුප් ලබන වෟත්තිකයෙක් පමනක් බවට පත්විය. වෙද පරපුර සම්පුර්ණයෙන්ම විනාශයට පත්ව දොස්තර බිහිවිය. අද ගෞරාන්විත දේශීය වෙද කම නැති වී ඇති නිසා වෙද මහතා දකින්නට නැත.සග පරපුරද මා මුලින් සදහන් කල වෘත්තිකයන් ගොන්නට ක්‍රමයෙන් පත්වෙමින් සිටින බව ගමේ පන්සලට ගිය විට පැහැදිලිව දකින්නට ඇත.
සමාජය විසින් රක්ෂා කරන ලද අපේ හාමුදුරුරවරු දුන් දේ බාරගෙන පුණ්‍යානුමෝදනාවෙන් සමාජයේ සිත් පහන් කරවා -පන්සල සිත් පහන් කල “පහන් -සලක් “ බවට පත් කරමින් වැඩ වාසය කල සමයේ සංඝාඥාවක් වී නම් එය බලවත් වනු ඇත.

වර්තමානයේ නම් එය විහිළුවක් සහ හිතළුවක් බව සදහන් කල යුතු වන්නේමය.

Tuesday, November 17, 2009

ප්‍රේම වසන්තය නෙමේ


පාට පාට මල් වැටිච්ච
පාර දිගට අතිනත් ගෙන
ඈත ඈත යන්න තියෙන
ආසාව නොහිමි
මාරු කාසි නැතිවුනාම
හිතට දුකක් ඇති වුනාම
ප්‍රේම වසන්තය නෙමේ
- පිනිවැස්ස 2003
- අදහස ප්‍රසාද් වීරසේකර

Thursday, November 12, 2009

අපිට කරන තර්ජන .

කාටූනය එස්.සී.ඹ්පාතයන්ගෙනි.

රනිල් වික්‍රමසිංහ මහතා ජවිපෙ වෘත්තීය සමිති ව්‍යාපාරත් සමග පඩි වැඩිකරනු !. යන්නෙන් සටන් පාඨය අතට ගෙන වරාය ,තෙල්, විදුලිය සහ ජලය සේවකයින් සමග වෘත්තීය සමිති වයාපාරයක.
මීදුමට යන්තමට මතකයක් තියෙනවා යුද්ධය නිසා වෘත්තීය සමිති එකමුතුව අවුරුදු තුනකට පස්සේ 2009 දී ලබන්න තිබුන පඩි වැඩිවිම 2010 දී ලබන්න එකගවු බව. ආණ්ඩුව 18% -22% අතර පඩි වැඩිවීමක් නොවැම්බර් සිට ගෙවන බවත් එය 2010 ජනවාරි මස සිට ලැබෙන්න සලස්වන බවත් පවසනවා.
ජනාධිපති තුමා “අපි කියන්නේ කරන දේවල් - කිවුවොත් කරනවා “ කියලා කියන කොට රනිල් වික්‍රමසිංහ මහතා “ ආණ්ඩුව කියන්නේ බොරු - ජාත්‍යන්තර මූල්‍ය අරමුදල සමග ගිවිසුමකට බැදිලා ඉන්නවා රජයේ සේවකයින්ගේ පඩි වැඩි නොකරන බවට ” කියලා අනිත් පැත්තට හැරිලා කියනවා.

ජවිපෙය වර්තමානයේ සිදුකරන්නේත් සහ අතීතයේදි සමසමාජ කොමිනියුස්ට් පක්ෂය සිදුකලේත් එකම රගපෑම.බණ්ඩාරණායක අගමැති තුමා තරම් වර්ජන වලින් පීඩාවට පත්කල ‍රාජ්යාපාලකයෙක් නැති තරම්. බණ්ඩාරණායක මහතාට කීවේ “ සෙවල බංඩාට පිට කොන්දක් නෑ” කියලා. ජේ.ආර්.ජයවර්ධණ මහතා සමග සෙල්ලම පටන් ගත්තේ ඒ කාලෙට අනූරූපව රුපියල් දහයක වැටුප් වැඩිවීමක් ඉල්ලලා.ලත් තැනම වැඩේ ලොප් කරපු උන්නැහේ මී කතුරට තියන ඇම වගේ ඇමට තිබ්බ අසරන රාජ්‍ය සේවකයෝ සහ පවුල් කී දාහක් ජීවිත කාලයම බඩගින්නේ තියන්නත් සියදිවි නසා ගන්වන්න තරම් සහාසික වුනා අපිට මතකයි.

අපේ රටේ ජනගහනයෙන් රාජ්‍ය සේවකයින්ගේ සහ යැපෙන්නන්ගේ ප්‍රතිසතය 5% කටත් අඩුවෙන්න ඇති. ( රාජ්‍ය පාලකයන්ගේ ප්‍රතිසතය නම් කොයිතරම්ද කියලා හිතා ගන්න බැහැ.) 95%ක්ම යැපෙන්නේ පෞද්ගලික ආයාතන ස්වයං රැකියා සහ හෙට වැඩක් ලැබෙයිද කියන අවිනිස්චිත රැකියා වලින්.මුළු ජනගහනයම උපයන සෑම සතයෙන්ම රජය නොයෙක් ආකාරයෙන් අයකරන බදු වලින් තමයි රට සමබර වෙන්නේත් මේ ඇත්තන්ට පඩි ගෙවන්නෙත්.

රාජ්‍යසේවකයින් ඉන්නේ පුරවැසියාට සේවය කරන්න වුනත් අපි වගේ හුදී ජනයාට සේවය කිරීමේ මානසිකත්ව යක් එතුමාලට නැහැ.රාජ්‍ය සේවය තුල කාර්යක්ෂමතාවය බිංදුව බවයිමීදුම අදහස් කරන්නේ.
කවදාවත් ජනතාවට හිතකාමි කියාගන්නා වාමාංසික ව්‍යාපාර ජනතාවට ලෙන්ගතුව රාජ්‍ය සේවයේ කාර්යක්ෂාමතාවය වැඩි කරන්න කියලා උද්ඝෝෂනයක් කල බවක් ජීවිත කාලයටම අහල නැහැ. මේ ඇත්තෝ කරන්නේ පිදුරු ගොඩේ ඉන්න බල්ලගේ රාජකාරිය විතරයි.
මහින්ද නායකත්ව ය පහුගිය අවුරුදු හතරේ හැසුරුන ආකාරය උතුරේ - දකුණේ සංහිදියාව සහ රාජ්‍ය අංසය වර්ධණය කිරීම වගේම රාජ්‍ය සේවකයින්ගේ දුක් ගැණවිලි වලට ඇහුම් දිම වගේ දේවල් වලදි පසුගිය පාලනවලට වඩා හිතකාමී බවක් දැක්වුවා කියලයි මීදුම හිතන්නේ. ( සුද්දේ අතින්........... යම් මත වාද තියෙන්න පුළුවන්.) ජනාධිපති තුමා “අපි කියන්නේ කරන දේවල් - කිවුවොත් කරනවා “ කියලා කියන කොට අපිට විස්වාස කරන්න වෙනවා “මේ මනුස්සයා කියනවා වගේ ජනවාරි වල සිට එරියස් එකත් එක්ක වැඩි පඩි දෙයි කියලා ”. ඉතින් එහෙම තියෙද්දිත් මොකටද ජනතා හිතකාමී රනිල් වික්‍රමසිංහ මහතා සහ ජවිපෙ මේ වර්ජනයක් පවත්වා ගෙන යන්නේ. ජනතාව පීඩාවට පත් කරමින්.

පාලන බලය ලබා ගැණිමට මේ වගේ සිල්ප ක්‍රම යෙදවීම වර්තමානය වන විට යල් පැණගිය උපක්‍රම කියලයි මීදුම හිතන්නේ.ජනපීඩකයෙක් ලෙස ජනතාව හදුනාගත් විට පිරිබාහරන්ට විමුක්තිකාමියෙක් ලෙස මීට දසක දෙකකට ඉහතදී තිබු පිලිගැණිම තිබුනේ නැහැ.බලය මිසක වෙනත් කිසිවක් අරමුණු කර ගත් චින්තනයක් රනිල්ට හෝ ජවිපෙයට නැහැ කියලා ජන විඤානය තේරුම් අරගත්දාට ජනතාව තුල ඹවුන් පිරිහිමට පත්වෙනවා හැරෙන්න වෙනත් දෙයක් වෙන්නේ නැහැ. සමසමාජ කොමිනියුස්ට් පක්ෂ අද යුනියන් පෙදෙසෙත්,බොරැල්ල කොටා රෝඩ් එකෙත් බෝර්ඩ් ලෑලි විතරයි.ජනතා හදවත් තුලින් මැකිලා ගිහින්. එහෙත් එම පක්ෂ1956 -1977 යුග වල මේ රටේ ප්‍රබල දේසපාලන පක්ෂ. වෙලා තිබුනා.

ජවිපෙයට ඒ වින්නැහිය වෙනවා දකින්න අපි කැමති නැහැ.චන්දදායකයින්ට එජාපයත් ග්‍රීලනිපයත් එපාවුනාම යන්න තැනක් හැටියට ජවිපෙය තුන්වන බලවේගයක් ලෙස පිබිදෙමින් තිබුනා. “මහින්ද ගෙදර යවා මිස නොනවතිමි ”යි පාරම්බාන්නේ නැතිව මහින්දත් සමග සංහිදියාවෙන් කටයුතු කලා නම් ඒ බලවේගය ග්‍රීලනිපයත් දියකරමින් වර්ධණය වෙන්න ඉඩ තිබුනා. රටට පේන්න හරි අද මහින්ද ජවිපෙ කොඩියේ බාගයක් අරගෙන යනවා. ජවිපෙය මහින්දට බැන බැන වෛරය වපුරනවා. ජවිපෙයත් රනිල් වික්‍රමසිංහ මහතාත් තේරුම් අරගෙන ජනතාව කටයුතු කරනවා.

අනාගතය උදෙසා පැහැදිලි දැක්මක් මිසක වෛරය ද්වේසය වැපිරීමෙන් අද දේසපාලන වේදිකාව සැරසුවට පලක් නැහැ.ඒ සැරසිලිවල තියෙන අවලක්ෂණ ජනතාව වහාම තේරුම් ගන්නවා. බලය නෙමෙයි තිබෙන ඉඩකඩ තුල සේවය කරලා පෙන්නුවොත් බලය නිකම්ම අතට ඒවී කියලා මිදුම හිතනවා.

Sunday, November 08, 2009

අංතට්ටුව




මේ දවස්වල මාධ්‍ය ඇස් පුරවන්නෙත් කන පුරවන්නෙත් අං තට්ටුව කාටද දෙන්නේ කියලා.
මහින්ද මහත්තයාට ව්‍යස්ථාවෙන් හිමි අවුරුදු හයක් තියෙනවා ජනාධිපති ධුරයේ වගකීම් ඉටුකරන්න. ගතවුනේ අවුරුදු හතරක් විතරයි නොවැම්බර් 18 වෙනිදා වෙන කොට.ජනාධිපතිවරණ ප්‍රතිඵල එතුමාගේ උපන් දිනේට ජනතාව දුන්න තෑග්ග කියලයි ඒ දවස්වල කිව්වේ. තෑග්ග තව අවුරුදු දෙකක් තියාගෙන ඉදලා එලියට ගන්න එක තමයි හොද කියලයි මීදුම හිතන්නේ.

අවුරුදු හතරකට පස්සේ යලිත් ජනාධිපතිවරණයකට මුහුණ දෙන පූර්වාදර්සයක් අතීත ජනාධිපතිවු පුද්ගලයින් විසින් ඇතිකරලා තියෙනවා. තමන්ට කැමති නම් ජනාධිපතිවරණයෙන් ජයග්‍රහණය කලොත් දිවුරුම් දීම නියමිත නිලකාලය අවසන් වුනාම කරන්න පුළුවන්. පරාජයවුනොත් ප්‍රතිපලත් සමග තනතුර අත්හැර යන්න වෙනවා.

අප්රේල් මාසය වන විට නිලකාලය අවසන් වන පාර්ලිමේන්තුවකුයි අපට තියෙන්නේ . නෛතික වසයෙන් පාර්ලිමේන්තු මැතිවරණයක මුව දොර තමයි අපි ඉන්නේ. දැනට මාස කිහිපයකට ඉස්සර ජනාධිපතිවරණක් පිළිබද කතා බහ වේදිකාවට ආවා.මිදුම හිතන්නේ යුධ ජයග්‍රහණත් සමග මහින්ද මහත්තයා පපඩම් ජනප්‍රි යතාවයකින් පිම්බුන හින්දා වට පිටාවේ ඉන්න කේවට්ටයෝ තමන්ගේ නොහැකියාව වහ ගන්න මේ සින්දුව ගායනා කරන්න පටන් ගන්න ඇති මුලදී.

රනිල් මහත්තයා කලබල වුන බවක් ඒ දිනවල මාධ්‍ය වාර්තා සිහිපත් කරවනවා.මලික් සමරවික්‍රම නොනිල මට්ටමෙන් ජනාධිපතිවරණ ඉක්මනින් පවත්වන්න එපා කියලා මහින්ද මහත්තයාගෙන් ඉල්ලීමක් කලා කියලත් වාර්තා වුනා.කොහොමත් රනිල් මහත්තයා නම් මේ දඩිබිඩි වැඩේට කැමති වන්නේ නෑ එතුමා ඉන්න සෲණ- 30% මායිමෙන් එතුමාට කොහොමවත් ගොඩ එන්න බැහැ.පොදු අපේක්ෂතකයෙකු බිල්ලට දීමේ කතා වස්තුවක් නිර්මාණය වන්නේ මේ අතරතුරේදී. දැන් ඒකත් යථාර්තයක ස්වරූපයට පත්වෙමින් තියෙනවා.

මේ ව්‍යවස්ථාවේ අඩුපාඩු තියෙනවා.ඒක හින්දා අධික පිරිවැයක් දරමින් ආණ්ඩුවක් පවත්වා ගෙන යාම සදහා නොයෙක් මාදිලියේ වරදාන දෙමින් පාර්ලිමේන්තුව නඩත්තු කිරීමට රාජ්‍ය නායකයින්ට සිදුවෙලා තියෙනවා.මහින්ද මහත්තයා යුද්දෙ පවත්වා ගෙන ගියේ පාර්ලිමේන්තු දේස හිතෛසීන්ට බඩ පිරෙන්න අල්ලස් දීලා. අයවැයක් වෙලාවේ රිමෝට් කොන්ට්‍රෝලරයේ හයිය පෙන්නපු ඇත්තෝ යටවෙලා හිටපු බලවේග ගැන අපිට නැවත සිහිපත් කරන්න පුළුවන්නම් ඒ ගොල්ලෝ ඉන්නේ කොහෙද කියලා අපිට හිතා ගන්නත් පුළුවන්.එදා අයවැය පරාජය වෙලා පාර්ලිමේන්තුව බිද වැටුනා නම් අපිට මේ නිදහස තියෙන එකක් නැහැ.

යුද්ධය මහින්ද මහත්තයාගේ ව්‍යාපෘතියක් වුනාට බටහිර බලවේග හසුරුවන ලද කන්ඩායම් අනුගමනය කලේ කොටි හිතවාදී ව්‍යාපෘතියක්. චන්ද්රිකා සමයේත්,රනිල්ගේ අගමැති ආණ්ඩු සමයේත් කොටි යනු පරාජය කල නොහැකි බලවේගයක් ලෙසටයි අපිට හදුන්වා දිලා තිබුනේ.ඩී.බී. විජේතුංග සමයේ එතුමාගේ ස්ථාවරය නම් මහින්ද ස්ථාවරයට සමපාත වෙලා තිබුනා.මීදුම හිතන්නේ කොටි අවුල නියම විදියට කළමනාකරණය කලේ මහින්ද මහත්තයා කියලා. බටහිර බලවේග වලට ඇහුන් කන් නොදෙමින් අසල් වැසි ඉන්දියාවෙන් උපරීම සහයෝගය ලබාගනිමින් ගිය ගමන බොහෝ ජත්‍යාන්තර සම්බන්ධ තා තිබුන අපේ රටේ නායක කාරක ආදීන්ට වඩා ඉහල මට්ටමක් "ගොඩේ මහින්දට" තිබුනා.
බලය බෙදා හැරීමේ සුදු අලියා පලාත් සබාව. මේ ක්‍රමය නැගණහිර පලාතේ ජනතාවට අත්හදා බැලීමේ අවස්ථාව උදාවුනා. උතුරටත් මේ තත්වය ඇතිවුනාම යම් තරමකින් ද්‍රවිඩ ජනතාවගේ සිත් සතන් තුලනය වෙයි කියලා මීදුමට හිතෙනවා. මේවායේ පාලනයට එන ජනතා නියෝජිතයෝ නේ සියල්ලම අවුල් වියවුල් කරමින් රට විනාසයට පත් කරන්නේ.එයාලට සුපිරි රැකියාවක් ලැබුනම තෘප්තිමත්ව සියල්ල සන්සුන් වෙනවා.ද්‍රවිඩ ජනතාවට ගැටළු තියෙනවා කියන සද්දේ නැති වෙනවා.

මහින්ද පුටුවට තල්ලු කලේ කව්ද කියන එකට නම් අයිතිකාරයෝ බොහොමයි. අයිතිවාසිකම් කියන එක්කෙනෙකුටවත් ඒ වැඩේ කරන්න බැහැ. ඒක කලේ අපි වගේ අය. අපි තමයි නියම උරුමක්කාරයෝ.අපි වේදිකාවවල ගයන බයිලා මායිම් කරන අය නෙමෙයි. 1956 දී දන ගෑවට නිදහස් අධ්යායපනයේ පිහිටෙන් දැන් අපි හොදට ඇවිදින්න පුළුවන් අය. කිරලා මැනලා වැඩ කාරයා- කවුද බොරු කාරයා -කවුද හොරා- කවුද මිණිමරුවා කවුද කියලා තක්සේරු කරලා 'වැඩ කාරයාට' කතිරේ ගහන්න අපිට කාගෙවත් උපදෙස් වැඩක් නැහැ.ඒ තරමට ජනතාව වන අපේ බුද්ධි මට්ටම දියුණුයි.

මහින්ද මහත්තයාත් සාක්කුවෙන් වියදම් කරනවා වගේ චන්ද වලට අපේ සල්ලි දියකරන්නේ නැතිව , අපිට නිවී හැනහිල්ලේ කාලා බීලා ඉන්න පරිසරයක් හදලා අවුරුදු දෙකක් ඉදලා තව වැඩ ටිකක් පෙන්නලා ජනාධිපතිවරණයකට ගියොත් තමයි හරි..
පාර්ලිමේන්තුවේ ඉන්න බඩගෝස්තරවාදීන්ට අපි ගාවට එන්න ඉඩ සලස්සලා., නිසි කලට පාර්ලිමේන්තුව විසුරුවා හැරියොත් අපිටපුළුවන් තෝරලා බේරලා එවන්න. තවත් ඒ වගේ කට්ටියක්.ඇයි අපට නාමයෝජනා තෝරන්න පක්ෂවල ඉඩක් නැහැනේ.ප්‍රජාතන්ත්‍රවාදය කියලා අර්ථ නිරුපනය කරන්නේ ඒ ගොල්ලන්ට කැමති අය අපි තෝරන එකටනේ.

Saturday, November 07, 2009

බෙලිහුල්ඹය - හාගල කන්ද







හාගල කන්ද ලෙසින් හැදින්වෙන මෙම කන්ද බෙලිහුල්ඹය නගරයට දිස්වෙන අයුරුයි මේ.
බෙලිහුල්ඹය ඒ 4 කොළඹ බදුල්ල මහා මාර්ගයේ 159 කි.මී පිහිටි සංචාරකයින් ප්‍රියකරන නවාතැනක් ලෙස ප්‍රසිද්ධය.
හාගල කන්ද ජුලි සැප්තැම්බර් මාසවල වියලි කාලගුණයක්ඇති කාලයේ දිස්වන අයුරු සහ ඉන්පසු එලබෙන වැසි සහිත කාලගුණයක් ඇති මාස වල දකින්නට ඇති අයුරුයි.

Friday, November 06, 2009

සැදැ අදුර තුල හිරු මියයනවා




සැදැ අදුර තුල හිරු මියයනවා
සොයමින් එනවා - ඔබ සොයමින් එනවා
සොයමින් එනවා - ඔබ සොයමින් එනවා

හඩා වැටෙන තරු -කදුලැලි වැස්සේ
මට හමුවෙනවා - ඔබ මට හමුවෙනවා
මට හමුවෙනවා - ඔබ මට හමුවෙනවා
සොයමින් එනවා - ඔබ සොයමින් එනවා
අඩ සදබැස යන -අළුයම් යාමේ
ලොව වැලපෙනවා - මුළු ලොව වැලපෙනවා
ලොව වැලපෙනවා - මුළු ලොව වැලපෙනවා

විලිලන අදුරින -හිරු බිහි වෙනවා
වෙන්වී යනවා - මම වෙන්වී යනවා
ලොව වැලපෙනවා - මුළු ලොව වැලපෙනවා
වෙන්වී යනවා - මම වෙන්වී යනවා

ආචාර්ය අමරදේවයන්

Tuesday, November 03, 2009

ගුණදාස කපුගේ වෙනුවෙන්

“සබද අපි කදු නොවෙමු
උනුන් පරයා නැගෙන
සුනිල දිය දහර වෙමු
එකම ගගකට වැටෙන
වියරු ගිනිදැල් නොවෙමු
වනය අවුලා තබන
සිහිල දෙන වැස්ස වෙමු
දැවෙන කැලයට වසින
නපුරු සිහිනය නොවෙමු
ලමුන් නිදි සුව බිදින
සොදුරු අඩහැරය වෙමු
දනන් නින්දෙන් මුදන.”
කම්පන - ගුණදාස කපුගේ.
“කපුගේ නිදහස් සමාජවාදියෙකු හා වාමාංශික මතධාරී කලාකරුවෙකු විය.කලාව ජනතාව සදහාම විය යුතුය යන්න ඹහු උපරීම ලෙස ඇදහු අයෙකි.
මේ නිසාම ඔහු තැලෙන පෑගෙන ජනතාවගේ හඩ හා වේදනාව තම නිර්මාන වලට හසු කර ගත්තාය.ඒ අතින් මෑත යුගයේ ඉදිරියෙන්ම සිටින ගායකයා කපුගේ යැයි සදහන් කිරීම අභියෝගයක් නොවේ.නිසගයෙන්ම ඔහු තුල පැවති වාමාංශික දේශපාලන ස්ථාවරය නිසා විවිධ අවධිවල සටන් පාඨ වලට ගැලපෙන පරිදි ඔහු වමේ දේශපාලන වේදිකාව තෝරා ගත්තේය.
ඔහු මොන වේදිකාවේ සිටියත් ජනවාර්ගික සමගිය හා සාමය වෙනුවෙන් සෘජු ලෙසින් පෙනී සිටි කලාකරුවෙක් විය.ඔහු යුද්ධයට විරුද්ධ පැත්තේ සිටි අයෙක් විය. උතුරේ අර්බූදය දේශපාලන විසදුමක් හරහා විසදිය යුතු ස්ථාවරයක පසුවිය”.
-දෙසතිය 2003 අප්රේල්30

Thursday, October 22, 2009

හඩ්සන් සමරසිංහ සමග විග්‍රහයක් .

උදෑසන විද්‍යුත් නාලිකාවල පුවත් පත් සමග ගෙවන කාලය අසන්නන්ට සහ බලන්නන්ට ප්‍රයෝජනවත් යමක් ඉතිරි කර දෙයි. ස්වර්ණවාහිණිය ඇරඹු මෙම මාවත දිගේ සියළුම විදයුත් නාලිකා අනුකරනය කරමින් තරගයක යෙදී ගමනේ යෙදී සිටී. ස්වර්ණවාහිණියත් , දෙරණත් මෙම වැඩ සටහන ඉතාමත් වැදගත් ලෙස ඉදිරිපත් කරන අන්දම ප්‍රශංසණියයි.

ජාතික රූපවාහිණියත් , ශ්‍රී ලංකා ගුවන් විදුලි සංස්ථාවත් මේ කාරියේදී හැසිරෙන අන්දම ............... අපිට අසන්න සිදුව ඇත්තේ හඩ්සන් සමරසිංහ මහතාගෙන්ම පමනි.

ස්වාධීණ රුපවාහිණියේ මහින්ද අබේසුන්දරගේ විපරම අමුම අමු ආණ්ඩුවේ හඩකි.ඒත් එය අසන්න හැකි ලෙස පිටපත ලියවෙයි. තේමාවෙන් කියවෙනවාසේ අන්තර්ගතය යමක් හිතන්න ඉතිරි කරයි.

හඩ්සන් සමරසිංහ මහතා කලක් ඇසුරු කල පෙම්වතිය බුට් එක දුන් ප්‍රේමවන්තයක බදුවේ. වියෝදුක ඉවසා ගත නොහැකිව කම්පනයෙන් ආතතියට පත්වු පෙම්වතා හමුවන හමුවන හැම දෙනාටම තම දුක්ගැනවිල්ල ප්‍රකාශයට පත් කරන්නේ පෙම්වතියගේ අහයපත් ගති ලක්ෂාණ පමණක් මතු කරමින් ද්වේෂ සහගතව අවලාද කීමේ ස්වරූපයෙනි. හඩ්සන් සමරසිංහ මහතාගේ පුවත් පත විග්‍රහයද ඉදිරිපත් කරන්නේ එවැනිවු ද්වේෂ සහගත ලීලාවෙනි.

රනිල් මෙන්ම මහින්ද ද කාලීනව විග්‍රහ කරයුතු චරිත බවට පත්ව තිබේ. නමුත් විවේචන විග්‍රහ සිදුවිය යුත්තේ වැදගත් ස්වරූපයෙනි. නානාප්‍රකාර නම් පට බදිමින් මඩ ස්වරූපයෙන් රනිල්ට පමනක් දමා ගසනාවා නම් අසා සිටින බලා සිටින අපට පිළිකුලක් ඇති වන්නේ මඩ පහර එල්ල කරන තැනැත්තාට මිස මඩ පහර කන පුද්ගලයා කෙරෙහි නොවේ.හඩ්සන් සමරසිංහ මහතා ශ්‍රී ලංකා ගුවන් විදුලි සංස්ථාවේ සභාපති ධුරයද දරයි. අගමැති, ඇමති ,මන්ත්‍රී,අමාත්‍යාංශ ලේකම් ආදී නම් කියවි එන විට රාජ්‍ය අංශයේ ආයාතනයක සභාපති තනතුරත් ඒ කිට්ටුවෙන් කියවේ. එහෙම තනතුරක් දරන උත්තමයෙකු කොයිතරම් විනීත හා සංවර විය යුතුදැයි සිතුවත් අපේ රටේ එසේ විය යුතු නැතැයි හඩ්සන් සමරසිංහ මහතා සිතනවා විය හැකියි.

රනිල් වික්‍රමසිංහ මහතා මේ රටේ දේශපාලනය තුල අවුරුදු හතලියක් පමන කාලයක් රටට යම් සේවාවක් සහ රටට අහිතකර තීරන සදහා දායකවු මහත්මයෙකි.ඔහු හදුනාගත් මොඩලය අපිට දිරවන්න බැරිවු නිසා 30% මායිම දක්වා ජනප්‍රියතාවය බස්සවා ගත් ඔහු වර්තමානයේ මහින්ද රාජපක්ෂ මහතාට අභියෝගයක් නොවෙයි. හඩ්සන් සමරසිංහ මහතාට මහින්ද රාජපක්‍ෂ මහතාට කඩේ යාමට කල යුතුව ඇත්තේ රනිල් වික්‍රමසිංහමහතාගේ රටට අහිතකර කෙරුවාවල් ටික වැදගත් ස්වරූපයෙන් රටට දියකර හැරීමයි. එවිට අනුපානත් සමග බොන හුදී ජනයා 30% මට්ටමෙනුත් පහලට එතුමා රැගෙනයාමට අවධාණය තවත් දුරට යොමු කිරීමට අනිවාර්යෙන්ම පෙලෙබෙනු ඇති.

අද ශ්‍රී ලංකාවේ ජනගහණය අධ්‍යාපන සාක්‍ෂරතාවය ඉතාමත් ඉහල අගයක පවත්වා ගෙන සිටින රටකි.අඩුම තරමින් වයස අවුරුදු 40 පමන දක්වාවු ජනගහනය අපොසප සාපෙල දක්වාවත් පාසල් ගිය අයවෙති. මුද්‍රිත මෙන්ම විද්යුත් මාධ්‍ය බොහෝ ප්‍රචලිත මෙසමයෙහි ගෝචරදේ තෝරා බේරා ගතහැකි ස්වයං බුද්ධියක් අඩු අධ්‍යාපනයක් ලැබු අය තුලද වර්ධණය වී තිබේ. මෙහි ප්‍රතිපල ලෙස මින් දශක තුන හතරකට පෙර මෙන් ආරවුල් ඇතිකරගෙන පොලිසිවලට අධිකරණයට යොමුවන පිරිස් වැඩිවන ජනගහනයට සාපේක්ෂව අවම බවට පත්වී තිබේ.චන්ද පොලට යන්නේද දැනුවත් භාවයකින් මිස වේදිකාවේ ඇද බාන බොරු බේගල් වලට රැවටී බොරුව බොරුව ලෙස තේරුම් ගෙන ඇත්තට මනාප දැකිවීම සදහායි . මින් අදහස් වන්නේ ලාංකීක ජනගහණය යම් දියුණු මානසික ඉසව්වක සිට ප්‍රශ්න හා ගැටළු දෙස බලන බවයි.

හඩ්සන් සමරසිංහ මහතාගේ පුවත්පත් විග්‍රහයේ තේමාව මේ ගති ලක්ෂණ අභිබවා අසන්නෝ සමග උඩු ගංබලා පීණිමට තැත් කිරීමකි. අසන්නන්ට සහ බලන්නන්ට වැඩ සටහන නීරස කිරීමකි. මේ කාර්යෙන් මහින්ද රාජපක්ෂ මහතාට අවැඩක් මිස සේවයක් නොවේ.ඔහු සිදු කරන්නේ දැළි පිහිය අත ඇති වදුරා රැවුල බෑම වෙනුවට රජුගේ බෙල්ල කපා දමනවාසේ .. හාණියකි.

Tuesday, October 13, 2009

රුසියාවෙත් ඔහොම තමයි.

දකුනේ පලාත් සභා මැතිවරණයේ ප්‍රතිපල නිකුත් වී ඇත. තරග කල ප්‍රධාණ පක්ෂ පිලිබද මනා විග්‍රහයක් ජනතාව විසින් කර ඇත. මැතිවරණයෙන් පසු බක පන්ඩිතයෝ තමන්ගේ ඇස් කන්නාඩි දාගෙන රෙදි ගලවා ති‍යා කරන විග්‍රහ වලින් වැඩක් නැත. රනිල්ට නායකත්වයෙන් යන්නත් මහින්දට දේශප්‍රේමය විතරක් අලවි කර ඔටුන්න රැකගත නොහැකි බවත් දකුනේ ජනතාව පැහැදිලිව කියා ඇත.ජවිපෙය නම් දකුනේ තම ඡන්ද පදනම විමල් වීරවංශගෙන් ආරක්ෂාකර ගෙන ඇත.

මහින්ද මහත්තයාගේ දේශපාලන ව්‍යාපෘතිය තුල ශ්‍රීලනිපයේ පරණ කකුල් වලට වැඩක් නැතිවී අළුත් කකුල් චේදිකාවේ මොර දෙන ප්‍රවනතාවයක් මෑත කාලයේ පෙනෙන්නට පටන් ගැනිනි. හතර වටේ ඉන්නා කහපාට කොළපාට සිග්නල් කනු ( කොන්ක්‍රිට් ,ලී වැනි දේවලින් නිර්මිත බැවින් ඒවා කනු මිසක ශ්‍රිලනිපය තුල සජීවී වස්තු නොවන බව තව තව කල් යන කොට තේරෙනු ඇත.) එකතු කර පාර්ලිමේන්තුව ගැට ගසා ගත්තේය. එහෙත් මෙම පෞද්ගලික හා කෘතිම පදනම පාර්ලිමේන්තු මැතිවරණයකට නම් ශ්‍රීලනිපයට කොහෙත්ම ගැලපෙන්නේ නැත. මේ පාට පාට සරුංගල් ටික මුදා හැර ඡන්දේ ඉල්ලන්න ගියොත් සරුංගල් වලින් දෙකක් තුනක් හැර ඉතිරි ඒවා එකතු කරගන්න මහින්ද මහත්තයාට හැකි නොවනු ඇත.

අපි විද්‍යුත් මාධ්‍ය වල කොමඩි වැඩ සටහන් බොළද වැඩ සටහන් දෙස බලා ඉන්නේ කාලය ගෙවා ගන්නට මිස ඒවායේ අරුත් බර යමක් ඇතියැයි සිතාගෙන නොවේ. ඒ වාගේ අයියාට කඩේ යන්න ඕනෑ වුන විට මල්ලී කඩේ ගොස් කරපු දෙයක ප්‍රතිපල දකුනේ දුටුවේ නැත. ගීනස් පොතට යන්න පැයගානක් අයියා වෙනුවෙන් බෙරිහන් දුන්නාට ජනතාව ඒවාට ඇහුන් කන් දෙන්නේ නැත. මල්ලී වේදිකාවට විත් කරන්නේ ජනතාවට කොමඩි සපයනවා මිසක ඉන්නවයි කියන සාමාජික සමාජිකාවන්ගෙන් පෙරමුනේ ඡන්ද පෙට්ටිය පුරවන එකනම් නොවන බව මහින්ද මහත්තයා දකුනෙන්ම පැහැදිලි කර ගත යුතුය. මල්ලීට පුළුවන් කතාව පමනය . කතා කාරයාට වැඩ බැරිය.

බස්නාහිරදී දිනේෂ් ගුණවර්ධන මීට වඩා මෙහෙයක් පෙරමුනේ ඡන්ද පෙට්ටිය පුරවන්න කරන බව අපට පැහැදිලිය. දකුනේදී කොමිනියුස්ට් පක්ෂය ඡන්දේට ගෙන ආ ගාල්ලේ පියසිරි වගේ අයගෙන් යාන්තම් නම්බුව බේරා ගත්තේ ඔවුන් සැබැවින්ම ශ්‍රීලනිපයේ ඡන්ද පදනමත් සමග බද්ධව කටයුතු කරන නිසාවෙනි. එවැනි දෙයක් කරන්න තවමත් රුසියාවේ ක්‍රමයෙන් බැරිය.

මැතිවරණ දිස්ත්‍රික්කයෙන් දිස්ත්‍රික්කයට පොඩ්ඩක් ඔළුව දා බලන්නට මහින්ද මහත්තයාට කාලය ඇවිත් ඇති බව දකුනේ මැතිවරණය සන්නිවේදනය කර ඇත.එවිට සරුංගල් සමග පාවී ආ වේයෝ ශ්‍රීලනිපයේ පරන කකුල් බයිට් එකට ගෙන ඇති ආකාරය පැහැදිලි වනු ඇත.සමහරු ඡන්ද පොලට ගෙන්නා ගන්නත් බැරිතරමට දුර්වලබවට පත් කරලා ඇත .ඉතින් කොහොමද 80% ටාගට් ගන්නේ.හොද වෙලාවට රනිල් මහත්තයාට බැරි නිසා සියයට හැට ගනන්වල ඉන්න පුළුවන් වෙලා ඇත.නැත්නම් අභියෝගය තරමක් බරපතල තත්වයට පත්වීම අනිවාර්ය වන බව සජිත් ප්‍රේමදාස මහත්තයා හම්බන්තොට දිස්ත්‍රික්කයෙන් පැහැදිලි කිරීමක් කර ඇත.

Saturday, October 10, 2009

ශාස්ත්‍ර පීඨය කඩුව ගැණිම.

කොළඔ විශ්ව විද්‍යාලයේ ශාස්ත්‍ර පීඨය 2010 වසරේ සිට ඉංග්‍රිසි මාධ්‍ය උපාධි පාඨමාලා ඇරඹිම සිදුකරන බව පලවී තිබේ. හැම එකකටම විශේෂඥ විග්‍රහයක් කරන විමල් වීරවංශ සහෝදරයාට මේ පිලිබදවද මතයක් තිබේ.ඔහුගේ අදහස නම් මෙය දුෂ්කර පාසල්වල සිසුන් විශ්ව විද්‍යාලයට පිවිසිමට ඇති ඉඩකඩ ඇසිරීමකි.
“භායානක යටත් වීජිතවාදී කුමන්ත්‍රණයකි. රුසියාවේ එලෙස නොවේ” යන චින්තනයේ සිට මෙම විෂය දෙසද බැලීමකි. සමාජයේ විවිධ වෘත්තිකයන්ගෙන් විරෝධතාද දැන් දැන් කල එලි බසී.

මීදුම අදහස් කරන්නේ දුෂ්කරතා ඇතිවුනත් මෙය යහපත් ආරම්භයක් බවයි.අද ගම්බද පාසල් වල දරුවන්ට ඉංග්‍රීසි ඉගන ගැනීමේ උවමනාව තිබුනත් උගන්වන්න ගුරුවරුන් ගේ බරපතල හිගයක් තිබේ. උපාධිධාරීන් තිස් හතලිස් දහස් ගනනින් ගුරු ප්‍රවාහයට එකතුවූ වත් එම පිරිසෙන් මෙම රික්තය පුරවා ගැනීමට ඉන් දෙතුන් සියයකින් ගෙන්වත් හැකියාව ඇතිවීදැයි සැකයකි. ඉංග්‍රිසි විද්‍යා පීඨ හරහා ගුරු සේවයට එකතුවන පිරිස හැරෙන්නට ඉංග්‍රීසි විෂයයක් ලෙස ඉගැන්වීමට ගුරු ධාරාවට අළුතින් එකතු වන පිරිසක් ගැන මීදුම නම් නොදනී.

ඉංග්‍රීසි මාධ්‍යයෙන්ම ඉගැන්වීමට නොව අතිරේක භාෂා විෂයයක් ලෙස ඉගැන්වීමට පවා පාසල් වල ප්‍රමානවත් ගුරුවරුන් නැති බව සත්‍යයකි. එහෙත් ජාතික පාසල් අතරින් අඩක් පමන මෙම ගුරු අඩුව අභියෝගයක් ලෙස පවත්වාගෙනත් ඉංග්‍රීසි මාධ්‍යයෙන් චිෂයයන් ඉගැන්වීම ආරම්භ කර තිබීමද ප්‍රශංසනීය කටයුත්තකි. බොහෝ ශාස්ත්‍රවේදී උපාධිධාරීන් ගුරු ධාරාවට එකතුවන රටක දරුවන්ගේ ඉංග්‍රිසි අධ්‍යාපනය දියුණු කිරීමට ශාස්ත්‍රවේදී උපාධිධාරීන් ඉංග්‍රිසි මාධ්‍යයෙන් අධ්‍යාපනය හදාරා තිබීම ඊලග පරපුරට නම් අත්වැලකි.

මේ අදහස පසක තබමු. අද දැනුම අන්තර් ජාලයෙන් අතලගටම පැමින තිබේ. ඒත් අතට ගැනීමට සිංහලෙන් කර ගත හැකි නොවේ. පෞද්ගලික ව්‍යාවාසකයන් බොහෝ විට සම්බන්ද වන්නේ ඉංග්‍රීසියත් සමගිනි. අද ඉංග්‍රීසිය ඇත්නම් රැකියා අවස්ථාද බොහෝ වෙති. උපාධියත් ඇතත් රැකියා නැතිව රජයට එරෙහිව බෝර්ඩ් ලෑලි එල්ලා ගෙන ලිප්ටන් වට රවුමේ කොටුව දුම්රිය පොලේ පාළු කපන විට කඩුව මුවහත් සාමාන්‍ය පෙල සමත් අය පවා රැකියා එකක් අතහැරෙන විට තව එකක් ක්‍ෂණිකවම සොයා ගත හැකි ඉල්ලුමක් ඇති කර ගෙන සිටි.

විමල් වීරවංශට තමන් ගේ දේශපාලනය කර ගැණිමට රටේ ප්‍රශ්න තිබිය යුතුය යන්න පදනමේ සිට නම් මේ වැඩේ නතර කිරීම හොද දෙයකි.

විශ්ව විද්‍යාල තුලද මාධ්‍යය වෙනස් කිරීම ගැටළු ඇතිකරන්නක් විය හැකියයි මීදුම උපකල්පනය කරයි. සිංහල භාෂාව රජ කරවු දා පටන් අධ්‍යෘයපනය සිංහලවී අවුරුදු පනහක් පමන ඉක්මවු යුගයක සිංහලෙන් ඉගන සිංහලෙන් උසස් අධ්‍යාපනය හැදෑරු යාම්තම් ඉංග්‍රීසිය හසුරුවන සම්පත්දායකයෝ ඕනැතරම් සිටිය හැකියයි සිතිය හැකිවේ. මේ ඇත්තන් සමග වහාම ඉංග්‍රීසියට යාමද විශ්ව විද්‍යාල අර්බූදයක් නිර්මානය කරගැනීමකි. එහෙත් අසනීප සදහා දෙන බෙහෙත් තිත්ත උවත් බීම සිදුකල යුතුමවේ. සිංහලෙන් උපාධිය හමාර කරන දෙවන වසරේ සිට අවසන් විභාගය දක්වා විශ්ව විද්‍යාලයේ රැදී සිටින සිසුන්ටත් මෙය ප්‍රියජනක දසුනක් නොවීම අනිවාර්යවේ.ඉතින් විශ්ව විද්‍යාලය තුලින්ම වැඩේ අබ්ලික් කිරීමේ අවස්ථා නම් මතුවිය හැකි බව මීදුම සිතයි.

මධ්‍ය මහා විද්‍යාලයකට ශිෂ්‍යත්‍ව විභාගයෙන් සමත්ව පස්වන වසරට ඇතුලත්වු මිදුම ඉංග්‍රීසියෙන් උගත් අවසන් කන්ඩායම බල බලා සිංහලෙන් උගත් අයෙකි.එකල සිංහලෙන් ඉගනගැනීම මහත් අභිමානයක් වුවද සමාජ ගත වීමත් සමග ඉංග්‍රීසියේ වැදගත් කම කොයිතරම්ද යන්න තේරුම් යනවිට අප යා යුතු කෝච්චිය ගොස් හමාර වී තිබිණි.

Tuesday, October 06, 2009

දකුනේ ප්‍රතිපල.

මැතිවරණය අතලගය.
මැතිවරණත් සමග සිහියට එන මගේ මිතුරෙකු සිටි. මිතුරා හදුනා ගැනීමට අමරේ යයි කියමු මෙතැන් සිට වියමන් වන්නේ අමරේගේ මැතිවරණ කතාවයි.

අමරේ 1989 සිටම හොද ශ්‍රී ලංකා කාරයෙකි. ඊට පෙරනම් හොදම යූඑන්පී කාරයෙකි.අමරේ යුඑන්පියට යන විට වටා පිටාවේ අයත් යුඑන්පියට යා යුතුය.ඒ වාගේම අමරේට ශ්‍රීලනිපවු විට වටා පිටාවම ශ්‍රී ලංකා කාරයෝ විය යුතුය. නැත්නම් මැතිවරණ කාලයට පෙරත් ටික කාලයක් පසුව වත් අමරේගේ පැත්තේ නොවන හැම දෙනාම ඔහුගේ තරහ කාරයෝය. ඔහුගේ හොදම මිතුරන් පවා විකල්ප මත දරන්නෝ නම් මැතිවරන දවස්වලට ඔහුට පෙන්නන්නම බැරිය. කුමන්ත්‍රණ කරුවෝ කඩාකපල්කාරයෝ ඔත්තුකාරයෝ ආදීයෙන් සටහන් වී ඇති ලේබල් අලවා ඔවුන්ගෙන් පිටමං වීම අමරේගේ සිරිතය..

නාමයෝජනා දුන් දින පටන් අදාල මැතිවරණයට අයත් පැරණි ප්‍රතිපල ලේඛණ ඔහුගේ ලේඛනාගාරයෙන් ගොඩ ගන්නා අමරේ මහත් වෑයමකින් ප්‍රතිපල විශ්ලේෂණයක් කිරීම ආරම්භ කරයි. හත් දික්භාගයේ විසිරී ඇති ඔහුගේ නෑදෑ මිතුරන් සමග පුළුල් සංවාදයක්ද අරඔනු ලැබේ. ප්‍රදේශයෙන් ප්‍රදේශයට තොරතුරු එක් රැස් කර ගෙන දිනෙන් දින මැතිවරන ප්‍රතිපල පිලිබදව අනාවැකි පල කිරීමත් දේශගුණය මෙන් වෙනස් වන මැතිවරන උනුසුම පිළිබද අදහස් පල කිරීමත් ඔහුගේ පුරුද්දකි . පොඩි වැරද්දකට ඇත්තේ සියළු අනාවැකි පල වන්නේ ඔහුගේ පෞද්ගලික මතවාදයනට පක්ෂපාති කෝනයෙන් වීමයි.
මනාපය මැතිවරණයට ඈදීමත් සමග ඔහුගේ මනාප අනෙක් අයගෙත් මනාප බවට පත්කරවීම තවත් නිර්නායකයක් ලෙස එකතු වී තිබේ.
වර්තමානයේ නම් මැතිවරන කාලයට ශ්‍රී ලංකා කාරයෙකු වී ඔහුගේ මනාපත් අනුගමනය නොකරන නෑදෑ හිතමිතුරන් වත් ඔහුට පෙන්නන්න බැරි වාතාවරණයක් ඇතිවේ.

මහින්ද රජ වීම සතුටක්වු ඔහුට මැතක සිට මහින්ද එලවා දමන තෙක් නින්ද නොයන අසනීපයක් ඇතිවී ඇති බව පලකරයි.ඒත් ශ්‍රීලංකා නිදහස් පක්ෂයයට නායකත්වය සදහා පත්කිරීමට විකල්පයක් නැති නිසා ඔහුගේ තදියම තවමත් බුරුලෙන් ක්‍රියාත්මකවේ.යුඑන්පියට නම් හත්ගව්වක් දුරකින්වත් විකල්පයක් නැති නිසා ඒ ගැන හිතන්නටවත් අමරේට උවමනාවක් ඇති නොවේ.ඒ නිසා තවවමත් අමරේ තල තලා ශ්‍රිලනිපය රැකගනී.

පසු ගිය දිනක අමරේ මිදුමට හමුවිනි. කොහොමද දකුනේ ඡන්දේ ? මිදුම ප්‍රශ්නයක් ඇතිකර උත්තර බදින තෙක් බලාසිටී. – “යුද්ධෙ යුද්ධෙ කිය කියා හිටියා . දැන් තාමත් ත්‍රස්වාදීන් ඉවර නෑ කියනවා දේශප්‍රේමෙ කියලා බලාගෙන ඉන්න පුළුවන්ද බඩගින්නේ දැන් බඩු මිළ අධිකයි. ආනයනික සීනි රුපියල් 105.00කි කන්තලේ පැල්වත්තේ සීනි නිෂ්පාදන වියදම රුපියල් 30.00කි.දයා ගමගේ (කන්තලේ පැල්වත්තේ නිෂ්පාදන සමාගම් අයිතිකරුය අමරේ එහි පැරණි සේවකයෙකි.) සීනි කිලෝවකින් රුපියල් 75.00 ලාභ ගනී. මුන් ඔක්කොම කරන්නේ එකයි පොඩි මිනිහා ගැන කිසිම අනුකම්පාවක් නෑ.” ආණ්ඩුවට තදබල ප්‍රහාරයක් ඇතිවේ. “ අමරේ රජයට නිෂ්පාදන බදුත් ගන්නවානේ ” මීදුමට අතුරු ප්‍රශ්නයකි. “මොන පිස්සුද ආනායනික සීනී වලින් විතරයිනේ බදු ගන්නේ”අමරේ කියයි. තර්කයට බැස්සෝත් මීදුම ට මිතුරා නැතිවේ “එහෙමද ?” කියා මීදුම පල්ලම් බසී.
අමරේ ගෙන් දකුනේ ප්‍රතිපල අනාවැකි නිකුත්වේ.ගාල්ල මාතෘකාවේ මුලට පිහිටයි. අනර්කාලි ,අක්මීමන හාදයා කැපී කෙටී ජයග්‍රාහි ලැයිස්තුවෙන් ඉවත්ව ගොසිනි. “මේ දෙන්නනේ නිකම්ම ජනප්‍රිය වුනේ. මම නම් හිතන්නේ වැඩිම මනාප ගන්නේ මුතුහෙට්ටිගමයි. අනර්කාලිත් ගාල්ලේ ලැයිස්තුවේ හතරට පහට එයි”. මීදුම අදහසක් දමයි . අමරේට තදවේ. “කොහෙද රස්තියාදු කාරයින්ට මානාප දෙන්නේ ? ” ඔහුගේ විග්‍රහයයි. - ගාල්ලෙන් එකයි, මාතරින් එකයි, හම්බන්තොටින් එකයි ජවිපෙයට ලැබෙන්නේ ඔහුගේ තවත් මතයකි. “හම්බන්තොටින් නම් දෙකක් ලැබෙයි ” ජවිපෙ අජිත් අතරමැද සිට සීරුවෙන් වචනය මුදා හරියි. ( ජවිපෙ අජිත් අමරේ සමග සෙට් වන කන්ඩායමේ මිත්‍රයෙකි.) අමරේ කියන්නේ ඉස්සර වගේ හම්බන්තොට ජවිපෙට සරු නොවන බවයි.
එජාපය දිස්ත්‍රික්ක තුනේම කරට කර සටනකි. හේතුව බඩු මිල , රාජපක්ෂීකරණය නිසා මහින්දගේ ජනප්‍රියතාවය දකුනේ දියවෙමින් පවතින නිසාවෙනි.දෙනියායේ මාලිගාව උදාහරණ වලට ගෙනේ . හම්බන්තොට වරාය ගුවන් තොටුපල දකුනේ කඩිනම් ව්‍යාපෘති අමරේ ගේ අවධානය නොලැබ දුක්වේ. අමරේ චන්ද්රිකාට බැන වදිමින් සිටි යුගය මිදුමට මතක් වේ. පුද්ගලික කරණ මුවාවෙන් කොමිස් ගසා පිටරට මාලිගා ගත් බවක් ඒ කාලයේ ඔහුගේ මතයවී තිබිණි.හොද වෙලාවට එතුමියගේ ධුර කාලය අවසන් වී මහින්ද ජයග්‍රහණය කල බැවින් අමරේ තවමත් ශ්‍රීලංකා කාරයෙකි.

කට කහනවට දකුණ ගැන අමරේට මිදුම අදහසක් දමයි “මොන පිස්සුද ? 30% ටත් වඩා අඩුවී එජාපය දකුනෙන් පල්ලම් බහි. ඇයි ගිය පාරත් දකුනෙන් 64%ක් 61% ක්ද කොහෙද පෙරමුන ගත්තානේ හම්බන්තොටින් විතරක් 70%ක් ?.’ අමරේ එකග නොවෙයි. වැඩි සංවාදයට ගියොත් වැඩේ අවුල්වේ අමරේ දැන් බාගයක් පදිංචි දරුවන් ගේ ගෙවල් වල බැවින් , “ කවද්ද ආයෙත් දූ දරුවන් බලන්න යන්නේ ?”අසමින් මිදුම ඔහුගේ ප්‍රියතම මාතෘකාවට හෙමින් සීරුවේ මාරුවීමෙන් කතාවට තිත වැ‍ටේ.

Sunday, October 04, 2009

GSP + Generalized System of preferences

අද ‍බොහෝ දෙනාගේ මතෘකාව බවට පත්ව ඇති GSP + බදු සහනය ගැන සටහනක් මීදුම වියමන් කරන්නට අදහස් කලේ එය අද කාලීන ප්‍රවෘත්තියක් වී ඇති බැවිනි. බොහෝ විද්වතුන් මේ සම්බන්ධයෙන් නොයෙක් මතවාද පලකරමින් සිටිති. දේශපාලන වේදිකාවේ ආණ්ඩුව විපක්ෂයටත් - විපක්ෂ ය ආණ්ඩුවටත් මල්ටි බැරල් ප්‍රහාර එල්ල කිරීමට යොදා ගන්නා මේ මාතෘකාව අපට නම් විහිළුවකි. රටකට ආදරේ ඇති පිරිසක්වේ නම් බලය අල්ලා ගැණිමේ ව්‍යාපෘති මැතිවරණ වලට පමනක් සීමා කර මැතිවරණයෙන් පසු රටට හිතකරව සේවය කිරීම සිදුකල යුතුවේ. අපේ රටේ ආණ්ඩුවත් විපක්ෂයත් හැසිරෙන්නේ ජම්ම වෛරක්කාරයෝ පිරිසක් ලෙසිනි.

මේ දෙපිරිසම නඩත්තු වන්නේ දියළුනු කැටයෙන් පවා අය කරගන්නා බදු මුදල් වලිනි.තීරු බදු රහිත දීමනා, මාදිවලින් නේවාසික පහසුකම් දුරකතන, ගමන්,සංග්‍රහ ආදී කී නොකී දීමනා ලැබෙන්නේ ආණ්ඩු පක්ෂයට පමනක්ම නොවේ. විපක්ෂයටත් ලැබේ.වෙනසක් ඇත්නම් සොච්චමක් විය හැකියි. අපේ රටේ මේ දෙපක්ෂයේ ආර්ථික පරතෙරය ඇති කිරීමට පමනක් නිර්මාණය කරගත් අළුත් මාවත ආණ්ඩු පක්ෂය සියල්ලම ඇමතිවරු බවට පත් කිරීමෙන් සිදුකරගෙන තිබේ. මෙම පුර්වාදර්ශයද 1977 දී ධාර්මිෂ්ඨර් විසින් මේ රටට ලබා දුන්නකි.

මිදුම පාරෙන් පිට පැන්නා යයි සිතුවා විය හැකියි. ඒත් අපට වී ඇති දේශපාලන වින්නැහිය සෑම කරුණටම පාදක වී ඇති බව අමතක කර ගත හැකි කරුණක් නොවේ. GSP + කතාව ඇරඹෙන්නේ සුනාමියත් සමගිනි. ආසියාතික රටවලට සුනාමියෙන් ඇතිවු විපතින් ආර්ථිකයද සුනාමියක් බවට පත්වු විට ඒ ඒ රටවල නිෂ්පාදිත භාණ්ඩ 7200 ක් යුරෝපා සංගමයේ රටවල්වලට මිළදී ගන්නා විට තීරු බදු සහ රේගු බදු අය නොකර ගැණිමෙන් සහනයක් ලබා දීමට තීරණය කෙරිණි. මෙම සහනය ඇගළුම් ඇතුළු අපේ කර්මාන්ත වලට යුරෝපා සංගමයේ වෙළද පල තුල යම් ස්ථාවරයක් ගොඩනංවා ගැණිමට හේතු වන්නට ඇත. එමෙන්ම මෙම සහනයෙන් ප්‍රයෝජන ගැණිමට විදේශිය ආයෝජකයෝද යම් යම් කර්මාන්ත ඇරඹීම නිසා අපේ රෑකියා නියුක්තියන්ගේ ප්‍රමාණයද ඉහල ගියාය. අප මෙම සහනය දැන් අවුරුදු හතරක් පමණ භුක්ති විද ඇත්තෙමු.
දැන් ඇතිවී ඇති අනතුරෙන් යුරෝපා වෙළදපලේ අපේ භාණ්ඩවල මිළ ඉහළයාම නිසා එම රටවල පාරිභෝගිකයෝ අප අත්හැර වෙනත් රටවල නිෂ්පාදන කෙරෙහි අවධාණය යොමුවුවහොත් අවසානයේ අපගේ රැකියා නියුක්තියෝ පාරට බසින්නට සිදුවන්නේය. මෙම අනතුර මුව විටට ආ බවක් පෙනෙන්ට ඇති බව දැක දෙගොල්ලෝම අසරන රැකියා නියුක්තියන් ගේ මළමිනී මතින් බලය ලබා ගැණිමේ සහ බලය රැක ගැණිමේ පාපකාරී සිතුවිල්ලක සිටිමින් සිටින බව විද්‍යාමාන කරන බවක් මිස පිලියම් හෝ සැලසුම් ගැන අවබෝධයක් ඇති බවක් නම් නොදක්වන බව මීදුමට සිතේ.

ආණ්ඩුව සහ අදහස් දක්වන විද්වත්තු GSP + සදාකාලිකව ලැබෙන සහනයක් නොව තාවකාලික බදු සහනයක් බව පවසයි. අපිද එය පිළිගත යුතුවමු. යම් රටක් හෝ රටවල් සමුහයක් සදාකාලිකවම තම රටේ බදු ආදායම පිනට දෙන්න කෙසේවත් කැමතිවන්නේ නැත.එසේ නොදෙනුද ඇත. සුනාමිය ගෙවී අවුරුදු පහකි. යුද්ධය ඊට අවුරුදු විස්සක් විසිපහක් තිස්සේ පැවත්වෙමින් තිබියදීද අපේ රටේ ඇගළුම් ඇතුළු වෙනත් නිෂ්පාදන අපනයනය වෙළද පලට යොමු කරමින් සිටියේය. සුනාමියෙන් ලැබුන GSP + සහනය අමතර සහයෝගයකි. ඒ සහනය තුලින් අපේ රටේ නිෂ්පාදන සදහා විදේශීය පාරිභෝගිකයන් තුළ නමක් ඇතිවුවාටද සැකයක්ද නැත. එය අමතරව ලැබු ප්‍රතිලාභයකි.

මිදුමට ඇති ප්‍රශ්නය මෙය නොවේ අපේ රටේ එක් එක් විෂය භාර ඇමතිවරු රොත්තක් සිටී. විදේශිය, විදේශිය වෙළදාම, වෙළද ප්‍රවර්ධණ , කර්මාන්ත, ආදී මෙම විෂය පථයන්ට ආදාල ඇමතිවරු අඩුම තරමේ විස්සක්වත් ගැන ගත හැකිවීම සිම්පල් කාරනාවකි.මෙම ඇමති රොත්ත බුරුත්තට ඇති කාර්ය මණ්ඩලය , උපදේශකයෝ කොයිතරම් ඇත්ද ?. මේ මිනිසුන් අවුරුදු පහක් තිස්සේ GSP + සදාකාලිකවම අපට ලැබෙන බව සිතාගෙන ජොලි කල බවක් පේනවා හැරෙන්නට විකල්ප විසදුම් ගැන සැලසුම් ඇතිකලේ නැත. ලෝකයේ ඇත්තේ යුරෝපා වෙළද පොලක් පමනක් නොවේ. වෙනත් වෙළද පලවල් පසුගිය අවුරුදු හතරේ සොයාගන්නට තබා හිතන්නටවත් මේ මිනිසුන් පෙළඹී ඇතිද?.අපේ රට නියෝජනය කරමින් විදේශීය රටවල නිත්‍ය නියෝජිතයින් ,කොමසාරිස්වරුන් , තානාපතිවරුන් සහ ඔවුන්ගේ කාර්ය මණ්ඩලයන් ඒ ඒ රටවල සිට නිදිවදින්නේද ?. ඔවුන් ගේ කාර්ය භාරයට විදේශීය වෙළදපල අපනයන සදහා අප රටට සකස් කර දීමට සැලසුම් ඇති කිරීමවත් ඇතුලත්වන්නේ නැද්ද ?.

නහය තෙක්ම ගිලෙන තෙක් සිට ‘අපිව එවරයි කියා මර ලතෝනි දෙන්නන්” සහ ‘උඹට මරු වැඩේ උනේ ඕකත් කාලා මැරියන්” කියන අයගේ බයිලා සංවාදය හැරෙන්නට දේශප්‍රේමය නම් මේ මිනිසුන් ගේ අහලකින්වත් ගෑවිලා නැත.

Monday, September 28, 2009

ඌරු කොටුව සහ බූරුපිටිය.

පුවත් පත් සියල්ලම කියවන පාඨකයෝ නොමැති නිසාත් පලවන සියල්ල ඇස නොගැටෙන නිසාත් 27 දා දිවයින ඉරිදා සංග්‍රහයේ කරු පරනවිතානගේ සංහිතාව කොලමේ කොටස් කිහිපයක් එලෙසම පලකරමි.ඒ අතරට මීදුමද ඌණපූරණයක්ද කරයි. කාලීන අවශ්යනතාවයක්වු මනාප මැතිවරණ ක්‍රමය වෙනස් කිරීම අද කතාවට පමනක් සීමාවු මාතෘකාවකි. මැතිවරණයක් මුව විට ඊලග මැතිවරණයෙදි වෙනස් කරඤ්ඤං කියන බාලගිරි දෝෂය ලග තබාගෙන මනාප ක්‍රමය ප්‍රධාන පක්ෂ සියල්ලම කැමැත්තෙන් වැළද ගෙන සිටිනු ලැබේ.මනාප ලබා ගැනිමට වියපැහැදම් කරන සල්ලි කන්දරාව පාර්ලිම්න්තු සහ පලාත් සභා ප්‍රදේශීය සභා ධුර කාලයකදී කිසිසේත් පියවාගන්න බැරි බව වටහා ගෙනත් වියදම් කරනුයේ වියදම පියවා ගත හැකි දූෂිත මාර්ග විවරව තිබෙනා බැවිනි.

පරනවිතානගේ ඌරු කොටුවට පිවිසෙමු . “ එක් ඌරෙක් තවත් ඌරෙකුට අල හාරා දෙන්නේ නැත.” යනුවෙන් ඉංග්රී සි කියමනක් තිබේ.මේ කියමන වර්තමාන මනාප පොර දේශපාලනයට කදිමට ගැලපේ. මනාප තරගයේදී කිසිවෙක් අනෙකාට උදව් කරන්නේ නැත. .....................මේ අර්ථයෙන් ගත් කල දේශපාලනය මුළුමනින්ම ඌරුපිටියක් බවට පත්ව ඇත.මනාප දේශපාලනයට බසින සියළු මිනිසුන්ට ඌරන් වීමට බල කෙරී ඇත.එසේ නැතහොත් බලය නැමති අලය හාරාගැණිමට හැකිවන්නේ නැත.මේ හෑරිල්ලට බැස්ස කල දරුණු දේශපාලන සූදුවක් කිරීමට සිදුවේ.එම සූදුවේදී ප්‍රතිපත්ති මනුෂ්‍යහත්වය අවංකත්වය,ගුණධර්ම, සාරධර්ම, සතය යන සියල්ලම විකිණීමට උකස් කිරීමට සහ සූදුපිටියේ උකස් තැබීමට සිදුවේ.................................ඒ අර්ථයෙන් ගත් කල වර්තමාන දේශපාලනය මුළුමනින්ම ඌරුපිටියක් හා බල දේශපාලන සූදුවක් කෙලිනා බුරුපිටියක් බවට පත්ව තිබේ.”

කරු පරනවිතාන හිතනා අයුරින්ම අපේ පරමාධිපත්‍ය අලවි කරන මැතිවරණ ඌරු කොටු සහ බූරුපිටි බවට පත්ව තිබේ. ජේ.ආර්ගේ ධාර්මිෂ්ඨ ව්‍යවස්ථාවෙන් නිර්මාණය කල මේ තත්වයට පක්ෂ විපක්ෂ ඌරෝද බුරුවා ගසන්නෝද බොහෝ කැමැත්තෝය. මේ නරා වලෙන් ජනතාව මුදන්නට කතා කරන්නෝ හැර ක්‍රියා කරන්නෝ නම් නැත. පරණවිතානයන්ද නායකකාරකාදීන්ට හුළු එලි අල්ලා රත්නපුරය නම් ඌරු කොටුවේ ‍ජරාව නාගෙන බුරුවා කෙලින්නට ස්වේච්ඡාවෙන් පැමිණ ඇති බව පවසයි. එසේ පැමිණියේ පුරවැසි දේශපාලන ගමනක් සබරගමුවේ රත්නපුරයෙන් අරඹනා ලෙස නායකයා උපදෙස් දුන් නිසා බවද පවසයි. දොහොත් මුදුන් දී සාධුකාර දිය යුතුව ඇතත් මේ ගමනටම පැමිණි රත්නපුර ඌරු කොටුවේ සහ බූරු පිටියේ සිටින අයියලා අක්කලා ,මල්ලිලා නංගිලා,දුවලා පුතාලාද , මචංලා ද කියා තමන්ම හදුන්වා ගත් පිරිසද පැමිණියේ ඔය කතාවම කියා ගෙන බැවින් එසේ නොකර අසා සිටිනු ලැබේ. අර මම කලින් කී කට්ටිය දැන් “සර්ලා සහ අප්පොලා,මැණිකේලා, මැඩම්ලා’වී ඇති බැවින් අළුතින් එන මානව හිතවාදීන්ට යම් ඉඩක් නිර්මාණය කර ගත හැකිවේයැයි පරණවිතාන සිතන බවකි . දැන් ඡන්දදායකයෝත් “පරණවිතාන ලා ” මෙන් කපටි සූත්තර කාරයෝ වී ඇති බැවින් කලබලවන්නට හේතුවවක් ඇතිනොවේ.

පරනවිතාන දිවයින සංහිතාවට කියනා අයුරින් පරාක්‍රම කොඩිතුවක්කු මෙසේ කියයි. “...................මුලින් ලොකු මිනිසුන් ලගට නොව නායකයින් වැඩිය හම්බ වෙන්නේ නැති සුළු මිනිසුන් ලගට යන්න. ඔවුන් සමග කතාකල හැකි , ඔවුන්ට තේරෙන භාෂාවක් හදා ගන්න. ඒ සංවාදය ඇතුලේ අලුත් දේශපාලන ස්වර මාලාවක් මතුවේවි.එය මහා ගීතයක්සේ පසුව රටටම ඇසේවී.” – (ධම්ම දිසානායක පරණවිතානට මෙසේ කියයි. ) “නුඔ නිර්ප්‍රභූ පොඩි මිනිසුන් ළගට පයින්ම පළයං ඊට පස්සේ ඒ මිනිස්සුත් එක්ක තවත් ඇවිදපං ” මේ මා මිත්‍ර ධම්ම දිසානායක මට දුන් උපදේශයයි. මෑතකදී ගුවන් අනතුරකින් මියගිය ජනප්‍රිය ඉන්දියාණු නායකයෙකුගේ උදාහරණයක් මට ගෙනහැර පෑවේය........................ඒ උපදේශය හරියට වැඩ කරන්නේ දැයි මම දෙතුන් පොළක පරීක්ෂා කර බැළුවෙමි.මා තෝරා ගත්තේ රත්නපුරයේ ඉතාම දුප්පත් මිනිසුන් වෙසෙන වතුකරයෙන් මැදිව දුප්පත් සිංහල දෙමළ මිනිසුන් වෙසෙනා ගම්මාන කිහිපයකි................... ”වැඩේ හරියන බව කරු පරණවිතානට තේරෙයි.

පරාක්‍රම කොඩිතුවක්කු පතින් පොතින් ලිපි ලේඛන දේශණ තුලින් සමාජවාදී චින්තනයෙන් අප හදුනති. ඔහු තම හිතවතාට මග පෙන්වන්නේ නිර්ධන ගම්බද සුළු තේ සහ වි, එලවළු ගොවියන් , තේ ඉඩම්වල කුළි වැඩ කරනා කම්කරුවන් වැනි පංතිකයන් මුලා කරගෙන වැඩේ පටන් ගත යුතු බවයි .පරණවිතානද අත්හදා බලයි .ඹහුගේ දිනපොතේ දිනයන් වෙන්වෙමින් පිටු පි‍රේ. උපදේශ සාර්ථක බව පවසයි. පරාක්‍රම කොඩිතුවක්කු , ධම්ම දිසානායකත් යා යුතු පාර පෙන්වන්නේ මේ අසරනයින් මුලා කරගන උඹටත් පොරක් විය හැකි බවට ඉගියක් දෙමිනි. එක අතකින් මේ දෙන්නා අසරන මිනිසුන් බිල්ලට යොමු කරන්නේ කවියෙකු කලාකාරයෙකුට ඇති සංවේදිතාවය අමතක කර මස්කඩ මුදලාලියෙකුට මසට ගවයෙකු පෙන්නන ගොරහැඩි බ්‍රොකරයෙකු පරිද්දෙනි.මේ අත්හදා බැලීමම කල අය රත්නපුරේ ඕනෑ තරම් සිටිති. ජනතාව ‘අපි නම් ඕවාට රැවටෙයි.’ යයි මූනට නොකියුවත් කියනා බව බලයෙන් හා දූෂණයෙන් අන්ධවුවෝ නොදනිති.

සංහිතාව පුද්ගල උදාහරණද කිහිපයක් දක්වයි. මෙතෙක් රත්නපුර දේශපාලනයේ රැදී සිටින අය මානව හිතවාදි තියරිය පැත්තක තියා ඌරු කොටුවේ මඩ නා ගෙන බුරුවා ගසිමින් සිටිති. එසේ නැතිව තියරිය පමනක් ක්‍රියාත්මක කරමින් සිටියෝ සද මෙන් බැස ගොස් මානව හිතවාදීව නිවෙස්වල වැජඹෙති. ඒ පුද්ගල උදාහරණ අතර සිටින සමහරු මානව හිතවාදීව පෙරමුනේ මානව හිතවාදී බව නොමැති නිසා දැන් දැන් අලියාගෙන් ඡන්දය ඉල්ලති.‍එසේ හෙයින් පරණවිතානද පරණ අරක්කු අළුත් බෝතලයක දමා රත්නපුර දිස්ත්‍රික්කයේ හුදී ජනයාට බොන්න දෙන්න සුදානම් වන්නේ මේ සියල්ල අධ්‍යයන කරමින් බව මිදුමට සිතේ.

සංහිතාව තුලින් කිසිදු දිනක ඌරු කොටුව සහ බූරුපිටිය විනාශ කර ජනතාහිතවාදී මැතිවරණ ක්‍රමයකට මග පෙන්වු අදහසක් පල නොකල පරණවිතාන, මේ නරාවලේ ජරාව කන්න කොතරම් කාලයක් කාලගෝල ,දික්තල ලබන්නට කැඹුරුවා මෙන් රජගෙදරට කඹුරන්න ඇත්ද යන්න මීදුම නිකමට හිතයි. කල යුත්තේ මනාප චන්ද ක්‍රමය නම් ජරාවේ තවතවත් ගිලෙමින් දග ලන්න නොව ඉන් ජනතාව මුදවා ගන්න කතිකාවක් ඇතිකර ක්‍රියාත්මක තලයට පත් කිරීමයි .මානවහිතවාදී වන්නේ එවිට මිස, මානව හිතවාදී ලේබලයක් අලවාගෙන පජරෝ මොන්ටේරෝ, සිහිනතුල ජරාව කන්නට ඌරෙකු වීමෙන් නම් නොවේ. ජරාව කා සන්තෘප්තියට පත්වුවන්ම බලයට පත් කිරීමෙන් එක් යහපතක් සිදුවේ. උන් බඩ ගින්නේ ඉන්නා එවුන් තරමටම කෑදර ලෙස කෑම නොකන බැවින් කන ප්‍රමාණය පොඩ්ඩක් හෝ අඩුවේ.

Wednesday, September 23, 2009

මුතුහෙට්ටිගම සහ අනර්කලී

දකුණු පලාත් සභා මැතිවරණයේදී අනර්කලී නම් වරිතයේ වැදගත් කමක් නැති බව මීදුම නාමයෝජනා දුන් දිනයේම උපකල්පනය කලේය. දකුනේ දේශපාලනයට එජනිස යෙන් කරළියට පිවීසීමට ඕනෑ තරම් සුදුසු තරුණ තරුණියෝ සිටියදී අනර්කලී වැනි පියර බබෙකු වේදිකාවට ගෙනාවේ මන්දැයි මීදුම සැකයෙන් සිතන්නට විය.

දකුණු පලාත් සභා මැතිවරණය අනෙක් පලාත් සභා මැතිවරණ වලට වඩා කල් ගනිමින් ඇගිලි ගනිමින් සිට පවත්වන පලාත් සභා මැතිවරණයක් ලෙස එකල අදහස් පලවීද තිබිණි. රජය පියවරක් පිටුපසින් සිටියාවත්ද? සැකයෙන් දකුණ ගැන යන සාංකාව මීදුමට පහලවී තිබිණි. ඒ නිසා එජාපය ගුරු කොට ගනිමින් දකුණට පැරිෂුට්ටන් පැරිෂුට්ටියන් පාත් කරනු ලැබුයේයැයි මීදුම සැක පහල කලේය.

දැන් දැන් බලන විට ප්‍රවෘත්ති මවන්නත් අවධාණය වෙනතකට යොමු කරගන්නත් මුතුහෙට්ටිගම සහ අනර්කලී යොදා ගෙන ඇත්දැයි සැකයක් මීදුමට ඇත. යුද්ධයේ ජනප්‍රියතාවය වසා ගෙන පොලිසිය කරන ලද අකටයුතු කම් රජයට බැරවෙද්දී භාණ්ඩාගාරය, මහ බැංකුව ආශ්‍රීතවූ මුල්‍යමය අර්බූද IMF අවතැන් කදචුරු වලින් මතු වන අදෝනා වැනි වැදගත් කරුණු දේශපාලන වේදිකාවෙන් බැහැර කර දකුනේ වේදිකාවේ දෙමළ චිත්‍රපටියක් පෙන්න බවක් දිනපතා ප්‍රවෘත්ති බවට පත්කරමින් සිටින්නේද?.අපි මුතුහෙට්ටිගම සහ අනර්කලී ගැන අවධාණය යොමු කර කතා කරමින් සිටිමු .සියළු දෝෂ භංගව එජනිසය දකුණේ ඉලක්කය සොයා යනු ඇත.

මැතිවරණවලට අපේක්ෂකයන් ඉදිරිපත් කිරීමේ අයිතිවාසිකම බිම් මට්ටමේ සාමාජිකයන්ට නැත. නායකකාරකාදීන් ඉදිරිපත් කරන මැට්ටන් අතරින් මහජනතාව තමාගේ නියෝජිතයා තෝරාගත යුතුය. මැතිවරණ අපේක්ෂක ලැයිස්තුවක් ගෙන තෝරා බේරා ගෙන බැළුවොත් ඡන්දය දෙන්න කෙනෙක් ඉතිරිවන්නේ නැත. අපි තිත්ත කෂායක් බොනවා මෙන් චන්දය පාවිච්චි කරමු.ජනතා පරමාධිපත්‍ය නම් එයයි.

Sunday, September 20, 2009

දෙණියාය රජ මැදුර සහ ලංකා ඉරිදා සංග්‍රහය.

දෙණීයාය රජ මැදුරේ කතාවට පිවිසෙමු . සැප්තැම්බර් 13 වෙනිදා ලංකා ඉරිදා සංග්‍රහයට අනුව කතාව සැකෙවින් මෙසේයි. දෙණියාය ප්‍රදේශයේ ව්‍යාපාරිකයෙකුවු තුසිත රණවක මහතා දෙණියාය බෙවරළිය පාරේ නාතගල ‘ඒ’කොටස නම් වත්තේ නිවසක් ඉදිකරයි. එය මහා මන්දීරයකි. මීට අමතරව ඔහු රජ පවුලේ ඥාතිවරයෙකි. එම වත්ත මීට වසර දෙකකට පමණ පෙර විලී ගෲප් සමගමට අයත්ව තිබී තුසිත රණවක මහතා රුපි කෝටි දෙකකට මිළදී ගෙන තිබේ.එයින් එය ඔහුටම අයත් දේපලක් බව පැහැදිලි කරයි.මිළදී ගත් පසු ගස් තොගයක් කපා විකුණාගත් බවත් පල කරයි. තුසිත රණවක මහතාගේ නාතාගල වත්ත හරහා රාජ්‍ය වියදම් දරා ගෙන “මගනැගුම” ව්ය්‍යාපෘතිය මගින් මාර්ගයක් කොන්ක්‍රීට් කර සංවර්ධණය කරයි.
පසුවදන
පෞද්ගලික ඉඩම් ,පෞද්ගලික සමාගම් සහ රජයේ වැවිලි කළමනාකරණය කරන සමාගම් හරහා ඇති බොහෝ මාර්ග පද්ධති අර්ධ රාජය සංචිතයක් මගින් නඩත්තු කරනු ලබයි. මීට අමතරව ප්‍රාදේශීය සභා පලාත් සභා නඩත්තු කරනු ලබන මාර්ග පද්ධති මෙවැනි මහා පරිමාන වතු මැදින් ඉදිවී තිබේ. ගම් යාකිරීමේ අරමුන ඇතිව ඉදිකල මාර්ගද පෞද්ගලික ඉඩම් මැදින් ඉදිවී තිබේ.මේවා අදාල රාජ්්‍ය ආයතන මගින් රජයේ මුදල් යොදවමින් නඩත්තු කරයි. පෞද්ගලික දේපලක් සංවර්ධණය කරන අරමුනින් රජයේ මුදල් ආයෝජනය කරන්නේ නීති පොතේ අකුරකුදු නොදන්නා මෝඩයෙකු විය යුතුයි. රාජ්‍ය ප්‍රධානීන්ගේ ඉඩකඩම් ඇති ප්‍රදේශ ආසන්නයේ පදිංචිවී සිටීමට පින්කල යුතුය. එම ප්‍රදේශ වහා සංවර්ධණය වන අවස්ථා මීදුම දැක තිබේ. මාර්ග පද්ධති, විදුලිය වැනි යටිතල පහසුකම් අවට ගම්වාසීන්ට ඉල්ලීමකින් තොරව ලැබෙයි. මේ පහසුකම් හුදීජනයාට ලැබෙන්නේ ම වාසනාවටයි.

පෞද්ගලික ඉඩම් ,පෞද්ගලික සමාගම් සහ රජයේ වැවිලි කළමනාකරණය කරන සමාගම් වලට අයත්මාර්ග වල ගමනා ගමන පහසුකම් වැඩි දියුණු කර බස් රථ යොදා ඇති අවස්ථා මීදුම දැක තිබේ. මෙවැනි සංවර්ධණ ව්‍යාපෘතිවල අරමුණ වතු කම්කරුවන්ගේ ජීවන තත්වය ගොඩනැංවීමයි. රජයට අයත් මාර්ග ව්‍යාපෘතියක් බෙවර්ලි වතුයාය හරහා සංවර්ධණය කරනවානම් “මග නැගුම” රජයේ කොන්ත්‍රාත් කරුවන් මැදිහත් වීම අරුමයක් නොවේ. එසේ නොවී පෞද්ගලික ඉඩමකට අපේ බදු මුදල් සහ විදේශිය ණය මුදලින් රුපියල් කෝටි පහක් යොදවා තිබේ නම් එය හෙන ගහන අපරාධයකි. නීති විරෝධී ක්‍රියාවකි. අපට පුර්වාදර්ශ තිබේ. “වෝර්ටර් ඒජ්, රක්ෂණ සංස්ථාව’ හොදම උදාහරණ වෙති.

යාන වාහන බදු පදනමක් මත ගෙන සංවර්ධණ ව්‍යාපෘතියේ යොදවා ඇති බවත් මහත් මුදල් කන්දරාවක් බදු වශයෙන් ගෙවන බවත් , වාහන අංකත් සමග පුවත් පත වාර්තා කරයි. බොහෝ ව්‍යාපෘති වල බදු පදනමට ගත් වාහන යන්ත්‍රරෝපකරන යොදවා තිබේ. වාහන සංචිතයක් පවත්වා ගෙන යාම අධික පිරිවැයක් ලෙස සලකා මේ ක්‍රමය වසර කිහිපයක සිට රජයේ ප්‍රතිපත්තියක් බවට පත්වි තිබේ. මෙම ප්‍රතිපත්ති හිතවතුන්ට සැලකීම සදහාද යොදා ගනී.අනෙක් යානවාහන කෙසේ වෙතත් 30-8449 වැනි වාහන ගැන මීදුමට අත්දැකීමක් තිබේ. මීදුම රාජ්‍ය ආයතනයකට ටොයෝටා ලයිට් ඒස් වර්ගයේ වෑන් රියක් මාසික බදු පදනම යටතේ සේවයේ යොදා තිබිණි. ඒ අවස්ථාවේ මසකට කි.මි.1200ක් උපරිම ධාවන දුරක් සදහා රුපියල් 25000.00 ක් ගෙවනු ලැබු අතර ඉන් අතිරේක දුරක් ධාවනය කලවිට කිලෝමිටරයට රුපියල් 22.00 ක් බැගින් ගෙවනු ලැබුයේය.රියදුරු සහ ඉන්ධන මීදුමගේ වගකීම විය. මසකට දින හතරක් වාහනයේ නඩත්තුව සදහාද නිදහස් කෙරිණි. ඒ ගනුදෙනුව අනුව අබලන් බස්රථය ගරාජයක හෝ අතරමග නවතා තබාගෙන නැතිව සේවාවක යොදවා රුපියල් 40000.00ක් ගන්නවා නම් එය මෙකල වෙළදපොල මිලගනන් අනුව සාධාරණයකි. නැත්නම් මුලින් කීවා මෙන් එයත් හෙන ගහන අපරාධයකි.

කොළඹ -බදුල්ල මහා මාර්ගය සංවර්ධණය කරනු ලැබුයේ කොරියානු සමාගමක් විසිනි. මාර්ග සංවර්ධණ අවස්ථාවේ කිරිවැල්දොල,බටයාය රෝහල අසල ගම්මානය,වැනි ගම්මාන වල වැසියන්ට මෙන් අපටත් ජලනල මාර්ග තාවකාලිකව අබලන් වීම් නිවාස වලට ඇති පිවිසුම් මාර්ග අවහිර වීම් සිදුවී නොයෙක් ගැටළු ඇතිවිනි. ප්‍රාදේශීය ලේකම් .පොලිසිය වැනි ආයතන මැදිහත්වී ගැටළු නිරාකරනය ගැණිමට හැකිවු අවස්ථාද බොහොමයකි. දෙණියාය ප්‍ර දේශයේදී මෙවැනි අකටයුත්තකදී මැදිහත්වන්නට නිලධාරීන් නොමැතිවුවානම් එය කනගාටුවට කරුණකි. රජයේ පිලිගත් කොන්ත්‍රාත් කරුවන්ට එරෙහිව නිතිය ක්‍රිනයාත්මක කිරීම සිදුවිය යුත්තකි.

තුසිත රණවක මහතාගේ විවිධ බලපුළුවන්කාරකම් එක් පසකය. ප්‍රදේශවාසීන්ට සිදුවන අකටයුතු කම් අනෙක් පසය. ලංකා ඉරිදා සංග්‍රහයට සිදුවු හිරිහැරය සිදුනොවුනාම් මෙම මන්දීරයත් මාර්ග සංවර්ධණයත් ප්‍රවෘත්තියක් වන්නේ නැති ප්‍රවෘත්තියකි.

Tuesday, September 15, 2009

Anonymous ට ආරාධනාවක්.

හැම විටම චෝදනාවක් තිබේ. මීදුම අකලට පැසී ඇති බව පලමු comment එක පල කර නැවත දෙවන ඇසිල්ලේ තව වරක් comment එකක් පල කරමින් දුන්නා මදියයි සිතමින් තව වියමනක් කරයි. සිහිපත්වන සැමවිටම තව තවත් ප්‍රහාර එල්ල කරයි ඇයි ඔයතරම් ආවේගශීලි වන්නේ.ඉවසිල්ලෙන් කටයුතු කරමු.’අපි කදු වන්නේ කුමටද උනුන් පරයා නැගෙන -සුනිල දිය දහර වෙමු එකම ගගකට වැටෙන.’

මිදුම පරිසරයත් සමග තම ආකල්ප වල් පල් ලෙස දිග අරියි. Anonymous ට විද්‍යාත්මක සහ න්‍යාත්මක පසුබිමකුත් කලට මේරු බුද්ධි පරාසයකුත් ඇත. යහපත් හමුවු වීමකි. කාලය මිදුමගේ වැඩිහිටි බව දැනුවත් වීමට අවහිරයක්ද නොවේ. ක්ලේමෝ පුපුරන්නා මෙන් ප්‍රහාර එල්ල කර පරලොව යවනවාට වඩා අධ්‍යාපනයක් ලැබීම මීදුම අගේ කරයි.එයත් පුනරුත්ථාපනය වීමකි. යහපත් ආකල්පයෙන් අදහස් හුවමාරුවිම නිම් වලළු පුළුල් කර ගැණිමට හේතුවේ.අනෙක් වියමන් කරන සහෘදයින්ටත් තම තමන්ගේ ආකල්ප අදහස් නිවරදි කර ගැණිමට පරාසයක්ද ඇතිවේ. කොයිතරම් සුන්දරවේද ?.

අංකල් සීයා චමින්ද නොවී මීදුමටත් දැනුමෙන් තරුන වන්නට හැකිවේ. මීදුම ආච්චී සිහිපත් නොකරයි. ඈ හමුවුදා සිට පිහිටුවා ඇති විධායක මොඩලයේ ආණ්ඩුවේ ඈ ප්‍රධානියාය. විධායක ජනාධිපති තනතුරේ ස්වරූපය කවුරුත් හදුනති. ඒ නිසා ආච්චී පැත්තක හිටපුවාවේ.

මිදුම සමග Anonymous වර්තමාන දේශපාලනය පිළිබදව, ජනවාර්ගික ප්‍රශ්නය ලෙස හදුන්වන ගැටුම පිළිබදව පරස්පරයක් ඇතිවී තිබේ. මීදුමට ඇත්තේ වල්පල් විග්‍රහයකි. එය Anonymous දකින්නේ ඊට වඩා පුළුල් අර්ථයකිනි.පරාසයකිනි.පරන වියමන් පැත්තක තබා අපි අළුතින් වියමන් කරමු .අදහස් බෙදා ගනිමු.

මිදුම දරන මතයක් සටහන් කරමු. මේ අදහස් කාලයා ඹළුවට දමා ඇති වල්පල් අතර රැදුනකි.1956 බණ්ඩාරනායක බලයට පත්වීම, 1971,1989 ජනතා විමුක්ති පෙරමුනේ පිබිදීම සමාජය, දේශපාලනය ගමන් ගත් දිසාව වෙනස් කල සංසිද්ධි දෙකක් විය. එමෙන්ම LTTE සංවිධාණයේ සටන් කාමී අරගලයද අපේ ගමන් මග වෙනස් කලාය. අපිට ඒ අනුව වෙනස්වන්නට අනිවාර්යෙන් බලපෑම් ඇති වෙමින් පවතින බව සටහන් කල යුතුමය.මේ අතරට බොර දියේ මාළු බාන ජාවාරම්කාර සංවිධාණද ඇති බවත් සිහි කටයුතුය.

Monday, September 14, 2009

මාධ්‍යය නිදහස...........Anonymous වෙතටයි.

මිදුම කිසිවිටකත් අපහාසව කිසිවෙක් අමතන්නේ නැත.අදහස් එක් එක් අයට විශේෂිතවු මනසින් යුත් පදනමකින් පලවෙයි. තිස්සනායගම් සිද්ධියේ ලංකා ඉරිදා සංග්‍ර හයේ පත්‍රකලාවේදීන්ගේ සිද්ධියේත් මීදුම තම අදහස විනීතව පලකලාය. අන් අයට මඩ ගසන්නට පෙර තමන්ගේ අතේ මඩ තැවරෙන බව Anonymousලා සිතා ගත යුතුය.

Anonymousට මීදුම පලකල අදහස්වලට ප්‍රති උත්තර සපයන්නේ අධික කේන්තියකිනි. එසේ කරනවාට වඩා තර්කානුකුලව මීදුම ඉදිරිපත් කල කරුණු බිද දමන්නේ නම් මිදුමත් Anonymousගේ පිලිගතයුතු අදහස් පිලිගන්නට මැලි නොවනු ඇත.
උතුරේ ගැටළුව පිලිබදව මිදුම දරන මතය ඒ ආශ්‍රිතව මිදුම ලියු වියමන් වලින් පැහැදිලි කර ගතයුතුය. හුදකලාව එක් සිද්ධියක් පදනම් කර ගෙන සද්දය දැමීමෙන් Anonymousගේ ඉක්මන්විම මිදුම අනුකම්පාවෙන් යුතුව සිහිපත් කරන්නකි.
සන්සුන්වන්න. අන් අයට සවන් දෙන්න.ඔබේ අදහස් පැහැදිලි කරන්න. මබේ මතය ගැලපේ නම් අපත් ඔබේ හඩට එකතුවෙනු ඇත.නැතිව අන් අයගේ මතවාද වෙනස් කර තම මතවාද අන් අයට පැහැදිලි කරදිය නොහැක. මීදුම සීයා කෙනෙක් අංකල් කෙනෙක් චමින්ද කෙනෙක් වුයේ Anonymousලාගේ කාලය පසුකරගෙන ගොස් අත්දැකීම් ලැබීමෙන් පසුව බව සටහන් කර තබනුයේ ඒ කාලයට එන්න අධි වේගයෙන් ගිය හොත් Anonymousට නොහැකිවේයැයි සිතන බැවිනි.

මීදුමටද දේශපාලනයක් තිබේ . එය විටෙක කොළ පාටයයි මීදුම කියවන සහෘදයෝ අර්ථ කතනය කර තිබේ. විටක නිල් පාටද දැයි විමසා තිබේ. තවත් විටක රතු පාටදැයි අසයි.

මීදුම වියමන තුල මේ හැම පාටම නියෝජනය කරයි.ඒත් සැබැ අර්ථයෙන්ම පලමුවත් දෙවනුවත් තෙවෙනුවත් මව් බිම යන තේමාව මීදුම අගේ කරයි. අනුගමනය කරයි. සමහර අවස්ථාවල අන් අය එසේදැයි මීදුම ප්‍රශ්න කරන්නේ කතාව පමනක් නොව ක්‍රියාවත් මීදුම අගේ කරන බැවිනි.

Thursday, September 10, 2009

මාධ්‍යය නිදහස නැත්තේ ජන සමාජයටයි.

තිස්සනායගම් නඩු තීන්දුව සහ ලංකා සති අන්ත පුවත්පතේ මාධ්‍යවේදීන්ගේ සිද්ධිය නිසා මාධ්‍ය නිදහස ගැන කතිකාවක් මේ දිනවල නිර්මානය ව ඇත. මාධ්‍යකරුවන් 100%ක් නිවරදිව, අපක්ෂපාතව හැසිරෙනවාද යන්නත් අපේ රටේ අධිකරනය හැර අධිකරනයට කරුණු කාරනා ඉදිරිපත් කරන ආයාතන නිවරදිව හැසිරෙනවාද යන්නත් මීදුමට ඇති ගැටළුවකි.

තිස්සනායගම්ට එරෙහිව ඉදිරිපත්ව තිබු චෝදනා සාධාරණ සැකයකින් තොරව සනාථ කරවු නිසා නීතී පොතේ අනුරුපවු නිර්නායකයන්ට සමානුපාතිකව මේ වරදට මෙපමණයි යනුවෙන් අවුරුදු විස්සක සිරදඩුවමකට ඔහු යටත් කරවීය.තිස්සනායගම් පාර්ශවයෙන් ඔහුට එරෙහිව නගා තිබු චෝදනා අසත්‍ය නම් නිරවද්‍යතාවය තහවුරු කිරීමට හැකියාව තිබූ බැවින් එසේ අධිකරනය හමුවේ කරුණු කාරනාද ඉදිරිපත් කරනු ලැබීය. එහෙත් එම කරුණු ද තිස්සනායගම්ගේ ක්‍රියාකලාපය තහවුරු කරන්නක් වු බව “දිවයින සදුදා වම් ඉවුර” ( සී.ඒ.ප්‍රේමචන්ද්‍ර) ලිපියක පලවී තිබුන බව මීදුමට මතකය.එසේ වී නම් තිස්සනායගම් අපේ රටේ නීතිය උල්ලංඝණය කරමින් කටයුතු කල පුරවැසියෙකි.ඔහු කල වරදට දඩුවම් විදීම ඔහු සිදුකල යුතුය. එසේ නොවේ නම් වැරදි පූර්වාදර්ශ ලැබ රටේ සිටින සියළු තිස්සනායගම්ලා ආයාලයේ යන්න පටන් ගනු නොඅනුමානය.
තිස්සනායගම්ට එරෙහිව කටයුතු කිරීම මාධ්‍ය නිදහසට - ලිවීමේ නිදහසට - කතාකිරීමේ නිදහසට එරෙහිව යාමක් ලෙස මීදුමට සිතුනේ නැත.

‘ලංකා’ සති අන්ත පුවත්පතේ මාධ්‍යවේදීන්ගේ සිද්ධිය අධිකරන කටයුත්තක් බවට පත්වී ඇති බැවින් මීදුම ඒ පිලිබදව අදහසක් පලකිරීමෙන් වලකනු ලැබේ. රනිල් වික්‍රමසිංහයන් පාර්ලිමේන්තුවේදී ප්‍රකාශ කරනු ලැබුයේ දෙනියායේ වත්තක හදන කුස්සියේ පොල් බිදින හඩ නිවස ඇතුලට ඇසීම වැලක්වීම පිණිස sound proof කුස්සියක් හදන බවකි. අනවසරයෙන් කුස්සියට ඇතුල්වීමේ වරදට අනවසරයෙන් ඇතුළුවීම යන චෝදනා මත නඩු පැවරීම කල හැකි බවත් ත්‍රස්තවාදී විමර්ශණ ඒකකය මගින් ප්‍රශ්න කිරීම පමනක් ප්‍රශ්නකාරී බවයි.එක්සත් ජාතික පක්ෂසයේ සාගල රත්නායක මහතා ගේ චෝදනාව වන්නේ දෙනියාය පොලිස් බල ප්‍රදේශයේ ජනාධිපතිවරයාගේ සොහොයුරියකට අයත් වත්තක රාජ්‍ය දේපල යොදා ගෙන කරන ලද ඉදිකිරීමක් වාර්තා කිරීමට අනවසරයෙන් මෙම වත්තට ඇතුල්වීම නිසා මෙම අකරතැබ්බය වූ බවකි.මාධ්‍යවේදීන් තිදෙනා මේ වන විට ඇප මත මුදා හැර තිබේ.

ජීවිත තර්ජනයකට මුහුනදී සිටින ජනාධිපතිවරයාගේ ආරක්ෂාමව ගැන වග බලාගැණිමද වැදගත් කටයුත්තකි.දකුණු පලාත් සභා මැතිවරණ සමයේ මෙවැනි ප්‍රවෘත්තියක් නිර්මාණය කර ගැණිම අමුම අමු මඩ ප්‍රහාරයකට හොද අමුද්‍රව්‍යයක් ලෙස මීදුම සිතයි.ප්‍රවෘත්තියේ ඇත්ත නැත්ත හෙළිවන විට කෝච්චිය ගොස් හමාරවේ.එතෙක් ප්‍රහාරය බලවත්ව ක්‍රියාකරයි.

පසුගිය කොටි බලවත්ව සිටි සමයේ යම් යම් මාධ්‍ය හැසුරුන අයුරු මීදුමට හොදින් මතක තිබේ. හමුදාවට දරුවන් බදවා ගැණිමට අවහිර වන අන්දමින් දිනපතා සහ සතිපතා පත්‍ර යුද්ධයේදී මියයන වීරෝධාර හමුදා සාමාජිකයන් ගැන දුක ශෝකය ජනිත කල ලිපි නොකඩවා පලකෙරිනි. යුද්ධය අනර්තකාරී විනාශයක් බව ජනතාව තුල පැල පදියම් වීමට බීජයන් වැපරීනි.යුධ විශ්ලේෂන කල ලේඛකයෝ කොටි පුම්බමින් අපේ හමුදා දුර්වල බව කීවෝය .නොයෙක් උපදෙස් දෙමින් විවිධ ආයුධ ගැනත් ඒවා මිළදී ගත යුතු රටවල් ගැනත් ලීවෝය. හමුදාවේත් මෙම යුධ විශ්ලේෂකයෝ තරම් ප්‍රවීනයන් නැති බව මේ ලිපි කියවන විට මීදුමට නිතර සිත්විනි.

මාධ්‍යකරුවෝ ජරාජීර්නවු දේශපාලන මඩවලේ මඩකරියන් (මඩේ සිටින මසුන් විශේෂයකි. ) ලෙස හැසිරෙති.අලවිය සහ පාඨකයන් පරමාර්ථ කරගත් මාධ්‍ය කලාවක් අපේ රටේ ඇත්තේම නැත.පිටපත් අලවියත් දැන්වීම් අලවියත් සිදු කරමින් ලැබෙන ආදායම පදනම් කරගෙන පමනක් පවත්වාගෙන යන ප්‍රවෘත්ති පත්‍ර ලංකාවේ ඇතිනම් ඒවා එක් අතක ඇගිලිවලටත් අඩු විය හැක. අනෙක් පත්‍ර පිටපත් අලවිය හා ඒවායේ දැන්වීම් පලකරන ආයාතන ප්‍රමානය සලකා බැළුවහොත් එම ආයතන පවත්වා ගෙන යාමත් විස්මජනකය. එම පත්‍ර ආයතන පවත්වා ගෙන යාමට කවුරුන් හෝ ආර්ථික ලාභයක් නොලබා ආයෝජන කල යුතුය.ආර්ථික ලාභයක් නොලබා දිගින් දිගටම ආයෝජන කලහැකි අයෙක් සිටිය නොහැකි බැවින් ඒවා පවත්වා ගෙන යන්නේ යම් යම් දේශපාලන සංවිධාන වල අරමුණු තකාවිය යුතුය.නැත්නම් මාධ්‍යය පතාල අරමුණු උදෙසා විය යුතුය.රුපියල් මෙන්ම ඩොලර් වලින්ද යැපෙන මාධ්‍ය කරුවෝ මෙන්ම මාධ්‍යය ආයතනද ඇතුවා විය හැක.

සැබැවින්ම මාධ්‍යකරුවෝ ජනතා මිත්‍රයෝ නොවෙති. පුවත්පත් ,සතිඅන්ත පුවත් පත්, වාරසගරා වැනි මාධ්‍ය මෙන්ම විද්යුත් මාධ්‍යයද සේවය කරනු ලබන්නේ ජනතාවාදී අරමුණක සිට නොව තම හාම්පුතුන් ගේ අරමුණු මත සිටය. ආයාතනික මට්ටමේ සිටම මාධ්‍යයට නිදහසක් නැත. මේ නිසා මාධ්‍ය නිදහස ඇහිරී ඇත්තේ ප්‍රකාශණයේ හෝ භාෂණයේ නොව අපට කියවීමේදී සහ ඇසීමේදී යයි සිතන්නට සිදුව ඇත.
මාධ්‍යකරුවන් හැසිරෙන රටාවට මීදුම දොස් නගන්නේ නීතිය කරවන ඇත්තන්ටය. අපේ රටේ නීති පද්ධතිය ස්ථාපනයවු දා පටන් වැරදි නිවරදි යන තීරු දෙකක් පිලිබදව නිර්නායකයන් ඇතිවිය.වැරදි තීරුව අනුගමනය කරන්නන් නීතිය ඉදිරියට පත් කිරීමත් වැරදිකරුවන් දඩුවමට ලක්වීම නිසා අනාගතයට නිසි පුර්වාදර්ශයන් සමාජය තුල ඇතිවීමත් සිදුවන්නක් විය. එහෙත් කල් යත්ම බූවල්ලෙකු ලෙස ජරා දේශපාලනය සෑම අංශයක්ම වෙලා ගත් හෙයින් මේ තීරු දෙක අතරට පක්ෂ හා විපක්ෂ යන තවත් කැළැ ( වල්) තීරු දෙකක් එකතුවිය.
අධිකරණය සර්ව ස්වාධීන වුවත් අධිකරණයට ඉදිරිපත් කරන පැමිණිලි අනුව කටයුතු කරනවා විනා වැරදි හඹායාමේ ස්වභාවයක් අධීකරණයට නැත.අධීකරණයට පැමිණිලි ඉදිරිපත් කරන පාර්ශවය දේශපාලන බූවල්ලන්ගේ ග්‍රහණයට පත්ව ඇති බැවින් තමන්ට විරුද්ධ කොටස සමාජයට කරන අසාධාරණය සහ වැරදි අධිකරනයට යොමු වන අතර තමන්ට පක්ෂපාත කොටස සමාජයට කරනා අසාධාරණය සහ වැරදි දකින්නේ නැත.පාතාලය මෙන් ම මාධ්‍ය පාතාලයක්ද බිහිකරනු ලැබුයේ මේ දේශපාලන බූවල්ලන් මිස අන් ක‍වරෙකු විසින් නොවන බව නම් පැහැදිලිය.

යම් පාලකයෙක් සත් භාවයෙන් සහ සාධාරණයෙන් යුතුව නීතිය ක්‍රියාත්මක වන්නට ඉඩ හරිනවා නම් කාලයක් යන විට නීතිය ස්ථාවරවනු ඇත. එවිට ත්‍රස්තවාදය පාලනය කරගත්තාක් මෙන් කොයි කෙරුමාත් නීතියට බියවනු ඇත. නීති ගරුකව සමාජය ස්වයංක්‍රීයව හැසිරෙන්නට ගත්විට මාධ්යන කරුවන්ටත් එය පොදු න්‍යා යක්ව නීති ගරුකව හැසිරීම නිසා අපේ රටේ මාධ්යට නිදහස ඇති බව ඔවුන්ටත් අපටත් තේරුම් යනු ඇත.එතෙක් කොටසකට පමනක් යම් නිදහසක් ඇති බව දකිනා විට අනෙක් පාර්ශවයට නිදහසක් නොමැති බව දර්ශණය වීම වැලක්විය නොහැක.

Sunday, September 06, 2009

සුන්දරව නොවු මරණයද සුන්දරයි.

මිතුරන් ඇති කරගන්න නම් පලමුව තමන් හොද මිතුරෙකු විය යුතු යැයි කියමනක් ඇති බව මම අසා ඇත්තෙමි. මේ කියමන සිහිවී එක් සිද්ධිමය වටිනාකමක් අසල මම නතර වුනෙමි. මට ඥාතිවරයෙකුගේ අකල් ජීවිත සමාප්තියකට සහභාගි වන්න සිදුවිය. ඔහු සිගිති පුතාත් ආදරණිය බිරින්දෑත් සදාකාලිකවම අතහැර ගිය ඒ ශෝකා කූල ගමනේදී සැබැ මිත්‍රයෙකුයැයි තහවුරු කල සාධකයන් ජීවමාන වන්නට විය.

ඔහුට මා වැඩිහිටි ඥාතිවරයෙකු පමනක්ම විය. කලාතුරකින් මුණ ගැසුන අපි වැඩිහිටි පවුර විසින් දෙපසට වෙන් කල චරිත බවට පත් කර තිබිණි. එහෙයින් දෝ අප අතර විශේෂවු සම්බන්ධතාවයක් ඇතිවී තිබුනේ නැත.මට අවසන් වරට ඔහු හමුවු දවස සිහිපත් විය. ඔහු ඥාතීයෙකුගේ විවාහ මංගල්‍ය උත්සවයක තම බිරින්දෑත් සමග සහභාගීවී සතුටු සාදයක අපුරු රංගනයක සහ ගායනයක යෙදෙමින් සිට කවුරුත් අතර ප්‍රසාදයට පත්විය.එදා මගෙන් සමුගත් ඔහුගේ දෙවුර බදා තෙරුවන් සරන පතා ආශිර්වාද කලා මට සිහිපත් විය. ඉන්පසුව මා ඔහු මුණ ගැසෙන විට අනතුරකට ලක්ව රෝහලේදී තම ජීවිතය අතහැර ගොස් සිටියාය. සමීප ඥාතීන් කම්පිතව හා අසරනව සිටි ඒ මොහොතේ සිටම මෙතෙක් හදුනා නොගත් ඔහුගේ ජිවිතය හදුනා ගැනීමේ අවස්ථාව මට නිර්මාණය විය.

මහා විශාල ධනවතෙකු හෝ සමාජයේ ඉහල තලයක වැජඹෙන වෘත්තියක් නොකල ඔහු වැවිලි සමාගමක ඉඩම් වාහනයක රියදුරෙකු ලෙස සුළු යයි සිතන රැකියාවක නිරතවිය. ඔහු තවමත් තමන්ට කියා නිවසක් ඉදිකරගන්නවත් නොසිතූ සිතන්නට බැරි ජීවන අරගලයක නිරත වෙමින් වතු සමාගම සැපයූ නිවාසයක තාවකාලික පදිංචිකරුවෙකු විය.තවත් ඔහුගේ ජීවන අරගලය පැහැදිලි කල යුතු නැත. ඔහු සමාජයේ ධන සිට සෲණ දක්වාවු පරපුරකට හිමිකම් කීවත් පම්පෝරියකින් තොරව ජීවත්වු බව නම් මට ඔහුගේ අසල්වාසීන්ගේ මත වාද තහවුරු කලාය.

මේ පුංචි මිනිසාගේ අකල් සමුගැන්මේ පුවත ඇසු වතුකරයේ ද්‍රවිඩ ජනතාවද ,සියළු තරාතිරමේ සිංහල ගම්වාසීන්ද විවිධ ආගම්වල ආගමික පුජකවරුද පාසල් සිසු සිසුවියන්ද විටින් විට පැමිණ අජීවි ඔහුට ආචාර කරමින් ශෝකාකූලව මුමුනමින් ඔහුගෙන් සමුගත්තේය. දෙදහසක් පමන ජන ගගක් දෙදිනක් තුල රැස් කර ගැනීමට මේ පුංචි මිනිසාට තිබුන ශක්තිමත් බවේ හේතු පාදකත් ඔහුගේ ආකර්ෂනයත් සොයමින් මම මේ අතරටවී කම්පිත මනසින් යුතුව බලා සිටියේය. දරුවාගේ සහ සහ අසරනවු තරුන බිරිදගේ අවිනිශ්චිතවු අනාගතය ගැන සිතනා විට තව තවත් සිත පීඩාවට පත් කලේය.

ඔහු අනේක විධ ජීවන දුෂ්කරතා මැද උවද , ජීවත්වු සමාජය තුල සිනහවත් සුන්දර කතාවත් අතහැර දමා නොතිබිණි. කිසිදා ‘නැත’ යන්නත් ‘බැහැ’ යන්නත් ජිවිතයට ආදේශ කරගෙන නොතිබුන මේ පුංචි මිනිසා හට අයදුම් කල පුංචි උදව්වක්වත් කිසිදා බැහැර කරන්නට සිතක් නොතිබිණි. මේ ගුණාංගයන් ජීවත්වු පරිසරයේ ඔහු මහා විශාල මිනිහෙකු බවට ඔහු පත්කර තිබෙන බව මම ගලන ජන ගග දෙස බලමින් තේරුම් ගත් කාරනාවක් විය.

මිනිසෙකු මසුරු කමින් ජීවිත කාලයක් රැස් කළ මහා මුදල් සම්භාරයකට නොකලහැකි බොහෝ දේ ඔහුට මරණයෙන් පසුවත් කලහැකිව තිබිණි. මරණය ප්‍රදේශයම කම්පා කල පුවතක්ව දෙනෝ දහසක් ජනයා ඔහු අබියස කිසියම් ප්‍රාර්ථනයක නිරතවී “මොහු නැවත අප අතරට පැමිනේවා”යි ප්‍රාර්ථනා කලාද විය හැක.

ඔහු හොද මිතුරෙකුව සිට බොහෝ මිතුරන් එක් රැස්කර ගෙන සිටි බැවින්දෝ අකල් සමුගැන්මෙන් අසරනවු බිරිදට හා දරුවාට පිලිසරනක් නිර්මානය කරදෙන්නට බලකරනා පසුබිමක් ඔහුගේ මරණයෙන් පසුව උපත ලබා සිටියේය.ඔහු ගේ සේවාදායකයා ඔහු ගෙන් වෙන්ව යන්නට නොහැකි යුතුකමක් තිබු බැවින්දෝ දරුවාට සහ බිරිදට රැකවරනය සැලසීමට රැකියාවක් සහ රාජකාරි නිවස පැවරීමෙන් තහවුරු විය.
මුදල් පමනක් අගයන සමාජයක මේ අපුරු මිනිසා ලබා තිබු සමාජ වටිනාකම් මිළ මුදලින් නම් කවදා වත් උපයා ගත නොහැකි බව මට ඉන්පසු පසක් වු කාරනාවක් විය.සුන්දර නොවු මරණයද සුන්දරවු මිනිසුන්ගේ මරණයෙන් මතුවද සුන්දර වන බව සටහන් වන්නේ එබැවිනි.

Wednesday, September 02, 2009

අනර්කාලි සහ කාලි



බාල සිනමාවේ චරිත දේශපාලනයට පිවිසෙන්නේද දේශපාලනයද බාල නිසා යයි මීදුමට සිතිනි.

සබරගමුවේදී නන්තාරව සිටි එජාපය රන්ජන් රාමනායක නිසා පිබිදුනා යයි යමෙක් සිතන්නේ නම් එය මුලාවකි. වෙනසක් නොවී අදත් සබරගමුවේ එජාපය නන්තාරව ඇත. රන්ජන් රාමනායක රත්නපුර දිස්ත්‍රික් අපේක්ෂ්කයාව එජාපයට අළුත් චන්ද එකතු කලේ නැත. සම්ප්‍රදායිකව එජාපයට ලැබුන චන්ද වලින් කන්ඩායම් නායකයා වශයෙන් දිස්ත්‍රික්කය පුරාවට එක් මනාපයක් ලබා ගැනීමට වාසනාව පාදා ගත්තා පමනකි. එදා සබරගමු පලාත් සභාවට රන්ජන් රාමනායක ඉදිරිපත් වු විට ඇද කුද දුටු පොදු ජන එක්සත් පෙරමුණ අද තම චන්ද පදනමට තරු පෙන්වමින් සිටී.

මීදුමට රජවාසල සිහිවිය. රජ කතා කියවන විට අසන විට රජතුමාට පුරෝහිත ඇමතිවරු මෙන්ම අන්දරේ වැනි කවටයෝද සිත් පිනවන නාට්‍යාගනාවෝද සිටි බව කියවන්න අසන්න ලැබේ. දැනුත් එවන් රජ කාලයක් පහල වෙමින් තිබෙන්නේද?.වාසල විකටයන්ගෙන් නාට්‍යාගනාවන්ගෙන් වාදක කණ්ඩායම් වලින් ගායක ගායිකා වන්ගෙන් පුරවා ගත් විට ජනතාවට විනෝදයෙන් සතුටෙන් කාලය ගත කලහැකියයි සිතනවා විය හැක.
නැත්නම් වේදිකාවේ මාතෘකා නොමැතිව සිටින ජවිපෙයට සහ එජාපයට මාතෘකා සපයා දෙන්නට පොදු ජන එක්සත් පෙරමුණ සිතුවා විය හැක.

එජාපයට කවුරුන් මොනවා කීවත් ස්ථීර සාර චන්ද පදනමක් ඇත. තනි පක්ෂයක් වශයෙන් අදත් එජාපයට අභියෝග කලහැකි දේශපාලන පක්ෂතයක් නැත. එහෙත් අද තම චන්දදායකයින් චන්ද පොලට ගෙන්වා ගැනීමට සමත් වැඩ පිලිවෙලක් සහ නායකත්වයක් නොමැති කමින් එජාපය බින්දුවට බැස ඇත. එජාපයේ වර්තමාන නායකත්වයේ බාල උපක්‍රම කොපි කිරීමෙන් පොදු ජන එක්සත් පෙරමුණ සංවර්ධණය කරගැනිමට යාම නම් නුවනට හුරු නොවනු ඇත.
එජාපය චන්ද පදනමෙත් පොදු ජන එක්සත් පෙරමුණ වටා එකතුවන අර්ධ වාමාංශික චන්ද පදනමෙත් සිතුම් පැතුම් සමාන කල නොහැක.

මීදුම පුංචි පහේ සමීක්ෂණයකට අනර්කාලි ඉදිරිපත් කරනු ලැබුවාය අනර්කාලි ආකර්ෂණය කරගන්නා තරුන කොටස ඉලක්ක කරගනු ලැබු මේ කතා බහේදී ඔවුන්ගෙන් වැඩි දෙනෙකුන්ගේ මතයවූයේ වර්තමාන පොදු ජන එක්සත් පෙරමුණේ සංයුතිය යම් විකෘතියකට භාජනය වෙමින් තිබෙන බවය. පොදු ජන එක්සත් පෙරමුණට චන්දය දෙන ඡන්දදායකයින්ගේ දේශපාලන මානසිකත්වය ගොඩනැගී ඇත්තේ දේශමාමකත්වය පදනම් කරගත් අඩිතාලමක් මතය. ඔවුන් මනසින් දේශපාලන නායකත්වයට සුදුසු පුද්ගලයින්ගේ අධ්‍යාපනය ගතිපැවතුම් සමාජ සම්බන්දතා තක්සේරුවට ලක්කිරීම සිදුකිරීම අනිවාර්යෙන්ම සිදුකරනු ලබන්නේය. දකුනේ දී මේ නිර්නායක විශේෂයෙන් ක්‍රීයාකාරීය.

අනර්කාලි වැනි චරිත දකුණත් සමග බද්ධ වන්නේ කෙසේද?. ඈ පදිංචි කොළඹය. දකුනේ ජනතාව සමග ඈ කොතෙක් කාලයක් සමාජ සේවා කටයුතු වලට සම්බන්ධවී සිට ඇත්ද?.මහජන නියෝජිත වරයෙකු වශයෙන් චන්දයෙන් දිනුවොත් මහජනතාව සමග පවත්වා ගෙන යා හැකි, අනාගත සමාජ ක්‍රියාකාරිත්වය ගැන විශ්වාසයක් තැබිය හැකිද?. යන කරුණු චන්ද දායකයා හිතුවොත් අනර්කාලිට මනාප නැතිවනු ඇත.
සෙලොලයිට් පටයක, රූපවාහිණි විකාරයක බැරි සිංහල උච්චාරනයෙන් නැලවෙන විගඩමකට මනාප අයනම් ඈ හට මනාපවනු ඇත. එවැනි විකාර මනසින් යුත් චන්දදායකයින් ඇත්නම් ඒ සීමිත ප්‍රමානයක් වනු ඇත.රන්ජන් රාමනායකගේ පැරචුට් ගමන අනර්කාලිට දකුනේ ආදේශවුනේ පොදු ජන එක්සත් පෙරමුණ දකුනේ දි පසුබෑමකව ලක්වී ඇති බව නිරීක්ෂණය විමෙන්ද?.

දකුනේ ජනතාවගෙන් ඉදිරියට එන දේශපාලන අංකුර වලට පොදු ජන එක්සත් පෙරමුණ තුල ඉඩ කඩ අහුරා මෙවැනි විගඩම් දේශපාලන කරලියට ගෙන ඒම එජාපය ගමන් කරන අන්ධකාරයට පොදු ජන එක්සත් පෙරමුණත් ගමන් කරවීම ආරම්භ කර ඇති බවට ඉගිකරන්නක් ලෙස මීදුමට සිතිනි.
“කාලිය” නම් විනාශය සංකේත කරවන යක්ෂ ණියකි.

Tuesday, August 25, 2009

අතීත ආවර්ජනයක් .



මට මගේ ජීවිතයේ අතීතයට යන්නට අහම්බයක් පසුගියදා නිර්මාණය විය. උතුරු මැද පලාතට වසරක් දෙකක් පෙරුම්පුරා ගිය ගමනකදී මට මගේ වැඩිමහල් ඥාතී සහෝදරයා හමුවිය. දකුණත් සබරගමුවත් උතුරු මැද පලාතත් යා කල කථාවකට මේ හමුවීම මුලපිරවීය.

මේ අතීත කතාව ගම්පෙරළියේ ජිනදාස ඉසුරු සොයා උඩරටට ආ කාලයේ සිට පටන් ගන්නකි. දකුනේ උපන් ම‍ගේ පියානන් ජිනදාසගේ යුගයේ රැකියාවක් සොයා උඩරටට පැමින සබරගමුව පලාතේ මධ්‍යම කදුකරයේ බස්නාහිර බෑවුමේ ගමක ස්ථාන ගත විය.අපි ජීවය ලබන්නේ ඒ ගම්පියසේ දීය.අපට ගමක් නොවීය. පියා උපන් ගමට උරුමකම් කීවද එකල අපට තිබූ පහසුකම් තුල ඒ බව තහවුරු කර ගැණිමට නොහැකිවිය. පසු කාලයේ අපි පියා ගොඩනගා දුන් මවගේ ගම අපේ ගම විය. පාරම්පරික උඩරට - පහතරට බේදය තුල පීඩාවට පත්ව සිටි අපහට ඒ පීඩාවන් ජයගැනීමට පියා බලවත් අරගලයක යෙදුනාය. පසු කලක අපි පිලිගත් උඩරැටියෝ බවට පත්විය.

මමත් මගේ ඥාති සහෝදරයාත් ජීවිතයේ ඉම සොයමින් යන ගමනේ මට වඩා වසර දහයක් දොලහක් ඉදිරියෙන් ඔහු ගමන් කරමිනි සිටී.මගේ පියා ඔහුගේ බාප්පා වුවත් දෙදෙනා අතරේ එකල පැවතියේ පිය පුතු සම්බන්ධයකට සමිප බැදීමක් ලෙසින් කුඩා කල සිට මම හදුනා ගෙන සිටියෙමි . දෙදෙනාම ජිවන අරගලයට මුහුන දෙමින් එකිනෙකා සැතපුම් තුන්සියයක් පමන ඈත සිට ඔවුනොවුන්ගේ පෞද්ගලික ජීවිතවල දුක්ඛ දෝමනස්සයන් එකල සන්නිවේදන මග වු ලිපි මගින් නිතර නිතර හුවමාරු කරගත්තා අතිත මගේ මතකයන් තුල තවමත් රැදී ඇත. ගමන් බිමන් දුෂ්කර වු ඒ අවධියේ ඔවුනොවුන් හමු වුයේ වසරකට දෙකකට වරකි. නැත්නම් උග්‍ර ජීවිත ප්‍රශ්නයක් මතුව නිරාකරනය කරගන්නට සිදුවු විටකදී ඔහු මගේ පියා සොයා අවාය.
ඔහුද මගේ පියා මෙන් උපන් දකුණ අතහැර ආර්ථිකය සොයා අහඹු පර්යේෂණයක යෙදෙමින් තැනින් තැන ඇවිද සිටිනා අතර ගුරුවරයෙකු ලෙස පලමු පත් වීම උතුරු මැද පලාතට ලැබුවාය. ඔහු මගේ පියා සමග ගුරු තනතුරේ වැඩ බාරගැණිමට නියමිත පාසලට ගියාය. නවාතැනක් සොයමින් ගිය ඔවුනට කඩ පිලක නතරව තොරතුරු හුවමාරු කරමින් සිටිනා විට එතනට ආ ගම්වැසියෙක් “ අහ් බොල මේ අපේ මස්සිනා නේ” යයි මගේ පියා හදුනා ගෙන උනුසුමින් පිලිගැනීමෙන් ඒ ප්‍රශ්නය නිරවුල් කර දුන් බව ආපසු ආ මගේ පියා ගමන් විස්තර කියන අතර අපට කීවාය.
පසු කලක ඔහු, අහම්බයෙන් හමුවු මාමා සෑබෑ මාමා කර ගත් බවත් මගේ පියා සරදමින් ඔහු ගැන සදහන් කරනවිට නිතර සිහි කලාය.ඔහුද මගේ පියා සබරගමු පලාත අත් නොහැරියාක් මෙන් උතුරු මැද පලාත අත් නොහැර වෘත්තීම ජයග්‍රයහණ ලබමින් අධ්‍යාපන නිලධාරිවරයෙකු බවට පත්ව විශ්‍රාම ලැබීය.
කාලය ගෙවීයමින් මගේ පියාද කම්වු පරිද්දෙන් අප අතහැර ගියාය.කාලයා මපියා සහ ඔහු අතර ගොඩා නගා තිබු ඥාතිත්ව යේ පවුර අප දෙදෙනා අතර වඩාත් තහවුරුව ගොඩ නැගුවාය. අද අප නවීන සන්නිවේදන ඔස්සේ අපේ වර්තමානය සාකච්ඡා කරමින් සිටින්නෙමු. තොරතුරු , ජීවන ප්‍රශ්න සාකච්ඡා කරමින් විසදුම් සොයා ගැන්මට උත්සහා දරමු.එදා මගේ පියා සමග යෞවනයේ ගැට මුසු ජීවිතය කතා කරමින් සිටි ඔහු අද මා සමග බෙදා ගන්නේ වියපත් වියේ අර්බූදයන්ය.

විශ්‍ර මික ඔහුගේ දූපුතුන් අධ්‍යාපනය ලබා රැකියාවන් ලැබ නාගරික පරිසරයන් හී පදිංචියට ගොස්ය. අද ඔහුත් - ඇඹණියත් නුවර කලාවියේ වෙල් යායක තනිවී නන්දා මාලණියගේ “ වේවැල් කැඩුන පුටුවේ වක ගසා ගෙන දූ දරුවන් කවදා ඒදැයි මග බලා ගෙන” සිටිනා තත්වයට පත්ව ඇත. මටත් එයම සිදුවනු ඇත. අතිතයත් වර්තමානයත් ගැට ගසිමින් මේ ජීවිතයේ අදෝනාව අපේ හමුවීමේ මාතෘකාව බවට පත්විය.
අපද ලෝක ස්වභාවයට මුහුණ දිය යුතුය. ම පියා අනේක විධ බාදා ගැටළු ජයගනිමින් අප රැගෙන ආ දුර මට සිහිපත් විය. ඔහු ලබා ගත් ජයග්‍රහණයන් අපේ උදාසීන ජීවිතවලට කවදාවත් ලබා ගත නොහැකිවිය. වර්තමානයේ අපද ජීවිතයේ උරුමයට මුහුණ දෙමින් පියා සිටිනා තැන සොයමින් පියමන් කරමින් සිටින්නෙමු.
කවදා ඔහු හමුවේදැයි අප නොදනිමු.

Wednesday, August 19, 2009

2009 දෙවන වාර විභාගයේ ප්‍රශ්න පත්‍රයට මීදුම ලියු උත්තර.

අධ්‍යෘපන ඇමතිගේ පරිපාලනය නම් කැද හැළියකි. සියල්ල කෙලවර වන්නේ ජනාධිපතිතුමා මැදිහත් වීමෙනි. එසේනම් ඇයිදෝ ඇමතියෙක්. අධ්‍යාපන විෂයය උදෙසා පාර්ලිමේන්තුවේ සහ පලාත් සභාවේත් ඇමතිවරු කී පොලක් සිටීද ?.
එක් අයෙක්ගේ තීරණ වලට වඩා කිහිප දෙනෙක් සාකච්චා කර යහපත් තීරණයන් වලට එලබීම තුල ඉතා යහපත්වු ක්‍රියා දාමයනට යා හැකි බව අපි නිකමට උපකල්පනයක යෙදෙමු. එම උපකල්පනයේ එල්බී නම් ඇමති වරු කන්ඩායමක නායකයා කැබිනට් ඇමතිවරයා වන්නේ නම් එය ඉතා හොදය. නමුත් මෙවැනි කන්ඩායමක එකමුතුවක් ලෙස වර්තමාන ඇමති ගොල්ලගේ ක්‍රීයාකාරකම් මීදුම දකින්නේ නැත. අධ්‍යාපන විෂයය ගැන සාකච්ඡා කිරීම මුලික අරමුණ වුවත් ඉන් පිට පැන සාකච්ඡා වන්නේ මේ සියල්ල ජාලගත ක්‍රී යා බැවින්ය.වර්තමානයේ කැබිනට් ඇමතිවරුන් හා අනෙක් පුංචි පුංචි ඇමතිවරු අතර එවැනි සම්බන්ධේයක් ඇතැයි විද්‍යා මාන නොවන බව ඉතාමත් පැහැදිලිය.මේ ඒකාධිපති ස්වරූපය සෑම කැබිනට් ඇමතිවරුන් තුලම ඇති බව වැඩ අවුල් කරගන නාගන්නා අයුරින් අපට සිතා ගත හැක.
පසුගිය දා පලාත් විභාග අවුලක් ගැන මාධ්‍ය සාකචඡා කලේය. මේ විභාග අවුල නිර්මානය කර ගත්තෝ විභාග ජාවාරමක් කරගැනීම හැර ගුණාත්මක බව ගැන නොසිතා කටයුතු කල ඇත්තෝමය. දැන් ජනාධිපති නියමයෙන් වාර විභාග පැවත්වීම ආපසු විදුහල්පති වරුන් ලගටම පැමිණ ඇත.
අපේ කාලයේ විෂයය උගන්වන ගුරුතුමා ප්‍රශ්න පත්‍රයක් හදා දීමෙන් එතුමා වාර විභාගය පවත්වා අපව ඇගයීමක් කලේය.වර්තමානයේත් එය සුදුසුද ?.ජාතික මට්ටමෙන් විෂයය නිර්දේශයක් ඇත. ජාතික මට්ටමෙන් එකම පාඨ ග්‍රන්ත මාලාවක් පරිහරණයට පත්ව ඇත.ජාතික මට්ටමෙන් ඉගැන්වීමේ වේගයක් තීරණය වී ඇත.අසවල් දවස වන විට අසවල් කොටස දක්වා විෂය නිර්දේශයට අනුව අදාල විෂයය ඉගැන්වී තිබිය යුතුය. ජාතික තලයේ විභාග පැවත්වෙන විට අදාල විෂය නිර්දේශය සම්පූර්න කර තිබුනේ නැත්නම් දරුවා අතරමගය.
එවන් රටාවකට සකස් වී ඇති ඉගැන්වීම වාර අවසානයේ ඇගයීම සදහා කලාප මට්ටමේ පොදු වාර විභාගයක් පැවත්වීම විෂයය උගන්වන ගුරුවරයාද ඇගයීමට මිනුම් දන්ඩක් කර ගත හැක.කලක් මුද්‍රණ ආයාතනයන් හවුල් කර ගත් ගුරුවරුන් ප්‍රශ්න පත්‍ර සකස් කර පාසල් වල විදුහල්පතිවරු හරහා වාර විභාග සදහා ප්‍රශ්න පත්‍ර අලවි කල යුගයක් විය. ඉන් පසුව පලාත් මට්ටමෙන් ප්‍රශ්න පත්‍ර සකස් කර වාර විභාග පැවත්වූවා මීදුමට මතකය. පසුගිය අවුරුද්දේ සිට කලාප කාර්යාලය මේ කටයුත්තට අත ගැසුවා විය හැක.

විදුහල්පතිවරයාට වාර විභාග පැවත්වීම පැවරීමෙන් සිදුවන්නේ යලිත් ජනාධිපතිවරයා සහ මීදුම පාසල් ගිය කාලයට අධ්‍යාපන ප්‍රමිතිය රැගෙන යාමය.නැත්නම් කොහේ හෝ මුද්‍රණාලයක සකස් කරන ප්‍රශ්න පත්‍රවලට දරුවන්ට උත්තර සැපයීමට සිදුවීමය.වර්තමානයේ ජාතික මට්ටමෙන් භාවිතා වන්නේ එකම පෙල පොත් කණ්ඩායමකි. ජනාධිපතිවරයාද මීදුමද පාසල් ගිය කාලයේ විවිධ කතෘවරුන්ගේ පෙල පොත් විවිධ පාසල් වල භාවිතා විය.පය බරවායට පිටි කර බෙහෙත් බදිනවා යයි කියමනක් අපේ බස් වහරේ තිබේ. මෙවැනි තීරණද ඒ ඝණයට අයිතිය.

අපි කල යුත්තේ කුමක්ද ?.මෙවර ප්‍රශ්න පත්‍ර සකස් කිරීමේදී ක්‍රියාකාරකම් තුල සිදුවු අඩු පාඩු හදුනා ගෙන නැවත ඒවා නොසිදුවන්නට ක්‍රියාකාරකම් යාවත්කාලීන කිරීමය. එසේ නොකර ආපස්සට යාම සිදු වන්නේනම් අධ්‍යාපනය ඉදිරියට නොයනු ඇත.
අධ්‍යාපන පරිපාලනය නිසි යාන්ත්‍රණයකට පත් කලහොත් මේ සියල්ල කල හැකි බව අධ්‍යාපන ඇමතිවරයාට නොසිතෙන් නේ අපේ කරුමයටය. එතුමාට ඒ සදහා සම්පත්ද තිබේ. පහලම අධ්‍යාපන පරිපාලන ඒකකය වන කලාප කාර්යාල., අධ්‍යාපන සංවර්ධණ, විෂයයභාර, සැලසුම් යන කී නොකී අධ්‍යක්‍ෂවරු ,සහ එක් එක් විෂයය සදහා ගුරු උපදේශක වරුන්ගෙන් සන්නද්ධ බල ඇණියක් ඇමති තුමාට තිබේ. එහෙත් මේ සම්පත් යොදා ගෙන නිවරදිව වාර විභායක් පැවත්වීමට නොහැකි නම් ඇමති තුමාගෙනුත් ඔල මොට්ටල නිලධාරීන් ගෙනුත් පලක් නැත.

විභාගයෙන් සමත්ව අධ්‍යාපන පරිපාලනයට ආ නවකයෝද මහ ඇමති වරු පරිපාලනය අඩු ලුහුඩු කම් සපුරාලීමට වැඩ බලන පදනමින් පත් කල ජෙයාෂ්ඨ ගුරුවරුද රැසක් අධ්‍යාපන පරිපාලනය තුල කලාප කාර්යාල වල සිටී. කිහිප පොලක් මීදුමටද සමහර අවස්ථාවල මුණ ගැසේ . මේ අතර සමහරු අධ්‍යක්‍ෂකකම ආභරණයක් කර ගත් ඔල මොට්ටල මෝඩයෝ වෙති. විභාග සමත්ව පැමිණියෝ අනෙක් අයගේ ජ්‍යොෂ්ඨත්වයද මායිම් නොකරති. මීදුම දිනෙක මේ නොසැලිකීම අගය කලේ “සීසර් නැත්නම් නෝමල්ද නෙවෙයි බලන්නේ - තමුන් කරන වැඩේ හරියට කරනවද වැරදියට කරනවද කියලයි අපි බලන්නෙ” යයි සදහන් කරමින් බව මතකය. විභාගයක් පවත්වා නිළධාරීන් බදවා ගත්තාට මොළ පරිපාලනයට එනවා යයි මතයක් ඇමති තුමාට තිබේ. එහෙත් විභාගවලට වඩා වෘත්තීය පලපුරුද්ද ඵලදායී බව මීදුම සිතයි.
අධ්‍යාපන පරිපාලනයේ සිටින මේ මිනිසුන්ට පලමුව “මේ මගේ රට” යන්න අවබෝධ කලයුතු වේ. අපි එදාවේල සොයාගන්නේ රටේ බදු ගෙවන ජනතාවගෙන් යැයි කියා දිය යුතුවේ. මෙවන් රට ගැන තමන්ගේ දූ දරුවන් ගැන නොසිතන සියල්ල දත් යන උද්දච්ඡ මානසිකත්වයෙන් යුතු පිරිස් හට පලමුව එමදැනුම බෙදා දිය යුතුවේ.දැනුම යනු උපාධි සහතිකය පමනක් නොවේ. තම වගකීම පිළිබද අවබෝධයද රට ගැන හැගීමද ලබා නැත්නම් ඒ සහතිකවලට වටිනාකමක් නැත. මගේ දේශපාලන පක්ෂ ය මගේ ආගම වැනි මමත්ව කල්පනා මේ මෝඩ මොළවල තැන්පත්ව තිබේ. ඒවා වලින් මේ නිලධාරි මොළ පිරිසිදු කල යුතුවේ.

මේ වාර විභාග ප්‍රශ්නපත්‍ර අවුලට හේතු කාරක වූවෝ යම් සංවිධානත්මක අරමුණක කටයුතු කල බව මීදුම උපකල්පනය කරයි.මීදුම ඇසුරු කරන රාජපක්‍ෂ නොවන මාධ්‍ය මිතුරෙකු වාර විභාග පැවත්වූ වකවානුවේ හමුවන සෑම ගුරුවරයාගෙන්ම විමසනු ලැබුයේ “කොහොමද අද ප්‍රශ්න පත්‍රය “ යන්නයි. ඔහුගෙන් “මම මොකද මේ වලිප්පුව ” යන්න විමසුවෙමි. “මේ දවස්වල ඌවේ චන්දේ” යන්න ඔහුගේ පිළිතුරයි.වෙනත් වාර වලද සුළු සුළු අඩුපාඩු වාර විභාග ප්‍රශ්න පත්‍ර වල තිබුනත් ඒවා ජාතික මට්ටමේ අවුලක් ලෙස සාකච්ඡා නොවිනි.හේතුව වුයේ එකල මාධ්‍යයට උතුරේ සහ නැගණහිර යුද්ධයක් තිබිණි. දැන් ඒ තුවාලය නොමැති නිසා “අල්පෙනිත්තක් වැටුනත් රටටම ඇසෙන සේ ” හෙඩ් ලයින් වැටේ.

මේවා හැම අර්බූදයක්ම පස්සට දාන, ජනාධිපතිවරයා ලගට යනකම්ම බලා සිටින කැබිනට් ඇමතිවරයෙකුට නිදහසට කාරනා නම් නොවේ.කෝකටත් තෛලයවු ජනාධිපති තුමාත් උතුරේ ගැටළුවට කණ්ඩායමක් ලෙස කටයුතු කල ගෝඨාභය ඇතුළු ත්‍රිවිධ හමුදාවත්, හැම දේටම විසදුම් සොයන බැසිල් රාජපක්‍ෂත් හීන් සීරුවේ වැඩ කරන චමල් රාජපක්‍ෂත් හැරෙන්නට ඉන්නේ ලක්ෂ 35හේ බ’ර්ත්ඩේ පාර්ටි කාරයෝ නම් අපිට දෙවියෝ හැර වෙන කාගේ පිහිටක්ද ?.